Catch him .. Part 16

Catch him .. Part 16

بعد ما خلص اليوم مع لولو وهيوك وايمي ودوني .. خرجو واتفرجو على فيلم واتبسطو .. جه وقت انهم يروحو
اتنحنح هيوك : احم .. انا هوصل لولو للبيت بعربيتى
لولو اول ما سمعت كلام هيوك ابتسمت وفضلت متنحة عليه
قربت منها ايمى واتكلمت بوشوشة : امسكى نفسك شوية احسن هتتقفشى قريب من دونى او هيوك
بصتلها لولو بطرف عينها وقالت فى سرها : محدش قافشنى غيرك .. اخفى انتى ودونى من وشى بقى وسيبونى اخد فرصتى مع الواد
هز دوني راسة واتكلم بهدوء : لا متتعبش نفسك انا هوصلها
كان هيوك متوقع الرد ده من دونى وكان مفكر فى رد يقوله عليه : هتفضل مقضي اليوم كله مشاوير رايح جاي كده .. اصلا بيتها فى طريقى يعني مفيهاش تعب
دوني بعد تفكير في كلام هيوك : اراسو وصلها .. وبص للولو : كلمينى اول ما توصلى

للمرة التانية ابتسمت لولو ابتسامة كبيرة راحت ايمى حضناها كانها بتسلم عليها وهمست فى ودنها : مش عايزة اسمع بكرة ان هيوك ناقص حاجة لانك بطريقتك دى هتاكليه .. وابوس ايدك بلاش تفكرى فى شفايفه
لولو : انا شكلى هاكلك انتى واخلص منك
سلم هيوك على دونى وايمى وراح ركب عربيته ولولو سلمت على دونى وراحت ركبت جنب هيوك

فى الطريق كان هيوك بيحاول يفتح حوار مع لولو اللى من ساعه ما ركبت وهى متوترة لان كلام ايمى عمال يتردد فى دماغها خصوصا لما اتكلمت عن شفايف هيوك .. بالرغم انها مكنتش بتفكر فى كده لما هيوك اقترح انه يوصلها .. بس بسبب كلام ايمى عماله طول الطريق بتحاول تبعد تفكيرها عنه .. اتنحنح هيوك وبدا يتكلم

هيوك بابتسامه : اليوم كان حلو استمتعت بيه جدا اتمني يتكرر
ابتسمت لولو بتوتر : انا كمان استمتعت بيه

بصت لولو لهيوك لاقته بيبتسم فضلت مركزة ع ابتسامته وشفايفه .. وكلام ايمى ضرب ف عقلها تانى .. اتحرجت ووشها ضرب البوان .. ودت وشها الناحية التانية وبصت من الشباك طول الطريق .. لحد ما وصلو قدام بيتها .. وقبل ما تنزل اتكلم هيوك

هيوك : لولو .. حاولى تتحكمى فى احراجك وكسوفك فى الفترات الجاية
فتحت لولو عينها ع الاخر .. ووشها ضرب الوان ونزلت بسرعة دخلت بيتها

ابتسم هيوك على تصرف لولو وفضل يفكر فيها طول الطريق وكل شوية يضحك ع منظرها لحد ما وصل البيت

ف الوقت ده كان دونى قاعد على الكنبه بيقلب فى تليفونه وايمى كانت لسه خارجه من المطبخ ومعاها ميه بتشربها .. قعدت جنبه وحطت راسها على كتفه .. بص عليها دونى وباسها من راسها او بمعنى ادق شعرها
ايمي بسعادة : كان يوم جميل قوي ياريت نكرره تاني
بصلها دوني وابتسم على سعادتها : اراسو .. وحط ايده على كتفها
رفعت ايمي راسها من ع كتفه وبصتله : مع هيوك كمان
ساب دوني تليفونه على الطرابيزة اللى قدامه وعمل نفسه بيفكر وحط ايده على دقنه : اصلا بعد التفكير وبعد ما قضينا يوم مع بعض..  لقيت ان مفيش سبب للخوف منه وانا ارتحتله
ايمي فرحت من تغير وجهه نظر دونى عن هيوك واتكلمت بسرعه : بجد .. بجد اللي بتقوله

دونى : بجد .. بس لو ماخدتش حاجة حلوة منك .. هرجع ف كلامى

نطت عليه ايمى واديته بوبو خليتهم يقضو ليله حلوة مع بعض

تاني يوم الصبح كان دونى وتشولا قاعدين مع بعض .. والجو العام مش حلو
دونى بنفاذ صبر : هيونج .. احنا بقالنا كام يوم بنراقب قصر سونغمين ومفيش اى حاجة مريبة
بصله تشولا بغضب : وهفضل حاطط المراقبة عليه .. لحد ما اوصل لحاجة .. انا ما صدقت قدرت اقنع تيكى انى اعمل مراقبة عليه .. ومش هتخلى عن اى فرصة ممكن توصلنا

اتنهد دونى وسابه وقام فتح دولاب صغير موجود فى الجنب وخرج منه ملف كبير وفتحه وقعد يقلب فيه لانه عارف انه مهما اتكلم مع تشولا مش هيقدر يغير راية .. لان تشولا لما بيصمم على حاجة او يحط حاجة فى دماغه مش بيهدئ غير لو عملها او خلص منها

ف الوقت ده خرج مينى من الفيلا .. وركب عربيته

مينى : الشرطه بتراقبنا .. وبص لشيون اللى قاعد فى الكرسى اللى قدامه : المرة دى اتخلص من المراقبة عندنا مشوار مهم
بصله شيون فى مرايه العربيه الداخليه وهز راسه : متقلقش احنا عاملينا حسابنا

في اللحظه دى كانت عربيه المراقبة ابتدت انها تتحرك ورا عربيه مينى لحد ما جت عربيه قطعت عليها الطريق

رن تليفون شيون .. رد عليه : ايون ...... تمام وقفل
لف نفسه وبص لمينى : خلاص اتخلصنا من المراقبه
بصله مينى بنظره ثاقبه لانه عارف ان شيون بيحب العنف واسهل حاجة عنده هى القتل : مش عايز ضحايا من الشرطه .. قولتلك لكلام ده قبل كده
شيون بابتسامه : مفيش ضحايا احنا عطلناهم عن الحركه ورانا بس
مينى هز راسه بارتياح : كويس .. ايه اخبار هيمي ؟
شيون بتفاخر : ابتديت اول خطوه ونجحت
ابتسم مينى ابتسامه جانبيه : كنت متاكد انك هتنجح

بعد نص ساعة تقريبا .. وصل مينى وشيون للمكان اللى هيقابلو فيه عميل جديد من العملاء بتوعهم .. في الوقت ده كانت هديه تشولا وراهم .. وهي عربيه مراقبه تانيه كانت مستنياهم بعيد عن قصر مينى ومستنية الاشارة من المراقبة اللى اعترضوها فى الاول لانه كان عارف ان العصابه هتعرف انهم متراقبين .. فضلت وراهم المراقبه لحد ما وصلت للمطعم

نزل مينى و شيون من عربيتهم و دخلو للمطعم في اوضه خاصه لكبار الزوار .. نزل واحد من المراقبين ودخل المطعم ولبس زي العاملين في المطعم طبعا بعد ما اخد موافقه من مدير المطعم لما عرف انهم من الشرطه ودخل اوضه مينى اللى كان فى حراسة واقفة عليها من بره .. شافه قاعد مع واحد غريب اول ما دخل سكت مينى و الراجل عن الكلام .. اخد طلابتهم وطلع بسرعه علي العربيه وكلم تشولا

المراقب فى جهاز اللاسلكى : ايون يا فاندم .. هما دخلو اوضه خاصه .. ومعاهم واحد

تشولا باستفهام : متعرفش مين اللى قابله ؟
المراقب : شكله اجنبى
خبط تشولا المكتب اللى قدامه بايده دليل على عصبيته : اهو ده اللى مكنتش عامل حسابه انا محتاج اعرف مين الشخص التانى ده
قام دونى وقف جنب تشولا وحط ايده على دراعه : هيونج اهدى ممكن واحد من المراقبين يروح وراه او نروح احنا بسرعة قبل ما يخرجو
بصله تشولا وكان فكرة دونى جاتله من السما
تشولا للمراقبين : ابعدو بالعربيه ووقت ما تشوفو الراجل خارج راقبوه كويس .. انا عايز اعرف كل حاجه عنه
المراقبين : اوامرك .. وقفل معاه
تشولا بصوت واطى محدش يسمعه : اكيد فى سبب قوى يخلى سونغمين يروح بنفسه للراجل ده ويهرب من المراقبة
دونى : قررت هنروح احنا ولا هنبعت حد تانى ؟
مسك تشولا الجاكيت بتاعه من على كرسيه : يالا بينا .. احنا هنروح نراقب سونغمين .. بس ادعى اننا نوصل قبل ما يمشى

خرج تشولا ودونى من مركز الشرطة لمكان المطعم .. بعد مرور ساعة خلص سونغمين والراجل مقابلتهم وخرج الراجل الاول بس المرة دى كانت المراقبة وراه
وبعدها بشوية خرج سونغمين وشيون ركبو عربيتهم وكان وراهم دونى وتشولا

مينى بنبرة جادة : الصفقة دى مهمة جدا لازم تتم من غير اى مشاكل .. ومش عايز اى غلطة
شيون : احنا هنعمل كل الاحتياطات اللازمة
مينى بنفس النبره : لو حصل اى حاجة انا مش هعدى الموضوع بالساهل ابدا
ارتبك شيون من نظرات سونغمين وطريقة كلامه وهز راسة دليل على فهمه .. ساد الصمت بعدها لجد ما رجعو الفيلا تانى

تاني يوم الصبح كان الجو جميل والسما صافيه .. قررت هيمى انها تخرج تتمشى فى النادى ع التراك .. كانت لابسة ترنج رياضى لونه احمر ورافعة شعرها ديل حصان وحاطة السماعات فى ودنها بتسمع اغانى .. وهي ماشيه حست ان فى حد وراها بس كل ما كانت بتبص مش بتلاقى حد .. بعدها بشوية حست بايد حد من وراها بتخبط على كتفها اتخضت هيمى وبصت وراها بسرعة وهى فاتحه عينها بخوف .. وبعدين اتنهدت براحة

حطت هيمى ايدها على قلبها براحه : شيون شى .. انت بتعمل ايه هنا ؟
شيون بابتسامه وعيون بريئة : كنت بتمشي و شفتك قولت اسلم عليكي .. انتي بتعملي ايه ؟
هيمي بابتسامه : انا كمان بتمشي
شيون بابتسامه ساحرة عشان هيمى مترفضش طلبه : يضايقك لو مشيت معاكي هنسلي بعض
هيمي في نفسها : نسلي !!! تاني كيس الترمس .. و ابتسمت لشيون : اراسو

اتمشي شيون و هيمي مع بعض وهما بيحكو فى مواضيع عشان يسلو نفسهم ويتعرفو ع بعض اكتر .. راحو قعدو فى كافتريا النادى .. كان شيون بيحكيلها مواقف وحاجات .. منها الحقيقى ومنها اللى مش حقيقي .. لمجرد ان هيمى ترتاحله اكتر .. وبعد فتره خرجو من النادى ووصل شيون هيمي قدام بيتها
هيمي بابتسامه : شكرا شيون شي انك وصلتنى
شيون حط ايده على صدره وابتسم : دى كانت صدفه سعيده اني قابلتك واتمنى اننا نبقى اصحاب
هيمى : اكيد طبعا احنا من اللحظة دى اصحاب .. ومدت ايدها لشيون
ابتسم شيون ومد ايده مسك ايده : ده شئ يشرفنى
ضحكت هيمى : ده انا اللى هقدر اغيظ كل اللى اعرفهم .. ان عندى صديق وسيم زيك

ضحك شيون على كلامها : اى وقت تحبى تضايقى حد انا جاهز

ابتسمت هيمي ودخلت بيتها .. شاورلها شيون بايده وبعدها مشي وكلم مينى فى الفون
شيون بابتسامه شر : الخطة ماشية زى ماحضرتك عايز بالظبط .. اخدت عليا وبقينا اصحاب كمان
مينى بشر : كويس اوى كده كل حاجة ماشية تبع الخطة .. عموما تعالا بسرعة عشان عايزين نخلص شوية حاجات ورانا فى العملية الجديدة
شيون : حاضر مسافة السكة .. وقفلو

بعد يومين وصل واحد من المراقبين علي الراجل اللى تشولا كلفهم بمراقبته للقسم .. دخل لتشولا ودوني ومعاه المعلومات اللي جمعوها عن الراجل
قام دونى واخد الملف من ايده : ها .. وصلت لايه ؟
المراقب : اسمه جون من امريكا .. جه كوريا من يومين و مأجر فيلا لمدة شهر في كانغنام .. حصل هجوم كذا مره عليه ف امريكا بسبب تجاره السلاح بس محدش عرف يمسكه متلبس وكل مرة يطلع منها ويطالب حكومته بالتعويض
هز تشولا راسة وشد على ايده اللى كان شابكها فى بعضها : اكيد جاى يتمم صفقة مع سونغمين .. بص للمراقب : فيه مراقبه عليه لسه صح ؟
المراقب ارتبك من بصه تشولا : اكيد زميلي بيراقبه وانا بجيب المعلومات
ادى دوني الملف لتشولا وبص للمراقب : خلاص روح انت وفتحو عينكم عليه كويس .. واوعى يفلت منكم

----------------- 

BY

D&E

Lolo Adel  

Emy Tarek