Catch him .. Part 27

Catch him .. Part 27

وصل دونى الحفلة وكان لابس بدلة سودا وقميص ابيض وجزمة سودا وقافل ازرار البدلة ورافع شعره لورا بطريقة شيك ولابس ماسك مخبى نص وشه .. قدم الدعوة اللى معاه قدام الباب ودخل القصر اللى كان فيه رجال اعمال كتيرة وكل واحد متنكر بطريقة مختلفة منها العادية ومنها المضحكة ومنها المخيفة .. بدا دونى يتجول فى القصر وكل ما بيلاقى مكان مناسب بيحط فيه ميكروفون وبيبتسم للناس ويحاول يندمج معاهم وبعدها يسيبهم ويمشى عشان يلاقى مكان تانى مناسب وكان بيدور على مكتب مينى لحد ما لاقاه .. دخل من غير حد ما ياخد باله وحط الميكروفون بس وهو خارج من المكتب خبط فى شخص كان معدى من قدامه لابس بنطلون اسود وقميص ابيض وبليزر اسود بصله الشخص ده ووقف مكانه .. فضل بيص على دونى اللى اعتذرله ومشى من غير ما يبص عليه او يستنى رده على اعتذاره .. فضل الشخص ده باصص على دونى لحد ما اختفى وسط الناس .. بعدها بص الشخص على المكان اللى خرج منه دونى ” المكتب ” ومشى كانه بيدور على حد معين لحد ما لاقاه واقف مع بنتين سحب الشخص التانى من ايده واعتذر للبنتين وطلع لاوضته وقفل عليهم الباب

كيونا بتانيب : يااااااااه هيوك .. ازاى تاخدنى كده من قدامهم بالطريقة دى .. انا كنت بدات اظبطهم واخد ارقامهم
قلع هيوك الماسك اللى كان لابسه : دونى هنا فى الحفلة
اتفاجئ كيونا : هنا .. بيعمل ايه ؟ وانت عرفت منين ؟
هيوك : خبط فيا بس معرفنيش .. شفته كان خارج من مكتب مينى
كيونا بقلق : لو مينى او شيون شافوه وعرفو هو مين مش هيخرج من هنا حى
هيوك مسك كتف كيونا : عشان كده لازم تلاقيه وتخرجه من هنا وانا هشتتهم

هز كيونا راسه وهيوك لبس الماسك بتاعه تانى وقال لكيونا على شكل دونى ولابس ايه وخرجو عشان يعملو اللى اتفقو عليه .. بس المفاجاه بقى ان اول ما مينى شاف هيوك مسكه من دراعة وقتها بص هيوك وكيونا لبعض وسابهم كيونا وراح يدور على دونى .. وهيوك مشى مع مينى اللى مسك الميكروفون عشان ياخد انتباه الناس
مينى اتنحنح : اولا احب اشكر كل اللى شرفونى النهاردة .. وبعدها حط ايده على كتف هيوك اللى واقف جنبه وكمل كلامه : ثانيا اعرفكو سبب الحفلة ايه .. وهو رجوع اخويا هيوكجاى .. وخلاه يخلع الماسك
بدات الناس تسقف ويتكلمو مع مينى وهيوك

ارتبك هيوك لانه عرف ان دونى اكيد شافه وعرفه وهيحصل سوء تفاهم تانى بس المرة دى مع دونى بس مش ده كان كل اللى شاغل بال هيوك بس .. لان كان فى نفس الوقت شاغل باله ان كيونا يقدر يلاقى دونى ويخرجه برا الحفلة بسلام .. وبتلقائية بدات عينه تبص على الناس اللى موجودين قدامه وانحنلهم لحد ما عينه وقعت على دونى اللى كان باين عليه الصدمة من اللى لسه شايفه وسامعه وقتى فضلو الاتنين باصين لبعض .. فى الوقت ده اخد كيونا باله من الشخص اللى هيوك بيبص عليه وعرف ساعتها انه دونى
راح كيونا ناحيته وحط ايده على كتفه : دونى

انتبه دونى للصوت اللى نادى عليه لانه مالوف وبص على اللى بيكلمه : كيونا
سحب كيونا دونى من كتفه وبداو يمشو باتجاه الباب : انت لازم تخرج من هنا حالا
فاق دونى من صدمته بعد ما خرجو وزق كيونا بعيد عنه : انا عايز افهم ايه اللى بيحصل بالظبط
كيونا وقف قدامه : هفهمك كل حاجة بس الاول نبعد عن هنا

فى الوقت ده اتسحب هيوك من غير مينى المشغول بالكلام مع الناس ياخد باله وخرج ورا دونى وكيونا
وقف هيوك ورا دونى ونادى عليه لفله دونى وبصله
دونى بعصبيه : انا عايز اعرف ايه اللى سمعته وشفته وقتى ده
راح كيونا وقف جنب هيوك اللى كان باصص لدونى ومش عارف يقوله ايه بالظبط
هيوك بتردد : انا هقولك على كل اللى انت عايزة بس ياريت تصدقنى
دونى بحدة : ده يتوقف على اللى انت هتقوله

بدء هيوك يحكى لدونى كل حاجة من ساعة ما اتخطف وهو صغير .. والسبب فى تحول مينى للشخص ده .. ولما سورا سفرته هو وكيونا بره البلد عشان تبعدهم عن مينى واللى بيحصل .. ورجوعه .. وانه كان بعيد عن مينى ومش متقبل اللى هو بيعمله .. ولما اتعرف عليهم .. وانه كان بيحاول يساعدهم بدليل الرسالة اللى بعتها هيوك لدونى وتشولا عشان ينقذو واحد من الموت .. وانه كان صادق فى علاقته بيهم وحبه للولو وانه مكنش بيستغلهم .. وانه فى النهاية كان مضطر يرجع لمينى تانى .. بس مقالوش على سبب رجوعه

فضل دونى ساكت بيسمع هيوك لحد ما خلص كل كلامه ومفيش اى تعبير على وشه .. كان هيوك وكيونا مستنين دونى ينطق باى كلمة بس دونى فاجئهم بانه ضرب هيوك بالبوكس ومسكه من قميصه بايدة الشمال وكان هيضربه مرة تانية بايده اليمين .. بس كيونا مسك ايد دونى اللى بصله بغضب .. فى نفس اللحظة كان كيونا بيبصله بغضب بردو لانه مش بيحب اى حد يضايق هيوك او يضربه خصوصا قدامه .. وفى وسط نظراتهم حط هيوك ايده على كيونا عشان ميعملش حاجة متهورة مع دونى والموضوع يكبر اكتر .. فهم كيونا قصد هيوك ومسك اعصابه ونزل ايد دونى وفضل ماسكها بحيث ان دونى ميضربش هيوك تانى

رجع دونى بص لهيوك وشده من قميصه عليه اكتر وعينه مليانة غضب وطالع منها شرار واتكلم ما بين اسنانه ” جز على سنانه ” : عايزنى اصدق اللى انت قولته .. تمثيل مسرحية كويس من زعيم عصابه واخوه .. وبص لكيونا : ومن صاحبهم .. وبعدين رجع بص لهيوك تانى : دلوقتى عرفت ليه كانت خططنا كلها بتفشل بسبب ان اخوك زرعك وسطنا .. ومش بعيد كمان تكونو بتتسنطو علينا .. بس كل ده كوم واستغلالك وضحكك على لولو ده كوم تانى .. وشده عليه اكتر : صدقنى ده هتدفع عليه الثمن غالى قوى .. انت اخترت الاشخاص الغلط اللى تلعب معاهم وتضحك عليهم .. اياك اشوفك قريب من لولو تانى ولو حتى بالصدفة لان ده هيكون اخر يوم فى حياتك .. انت لو كنت شفت مننا جزء فانت متعرفش الوش التانى بتاعنا عامل ازاى

خلص دونى جملته وضرب هيوك برجله فى بطنه وسحب ايده من كيونا بعنف وسابهم ومشى .. بس كان نفسه يرجعلهم تانى ويقطعهم بايدة واسنانه بسبب ان الشخص اللى وثقو فيه ودخلوه بينهم بالرغم انهم مش بيدخلو اى حد بينهم ضحك عليهم واتغشو فيه .. وبسبب اخته لولو اللى دلوقتى بس عرف ايه سبب الحاله اللى هى فيها وقلبه وجعه عليها لان الشخص الوحيد اللى حبته جرحها بالطريقة دى .. وده لوحده سبب كافى ان دونى يتحول لشخص تانى اى حد يخاف يتعامل معاه ولو كان فى ايده مسدسه كان ضرب هيوك وكيونا ومينى بالنار وبردو مش هيكون كفاية انه يشفى غليله وغضبه

فى نفس الوقت كان هيوك بيبص على دونى بحزن واسف وحسرة من كل اللى بيحصله
كيونا مسك هيوك من كتفه : انت كويس ؟
هيوك هز راسه بمعنى ايوة من غير ما يتكلم
كيونا : شكلك مش باين عليه
هيوك غمض عينه : انا بس متضايق لان محدش عايز يصدقنى وبيتهمونى بذنب انا معملتوش
كيونا ملقاش حاجة يقدر يقولها لهيوك عشان يخفف عليه اللى هو حاسس بيه او يقوله كلام يشجعه بيه .. اتنهد كيونا وقرر يغير الموضوع : مكان الضرب وجعك ؟
هيوك : انا مش فارق عندى الوجع الجسدى .. انا كل اللى وجعنى بجد هو قلبى حاسس انه بيتقطع ومش عارف اعمل ايه ؟

طبطب كيونا على كتفه : سيب الامور للزمن هو كفيله انه يحلها

بصله هيوك من غير ما يتكلم .. ابتسم كيونا فى وشه واخده ورجعو للحفلة تانى عشان مينى ميشكش فيهم وانهم اختفو ليه وراحو فين

بعد ما مشى دونى من الحفلة راح لبيت امه دخل اوضة لولو لاقاها قعدة على السرير وسرحانة دخل وقفل الباب وقعد قدامها على السرير
دونى بصوت هادى : لولو
بصتله لولو وابتسمت : نعم
دونى بنفس نبرة صوته : مالك ؟
لولو هزت رسها : مفيش حاجة انا بس كنت سرحانة شوية
دونى : كنتى سرحانة فى ايه ؟
لولو : مش فى حاجة محددة كانت فى افكار كتيرة فى دماغى وخلاص
قرب دونى منها وقعد قدامها بالظبط ومسك ايدها : لو فى حاجة عايزة تقوليها .. قولى وطلعى كل اللى جواكى

سكتت لولو وفضلت بصاله بس كانت جواها بتتمنى انها تقدر تقوله على كل اللى جواها واللى حاسة بيه زى ما بتعمل دايما بس للاسف المرة دى مكنتش قادرة واكتفت بانها تبصله بس
دونى حاول يخليها تتكلم معاه : انا شفت هيوك النهاردة فى قصر اخوه سونغمين
اتفاجئت لولو من كلام دونى لانه عرف حقيقة هيوك وبالتاكيد عرف هى مالها وكانت مخبية عليه ايه .. ومن غير اى مقدمات رمت نفسها فى حضنه ودموعها سبقتها وبدات تنزل كانها مطر وبمجرد ما حضنت دونى حست بضعفها وانها محتاجة دونى جنبها ومعاها

حضنها دونى جامد كانه بيقولها انا دايما معاكى وبدا يحسس على شعرها وضهرها بايده لحد ما حس انها هديت شوية بعدها عنه ومسح دموعها بايده
دونى : لولو حبيبتى متعيطيش انا مش عايز اشوف دموعك ومش عايز اشوفك بالحالة دى
لولو وهى لسه بتعيط وبتضرب قلبها بايدها : غصب عنى .. قلبى بيوجعنى قوى يا دونى حاسة انى عايزة اطلعه من جسمى واقطعه بايدى
مسك دونى ايدها اللى بتخبط بيها على قلبها : هششش .. انتى مغلطيش فى حاجة .. وادينا اتعلمنا من اللى حصل .. وبكره تنسيه وتعيشى حياتك
بصتله لولو : انا فعلا كنت غلطانة .. ياريتنى كنت سمعت كلامك من الاول ومدخلتوش حياتى بالطريقة دى .. يارتنى ما عرفته من الاساس .. انا بجد نفسى دلوقتى انسى انى عرفته اساسا
دونى اخدها فى حضنه تانى : لولو صدقينى انى مش هنسى ولا اسامحه على اللى عمله معاكى والجرح اللى سببهولك وفى يوم هيدفع تمن غلطته دى
كان دونى بيتكلم وجواه فى فكرة واحدة بس انه مقدرش يحمى اخته وانه اتكسر قلبها ومش هيسمح بكده تانى ابدا .. وفى نفس الوقت كان بيفكر فعلا انه هينتقم من هيوك

فى مكان تانى بعد ما وصل دوني المايكات في قصر ميني ابتدي تشولا انه يسمع كل اللي بيحصل فى بيت ميني بس اليوم ده محصلش فيه اى حاجة مهمة .. بس تانى يوم اكتشف تشولا حاجة  …….
فى مكتب مينى كان بيتكلم مع شخص وحس ان صوت الشخص ده مالوف بالنسبة ليه بس مش عارف هو مين
ميني : انا مبسوط انك رجعت
الشخص : رجعت او لا ده مش هيفرق كتير .. انا لسه عند قرارى وموقفى
ميني : هيوك انا اخوك وده مش هيتغير سواء وافقت اولا
هيوك : كل حاجة بتتغير وانت مفروض تكون اكتر واحد عارف كده .. وسابه وخرج

في الوقت ده كان تشولا فى حاله ذهول من اللى بيسمعه و بعدها قلع السماعه و حدفها علي المكتب وكان كل تفكيره انه غبى جدا ازاى كان هيوك قدامه كل المدة دى ومعرفش انه اخو سونغمين وبالتبعية فكر زى لولو ودونى .. واكيد كل اللي كان بيحصلهم كان بتخطيط من هيوك و اخوه و كان بيجي يزورنا علشان يتاكد من نجاح الخطه بتاعتهم… طلع تليفونه و اتصل علي دوني
دوني : يوبوسايو هيونج
تشولا بعصبيه : انت فين ؟ تعالي بسرعه
دوني بقلق : خير
تشولا بصوت عالي : بسرعه .. و قفل السكه فى وش دوني
فضل تشولا في حاله العصبيه و كل تفكيره متعلق بالشخص اللي ضحك عليهم و استغل قربه منهم

وصل دوني دخل لقي تشولا قاعد علي الكرسي ووشه احمر وشابك ايده الاتنين فى بعض وبيشد عليهم جامد
قعد دوني قدام تشولا : هيونج .. حصل ايه ؟
تشولا بص لدوني : اتضحك علينا .. دخلنا فرد من العصابه و سطنا .. ازاي يدخل وسطنا من غير ما نشك فيه ازاي وثقنا فيه .. هيوك طلع فرد من العصابه
دوني اتنهد : عرفت
بص تشولا لدوني وهو متفاجئ ووسع عينه على الاخر وبصوت عالى : انت عارف
نزل دونى راسه وغمض عينه وهز راسه وابتدي يحكي اللي حصل وقت الحفله و كلامه مع هيوك و انه ملهوش علاقه بميني وانه اضطر يرجع لميني تاني .. وحاله لولو ايه
وتشولا بيسمع كلام دوني و عصبيته بتزيد مع كل كلمه و بيتمني ان هيوك يكون قدامه علشان يخليه عبره لاي حد يحاول يستغلهم تانى

بعد يومين في قصر ميني هيوك و كيونا قاعدين في اوضه هيوك
كيونا : انت مش ملاحظ التغير اللي حصل لميني اليومين دول
هيوك بعدم اهتمام : لا مش ملاحظ
كيونا خبطه فى دماغه : مش ملاحظ ان بقاله فتره بطل اعماله اللي بيعملها
هيوك عقد بين حواجبه : عايز توصل لايه ؟
كيونا : يعني لمجرد انه وعد انه مش هياذى حد لو رجعتله .. وفي بوعده برغم اللى دونى بيحاول يعمله كل شوية معاه او فى الشركة

بص هيوك لكيونا وسكت مستنيه يكمل كلامه وهو عارف ان اللى هيقوله كيونا مش هيعجبه و كمل كيونا كلامه
كيونا : اعتقد انه فعلا محتاجك جنبه وممكن يعمل اى حاجة عشان ميخسركش .. اعتقد اننا ممكن نستغل النقطة دى فى صالحنا ونغير مينى ونرجعه زى الاول
هيوك بص لكيونا وضيق عينه : عايز تقول ايه ؟ نستغل ايه ؟ وازاي ؟
كيونا : حاول تقرب منه شويه بدل مانت بعيد عنه وبتعامله بطريقه باردة قوى كده .. يعني تتكلم معاه و تقعد معاه وتبينله انك مش راضي عن اللي هو بيعمله .. وخلينا نشوف هيحصل ايه
هيوك : انت اكيد بتهزر صح .. انت عارف انت بتقول ايه؟ .. اسف كيونا بس اجابتي .. لا
كيونا اتنهد : يعني انت دلوقتى خسرت كل حاجة وكل حد حواليك .. مش عايز ليه تحاول تكسب مينى وترجعه تانى ؟ .. انت عايز تبقي لوحدك ؟ انت وميني فى الاول والاخر اخوات ومحتاجين بعض
هيوك : انا مش لوحدي انت معايا
كيونا : علي قد مانت متاكد اني بحبك وانى هفضل جنبك دايما .. بس متنساش ان ميني بيحبك اكتر و ده انا متاكد منه .. هو اكتر شخص بيخاف عليك .. ولو لاقيت انه فعلا بيتجاوب وبدا يتغير يبقى ده مكسب لينا ولو لاقيت انه مفيش اى تغير يبقى بردو احنا مخسرناش حاجة .. بس صدقنى انا واثق ان خطتنا هتنجح وتجيب نتيجة وانت عارفنى لما بقول حاجة يبقى لازم تحصل

بص هيوك لكيونا وفكر شوية فى كلامه .. هو مش هيخسر فعلا اكتر من اللى خسره .. وكمان لو يقدر انه يرجع مينى زى الاول ده هيكون كفاية بالنسبة ليه لانه بالفعل محتاج اخوه القديم
كيونا بصله باستفهام : موافق ؟ هتحاول معاه ؟
هز هيوك راسه بالموافق : نحاول بس ياريت اللى بتقوله يبقى صح
قام كيونا وحضن هيوك : كوماوا هيوكى .. عموما خلينا نبدا نجرب ولو لاقينا اى تقدم فى شخصية مينى هقولك على حاجة تانية نعملها وانا متاكد انها هتاثر فيه
هيوك وهو حاضن كيونا مكنش عارف كيونا بيفكر فى ايه بس كان بيتمنى انه فعلا ينجحو فى اللى ناويين عليه

طول الفترة دى كان تشولا ودونى بيسمعو اللى بيحصل فى قصر مينى بس مش كله .. لان الدور الثانى من القصر مفيهوش اى مايكات .. فاى كلام كان بيدور فى الحديقة او الدور الثانى مكنوش بيعرفوه ودى الاماكن اللى كان دايما كيونا وهيوك بيتكلمو فيها براحتهم بس دايما الكلام اللى بيدور بين هيوك وكيونا ومينى بيثير فضول تشولا وبدا يفكر هل فعلا هيوك كان متفق مع مينى عليهم زى ما دونى ولولو فاهمين .. ولا هيوك كان بيقول الحقيقة وهو ملوش اى علاقة بتصرفات مينى .. كان بيفكر فى الموضوع ده دايما .. حتى يوم ما خرج مع هيمى وراحو قعدو فى كافية كان بيفكر فى نفس الموضوع .. لاحظت هيمى شرود وسرحان تشولا وانه بيفكر فى حاجة فقررت تساله
حطت هيمى ايدها على ايد تشولا : هاى .. رحت فين ؟
تشولا اتنبهلها : ها .. انا معاكى
هيمى : معايا فين .. انا بقالى ساعة قعدة مستنياك تتكلم او تعمل اى حاجة .. بتفكر فى ايه ؟

تشولا فضل باصص لهيمى وبيفكر هل ياخد رايها بس بطريقة غير مباشرة او حتى بطريقة مباشرة بدون ذكر اسماء لانها متعرفش اللى حصل ده كله لان لولو ودونى قرروا ميتكلموش فى الموضوع ده مع اى حد وفضلت هيمى وايمى ميعرفوش اى حاجة
تشولا : هاخد رايك فى حاجة بس عايزك تصحصحى معايا كويس لان الموضوع ده شاغل تفكيرى جامد

ارتسمت ملامح الجدية ع هيمى وركزت مع تشولا اللى بدا يحكيلها بس بطريقة غير مباشرة
تشولا : فى اتنين اخوات .. واحد منهم مش كويس وبيعمل حاجات كتيرة غلط وممكن توصل لجرايم .. والتانى بيقول انه ملوش علاقة باللى اخوه بيعمله وانه مش راضى عنه وانه انفصل بحياته عنه .. تفتكرى الشخص ده بيقول الحقيقة ؟
هيمى : طبعا انا مش عارفة انت بتتكلم عن مين .. بس خلينا نتكلم فى العموم .. مش شرط ان الاخوات يبقو زى بعض احيانا كتير بيبقو عكس بعض تمام حتى التوأم تلاقى طباعهم وتفكيرهم بيختلف .. وكل شخص ظروفه بتختلف عن التانى يعنى ممكن فعلا يكون صادق فى كلامه .. وممكن لا .. وبردو بيتوقف على علاقتهم ببعض عاملة ازاى .. ممكن منها نقدر نعرف الحقيقة .. طيب انت من كلامك مع الشخص ده اكتشفت ايه ؟
تشولا رفع حواجبه واتنهد : انا متكلمتش معاه فى الموضوع ده .. وده اللى محيرنى بس اللى سمعته عنهم حاجة واللى انا بشوفه منهم حاجة تانية .. محتار اصدق ايه اللى سمعته وعرفته من شخص تانى , ولا اللى سمعته منهم .. بردو ممكن يكونو بيتعمدو يضللو تفكيرى او يكون الشخص ده قاصد اننا نسمع حاجات غير الحقيقة ونقع فى الحيرة دى
هيمى : انا مقدرش افيدك فى النقطة دى .. بس اللى اعرفه انى مينفعش احكم على حد غير لما اتكلم معاه بنفسى .. وانت من خبرتك اكيد هتعرف ازاى كان هو برئ ولا لاء
تشولا : انا فعلا كنت بفكر فى كده .. انا لازم اعرف الحقيقة بنفسى
هيمى : ممكن بقى تبطل تفكير فى الموضوع ده وتخلينا نقضى وقت مع بعض كويس .. ميبقاش بتفكر فى الشغل والجرايم حتى واحنا مع بعض
ابتسم تشولا ابتسامه خفيفة وهز راسه وبداو يتكملو فى اى حاجة تانية
هيمى : ها هنعمل ايه بعد كده ؟
تشولا : اممممممم انتى تحبى نعمل ايه ؟
هيمى : انا فى حاجة عايزة اعملها من فترة وبما انى ساعدتك من شوية يبقى لازم تعملى اللى انا عيزاه
تشولا شدها من خدودها : انتى فاكرة انك هتعرفى تستغلى الموقف .. عموما انا هعملك اللى انتى عيزاه بمزاجى
هيمى مسك ايد تشولا اللى على خدها وقامت وقفت : طيب يالا بينا
خرجت هى وتشولا من الكافيه وفضلو ماشين هيمى متشعلقة فى ايد تشولا وحاطه راسها على كتفه لحد ما وقفت وشدته ناحية محل ملابس ووقفت قدام تشيرتات
فهم تشولا اللى هيمى عيزاه لما بص على التشيرتات الكوبل اللى بدات تمسكها وتقلب فيها .. ابتسم تشولا وبدا يدور معاها على الوان مناسبة فضلو يجربو الوان كتيرة واشكال كتيرة لحد ما استقرو على تشيرتين ابيض واسود ومرسوم عليهم دايرة ومكتوب جواها حرف H

بعد ما خلصو الشوبنج اللى بيعملوه وهيمى لففت تشولا على كل المحلات عشان تاخد رايه .. اتمشى تشولا وهيمى لحد بيتها وهما لابسين تشيرتات الكوبل وتشولا شايل كل الحاجات اللى اشتروها لحد ما وصلها لقدام باب بيتها
اخدت هيمى الشنط من تشولا وباسته من خده بسرعة : كوماوا تشولى انا عارفة انه تعبتك النهاردة معايا
الحركة فاجئت تشولا اللى ابتسم ابتسامه واسعة واخدها فى حضنه : كوماوا ليكى انتى .. وباسها فى راسها
وبعد شوية بعدها عنه ومسك وشها بين ايده وبص فى عينها وباسها بوسة سريعة : يالا ادخلى
ابتسمت هيمى وهزت راسها ودخلت بيتها ووقفت ورا الباب واتنهدت بفرحة .. وفى نفس الوقت مشى تشولا وهو حاطط ايده فى جيبه ومبسوط لان هيمى قدرت تغير حالته بعد ما فضل كام يوم دماغه مشغولة

في يوم كان هيوك فى الشركه كالعادة الصبح جاله اتصال خلاه استغرب كان الاتصال ده من تشولا
هيوك : ازيك هيونج ؟
تشولا : بلاش الشكليات دي هيوك .. انت عارف اني مش بكلمك علشان نتطمن علي بعض
هيوك اتنهد : عارف
تشولا : انا عايز اشوفك .. نتقابل النهاردة بالليل
هيوك : ارسو .. وقفلقو

بالليل كان هيوك مستنى تشولا يكلمه عشان يتقابلو وبالفعل كلمو واتقابلو فى كافيه عشان يعرفو يتكلمو براحتهم .. وصل تشولا بعد هيوك وراح قعد قدامه : اتاخرت عليك ؟
هيوك هز راسه : لا ابدا انا لسه جاى .. اصلـ….
تشولا قاطعه : خلينا ندخل فى الموضوع على طول
هيوك : هيونج .. ياريت تسمعني و تحاول تصدقني
تشولا : انا سمعت اللي محتاج اني اسمعه
هيوك : لازم تعرف كل حاجة عشان تقدر تحكم عليا صح

بصله تشولا شوية وحرك ايده بمعنى يتكلم .. وبدا هيوك يحكيله عن كل حاجة من ساعة ما اتخطف وهو صغير .. والسبب فى تحول مينى للشخص ده .. وسفره هو وكيونا بره البلد .. ورجوعه .. وانه مش متقبل اللى مينى بيعمله .. وانه حاول يساعدهم بدليل الرسالة اللى بعتهالهم عشان ينقذو واحد .. وانه ملوش اى علاقة باللى بيحصل
تشولا : اذا كان فعلا الموضوع زى انت ما بتقوله كد .. ايه اللى خلاك ترجع تعيش معاه تانى ؟
هيوك : لانه قال انى لو رجعتله مش هياذيكو تانى .. انا فضلت افكر فى الموضوع ده كتير ومكنتش هرجعله فعلا .. بس بعد ما حصل التعدى عليك وعلى بيتك ..وقتها عرفت انه بيلوى دراعى ويهددنى بيكو وده اللى خلانى ارجع تانى .. عشان اقدر احميكو وانه مياذيش حد منكو
تشولا : بس اللى اتهجم عليا كان حرامى انا عارفة ومسكته بعدها .. كان داخل يسرق بيتى من غير ما يعرف انى صاحب البيت

فى الوقت ده فكر هيوك ان مينى فعلا مكنش بيضغط عليه وانه كان عايزه يرجعله بارادته واختياره
هيوك : صدقنى انا مش بكدب عليك او بخدعك
تشولا : وانا ايه اللى يخلينى اصدقك ؟
هيوك اتنهد : انت تقدر تتاكد انى فعلا كنت بره البلد لمدة 6 سنين ومرجعتش فيها ولا مرة .. ولما عرفت معلومه الرجل اللى كان هيموت بعتلكو الرسالة من غير ما تعرفو انه انا .. وانا مكنتش مضطر اعمل كده لو مكنتش صادق فى كلامى معاك وانى مش راضى عن اللى بيحصل .. وبعدين انا لو كنت عايز ااذيكو كنت قدرت اعمل كده بمنتهى السهوله فى الفترة اللى كنت قريب منكو فيها بس انا معملتش كده بالعكس
تشولا اتعدل فى قعدته : بص يا هيوك .. انا هتكلم معاك بصراحة .. انا مقدرش اثق فيك وفى كلامك تمام بعد اللى حصل .. بس انا ليا وجه نظر فى الشخص اللى قدامى .. وانا مصدقك بالرغم من كل حاجة .. واتمنى انك متخيبش ظنى فيك
ابتسم هيوك : كوماوا هيونج .. وصدقنى انا قولتلك كل الحقيقة حتى انى مقولتش لدونى كل ده او لولو .. ومش هخيب ظنك فيا
تشولا : ودلوقتى هتعمل ايه مع اخوك ؟
هيوك ارتبك : انا هقولك على حاجة وياريت تسمعنى للاخر وتفهمنى

وبدا هيوك يقول لتشولا على خطته هو وكيونا .. سمعه تشولا لحد الاخر وبعدين اتكلم
تشولا بجدية : متفتكرش ان عشان سونغمين اخوك انى هسيبه .. لا العدل لازم ياخد مجراه
هيوك : هيونج تعالا نحسبها بالعقل .. انتو بقالكو قد ايه بتحاولو تمسكوه وتقبضو عليه ومش قادرين او عارفين توصلولو .. انا هحاول معاه مرة واحدة انه يتغير ولو حصل يبقى ده مكسب لينا وصدقنى مينى لو قال كلمة لازم ينفذها مهما كان .. ولو فشلت فى محاولتى انا بنفسى هساعدكو تقبضو عليه
سكت تشولا شوية وفضل باصص لهيوك بيقلب كلامه فى دماغه : انت كده بتصعب الامور عليا وعليك
هيوك : ادينى فرصة واحدة مش هنخسر حاجة ولو فشلت اعمل اللى انت عايزة مش هقدر اقول حاجة
تشولا فكر شوية واتنهد : تمام بس تبقى على اتصال دايم بيا تقولى كل حاجة اول باول ومحدش يعرف بلاتصال ده حتي كيونا
هيوك : اتفقنا

كان اليوم ده بداية امل جديد لهيوك طالما تشولا صدقه وهيساعده .. وده ممكن يغير تفكير دونى ولولو او ياثر عليهم حتى ولو بشكل قليل

----------------- 

BY

D&E

Lolo Adel  

Emy Tarek