Super Show
SS4
الأحد، 25 سبتمبر 2016
Super Show (SS4)
نيللي وهي بتسبل لشيون : فكرت فاسم للاغنية دي
شيون : اه .. يو
نيللي : نعم ؟
شيون : اسم الاغنية يو
نيللي : مالي ؟
شيون : هي دي فكرتها واحد بيقول لواحده انه مش قادر يبطل يفكر فيها فهيعمل كل اللي يقدر عليه عشان يخليها ليه حتى لو سحر
نيللي بحماس : يعني فيها اكشن وسحر وعفاريت وكده
ضحك على تفكيرها
شيون : لا مفيهاش هي رومانسية بس بطريقة مختلفة
نيللي : طريقة اقل سهوكة
شيون : هو انتي عندك كل الرومانسية سهوكة ؟! .. الرومانسية احساس جميل فعلاً
نيللي : اعذر تفضيلي للحياة الواقعية
شيون : طالما مجربتيش الرومانسية قبل كده يبقى تعرفي منين انهي احسن
نيللي وشها احمر جامد وبعدت عنيها عنه
نيللي : وانته ايشعرفك انته اذا كنت جربت الرومانسية وال .. احم .. الحب قبل كده ؟
شيون : عشان لو تعرفيه مكنتش قولتي عليه كده
حسب بوجع في قلبها من كلامه : معنى كده انك عرفته قبل كده صح
شيون : خلينا في الاغنية .. اقري المقطع ده كده وقوليلي رأيك
قامت منغير ماتبصله
نيللي : مش دلوقتي هقوم اشوف التدريب ماشي ازاي
سابته ومشيت وهي حاسة انها عايزة تعيط ملقتش حتة تستخبى فيها غير ورا المسرح فقعدت الرصيف كاتمة نفسها كعادتها اما تحس انها على وشك تعيط عشان تمنع نفسها مالعياط فجأة لقت اللي بيقعد جمبها
هيتش : وشك ازرق
نيللي : هيتشول .. مش المفروض تتمرن عالدرامز مع ...
هيتش : بريك
نيللي : اه طيب
هيتش : غريبة اول مرة تشوفيني ومتحاوليش تتهجمي عليا
ضربته فكتفه بغيظ
نيللي : ده على اساس اني ايه يعني
هيتش : هنستعبط
ضحكت غصب عنها من كلامه
هيتش : عارفة السبب اني وافقت ادخل الفرقة دي
نيللي : عشان النوم في الاستاد مش مريح فقررت تنام هنا
هيتش : ده ولسبب تاني .. عشان هنا هرتاح من لمة البنات حواليا بطريقة مزعجة
بصتله بإحتقار : مش اوي ياعم كازانوفا
هيتش : شوفتي عشان كده انا هنا مرتاح .. ندى مش من النوع ده من البنات وانتي ...
نيللي : انا مش بنات اصلاً خلاص قديمة
هيتش : لا .. انتي مركزة فحتة تانية
نيللي : نعم ؟
هيتش : متستعبطيش الكل عارف , انتي وشيون
نيللي : متزودش في الكلام وتفترض حاجات من دماغك عشان مزعكلش
هيتش : نيللي .. انا كيم هيتشول
نيللي : ايوه عايز ايه يعني
هيتش : اعترفي انتي معجبة بيه
نيللي : انته بتخرف
هيتش : فجأة قلبتي بنت ووشك بيحمر كمان لا انا كده اقلق بقى
قامت وقفت بعصبية
نيللي : ماشي انا معجبة بيه فيها حاجة دي مين ممكن متعجبش بشيون .. بس في النهاية الموضوع ملوش لازمة .. استحالة حد زي شيون يبقى سينجل اصلاً
هيتش : وانتي ايشعرفك ؟
نيللي : مش محتاجة كلام .. ده غير اني لما سألته توه في الموضوع
كيبوم : سينجل
نطط بفزع وبصت للي كان قاعد فوق الشجرة بيتفرج عليهم
نيللي : انته قاعد هنا من امتى ؟!
كيبوم : من امبارح ليه ؟
نيللي : هه ؟
كيبوم : شيون سينجل
نيللي : والباشا عرف منين ؟
كيبوم : انتي بتشكي فكلامي
هيتش : طالما بوم قال سينجل يبقى تصدقي وانتي مغمضة
نيللي : بوم ؟! .. انتوا اتلميتوا على بعض
بصله وضحك بسخرية
هيتش : غلبانة متعرفش حاجة
نيللي : طبعاً مانتوا من نفس الكوكب .. انته متأكد ان شيون ميعرفش حد ؟
هز راسه ( لأ ) بإبتسامة فأبتسمت بحماس
هيتش : استني متفرحيش اوي .. شيون سينجل اه بس مظبوط
نيللي : قصدك ايه ؟
هيتش : يعني اكيد مش هيحب واحد صاحبه
نيللي : ابتدينا قلة الادب
كيبوم : خليكي واقعية انتي قاعدة وسط اكبر شلة شباب في الجامعة والحمد لله كلهم سناجل ومع ذلك عمرك ماسألتي نفسك ليه ولا واحد فيهم فكر فيكي شمال
نيللي : عشان محترمين مثلاً
هيتش : او عشان هي اصلاً شمال
كيبوم : عشان انتى ياصاحبهم ياخوهم الصغير
نيللي : والنبي ماتسمعني خطبة الانوثة العصماء عشان محدفكش بطوبة دلوقتي
كيبوم : مش حكاية خطبة بس ركزي البنات اتخلقوا بنات عشان يبقى عندهم انوثة والراجل بيحب البنت الجدعة الجامدة اه بس برضو لازم يشوف فيها انوثة .. حب للرومانسية , يحس انه مسؤول عنها وانها بتفرح بوجوده مش اول ماتشوفه تلسعه على قفاه وتقوله يلا ناكل كبده
نيللي : مالها الكبده ؟
هان : هو ده كل اللي سمعتيه من اللي قاله
ريوو : دي اطول جملة يقولها حرام عليكي
يسونج : مفيش فايدة
نيللي بفزع : انتوا واقفين هنا من امتى ؟!
كانج : لما شوفت الكائن ده خارج وراكي جيت لقيتهم فقفايا
نيللي : وواقفين تتصنتوا
ليتوك : لا احنا بنسترق السمع
جومي : بس فعلاً عنده حق .. مين اللي ممكن يبصلك كده ده انا فيا انوثه عنك
كانج : انته فيك انوثة عن صافيناز
هنري : انا شايفك حلوة منغير حاجة
دوني : ده حوار +19 يابابا امشي من هنا
هيوك : مابوراحة عالواد
سونجمين : انا اللي خلاني احب سايون هو براءتها وانوثتها .. اد ايه كيوت وعسولة
شيندونج : بس يابابا روح حب فحتة تانية
نيللي صوتت : كفاااااااااااااية فضحتوني الله يخرب بيوتكوا , في حد تاني في الجامعة لسه معرفش , ماتروحوا لشيون وتقولوه بالمرة
ليتوك : عيب عليكي احنا اول مالقيناكي بتسيحي لنفسك وزعناه
نيللي : لا فيك الخير , يلا يا كلاب من وشي واياك اسمع حد بينطق كلمة في الموضوع ده
دوني راحلها بحكمة : نيللي لو احنا مظبطناكيش مين هيظبطك
نيللي : انته بالذات متتكلمش عن التظبيط
كانج : جرا ايه يارجالة احنا هنعمل فرح ماتتلموا
نيللي : عاجبك كده
كانج : ماهو بصي خلينا صرحا , انا لو لفيت الدنيا مش هلاقيلك عريس احسن من شيون .. الواد مستريح اوي
هنري : وطيب
لسه دوني هينطق حدفته بطوبة
نيللي : عرفت انه زفت خلاص عايزين ايه بقى
هيتش : يابنتي محدش هيعرف يظبطكوا مع بعض الا شلة المتخلفيين دول
نيللي بعصبية : محدش له دعوة بيا ولا بأي حاجة تخصني واللي هعرف انه فتح الموضوع ده بأي شكل ليلة اهله سودا
سابتهم ودخلت المسرح تاني
ريوو : هي قفشت ليه
هيوك : كسوف بقى وكده
ليتوك وقف قصادهم
ليتوك : يارجالة , نيللي ملهاش غيرنا وعيب اوي نبقى كلنا اصحابها والبت شايلة همنا ووجع دماغنا ولابسة في الحيطة 24 ساعة بسببنا ومنساعدهاش في محنة زي دي .. انا من موقعي هذا وكأكبر واحد فيكوا والعقل المدبر هنا بقول ان تظبيط شيون مع نيللي بقى اولوية زي المسابقة بالظبط .. مين معايا
هتاف جماعي بحماس حتى هيتش وكيبوم صقفوا مش حماس اد ماهما متخيلين هيستمتعوا اد ايه بالهبل اللي هيحصل
ليتوك : في حد ناقص .. فين كيو ؟
جومي : جوا مع ندى اصله قرر ان الاغنية بتاعته محتاجه سولو بيانو فبيتفق معاها
جوا المسرح كيو واقف بيتفرج على ندى وهي بتعزف وبيحاول يجمع كلمتين على بعض يقولهم بس مش عارف لحد ماخلصت
ندى : ايه رأيك ؟
كيو : تـ حفة .. جميل جداً
ندى : ده جزء من العرض اللي بنحضرله
كيو : اكيد هيبقى جميل
ندى : وانته ايه اخبار السولو بتاعك
كيو : حلو تمام تمام
عايز يكمل بس الكلام مبيخرجش
كيو : في الحقيقة كنت عايز .. عندي طلب , هو اقتراح عموماً
ضحكت على خجله اللطيف ده
ندى : مالك قول في ايه ؟
كتم نفسه وطلع كله مرة واحدة : كنت محتاجك تعزفي البيانو في السولو بتاعي
ندى ببساطة : تمام ماشي
كيو : بس كده ؟ يعني موافقة ؟
ندى : اه عادي وريني الاغنية ونحطلها اللحن عالبيانو سوا , اصلاً هتبقى حاجة جميلة جداً عشان انته صوتك ممتاز متخيلة بقى لو على بيانو هتبقى تحفة
ابتسم بسعادة وطلعلها عالمسرح ومعاه الكشكول بتاع الاغاني فوسعتله عشان يقعد جمبها على بنج البيانو .. بتردد قعد وهو حاسس ان قلبه هيسيبه ويجري .. فتحت الكشكول وبدأت تقرا كلمات الاغنية
ندى : " 7 YEARS OF LOVE " اسمها مميز اوي
كملت قراية وهو قاعد جمبها وايده بتعرق ولا كأنه في امتحان ثانوية عامة , ده حتى في امتحان ثانوية عامة كان هادي ورايق عن كده , لحد ماخلصت
ندى : هو انا لو قلتلك ان دي اجمل حاجة قريتها فحياتي هتفتكر اني ببالغ صح
كيو : بصراحة اه
ندى : تبقى مش مقدر انته كاتب ايه .. ازاي قدرت تحط قصة كاملة بالشكل ده في اغنية وبالتفاصيل والمشاعر والوصف كأنك .. كأنك عشتها بجد
الجملة الاخيرة كانت سؤال
كيو : انا بس .. حسيتها .. يمكن مش فكرة الاغنية بالظبط بس الاحساس , احساس انك تبقي بتحبي حد بس عارفة انكوا صعب جداً تبقوا لبعض .. تخيلتها بالشكل ده
ندى : وليه تتخيلها بالشكل ده بالذات ؟ كان ممكن تخليها اعتراف بالحب مش حب وفراق
كيو : ممكن نقول خيالي المريض
ندى بضحك : قصدك خيالك النكدي .. هو الكل راح فين ؟
كيو : مش عارف تقريبا هيتشول كان بيتحرش بنيللي ورا المسرح فراحوا يقتلوه متاخديش فبالك
ندى : طب يلا نبتدي نلحنها
كيو : بسرعة كده
ندى : متحمسة اسمعك بتغنيها بصراحة
ضحكوا وابتدوا يحطوا اللحن سوا عالبيانو وهيتش وكيبوم بيتفرجوا من بعيد
كيبوم : love in the air
هيتش لبس القناع الاسود بتاعه
هيتش : شوفلك واحد انته كمان لا تلقط العدوى
دوني : استنى ياسطا انا مش فاهم المثلث ده جه منين ؟!
هان : ارحم امي ده في المعطيات يا بابا هيبقى مرسوم في السؤال
هنري : طب هو احنا ليه منجيبش رئيس كوريا الشمالية مع رئيسنا ويقعدوا قعدة صلح حلوة وياكلوا طبق دوكبوكي ونعرف فين اساس المشكلة
هيوك : او كيمباب
ريوو : انا عليا ساندويتشات ...
كيو : كفااااااااااااااية اسمعوا واكتبوا وانتوا ساكتين واللي بشرحه تحفظوه وبس
كانج : انا مش عاجبني الكلام ده
شيون : كلام ايه بس اللي مش عاجبك
كانج : انته عايز تقنعني ان الارض بتلف يعني انا انام في سيؤل اصحى الاقي نفسي في موزمبيق مثلاً
نيللي : هتشل الراجل يابعيد اخرس
ليتوك : فين كيبوم ؟
ريوو : سؤال غبي جداً
ليتوك : اسف
دوني : هببت ايه ؟
هيوك : نفس اللي بهببه من اول السنة
يسونج : انا هسقط وش
كانج : بتقول كده كل سنة يا واطي
هان : انا لو كنت حالل السؤال ده صح فعلاً يبقى في امل اجيب تقدير محترم
ريووك : ايه ده هو السؤال ده اجباري ؟
هان : ريووك .. مفيش اسئلة اختياري اصلاً
ريووك : احيه
نيللي : خلاص يا رجاله لا يفيد البكاء على اللبن المسكوب
دوني : ومين ابن الجزمه اللي سكبه
نيللي : انته ضارب حاجة مش كده
دوني : اخر يوم وبحتفل بقى خليكي حنينة
نيللي : ما علينا المهم دلوقتي احنا داخلين على اوقات حاسمة المسابقة كمان اسبوعين ولازم نلحق نظبط نفسنا بقى اشطه
ليتوك : طب مش نخرج خروجة الاحتفال بنهاية الامتحانات الاول
كانج : معاك فلوس
ليتوك : لا
كانج : حد معاه فلوس
بصوت واحد : لا
كانج : يبقى اخرس
شيون : انا عازمكوا
لحظات صمت وهما متنحينله
ليتوك : انته عارف اننا 15 بغل ومعزتين صح
كانج : انته حاسب سوسن وشيني معانا ؟
ليتوك : دول مالعيلة يا راجل
شيون : عارف هنتعشى كلنا النهاردة سوا على حسابي
هيتش : شيون قلتلي بابا بيشتغل ايه
فجأة كانج وليتوك عملوا ريا وسكينة حوالين نيللي
كانج : الواد ده ميضعش من ايدك
ليتوك : لو عليا هقلب بنت واتجوزه بس الموضوع اسهل بالنسبالك ومش محتاج عمليات .. تقريباً
كانج : ده اللي هيعيشك متستتة
نيللي : وانته شايفني بشحت في الاشارات
كانج : انتي عايشة عالة علينا كلنا
نيللي : عشان انا البنت ولازم تعزموني
ليتوك : واشمعنى فدي معترفة انك انثى
هان : بتتوشوشوا فأيه
كانج : لازم نجوزهم لبعض
هان : اتلموا بقى
سحبها من وسطهم بأعجوبة
شيون : يلا تحبوا تاكلوا ايه
كيو : انا .. مش هقدر اجي معاكوا
شيون : ليه ؟
هيوك : بتذاكر في الصيف كمان
كيو : لا بس ...
شيون : مفيش بس كلنا خارجين
بالنسبة لكيو فهو لسه ميعرفهمش ومتعودتش عليهم وهو عمره ماتعودت يقضي وقت مع حد ميعرفوش .. او يقضي وقت مع حد اصلاً
ندى : كيو .. تعالا معانا , مش هتبقى الخروجة حلوة منغيرك
الا لو كانت ندى
كيو : طـ طيب
ليتوك : اشطه جداً يلا بيناااااااااااا
وبرغم ان شيون حاول يعزمهم في مطعم محترم الا انهم اصروا ياكلوا في اعفن مطعم فيكي يا كوريا كنوع من الحفاظ على التراث , وكانت ليلة كارثية كلهم مسطولين منغير مايشربوا اي حاجة الموضوع ابتدى بالضحك على ذكريات طول السنة واول ماعرفوا بعض نزولاً الى النكت الابيحة وانتهاءاً بالرقص عالتربيزات لحد ماصاحبة المطعم كانت هتبلغ عنهم لولا ان شيون قالها تسيبهم يعيشوا وهيدفعلها زيادة
ندى : شلة مجانين بجد
كيو وهو مش قادر يمسك نفسه مالضحك : دول مساطيل مش مجانين
ندى : انا اول مرة اشوفك بتضحك .. علطول بتبقى حاطط عينك في الكتاب او بتكلم الدكاترة والمعيدين
الاكل وقف فزوره تقريباً وهو باصصلها .. ده معناه انها كانت شايفاه طول الوقت فعلاً
ندى : تصدق دي اول مرة اشوفك قاعد مع شلة اصلاً علطول قاعد لوحدك او بتذاكر لحد
دي مش شايفاه وبس دي مركزة .. تقريباً قلبه وقف
كيو : ا .. اه , اصلي .. معنديش اصحاب كتير
ندى : ليه ؟
كائن الكيوهيون من النوع اللي استحالة يتكلم عن نفسه ويشكي مشاعره الداخلية لكن قصاد بصتها دي حس انه مستعد يحكيلها تاريخ حياته ويعيط كمان يمكن تطبطب عليه
كيو : من صغري اتعودت عالمذاكرة وبس , كل اللي كانوا بيقربولي عشان يستفادوا مني عشان كده اما كبرت قررت اني لوحدي احسن .. في الحقيقة دي اول مرة اخرج مع شلة ونقعد القعدة دي
ندى : شوفت اول خروجة ليك مميزة ازاي , معتقدش ان ده يوم ممكن يتنسي
كانت بتتريق وهي باصة للمجانين اللي بيرقصوا عالترابيزات على اغنية بنات مشهورة .. وهو كان باصصلها هي بس
كيو : فعلاً .. عمري ماهنساها
ومعانا عالخط الكوبل التاني بسرعة , نيللي واقفة فوق تربيزة بلا اي خجل بتغني بأسوأ صوت ممكن يتسمع اغنية ما وكلهم بيصقفوا حواليها ولا كأنها اديل فزمانها حتى شيون مسخسخ مالضحك على اد ايه جنانها لطيف , ميعرفوش ان في عقول اجرامية شريرة بتتفرج من ورا
هيتش : بعيداً عن الرومانسية الاوفر اللي هناك .. ايه رأيك نسيب الاتنين دول في هبلهم كده ؟
كيبوم : وليه لما ممكن نحرك الاحداث شوية .. بصراحة مش مستحمل صوتها اكتر من كده
هيتش : يبقى نخرسها خالص
غمزتين وكده اتشرحت الخطة وكل واحد خد موقعه , شيون وسط الدوشة محسش باللي بيحركه ويسنتره قصاد التربيزة بالظبط وعلى صعيد اخر هيتش ادى التربيزة ركلة حرة مباشرة طيرتها من تحت رجلين نيللي اللي فجأة لقت نفسها نازلة على وشها .. وسكت كل حاجة .. لحظات من الصمت وهي مغمضة عنيها بتحاول تستوعب صوت الدق اللي تحتها ده ايه لحد ما ادركت .. انه صوت دقات قلب , بفزع فتحت عينيها لقت وشها فوش شيون لا يفصل بينهم سوى مناخيرها اللي اول مرة تحس بالسعادة لأد ايه هي كبيرة وفنفس الوقت اد ايه نفسها تقطعها وتحدفها فأي حتة دلوقتي .. كان باصصلها بس وتكاد تشعر بدراعاته حوالين وسطها
شيون : انتي كويسة ؟
قمة الغباء ان حد يسأل السؤال ده لواحده مسطحة فوقه ووشها شبه الطمطاية وعنيها على وشك تقع من مكانها ونفسها مكتوم اطول من اللازم
ليتوك بتعبير اعمل نفسك متفاجئ : ايييييييه داااااااااااااااااااا
كانج بنفس التعبير : انا مش مصدق اللي انا شايفة
دوني : فضييييييييييييحة
كانج : اقول لأخوكي ايه دلوقتي اودي وشي منه فين
نطت 8 متر بعيد عنه وهي بتزعق
نيللي : هو ايه اللي تقول ايه لمين فين وعشان ايه انته مش شايف ايه اللي حصل ولا ايه
هيوك : فزورة اليوم كام " ايه " اتقالت في الجملة دي
شيون قام ينفض نفسه
شيون : احم المهم انك كويسة الحمد لله انك موقعتيش عالارض
نيللي : اه شكراً طيب ماشي
هنري : مبتجمعش
شيني : لا يا حبيبي دي بتسف
نيللي : عموماً اصلاً الوقت اتأخر انا هرجع عشان المواصلات
شيون : تحبي اوصلك
نيللي : لاااااااااااا .. انا بحب الاتوبيسات اوي
كانج بيغمز : ليه يا نيللي ماتخليه يوصلك
نيللي : اتلم بدل ما ...
تشانيول : ايه ده شلة الفشلة متجمعة فمكان واحد
اتلفتوا لقوا ام الشلة اللعينة واقفة عند باب المطعم ببصات القرف التي لا تفارق وشوشهم
هان : الليلة اتضربت
بيكهيون : لا وعددهم زاد كمان , اومال فين الليدر بتاعتكوا
كريس : دور على ارجل واحد فيهم
كانج : وحيات ...
هان مسكه قبل مايتهور
هان : امسك نفسك
كريس : ايه اخبار التمرين ناويين تسحقونا برضو
نيللي : تحب تراهن على كده
كريس : معتقدش انك عندك حاجة تستاهل اراهن عليها
شيون : شباب الوقت اتأخر ومعانا بنات يلا نمشي
كاي : هما فين البنات دول
سوهو : لقيتها
شاور على ندى بإبتسامة صفرا
كريس : اوكى اعترف , يمكن جامعتكوا مش مضروبة اوي
كيو قام يطلع مصراينه ندى مسكته بسرعة
ندى : بلاش هما قاصدين يستفزونا
تشانيول : شباب خلينا في الشغل , بما ان عددكوا زاد فجأة كده اقدر اقول ان ده فريقك مش كده
نيللي : عندك مشكلة مع الموضوع ده
تشانيول : اطلاقاً , من حق كل واحد انه يلعب شوية .. ايه ده انا عارف الاتنين دول
شاور على جومي وشيني
بيكهيون : الاتنين المدربيين يابني مش فاكرهم
كاي : بتهزروا دول المدربين بتوعكوا .. لا لا كفاية تريقة يا جماعة اظن ان اللي هما فيه كفاية
كانج : انته عارف اننا ممكن ندفنكوا هنا مش كده
كريس : اتفضل وريني
اتجمعوا وكل واحد ناوي يخلص عالتاني قبل ما ليتوك يلحق الموقف
ليتوك : كفاية , كيو وصل ندى البيت .. شباب يلا نمشي عندنا تدريب الصبح الموضوع ميستاهلش
كانج : متدخلش انته
هان : كانج كفاية .. الموضوع فعلاً ميستاهلش
نيللي : خناقنا ورهانا مش هنا , عالمسرح يوم ماهتقفوا وتعتذروا علني
كريس : ثقة رهيبة
ليتوك : شباب يلا
بمعجزة قدروا يهدوا فعلاً ويروحوا ناحية الباب
تشانيول : ياريت متنسوش حفلة الاتحاد , بما انكوا مشاركين في المسابقة اتوقع تحضروا
مهتموش بكلامه وخرجوا بغيظ لحد مابعدوا
كانج : كنت سيبني عليه كنت هـ ...
هان : هتتمسك بتهمة الاعتداء يا متخلف
سونجمين : ايه حفلة الاتحاد دي ؟
جومي : اتحاد الجامعات بيعمل حفلة في نهاية كل سنة للجامعات اللي داخلة المسابقة يعني كنوع من كسر العداوة وتنمية الروح الرياضية والهبل ده
شيندونج : بس في الحقيقة بيبقى الهدف منها ان الفرق ترعب بعضها مش اكتر وفي منهم اللي يعمل اتفاقات عشان يوقعوا فرق تانية
ريووك : ودي المفروض نروحها
ليتوك : لازم نروحها .. دي اللي بيتسجل فيها اسامي الفرق اللي داخلة
كيو : كلنا هنروح ؟
ليتوك : اه
كانج : انته عايزني اشوف العيال دي تاني
شيندونج : مش تشوفهم وبس ده انته هتشوفهم وتتكلم معاهم وتستحملهم للاخر لأن اللي بيتخانقوا في الحفلة دي بيخرجوا برا المنافسة اومال انته فاكرهم فكروكوا عشان نفسهم يشوفوا اشكالكوا بالبدل مثلاً
دوني : احيه بجد بقى
نيللي : هو ايه اللي احيه ؟ هنروح ولا يهمنا وهنتعامل بكل هدوء كمان ولا هنسيبهم يهزونا , احنا متعبناش كل ده عشان شلة سيس زي دي توقعنا , الحفلة دي امتى ؟
ليتوك : الخميس الجاي
هيوك صرخ : ده اللي هو بعد بكرا
نيللي : انته بتستعبط ازاي مقولتناش على حاجة زي كده
ليتوك : كنت هقولكوا في التمرين بكرا
هيتش : انته عبيط
شيون : بس مش وقت هبل الموضوع مش كبير احنا هنروح نقدم نفسنا ونسجل وبس ايه المعضلة
هزوا راسهم باستسلام
شيون : يلا كل واحد يروح يرتاح عشان بكرا نشوف هنعمل ايه , نتقابل في المسرح
ودعوا بعض وكل واحد مشي فطريقه وشيون وصل نيللي بعربيته
نيللي : انا قلقانة
شيون : مفيش داعي للقلق .. انت ادها يا نيللي
اتلفتتله .. ببشرته السمرا بإبتسامته المشعة بغمازاته القاتلة بالعربية لوحدهم والدنيا ضلمة وجو مناسب لكل الافكار الدنيئة اللي خلتها تقريبا تخرج من شباك العربية
نيللي : شكراً عالتوصيلة سلام
وجريت على بيتهم قبل ماتبلعه بعد ماذكرى وقوعها فوقه خبطتها فنفوخها فجأة
الاشتراك في:
تعليقات الرسالة (Atom)
ليست هناك تعليقات:
إرسال تعليق