Catch him .. Part30 .. The End

Catch him .. Part30 .. The End

صرخت لولو ومحستش بنفسها الا وهى سايبه دونى ورايحه بسرعة لهيوك اللي كان باصص علي ميني اللى كانت عينه مغمضه وبيحاول انه يمسكه بايده و يتكلم : ميني … هيونج
مسكته لولو وسندت راسه علي ايدها و حطت ايدها التانيه مكان الرصاصه وهي بتعيط
لولو والدموع بتنزل من عينها وبصوت مهزوز : هيوك متسبنيش
بصلها هيوك وحاول يمد ايده لوشها بس ملحقش لان ايده وقعت قبل ما توصلها و غمض عينه
لولو صرخت : هيوووووووووووووووووك .. وفضلت تعيط بشكل اقوى

راحت ايمى وقفت جنب دونى وهى حاطه ايدها على وشها وبتعيط .. حط دونى  ايده على كتفها واخدها فى حضنه وهو باصص على لولو وهيوك .. وراح تشولا بسرعة ناحيتهم وطلع تليفونه وطلب الاسعاف وهو بيتفحص مينى وهيوك وبعدها حط ايده على صدر هيوك وشال ايد لولو من عليه

قرب دونى من لولو وخلع الجاكت بتاعه وحطه عليها عشان هدومها المقطعة وحاول يقومها بس هى رفضت تسيب هيوك وفضلت ماسكه فيه وهى بتعيط .. فى النهاية وقف دونى جنبها وهو حاطط ايده عليها وايده التاية ماسك بيها ايمى اللى عمال تعيط هى كمان

لحد ما وصلت الاسعاف واخدت هيوك ومينى وشيون كان هيوك فى عربية ومينى وشيون فى عربية تانية
حاولت لولو انها تركب مع هيوك بس دونى رفض وفضل ماسكها لحد الاسعاف ما مشيت
راح تشولا وقف قدام لولو : احنا لازم نروح نعمل المحضر .. انتى ظابط وعارفة
بصتله لولو من غير ما تتكلم كانت بتعيط وبس
مسكها تشولا من كتفها وبصوت واطى : بعدها انا بنفسى هاخدك للمستشفى عنده
هزت لولو راسها .. وركبو كلهم عربية دونى .. كان دونى بيسوق وجنبه تشولا .. وورا لولو وايمى جنبها حضناها .. وبعد فترة وصلو للقسم وتم التحقيق فى الواقعة .. وبعد انتهاء التحقيق فعلا اخد تشولا لولو بعد مجادلة مع دونى للمستشفى .. ولان دونى رفض انهم يروحو لوحدهم راح معاهم ومعاه ايمى

وصلو للمستشفى لاقو كيونا اللى جاله اتصال من تشولا عرفه اللى حصل كله قاعد قدام العمليات والقلق واضح عليه
وقفت لولو قدام كيونا : خرج ولا لسه ؟ حصل ايه ؟
كيونا اتنهد : لسه فى العمليات .. ومش عارف ايه اللى بيحصل
بعد فتره خرج الدكتور راح الكل عليه بسرعه
كيونا بقلق : ها يا دكتور طمنا
الدكتور : العمليه نجحت بس ….
كيونا بقلق اكبر : بس ايه يا دكتور ؟
الدكتور : بس للاسف المريض دخل فى غيبوبه .. هو فقد دم كتير علي ما وصل لهنا و ده اثر عليه
تشولا : طيب هو هيفوق امتي من الغيبوبه دي ؟
الدكتور : دي حاجه مقدرش احددها .. متوقفه علي المريض نفسه .. احنا نقلناه لغرفة خاصه
.. وبعدها مشي الدكتور

اتصدم كيونا من الخبر اللي سمعه وفتح عينه من غير ما يتكلم … ولولو انهارت وقعدت على الارض وفضلت تعيط وايمي عماله تهدى فيها .. وتشولا غمض عينه بضيقه واتنهد .. ودونى كانت جواه مشاعر مختلطة بالرغم انه مش فارق عنده هيوك كتير .. بس اتضايق عشانه .. راح دونى وقوم لولو من على الارض واخدها فى حضنه لانه صعبان عليه منظرها والوضع اللى هى فيه
بعد فترة من وجودهم فى المستشفى قدام اوضه هيوك انتهت مواعيد الزيارة وكان لازم انهم يمشو
تشولا : مواعيد الزيارة انتهت ولازم نمشى .. ونيجى بعدين
لولو بصوت مبحوح من كتر العياط : لا انا مش همشي انا هفضل قاعده معاه
اتنفس دونى بقوة لانه مش راضى عن تصرفات لولو واتكلم بحده : لولو .. لازم تمشي .. القعدة دى ملهاش لازمة
بصتله لولو من غير ما تتكلم .. حطت ايمى ايدها على كتفها : لولو خلينا نمشى وبكرة نبقى نيجى لان مينفعش اننا نفضل هنا

قامت لولو معاهم مشو ومبقاش فاضل غير كيونا اللى دخل لهيوك و قعد علي كرسي جنب السرير
ابتدي كيونا يعيط واتكلم : هيوك انا عايزك تكون اقوي من كده و متستسلمش .. علشان خاطري وعلشان خاطر اللي بيحبوك .. مش كفايه عليا صدمت ميني .. بلاش علشان خاطري علشان خاطر لولو انت مشفتش شكلها كان ازاى
فضل كيونا قاعد جنب هيوك لحد ما غلبه النوم

تاني يوم راحت لولو لهيوك بعد خناقه مع دوني اللي كان رافض انها تروحله .. واستمر الوضع بالطريقة دى اسبوعين لازم يحصل بينهم كل يوم خناقة .. لحد ما قررت ايمى انها لازم تلاقى حل للموضوع ده .. كلمت هيمى فى التليفون عشان تفكر معاها فى حل للموضوع ده
ايمى : انتى فين يابنتى عيزاكى فى موضوع مهم ؟
هيمى : انا مع تشولا .. خير فى ايه .. قلقيتنى ؟
ايمى استغلت الفرصة : طيب افتحى المايك هاخد رايكو انتو الاتنين فى حاجة
فتحت هيمى المايك فعلا : اتكلمى انتى على الهواء
ايمى : عايزة اتكلم معاكو فى موضوع لولو ودونى .. انا تعبت منهم .. كل يوم خناقة عشان يسيبها تروح لهيوك فى المستشفى
تشولا : هو لسه راكب دماغه معاها
ايمى : انا بجد مبقتش عارفة اعمل ايه .. ياريت تساعدونى
تشولا : خلاص احنا جاين دلوقتى وانا هتكلم معاه
ايمى : انا مستنياكو

قفلو مع بعض وبعد نص ساعة وصلت هيمى وتشولا لبيت دونى .. وقعدو كلهم مع بعض .. دونى قاعد على كنبه وجنبه ايمى .. وقدامهم تشولا وهيمى كل واحد فيهم على كرسى
دوني بشك : انا حاسس ان الزيارة دى وراها سبب
تشولا بسخرية : عرفت منين ؟ بقيت بتقرا الطالع .. وتوشوش الودع
دوني : لا .. بس انا عارفك من زمان  ..يعني اكيد هعرف افرق
بص تشولا لايمي : ابتدي انتي
ايمي اخدت نفس وبصت لدوني : دوني ده موضوع مهم فياريت تركز معايا
اتعدل دوني في قعدته بحيث ان يكون جسمه موجه لايمي
ايمي : الموضوع يخص لولو و هيوك
اتغيرت تعابير وش دوني : لو هتتكلمو فى الموضوع ده .. انا مش عايز اتكلم فيه
هيمى : مش عايز تتكلم فيه ليه ؟ .. احنا عايزين نعرف ايه سبب رفضك انها تروحله ؟
حس دونى بالضيقة لانه لازم كل يوم يجادل مع لولو فى موضوع هيوك ودلوقتى بقى مضطر كمان يجادل مع ايمى وهيمى : انتو مش عارفين ايه السبب اللى مخلينى رافض
ايمى : طب ما تفهمنا على الاقل نبطل نتكلم معاك ونحاول نقنع لولو بكلامك
دونى بعصبية : سبب رفضي انه خدعنا كلنا .. ضحك علينا و طلع اخو زعيم عصابه كبير .. ضحك علي لولو وخلاها تحبه وتدخله بينا من غير ما نعرف عنه اي حاجه ووثقنا فيه .. واتسبب فى جرح لولو .. والسبب الاخير اللي مش هنساه ابدا هو موضوع خطفك انتي ولولو و كان ممكن تضيعو مني

اتفاجئت ايمى وهيمى من الكلام اللى دونى قاله لانهم اول مرة يسمعو كل ده على عكس تشولا اللى كان قاعد ساكت وهادى بيسمع كل كلام دونى وقرر انه يرد عليه
تشولا بهدوء : اظن انى عارف كل الكلام ده ومش هتفاجئ زى الاتنين دول .. بس انا مش معاك فى رايك
دونى باستغراب : انت اللى بتقول كده ؟
تشولا هز راسه : انت متعرفش كل حاجة انت كمان .. انا اتكلمت مع هيوك بعد ما عرفت الحقيقة منك .. واتاكدت فعلا انه مكانش ليه اى علاقة باعمال اخوه وانه كان بيقول الحقيقة
دونى : لو كان زى ما بتقول كده .. اومال ايه اللى خلاه يرجعله ويظهر حقيقته ؟
تشولا : هيوك كان مضطر يعمل كده .. لان اخوه قاله انه هيبطل ياذى اى حد لو رجعله .. ولانه كان خايف على لولو وعلينا كلنا قرر انه ينفذ طلبه .. ولو كنت سمعت كل التسجيلات اللى سجلناها من قصره كنت فهمت قصدى .. كمان متنساش انه حاول يساعدنا قبل كده .. والاهم من ده كله واللى لازم تفضل فاكرة طول عمرك انه ساعدنا نقدر نوصل لايمى ولولو فى الوقت المناسب قبل ما كان يحصلهم حاجة .. ولو كان فعلا انسان وحش او بيساعد اخوه فهو مكنش مجبر انه يجى معانا ويتعرض للخطر
ملاقاش دونى حاجة يقدر يجادل بيها قدام تشولا بس قرر انه يغير الكلام : بس بردو متنساش اللى اخوه كان بيعمله
تشولا : انا مش ناسى .. بس احب اعرفك حاجة متعرفهاش بما انى اللى كنت بسمع التسجيلات .. اخوه وقف كل اعماله وقرر انه ميعملش اى حاجة تانية ويبدا حياته من الاول .. واعتقد هو ده السبب فى خطف لولو وايمى لان شيون معجبوش قرار سونغمين .. وفعلا لما سمعت الكلام اللى دار بينهم اخر مرة كنت حاسس ان الموضوع مش هيعدى بسهولة .. وفى النهاية سونغمين مات وهو بيحاول يحمى اخوه من شيون واحنا مقدرناش نمسك عليه اى حاجة والقضايا كلها اتقفلت

سكت دونى وهو بيقلب كل الكلام فى دماغه مبقاش لاقى اى حاجة يقدر يقولها او يرد بيها على تشولا اللى دايما بينتصر فى كلامه لانه مش بيقول حاجة غير لما يكون متاكد منها بحيث ان محدش يقدر يجادلة فيها وليه طريقة يقدر يقنع بيها اى حد يتكلم معاه

فى الوقت ده كله كانت ايمى وهيمى ساكتين بيسمعو كل الكلام اللى بيدور بين دونى وتشولا وهما بنفسهم اقتنعو بكلام تشولا
تشولا : انا عارف انك بتحب لولو وخايف عليها .. بس اعتقد بعد كل اللى قولتهولك ده لازم تتاكد ان هيوك ملوش اى علاقة بالموضوع ده بالعكس هو كل حاجة عملها كانت عشان خاطر لولو وزى مانت خايف عليها وعايز تحميها هو كمان بيخاف عليها وبيحاول يحميها
فضل دونى باصص  لتشولا وفضل يفكر فى كل كلمة سمعها وبقى محتار مش عارف يعمل ايه فى الوقت ده اتكلمت ايمى
ايمى : دونيا .. اديهم فرصة .. انت عارف كويس ان لولو بتحبه وشايف اللى هى فيه .. حاول تدى هيوك فرصة تانية وانا متاكدة انه مش هيخيب املنا لانه فعلا بيحب لولو
اتنهد دونى بعد ما فكر فى كل كلامهم وقرر انه يدي لولو الفرصه انها تقرر اللي هتعمله مع انه متاكد ان لولو هتختار هيوك .. وبعدها هز راسه بمعنى انه موافق على كلامهم .. بصت ايمى وهيمى لبعض وقامت ايمى حضنت دونى
ايمى بسعادة : كوماوا دونى .. متعرفش كمية الراحة والسعادة اللى حاسة بيهم وقتى
ابتسم دونى وبص لتشولا اللى قاعد قدامه وهو بيبتسمله وهز راسه
مسكت هيمى ايد تشولا وهى فرحانة : حبيبى المقنع .. انا فخورة بيك
ابتسم تشولا اكتر : طيب مفيش مكافاه بقى لحبيبك المقنع
هيمى : اطلب اى حاجة وانا هنفذهالك
تشولا مسك ايدها جامد وابتسم بخباثة : مش هترجعى فى كلامك
بالرغم ان هيمى عارفة ان تشولا هيستغل الموقف بس هى فعلا هتعمله اللى هو هيطلبه
شاور تشولا على شفايفه ومدها قدام : عايز بوبو
ضحكت هيمى على طلب تشولا وفعلا قامت من مكانها وقربت منه ومسكت وشه بين ايدها وباسته
دونى بصوت عالى فزع ايمى وهيمى : يااااا الكلام ده مينفعش .. لا ده مكانه ولا وقته .. لما تتجوزو ابقى اعملو اللى انتو عايزينه
تشولا بحده : انت بتقول لمين يااا .. شكلك كده مستغنى عن روحك
نطت ايمى فى الكلام : لا مش وقت خناق خالص .. خلونا مبسوطين
وبصت لهيمى : كده مبقاش فاضل غير ان هيوك يفوق بقى
هزت هيمى راسها وفضلو يتكلمو كلهم مع بعض

تانى يوم بالليل راح دونى للولو .. دخل اوضتها وقعد قدامها على المكتب .. فضلت لولو باصه عليه مستنياه يبدا كلام
دونى : انتى لسه بردو مصممة تروحى لهيوك وتفضلى معاه
لولو نزلت راسها وغمضت عينها بتقول فى سرها : اهلا بالخناقة الجديدة
دونى : ايه .. خلاص مبقتيش عايزة تتكلمى معايا ؟
رفعت لولو راسها : لا طبعا .. انا بس مش عايزة اتكلم معاك فى الموضوع ده .. احنا  كل يوم تقريبا بنتكلم فيه .. ونفس النتيجة هى هى .. انت عارف راى كويس وانا عارفة انك مش راضى عنه
دونى : بس انا المرة دى هقول حاجة تانية غير اللى بقوله كل مرة
بصتله لولو باستغراب وسكتت مستنياه يكمل كلامه
دونى : بالرغم انى مش راضى عن الموضوع ده .. الا انى قررت اديلك حرية الاختيار .. وانا عارف انك هتختارى صح وتفكرى بعقلك
فرحت لولو من كلام دونى وقربت منه وحطت ايدها على ايده : دونى انتى بتتكلم بجد ؟
بصلها دونى وهز راسه .. قامت لولو وحضنت دونى وهى مش مصدقة اللى سمعته منه
لولو بفرحة : دونى .. انا بحبك قوى
حضنها دونى وحط ايده على راسها وضحك : دلوقتى بقيتى بتحبينى .. عموما انا اتمنى انك فعلا تكونى مبسوطة .. واختيارك يكون موقف .. ومتخيبوش ظنى
هزت لولو راسها وهى لسه حاضنه دونى وكانت مستنية الوقت اللى تقدر تشوف فيه هيوك عشان تقوله

وفعلا تانى يوم اخر النهار بعد ما خلصت لولو شغلها راحت لهيوك المستشفى كالعادة وكانت مبسوطة قوى لاقت كيونا هناك زى كل يوم لانهم دايما بيكونو موجودين عنده بيتكلمو معاه وبيحكوله كل اللى بيحصل معاهم فى يومهم
كيونا بص ناحيته وهى داخلة من الباب ولاحظ سعادتها : بقالى فترة مشفتكيش مبسوطة كده .. حصل ايه ؟
راحت لولو قعدت على الكرسى اللى جنب كيونا قدام سرير هيوك : عندى خبر حلو اوى
كيونا : طيب فرحينى معاكى
مسكت لولو ايد هيوك وبصت عليه : دونى وافق اننا نفضل مع بعض .. ومفيش خناقات بعد كده
ابتسم كيونا : ده خبر كويس اوى .. وبعدها بص لهيوك : مش قولتلك قبل كده ان كل شئ هيتحل .. قوم بقى عشان تفرح بالاخبار دى .. وافرح فيك واخليك تنفذلى كل اللى انا عايزة عشان تبقى تسمع كلامى دايما وتصدقنى
لولو مسكت  ايد هيوك جامد : اكيد هيقوم .. ماهو ماينفعش يتخلى عنى بعد كل الوقت الصعب اللى مرينا بيه .. ولما الدنيا تبقى كويس يفضل فى غيبوبته .. انا متاكدة انه سامعنى واكيد الخبر ده هيديله دافع انه يرجعلى تانى
بصلها كيونا وابتسم : اكيد
وفضلو قعدين مع هيوك بيتكلمو معاه او مع بعض .. بس محدش منهم لاحظ الحركة الصغيرة اللى حصلت فى ايد هيوك التانية

بعد 4 ايام فى المستشفى راحت لولو لهيوك كالعادة كانت قعدة جنبه وبتحكيلة اللى حصل

كانت لولو سانده ايدها على سرير هيوك وحاطه راسها على ايدها : النهاردة هبقى انا وانت لوحدنا .. كيونا ممكن يجى متاخر او ممكن ميجيش .. على حسب هيعمل ايه مع هنرى .. وهزت راسها : وجود الاتنين دول مع بعض خطر على الامن القومى .. اللى يشوف كيونا اول مرة ميقولش عليه انه شقى وشرير قوى كده .. هنرى تقريبا لاقى نصه التانى فى الشر والمصايب .. شكلى هقبض عليهم هما الاتنين او هموتهم قريب واريح البشرية كلها منهم .. وبعدين ميلت راسها : انا مش فاهمة هنرى هيعقل امتى .. ده هيبقى خال يعنى  مفروض يبقى قدوة للبيبى .. وفجاه خبطت ايدها فى بعض : اه صح نسيت اقولك انا كمان هبقى عمتو .. البت ايمى حامل فى دونى صغير .. متشوقة اوى اشوفه وامسكه بايدى .. ومسكت ايد هيوك : نفسى تقوم بقى وتشاركينى كل الاخبار الحلوة دى وتكمل فرحتى .. وفضلت قاعدة معاه تكلمه طول الوقت لحد ما مشيت

تانى يوم راح كيونا للمستشفى ومراحش الشركة لانه صحى متاخر بعد سهرته مع هنرى .. كان لسه هيدخل لهيوك لاقى الدكتور خارج من عنده
الدكتور : كيوهيون- شي .. كويس انك جيت انا كنت  لسه هخلى حد يكلمك
كيونا بقلق : خير يا دكتور .. هيوك حصله حاجة ؟
الدكتور بابتسامه : متقلقش .. هيوك- شى فاق النهاردة الصبح وحالته الصحية مستقرة 

كيونا مستناش ان الدكتور يكمل كلامه .. دخل بسرعة لهيوك اللى كان مغمض عينه بس مجرد ما قفل الباب فتح هيوك عينه وبص ناحيه الباب .. شاف كيونا واقف وعينه مليانه دموع من الفرحه
راح كيونا ناحية هيوك وحضنه : اخيرا فوقت
حطت هيوك ايده علي راس كيونا : كيونا
بعد عنه كيونا وبصله بابتسامه مخلوطه بالدموع
هيوك بصله بقلق : لولو
ضحك كيونا : حتي وانت كده بتفكر في لولو اول حاجه .. عموما متخافش الفتره اللي فاتت دي مسابتكش وكانت كل يوم هنا
وبدا يحكيله كل حاجة حصلت فى الفترة دى وهيوك بيسمعله وهو ساكت .. وبعدها نزل هيوك راسة وبانت عليه ملامح الحزن
كيونا : هيوك .. فى حاجة وجعاك ؟ حاسس بحاجة ؟
هز هيوك راسه : انا زعلان عشان خاطر مينى .. انا السبب فى انه مات .. وبدا يدمع
مسك كيونا ايده : مينى مات عشان يحميك زى ما كان بيعمل دايما
هيوك : كده مبقاش فاضلى حد .. كلهم ماتو
كيونا : وانا رحت فين مانا معاك اهو .. ولا دلوقتى مبقتش بتعتبرنى اخوك
هيوك : لا طبعا ربنا يخليك ليا .. انت عارف انك مش مجرد اخويا او صاحبى بس .. انت اكتر
كيونا قاطعه : انا عارف من غير ما تتكلم .. وبعدين متنساش ان لسه فاضلك لولو بردو اللى لسه لحد وقتى متعرفش انك فوقت
هيوك ابتسم : كلمها خليها تيجي بس متقولش اني فوقت

طلع كيونا تليفونه و كلم لولو اللي ردت عليه بسرعه
كيونا : لولو تعالي بسرعه علي المستشفي
لولو بقلق : ليه ؟
كيونا : تعالي ولما تيجي هتعرفي و قفل السكه
هيوك رفع حواجبه : انا قولتلك انك تجيبها اه بس مش بالطريقه دي .. انت كده خضتها
كيونا هز كتافه : انا عليا اجيبها وانت عليك تهديها .. وبعدها غمزله وفضلو يتكلمو

بعد فتره وصلت لولو ودخلت بسرعه الاوضه لقت كيونا واقف قدم هيوك وهيوك مش باين
لولو بخوف : كيونا .. فى ايه ؟
بصلها كيونا واخد خطوة على الجنب وظهر هيوك اللى باصصلها ومبتسم .. بصتله لولو وهي مش مصدقه .. ابتدت تعيط وتضحك وهى بتحاول تستوعب ان هيوك فاق اخيرا .. جريت عليه وحضنته وهو كمان بادلها الحضن وفضلو كده شويه..  سابهم كيونا وخرج بره الاوضه
هيوك : وحشتيني قوى
بعدت لولو عن حضنه وفضلت تبصله قوى : انت كمان وحشتني .. مش مصدقه انك فقت و بتتكلم معايا دلوقتي .. انت مش عارف احساس انك كل يوم تبقى قدامي شيفاك و بكلمك وانت مش بترد عليا
حرك هيوك ايده على وشها : انا كنت حاسس بيكي وكنت دايما سامعك .. اوعدك اني عمري ما هسيبك ابدا .. وبعدها اخدها فى حضنه تانى

بعد 6 شهور كانت ايمي و دوني و لولو و هيوك قاعدين فى بيت دوني .. لولو وهيوك قعدين جنب بعض .. وايمى ودونى قعدين جنب بعض .. وايمى بطنها منفوخة قدامها وبيتكلمو وفجاه رن تليفون لولو ردت عليه وفتحت المايك
لولو : بابوووو
هيمي : يااا بطلي الكلمه دي
لولو برخامة : ابدا استحاله ده لقبك حد يكره لقبه
تشولا : لولو متعصبيش هيمى احسنلك
لولو : دي الحاجه الوحيده اللي مش هطاوعك فيها
دونى : هيونغ اخبار شهر العسل ايه ؟
تشولا : اكيد يجنن مدام مع حبيبتي
بص هيوك للولو : عقبالنا .. كلها شهر
بصتله لولو : هانت فعلا كلها شهر بس وانا لسه مخلصتش كل حاجة
بعدها وجهت كلامها لهيمي : هيمي تعالو بسرعه بقي علشان تساعديني فى تجهيزات الفرح .. ايمي معتقدش انها هتفيدني كتير بمنظرها ده
هيمي : ايمي انتي هتبيضي امتي انتي فى الـ15 باين
ايمي بابتسامه بلهاء : حالف ما ينزل غير علي ايدك
لولو شاورت بايدها : ياختي عنه ما نزل
ايمي : حرام عليكى .. ده انا مستنياه من قرن تقريبا
لولو : اصلي تعبت يا ايمي ياختي ماهو يا تبضيه يا تبلعيه .. بس مش كل شويه راحة جايه على المستشفى
حطت ايمى  ايدها على بطنها بتحسس عليها : براحتى انا وابنى .. لازم نتعبكو معانا
لولو : طب اخرسي بقي بدل ما ادب السكينه فى بطنك اولدك انا
حط دوني ايده علي بطن ايمي ووجه كلامه لهيوك : ما تلم الكائن المتوحش بتاعك ده
حط هيوك ايده علي كتف لولو : لاحظي انك هتبقى فى موقفها بعد كده
بصت ايمى للولو بانتصار وبعدين وجهت كلامها لهيمى
ايمي :  خدى بالك انك متجوزه وريني شطارتك بقي لما تبقي مكاني
وبعدها وجهت كلامها للولو : وانتي ركزي قوي فى كلامك احسن اعملها واولدلك يوم الفرح
لولو : طب اعمليها كده وانا اعلقك انتي و البيبي و ابوه علي باب القاعه
هيوك : انا بفكر اغير راي .. انا هتجوز ظابط ولا سفاح
دوني : انا معاك فى الراي ده .. خدها منى نصيحة ..انفد بجلدك احسن
بصت لولو لهيوك : شكلك عايز تتعلق جنبهم
شدها هيوك من خدها : ده انا بهزر معاكى انا اقدر بردو
هيمي : صح هو فين هنري ؟ بقالى فترة معرفش عنه حاجة ولا بيكلمنى
ايمي : كالمعتاد صايع هو وكيونا كل يوم
تشولا قاطع كلامهم : بقولكو ايه اقفلو بقى عشان عايز الحق اجيبلكو بنوتة صغيرة لابنكو
وقفل السكة قبل ما حد يقدر يرد عليه
الكل فى صوت واحد : منحرف
وبعدها بص الكل لبعضه وفضلو يضحكو

----------------- 

BY

D&E

Lolo Adel  

Emy Tare