With You .. patr 03

With You .. Part 03

تاني يوم راحت دومي الكليه لاقت اصحابها قاعدين مع بعض وبيتكلمو
نورين : اتاخرتي ليه ؟
دومي : راحت عليا نومه
هيومي : افتكرت انك مش هتيجي غير على معاد المحاضره على طول علشان متسمعيش الحلقه
بصتلها دومي : انا وعدته اني هسمع الحلقه و انا مش برجع فى كلامي
دوني رفع ايده : وانا اشهد لدومى بكده انها قد كلامها فعلا
بص كيونا لدوني بقرف : محدش طلب رايك
هيومي : خلاص خلاص تعالي اقعدي الحلقه هتبتدي

قعد البنات و دوني يسمعو الحلقه

هيوك : النهارده هنتكلم عن الفضول
كل انسان فينا اكيد حصل معاه موقف اثار فضوله .. كلمه اتقالت .. حركه اتعملت .. بس عمرك قابلت شخص كله علي بعضه بيثير فضولك .. كل حركه يعملها .. كل كلمه يقولها .. ضحكته او حتي حاله دخل فيها .. ده بيخليك تفكر فيه طول اليوم .. عايز تعرف ايه سبب اللي بيعمله .. طب عمرك حاولت تثير فضول حد معين… و تثيره ازاى ؟

و انا مستني رسايلكم علشان اعرف رئيكم

اول رساله من ولد : الانسان بطبعه فضولي .. كتير بيثير فضوله حركه او كلمه .. بس مش كل حاجه بتثير الفضول بيكون ليها سبب او مقصودة .. يعنى اوقات بتكون حركه عفويه من شخص مكانش قاصد بيها اي حاجه
هيوك : بتفق معاك فى وجهه نظرك زي ما الانسان من طبعه الفضول كمان من طبعه تضخيم الامور .. و ممكن يثير فضوله حاجة مش مقصود بيها اي حاجه

رساله تانيه من بنت : عايز تثير فضول حد .. خليك غامض .. دي اسرع طريقه تثير بيها الفضول .. زي ما انت ثاير فضولي .. انت مين ؟
هيوك : انا مقدم الاذاعه الصباحيه و كفايه كده علشان افضل ثاير فضولك

رساله من بنت : يا تري انت عندك اللي بيثير فضولك ؟
هيوك : زي ما قالت اول رساله الانسان بطبعه فضولى

فضلت رسايل كتيرة تيجى لهيوك وهو يرد عليها .. بعد ساعة خلصت الحلقه وراح بعدها البنات و دوني يحضرو محاضرتهم .. راح هيوك للمكان اللي بيقعدو فيه على طول ملقاهمش فعرف ان عندهم محاضره قعد استناهم لحد ما خرجو و راحو يقعدو مكانهم اول ما نورين و هيومي شافوه راحو عليه بسرعه و دوني و دومي فضلو مشاين براحتهم لحد ما وصلو عند هيوك

كيونا : هو ايه اللى مقعده مكانا
راح دونى لهيوك : هيوك ايه اخبارك ؟
هيوك : تمام اخباركم كلكم ايه ؟
الكل : تمام
هيوك بابتسامة :  شكلها بقت حاجه اساسيه اني اسالكم عن رايكم فى الحلقه .. ايه رايكم بقي؟
هيومي : تجنن
نورين : اكيد حلوه
هيوك بص لدومى : وانتي يا دومي تفتقر للواقعيه بردو ولا تمام كده ؟
دومي : مممم .. الفضول هو اه حاجه موجوده و طبع فى الانسان بس مش لكل الناس

وقف الكل بصلها باستغراب
هيوك ميل راسه : ازاى يعنى ؟
دومي : الرساله اللي جت وبتقول كل انسان بطبعه فضولي انا مش معاها .. فى ناس مفيهاش حته الفضول دي
هيوك : ممممم طيب انتي قابلتي حد من الناس دى
هزت دومي  راسها : اها

خبطتها هيومى ونورين فى دراعها وراسها

بصتلهم دومى  هما الاتنين : ياااااا انا بقول راى زى مانا شيفاه
ربع هيوك ايده : طيب و انتي ايه بيثير فضولك ؟
رجعت دومي بصتله تانى  : انا من الناس اللي مفيش حاجه بتثير فضولي
هيوك : الطبع فى الانسان مش بيتغير .. فى حاجات تلاقيها فى الناس كلها زي الطيبة .. العصبيه .. خفت الدم .. الزعل .. الفضول .. بس كل انسان و شطارته انه يقدر يداريها و بتبقي مستخبيه جواه .. او يخليها ظاهرة .. او انه يقدر ينميها لو وجودها قليل جواه

كيونا : هو انت مذيع ولا محلل نفسى
دومي : يعني ايه ؟
هيوك : يعني انتي انسانه فاكيد الفضول جواكي .. اكيد كنتي فضوليه عن حاجه قبل كده و لو حتي مره واحده فى حياتك .. فكري كويس
فكرت دومي شويه و بعدين بصت لكيونا و قالت : الاشباح

بصلها الكل عليها باستغراب…  معادا كيونا اللي بصلها بابتسامه

هز دونى راسه يمين وشمال : انا قولت من الاول انك مش طبيعية .. مش لاقية غير الاشباح هى اللى تثير فضولك ؟
ابتسم هيوك بخفة : شفتي مش قولتلك…  ايه بقي اللي بيثير فضولك ليها ؟
دومي : الاشباح عايشه معانا طول الوقت بس احنا مش عايزين نصدق الموضوع ده .. ومش عايزين نفتح باب التواصل بينا وبينهم  .. ولو حد قال انه يتكلم عنهم بيعتبروه مجنون او مريض نفسى او على الاقل اعصابة تعبانه

هيومى : دومى قولى كلام معقول .. اشباح ايه اللى بتتكلمى عنها

دومى : وايه الغلط فى كلامى .. انا بقول حقيقة محدش بيحب يعترف بيها

نورين : وانتى شفتى اشباح قبل كده عشان تصدقى انهم موجودين

بصتلها دومى وسكتت محتارة تقول انها بالفعل بتشوف شبح كيونا وعايشة معاه .. ولا تنكر ووقتها ساعتها كلامها هيكون ملوش اساس

فى وقت ما هيومى ونورين بيكلمو دومى كان هيوك عمال يفكر وهو باصص ومركز قوى على دومى

هيوك فى سره : انا مش فاهم ايه اللى فى دماغك وبتفكرى فيه .. بس كل مرة بشوفك او اكلمك لازم تحصل حاجة تثير فضولى عنك .. حاسس ان فى حاجة تانية جواكى مش بتظهريها بس مش قادر اوصلها او افهمها .. ومش هستسلم غير لما اعرفها .. وابتسم جواه بسخرية : وقعتى فى واحد مش بيسكت غير لما يوصل للى هو عايزة

خبط ايده فى بعض عشان يوقف الكلام بين هيومى ونورين مع دومى
بص هيوك على ساعته :  انا لازم امشي لان محاضرتي هتبتدي .. وبص لدومي : اسمعي حلقه بكره اكييييد هتعجبك وممكن تلاقي اجابات لحاجات فى دماغك او علي الاقل هتفيدك بما ان الكلام هيبقى مع مستعمين كتير .. وشاورلهم بايده وسابهم و مشى

فضل كيونا باصص على هيوك : يعني ايه اللي هو قاله ده ؟
هزت دومي راسها بمعني معرفش
وقف كيونا قدامها وبصلها : بس بردو مش هتسمعيها
دومي : اييييشششش
دوني بص علي دومي : مالك
هزت دومي راسها  : لا مفيش حاجه… يلا علي المحاضره علشان نخلص

راح الكل علي محاضرتهم وبعدها راحو علي الكافيه مع دومي
وكالمعتاد فضلت تتكلم هي و كيونا وبس .. متكلموش عن هيوك لحد ما روحو البيت وقعدت دومى على الكنبة
قعد  كيونا جنبها وهو باصص قدامه : هتسمعي هيوك بكره ؟
دومي هزت راسها : اها
اتنهد كيونا ورجع راسه لورا : انتي بقيتي تخلفي وعدك معايا
بصتله دومي : مش بخلفه بس عايزه اعرف يقصد ايه … انت كمان عايز تعرف
كيونا بنفس وضعيته : مش عايز اعرف حاجه .. الوقت ده المفروض بتاعي
حركت دومي ايدها قدام عينه عشان يبصلها وفعلا بصلها : انا وقتي كله بتاعك .. وانت عارف اني مش مهتمه باي حاجه تانية تشغلنى عنك ..بس مفيهاش حاجه لو غيرت شويه من روتيني
بعد كيونا عينه عنها : اعملي اللي تحبيه
قامت دومي وقف قدامه ونزلت نفسها لمستواه عشان يبصلها : كيونا حبيبى .. انا مش هعمل حاجة الا لما انت توافق عليها
كيونا بهدوء وهو باصصلها : لو موافقتش هتزعلي .. و انا مش حابب ازعلك .. خلاص اسمعي حلقه بكره
دومي ابتسمت بسعادة  : كوماو كيونتي

تاني يوم فى الجامعه الكل كان قاعد بيسمع الاذاعة وتحديدا حلقة هيوك

 
هيوك : كلامنا النهارده عن الاشباح
ممكن تكون الكلمه مخيفه لبعض الناس .. وتافهه لبعض الناس .. بس اساله كتير بتيجى فى دماغنا لما تيجي سيرتهم قدامنا … يا تري في اشباح فى الحقيقة .. يا تري في ناس فعلا شافتهم .. ولا ده خيال بعض الناس و نسجته في قصص تحكيها وقت حفلات السهر .. ايه اللي يخلي شبح يظهر للانسان .. هل لازم يكون في علاقه تربيطهم ببعض مثلا اصحاب او قرايب او احباب علشان كده بيظهر و بيبقي فى اتصال بينهم و بين بعض .. ولا دي بسبب ظروف معينه ظهر فيها الشبح لشخص و الاتنين ميعرفوش بعض .. هل ممكن بعد كده يكونو اصحاب ولا الشبح بيكون للاذيه بس زي افلام الرعب … ياتري الشبح بيظهر بملايه بيضه عليه و تجويف عين اسود… ولا بيظهر زي كاسبر شفاف .. ولا علي هيئه انسان عادي… اسئله كتييييير بتبقي فى دماغي و اكيد عندكم اسئله اكتر .. مستني رسايلكم كل واحد يقول رايه عن الاشباح و يا تري بيؤمن بيها او لاء ؟

الرساله الاولي : انا مش بؤمن بوجود الاشباح او ان شخص ممكن يشوف شبح شخص تاني .. يعني ايه واحد مات وانا اشوفه بعد كده قدامي .. راي ان دي مجرد حكايات وخيال
هيوك : كل واحد ليه رايه… ضحك بعدها .. بس خد بالك ليجولك بليل و انت نايم وينتقمو من كلامك ده

رساله تانيه : انا من اللى بيؤمنو بالاشباح حتي سمعت وقريت روايات كتير عنهم .. وراي ان كل شبح بيظهر بيكون ليه سبب مختلف
هيوك : سمعتي روايات بس معشتيش واحده .. ده مش دليل انها موجوده بس ده رايك ولازم نحترمه

رساله ثالثه : الشبح بيظهر بسبب حاجه كانت ربطاه بالعالم بتاعنا ولسه مخلصهاش .. و بيحاول انه ينهيها باي طريقه ممكنه .. وممكن الطريقه دي بتوصل انه ياذي البشر
هيوك : الفكره دي حاجه مخيفه ان كل واحد ليه حاجه فى العالم مرتبط بيها يقدر يظهر بعد كده على هيئه شبح .. الفكره فى حد ذاتها كافيه بانها ترعب الناس

وبعد الحلقه ما خلصت اخد هيوك راي هيومي و نورين و دوني فى الحلقه .. وبعدها دخل فى نقاش مع دومي بسبب الحلقه بعد النقاش ده اقنعها انها تسمع حلقه تاني يوم .. و فضلو علي الحال ده كل يوم يدخلو فى نقاش بعد كل حلقه و تنتهي باقناعها بسماع الحلقة الجاية ..

 بالنسبه لهيوك من نقاشه مع دومي بقت تيجيله افكار للحلقات اللي بعد كده .. وبقى بيقدر يثير فضول دومي .. ايه اللي هيتكلم عنه الحلقه الجاية و ايه رايه الشخصى فى موضوع  الحلقة .. و مع الوقت اخدو على بعض و بقو يقعدو مع بعض كتير ..

بالنسبه للبنات و دوني بقو مستغربين من دومي انها اخدت علي هيوك و بتقعد تتكلم معاه لانها عمرها ما عملتها فى الفتره اللي قضوها مع بعض فيها .. حتي هما كان فكرة انها تتعرف عليهم شبه مستحيله وده بالنسبه ليهم تغير هايل فى شخصيتها ..

بالنسبه لكيونا كان متضايق بسبب كلامها مع هيوك وانها دايما بتسمع البرنامج وتفضل تتكلم مع هيوك كتير .. و انها مش بتنفذ الي بتوعده بيه انها مش هتسمع الحلقات تاني .. بس كانت بتقدر تصالحه بسهوله .. وتعوضه فى يوم اجازتها انها تبقى معاه هو بس حتى مش بتكلم اصحابها فى التليفون

وفى يوم من ايام الاجازة صحيت دومى كالعادة على صوت كيونا الفرحان خصوصا فى ايام الاجازة دى .. وطبعا فطرت وقضت اليوم ده الصبح مع كيونا فى البيت بيتكلمو وكيونا يفضل يناقر فى دومى .. وبالليل خرجو عشان يجيبو ملابس لدومى .. دخلو محل وكانت دومى بتدور على جاكت كويس تجيبه وكيونا عمال يبص على حاجات تانية

دومى ماسكة جاكت ابيض فى ايد وماسكة جاكت احمر فى الايد التانية محتارة تجيب اى واحد منهم وعمال تبص عليهم

دومى بصوت واطى عشان محدش يسمعها غير كيونا : كيونا انهى احلى الابيض ولا الاحمر ؟

كيونا كان عمال يبص على البنات اللى فى المحل : حلوين

دومى رفعت عينها عشان تبص لكيونا : يعنى اجيب اى واحد منهم ؟

وطبعا بعد ما رفعت عينها وشافت كيونا عمال يبص على البنات راحت وقفت قدامه وبصتله بنظرات حادة .. ابتسم كيونا ابتسامة بلهاء وبصلها .. وهى سابته ومشيت راحت وقفت مكانها تانى قدام الجواكت

راح كيونا وقف جنبها : ايوة بقى كنتى بتقولى ايه ؟

عضت دومى شفايفها بغيظ وشاورتله بعينها انه يجى وراها .. دخلت اوضة تبديل الملابس وقفلت الباب وطبعا كيونا دخل من وسط الباب

دومى بصوت واطى بس فى نفس الوقت عصبى : مش هتبطل تبص على البنات كل ما نخرج .. وبعدين انا كنت بكلمك واخد رايك وانت مش مركز معايا خالص

كيونا طلعت فى عينه نظره خبيثة : بتغيرى ولا ايه ؟

دومى : اه طبعا بغير .. بغير عشان بحبك

ابتسم كيونا وقرب منها : انا كمان بحبك .. وبحب اشوف غيرتك عشان كده ببص على البنات عشان تظهر غيرتك دى

دومى بصتله بغيظ وودت وشها ناحية الحيطة

ابتسم كيونا وراح وقف قدامها ف الحيطة ونزل راسه لمستوى راسها لانها اقصر منه : خلاص متزعليش .. وبعدين هو انا هقدر اكلم حد تانى غيرك .. اصلا مفيش غيرك شايفنى

بصتله دومى : يعنى لو كانو شايفينك كنت اتكلمت معاهم وعملت اكتر من كده كمان

هز كيونا راسه : انا مش عايز اشوف ولا اكلم حد غيرك ومش عايز حد يشوفنى ولا يكلمنى غيرك .. انتى عندى كفاية

ابتسمت دومى لانها عارفة ان دى الحقيقة .. لان كيونا لما كان عايش كان بيحب يخليها تغير بس عمره ما اهتم بحد ولا كلم حد تانى غيرها .. رفعت الجاكتين قدامها : قولى بقى اختار الابيض ولا الاحمر

اتعدل كيونا وحط ايده تحت دقنه وبص عليهم : امممممم .. الاتنين حلوين

دومى : يا سلام .. مانا عارفة وعشان كده باخد رايك لانى محتارة بينهم

شاور كيونا على الاحمر : الاحمر حلو وانتى دايما كان نفسك تجيبى جاكت احمر يبقى محتارة ليه ؟

دومى : لان الابيض كمان شكله حلو

كيونا : متحيرنيش معاكى .. اختارى اللى انتى عيزاه

دومى : اطلع بره .. انا غلطانة انى باخد رايك

كيونا : خلاص هطلع بس انا عارف انتى هتجيبى ايه .. قررى بسرعة وانا واقف بتفرج بره .. وسابها وخرج

بصت دومى على الجاكتين وبعدها بصت للمراية وكلمت نفسها : هيتفرج على ايه ده بره ؟؟

وبعدين افتكرت انه هيخرج يتفرج على البنات راحت خارجة وراه بسرعة اشترت الجاكت الاحمر وخرجو من المحل

كيونا ماشى جنبها وايده فى جيوبه : يعنى اشتريتى الاحمر زى ما قولتلك فى الاول

دومى : لانى ملحقتش افكر كويس .. عشان خرجت بسرعة ورا واحد عينه زايغه بيحب يتفرج على البنات

ضحك كيونا وبعدين وقف

بصت دومى عليه .. لاقيته بيبصلها بخباثة .. وفى نظره غريبة فى عينه

دومى : مش مرتحالك وقفت ليه ؟

شاور كيونا على محل : تعالى ندخل هنا 

بصت دومى على المحل اللى كيونا شاور عليه وفجاه شهقت وفتحت عينها على الاخر لانه كان محل ملابس داخليه حريمى : ياااااااا منحرف .. وسابته ومشيت بسرعة

فطس كيونا من الضحك على منظر دومى وراح بسرعة وراها : تعالى بس ندخل ولا انتى مش محتاجه تجيبى حاجة منهم ؟.. دول هيبقىو عليكى حلوين قوى

حطت دومى ايدها على ودانها ووشها احمر : منحرف .. منحرف .. منحرف 

وطلعت تجرى للبيت وكيونا بيجرى وراها وهو بيضحك وفضل طول الوقت يضايق فيها وهى تتكسف وتزعقله وهو يضحك عليها 

----------------- 

BY

D&E

Lolo Adel  

Emy Tarek