Catch him .. Part 28

Catch him .. Part 28

كانت لولو واقفة فى مكان غريب مش عارفة هى فين .. سمعت صوت حد بينادى عليها فضلت ماشية ناحية الصوت لاحد ما لاقت هيوك واقف وبيبتسملها ومادد ايده ليها .. ابتسمت لولو لانها شافت هيوك وراحت جرى تمسك ايده .. وقفت قدامه وفضلو باصين فى عيون بعض شوية
هيوك : كويس انك جيتى
لولو : احنا فين ؟
هيوك : مش مهم احنا فين .. المهم اننا مع بعض .. ومسك ايدها جامد وبداو يمشو
كانت لولو بتعدى وتشوف اماكن غريبة عنها والفضول ماليها عشان تعرف ايه المكان ده بس فكرة انها مع هيوك كان بيخليها متهتمش باى حاجة تانية
هيوك بابتسامه : لسه قدمنا طريق طويل عشان نقدر نوصل
بصت لولو على هيوك وابتسمت وقبل ما ترد لاحظت التحول فى ملامح هيوك ووقف مكانه بيبص على حاجة .. بصت لولو على اللى هيوك بيبص عليها واتسبب فى تغير ملامحه بالطريقه دى

لاقت دونى واقف قدام واحد مش باين شكله ليها قوى والاتنين موجهين مسدساتهم فى وش بعض
هيوك : هيونج ايه اللى بيحصل ؟
بصت لولو لهيوك بصدمة لانه عارف الشخص ده مين .. وسابها وراح وقف جنبه .. طلعها من صدمتها صوت دونى
دونى : لولو .. تعالى هنا
راحت لولو وقف جنب دونى وعينها على هيوك اللى بصلها وسكت
لولو موجهه كلامها لهيوك : مين الشخص ده ؟ .. تعرفه منين ؟ .. وايه اللى موقفك جنبه ؟
هيوك : ده اخويا اللى قولتلك عنه
بصت لولو على اخوه اللى عينه لمعت وابتسم بشر : كويس انكو اتجمعتو مع بعض
وضغط على زناد المسدس بتاعه

فتحت لولو عينها بسرعة لاقت نفسها فى بيتها ونايمة على سريرها والدنيا ضلمة .. غمضت عينها واتنهدت ومدت ايدها على الكومودينو مسكت فونها عشان تبص على الساعة لاقتها 2.45 بالليل .. سابت التليفون ولفت وشها الناحية التانية وغمضت عينها وهى بتتمنى تخلص من الاحلام دى اللى بقت بتجيلها كل يوم من ساعه من سابت هيوك وعرفت الحقيقة .. وعلى الرغم من كده كانت بتحلم بهيوك تقريبا كل يوم .. وكل يوم يزيد شوقها ليه وفى نفس الوقت يزيد وجعها منه .. غمضت لولو عينها وراحت تانى فى النوم

تانى يوم الصبح قرر هيوك انه يبدا خطوته التانية مع مينى .. راح كيونا على الشركة ونزل هيوك الحديقة لاقى مينى قاعد على طرابيزة صغيره وحواليها اربع كراسى وبيشرب الشاى وبياكل كيك راح هيوك وقعد معاه
هيوك وهو بياكل الكيك بتاع مينى : امممممم لذيذ اوى
ابتسم مينى : الف هنا عليك .. استنى هخلى حد يجيبلك العصير بتاعك وكيك تانى
هز هيوك راسه : لا مش مهم انا هاكل ده وخلاص .. وبعدين بص لمينى : ولا انت عايز تاكله لوحدك
مد مينى الطبق لهيوك : كل الكيك كله لو عايز
بعد ما اكل هيوك الكيك كله ومينى شرب الشاى واكل قطعتين بس من الكيك
هيوك : انا عايز اطلب منك طلب

ركز مينى قوى مع هيوك مستنى طلبه لان دى اول مرة هيوك يتكلم مع مينى بمزاجه من وقت ما رجع وكمان يطلب منه حاجة فكان متشوق يعرف هيوك هيقوله ايه
هيوك : عايز اروح ازور قبر اوما وابا وسورا .. وعايزك تيجى معايا وكيونا يحصلنا على هناك
سكت مينى شوية وفضل باصص على هيوك اللى كان بيتمنى ان مينى يوافق وبيفكر هو ليه مردش على طول وبيفكر فى ايه .. ولو مينى رفض هو هيلح عليه ويطلب منه تانى ولا ميقلوش تانى ويروح هو لوحده .. قاطع كل تفكيره ابتسامه مينى
مينى بابتسامه : انا كمان بقالى فترة مرحتش ازورهم .. كلم كيونا وقوله عقبال ما نجهز نفسنا
ابتسم هيوك وهز راسه وسابه وقام بس اول ما قام اتنهد بارتياح وكلم كيونا وعرفه ان خطتهم ماشى تمام لحد وقتى وانه يقابلهم هناك

بعد ربع ساعة كان مينى وهيوك جاهزين .. هيوك لابس بنطلون اسود وتيشيرت بكم ابيض وعليه جاكت اسود
ومينى كان لابس بدلة سودا وقميص ابيض ركبو عربيه مينى وهيوك هو اللى كان سايق .. وهما فى الطريق اشترو ورد وراحو للمكان المطلوب
وقف مينى وهيوك قدام قبر ابوهم وامهم واختهم بحيث يكون قبر امهم فى الوسط بين ابوهم وسورا بعد ما حطو الورد عليهم

هيوك بصوت واطى : وحشتونى قوى .. انا بقالى كتير مزورتكوش بس كان غصب عنى .. عارف انى قصرت فى حقكو .. بس انتو اكيد هتسامحونى
ونزل على ركبته قدام قبر امه وبدا الدموع تتجمع فى عينه وصوته يترعش : اومااا .. وحشتينى قوى .. وحشنى حضنك الدافى .. وحشنى صوتك .. ابتسامتك الرقيقة .. حنانك .. خوفك وقلقك عليا .. وحبك ليا .. وانك دايما كنتى معايا فى كل حاجة ومشجعانى دايما .. نفسى فى الوقت ده اترمى فى حضنك اللى بنسى فيه كل همومى واحس بايدك وروحك حواليا .. وانتى بتقوليلى كل حاجة هتبقى كويسة .. وجودك لوحده جنبى كان بيخلينى احس بالراحة
وبعدين بص ناحية قبر ابوه واتكلم بنفس نبرة الصوت : ابااا .. انت كمان وحشتنى .. وحشنى الاحساس بالامان معاك .. اكيد لو كنت موجود كانت حاجات كتيرة اتغيرت .. بالرغم من وجود هيونغ وانه حاول يملى الفراغ بعدكو بس …… وسكت
وبعدين بص الناحية التانية ناحية قبر سورا : سورا .. كان نفسى ابقى جنبك كان ممكن اقدر انقذك ومكنتيش هتبقى لوحدك..  بس لازم تعرفى ان مينى اخد حقك
وبعدين نزل راسه .. انا عارف انكو مش راضيين عن الوضع اللى احنا بقينا فيه وقتى .. وانا بتمنى اننا نرجع عائلة من تانى .. بس ده مش هيحصل غير فى حاله واحدة .. لو هيونغ بطل كل اللى بيعمله ده ويرجع مينى الطيب الكويس المحترم ويبعد عن كل اللى هو فيه وقتى .. انا مش راضى عن اللى بيعمله زى مانتو اكيد مش راضيين .. هو فاكر كده انه يبحمينى وبيحسسنى بالامان بس هو غلطان انا الامان ضاع منى
وبعدين وجهه كلامه لمينى وهو لسه منزل راسه وبيتكلم بنفس نبرته والدموع بتنزل منه : هيونغ انت كمان وحشتنى .. وحشنى حضنك .. وحشنى مينى اخويا وابويا وصاحبى ومثلى الاعلى 

فجاه حس بمينى قومه وحضنه جامد .. كل الوقت ده كان مينى واقف ساكت بيبص على هيوك وكلامه مع اهله واتاثر بيه جدا ولما اتكلم عنه حس بوجع الضمير وانه سبب فى عذاب هيوك
مينى وهو بيحضن هيوك جامد اللى بيعيط وشد على حضنه : اوعدك هيوكى انى هرجع هيونغ اللى بتحبه وبتفتخر بيه .. هبطل كل حاجة .. وبعدين بص بعينه لقبر ابوة وامه وسورا .. انا اسف ودموعه بتنزل منه

فى الوقت ده وصل كيونا وسمع كل الكلام اللى حصل وشاف رد فعل مينى وابتسم على نجاح خطته .. وقال فى نفسه : اخيرا مينى القديم هيرجع تانى

بعد مرور كام يوم كان هيوك متفق مع كيونا انهم يخرجو يغيرو جو فى اليوم ده هيوك مرحش الشركة وخرج اخر النهار من القصر يتمشى بعربيته وبعدها يعدى على كيونا فى الشركة ويخرجو .. وقف هيوك قدام كافيه ونزل من عربيته ودخل يشرب حاجة قبل ما يروح لكيونا بس المفاجاه اللى شافها بعد ما دخل انه لاقى لولو قاعده على طرابيزه و ماسكه كوبايه العصير في ايدها و بتشرب منها و هي باصه علي الطرابيزه وسرحانة .. وقف هيوك مكانه محتار مش عارف يعمل ايه .. يروح يكلمها ولا يسيبها .. بس كان كل اللى عارفة انه مش قادر يشيل عينه من عليها .. كانت وحشاه قوى .. وكل يوم كان بيتمنى يشوفها ويتكلم معاها .. نفسه ياخدها في حضنه ..كل حاجة فيها كانت وحشاه .. ضحكتها .. شقاوتها .. جنانها .. هزارها معاه .. كان دايما بيتمني انه يجي اليوم اللي تقدر تسامحه فيه وتصدقه
وفى النهاية قرر انه يحاول يكلمها تانى حتى لو مصدقتهوش .. بس هيكون اتكلم معاها وقدر يشوف ملامحها من قريب

راح هيوك وقف قدامها وهى مكنتش واخده بالها خالص لانها كانت سرحانه فى عالم تانى لحد ما سمعت صوته
هيوك بصوت هادى وتردد : لولو
رفعت لولو وشها وبصت لهيوك كانت مشاعر كتيره اوى بتدور جواها .. مكنتش مصدقة انها فعلا شايفه هيوك قدامها لانها كانت لسه بتفكر فيه .. هل هو ده هيوك فعلا ولا هى بدات تتخيله قدامها من كتر ماهى بتفكر فيه .. اول ما شافته حست قد ايه هو واحشها .. كان نفسها تقوم وترمى نفسها فى حضنه ومتسيبهوش ابدا وتطلب منه انه ميبعدش عنها تانى .. بس فى نفس الوقت مقدرتش تعمل اى حاجة كان فى صراع جواها بين قلبها وعقلها اللى مش عارف يصدق ايه هل فعلا هيوك كدب عليها واستغلها .. ولا هو صادق فى كلامه وملوش اى ذنب .. فضلو كل واحد فيهم باصص للتانى من غير اى كلمة لحد ما استوعبت لولو الموقف .. واخيرا عقلها قدر ينتصر على قلبها .. نزلت لولو عينها من على هيوك اللى واقف قدامها وقامت عشان تمشى من غير ما تقول اى حاجة بس هيوك مسك ايدها بسرعه وهي مبصتش ناحيته
هيوك : ممكن تسمعيني
ملاقاش اي اجابه من لولو فكمل كلامه : اسمعيني مش هتخسري حاجه وبعدها ابقي امشى مش هطول في الكلام
بصت لولو ناحيته بس من غير ما تبص فى عينه او وشه لانها مش واثقة من نفسها .. خايفة انها لو بصتله تانى وهو واقف قدامها بالقرب ده هتستسلم وتحنله .. قعدت لولو علي الكرسي وبصت على جنب  وهو قعد علي الكرسي اللي قدامها
هيوك بصدق : وحشتيني
لولو غمضت عينها اول ما سمعت الكلمة واتنهدت : ادخل في الموضوع هيوك ” في نفسها كانت بتقوله : انت كمان وحشني قوي “
هيوك : انتي عامله ايه
لولو : كويسه  ” وفى نفسها : ضايعه  “
هيوك : لولو بصيلي
اترددت لولو فى قرراها بس المرة دى عينها خانتها وبصت
هيوك : موحشتكيش
لفت لولو عينها بسرعة بعيد عنه لانها خايفة تفضحها وتكشفها : لا
هيوك : انتي ليه بتداري اللي جواكي لسانك بيقول حاجه بس عينك بتقول عكسها
لولو : انت غلطان انا بقول اللي حاسه بيه
هيوك : اتمني تصدقي كلامي اللي قولته قبل كده
لولو بدا صوتها يتهز : مش قادره اصدقك
مد هيوك ايده ومسك ايدها : اسالي قلبك وهو هيقولك صدقيه
فى اللحظة دى حست لولو انها بتنهار جواها من لسمة هيوك ليها كان نفسها تمسك ايده بشكل اقوى وتحضنه وتبدا تعيط وتعبرله عن كل اللى جواها بس مكنتش تقدر تعمل كده .. شدت لولو ايدها من ايد هيوك بقوه وسابته و مشيت وفعلا بدات دموعها تنزل من عينها

وقتها قام هيوك وقف وبص عليها و هي ماشيه لحد ما اختفت من قدامه .. كان بيتمني انه يجري وراها .. يمسكها و ميخليهاش تمشي بس هو متاكد انها بتتالم فافضل انه يسيبها وميزودش المها وبعد فترة خرج من الكافيه فى طريقه لكيونا

وصلت لولو لبيتها ودخلت اوضتها وقعدت علي السرير وابتدت تفكر في اللي حصل .. وكلامها مع هيوك ولمسه ايده .. ونبض قلبها اللي زاد من وقت ما شافته حطت ايدها علي قلبها بتحاول تهدي ضرباته .. فى الوقت ده كانت لولو بالفعل استسلمت لقلبها لان هيوك فعلا وحشها قوى ومش قادرة تتظاهر بالقوة اكتر من كده .. مسكت تليفونها وهي متردده تتصل بهيوك ولا لاء و فى الاخر اتصلت بيه فعلا .. بس قبل ما يفتح قفلت المكالمه مكانتش عارفه هتقوله ايه .. وهتتعامل معاه ازاى .. ودونى هتقوله ايه ؟ قبل ما تكمل تفكير رن تليفونها بصت على الاسم لاقته هيوك .. بمجرد ما شافت الاسم قلبها دق جامد وردت بسرعة بس مقدرتش تقول حاجة

هيوك : لولو ؟ انا مكنتش مصدق نفسي لما شفت اسمك… انتي بجد اتصلتي بيا
ملاقاش اي رد من لولو
هيوك بقلق : لولو
لولو : هممم
حس هيوك بالارتياح لانه قلق عليها لما مردتش وجت فى دماغه افكار مش حلوة ان حصلها حاجة وحد تانى هو اللى اتصل بيه من تليفونها
هيوك : الحمد لله انك رديتى انا قلقت عليكى
سكتت لولو تانى ومتكلمتش
هيوك بصوت هادى : وحشتينى
لولو بتردد : وانت كمان
هيوك بصدمه ممزوجه بفرحه : بجد !!! يعني صدقتيني وسامحتيني
لولو اتنهدت : انا مش عارفه بجد .. مش عارفه انا بعمل ايه ؟ بس كل اللي حاسة بيه انه مش قادرة ابعد عنك اكتر من كده .. حاسة اني عايزه اشوفك و اسمع صوتك و نرجع تاني زي الاول .. عايزه اصدقك… نفسي اصدقك عقلي بيقولي حاجه و قلبي بيقولي حاجه تانيه
هيوك بسرعة : صدقينى انا .. انا بجد مكدبتش عليكى ولا خدعتك .. واسف على كل لحظة اتالمتى فيها بسببى .. وياريت تدينى فرصة اعوضك عن كل اللى فات
لولو : هيوك انا خايفة ومش عارفة حكايتنا هتخلص على ايه ولا هيحصل فيها ايه ؟
هيوك : حكايتنا مش هتخلص هتفضل مستمرة .. دى مجرد ازمة بنمر بيها وهتتحل
لولو : انا مش عارفة اقولك ايه ؟
هيوك : لولو صدقينى انا عمرى ما هجرحك تانى وزى ما قولتلك قبل كده انا هحميكى بحياتى .. واعترافى ليكى بالحقيقة ورجوعى لمينى تانى كان عشان حمايتك
لولو : بتحمينى من ايه ؟ .. وازاى ؟
هيوك : كل ده مش مهم دلوقتى اكيد هتعرفيه وهقولك عليه بس المهم فى اللحظة دى هو احنا وبس
اتنهدت لولو ومعرفتش ترد عليه تقوله ايه لان هى نفسها متلغبطة : عموما انا لازم اقفل دلوقتى وهنشوف ايه اللى هيحصل معانا
هيوك : ماشى .. بس ياريت تصدقى كل اللى بقولك عليه وتدينا فرصة تانية

قفلت لولو بس كانت دماغها هتنفجر من التفكير مش عارفة اللى بتعمله ده صح ولا غلط .. بس فى نفس الوقت كان قلبها فرحان وبيدق بسرعة من مجرد احساس انها شافت هيوك وسمعت صوته واتكلمو ورجعو لبعض تانى

اما بالنسبة لهيوك كان طاير من السعادة .. لان امنيته اللى كان بيتمناها اتحققت .. اينعم متحققتش كلها لان لولو خايفة ومترددة بس اللى حصل النهاردة خلى عنده امل كبير .. وصل هيوك لكيونا فى الشركة وكانت السعادة مرسومة على وشه وطبعا لاحظها كيونا
كيونا بابتسامه : خير .. ايه اللى مفرحك قوى كده ؟

حكى هيوك كل اللى حصل معاه وكلامه مع لولو وطبعا كيونا اتبسط
كيونا : الحمد لله كده المشاكل بدات تتحل واحدة واحدة .. مينى قرر انه يتغير .. ولولو رجعتلك .. يارب الفرحة والسعادة دى تكمل على خير
هيوك بارتياح : انا اسعد انسان دلوقتى اهم حاجتين فى حياتى خايف منهم او عليهم اتغيرو
مسكه كيونا من كتفه وابتسم بخباثه : بمناسبة الاخبار الحلوة دى وانك فرحان يبقى النهاردة العزومة والخروجه كلها على حسابك
نزل هيوك ايد كيونا وردله الابتسامة الخبيثة : طب ما تكمل انت كمان فرحتى وتحاسب انت النهاردة
كيونا خبطه على كتفه : ارسو هعديهالك المرة دى عشان متقولش انى حارمك من حاجة .. يالا بينا
وخرج كيونا وهيوك واتبسطو وهيوك كان بيتعمد انه يغرم كيونا فلوس كتييييييييييييييير

عدى يومين بالوضع ده كان لولو وهيوك بيتكلمو فى التليفون كتير وبدات لولو حالتها تتغير تانى للاحسن بس كانت كل ما تفكر فى دونى او شغلها او اخو هيوك .. تتضايق وتتحير وترجع للغبطة تانى وهى مش عارفة ايه اللى هيحصل بعد كده .. وفى النهاية كانت بتقرر دايما انها متفكرش وتعيش اللحظة وتستمتع بيها

وفى يوم راح شيون لقصر مينى بعد رجوعه من السفر .. كان فى الصين لمدة 5 ايام بيظبط فيها كل حاجة ويشوف الامور ويجمع معلومات عن شخص عايز يتمم صفقة معاهم .. رجع بعد ما خلص كل ده .. واول ما وصل القصر دخل مكتب مينى واستناه لحد ما نزله من اوضته ودخل لشيون المكتب .. اول ما شيون شافه ابتسم وقام وقف وعلى وشه كانت باينه معالم الرضا
دخل مينى وقعد على الكرسى بتاعه : حمد الله على السلامة
قعد شيون قدامه : الله يسلمك .. انا لسه راجع .. جاى من المطار على هنا عشان اقولك الاخبار الحلوة .. انا جمعت كل المعلومات اللى عايزها والملف ده فيه كل حاجة .. نقدر نعمل الصفقة دى فى اقرب وقت .. هتبقى اكبر صفقة نعملها

سكت شيون ولسه الابتسامه على وشه وفضل باصص لمينى مستنى منه اى كلام او اى رده فعل بس اللى حصل كان اخر حاجة ممكن شيون يتوقعها
اخد مينى الملف من شيون وحطه بهدوء قدامه ورجع بص لشيون : احنا مش هنعمل الصفقة دى
استعجب شيون من كلام مينى لانها بالفعل صفقة كبيرة ومهمة جدا : ليه ؟
مينى بنفس الهدوء : احنا مش هنعمل الصفقة دى او غيرها
بص شيون باستغراب و انمحت الابتسامه من علي وشه : يعني ايه ؟
ميني بجدية : انا قررت اني ابطل الشغل اللي بنعمله ده و اركز علي الشركه و بس
اتصدم شيون من كلام مينى وفتح عينه على وسعها : تبطل شغل ؟ ليه ؟
مينى : ده قرارى اخدته ومش هرجع فيه
شيون : طيب ايه السبب ؟
مينى : من غير اسباب .. كده احسن احنا مبقناش محتاجين اى حاجة .. ايه اللى يخلينا نستمر فى الاعمال دى
اتعصب شيون من كلام مينى وعدم اهتمامه برايه وكلامه وقام وقف : اكيد هيوك هو السبب .. انا ملاحظ تغير عليك بعد ما رجع البيت بس مكنتش اعتقد انها هتوصل لكده .. انك هتضيع شغل سنين بالسهولة دى .. طب وانا هيكون وضعي ايه ؟
بص ميني لشيون بنظرات لو كانت حقيقية كانت قطعت شيون حتت وقام وقف قدامه وقرب منه واتكلم بحزم : هيوك ملهوش علاقه بالموضوع انا اللي قررت .. وبالنسبالك هتفضل في الشركه معايا انا مش هضحي بيك بس فى نفس الوقت مش هسمحلك تناقشنى فى قراراتى او تجيب سيرة هيوك .. الغي صفقاتنا مع اي حد باي ثمن

نظرات شيون فى الوقت ده كان فيها 100 معني من حقد و غل و كره و كانت نظرات حاده علي غير العاده .. بس فى نفس الوقت علي قد مكانته وانه دراع ميني اليمين بس مكانش يقدر يتطاول لا بالنظر او بالكلام معاه … وبالرغم من النظرات اللى كانت فى عين شيون الا انها مكانتش كافيه انها تبين البركان اللي جواه بركان عايز ينفجر و ياخد اي حاجه تقف قدامه .. نزل شيون عينه عشان ميشوفش مينى وعشان مينى مياخدش باله من نظراته
عدل شيون بدلته وبعدها اتكلم : اذا كان ده قرارك فاسمح لي انا كمان ليا قرار و هنفذه
ميني : اللي هو ايه ؟
اتحكم شيون فى نظراته وصوته وتعابيره واتكلم بطبيعيه : اكيد هتعرفه بس كل حاجه في وقتها .. وبعدها خرج شيون

----------------- 

BY

D&E

Lolo Adel  

Emy Tarek