الاثنين، 18 أبريل 2016
Break My Spell ( part 7 )
شيون : انا تشوي شيون .. اتفضلي اقعدي
صفا : اه .. لا .. انا مش جاية عشان كده .. انا ...
هيتشول : ايه ياعم المنبهر جمعي يا ماما مش اندهاشة يعني
صفا : شششش
شيون : نعم ؟!
صفا : لا لا .. دبانة معلش .. انا كنت جاية اسأل على حد .. كيم هيتشول
بان على ملامحه الانزعاج اول ماسمع الاسم
شيون : حضرتك تعرفيه ؟
صفا بسرعة : معرفة سطحية
هيتشول : نعم ؟!
صفا : اتقابلنا قبل كده وكنا اتكلمنا في تصميم وقالي انه هيشوف ممكن يعمل فيه ايه لكن للاسف مسمعتش منه من ساعتها
شيون : بجد ؟ من اد ايه الكلام ده ؟
صفا : اسبوعين تقريبا
- مستحيل
صوت انثوي نطق بفزع فأتلفتوا لقوها بنت في العشرينات واقفة وراهم كأنها كانت بتسمع الحوار اول ماشيون شافها ارتبك ووقف
شيون : سهر
سهر : انتي بتقولي شوفتيه من اسبوعين .. شوفتيه بنفسك
صفا : اه حتى قعدنا واتكلمنا اكتر من ساعة وقالي على اسم الشركة هنا لكن من ساعتها مكلمنيش
تراجعت سهر بخوف اكدت بيه ظن صفا وهيتشول
شيون بلهجة جادة : كيم هيتشول مجاش الشركة بقاله اربع شهور عشان كده اترفد واحنا منعرفش عنه حاجة .. اسف لكن مش هنقدر نفيدك في حاجة
تجاهلته ووجهت كلامها لسهر
صفا : حضرتك شكلك قلقانة عليه .. متأكدة انك متعرفيش عنه حاجة
هزت راسها ( لا ) وجريت جوا المكتب
صفا : هو انا قلت حاجة غلط ؟ عموما شكراً واسفة على تعطيلكوا
خرجت من الشركة اول مابقت براها رمت قناع الثقة اللي لابساه وبصلت لهيتشول ببلاهة قابلها بصرخة سعيدة
هيتشول : اخييييييييييراً
صفا : الحمد لله لقيناها اخيراً .. بس دلوقتي هنعمل ايه
سند ضهره عالحيطة ووقف بثقة
هيتشول : هنستنى هنا
صفا : نعم ؟!
ابتسملها بهدوء ووقف بصتله بدهشة ولسه هتنطق لقت اللي خارجالهم جري
سهر : لو سمحتي
صفا : يابن اللذينة
سهر : يا انسة
صفا عاملة نفسها متفاجئة : انا ؟!
سهر : ممكن اتكلم معاكي شوية
صفا : طبعاً
قعدوا على كافيه قريب وسهر بتتلفت حواليها بقلق
صفا : نعم ؟
سهر : اه .. انتي متأكدة ان اللي قابلتيه كيم هيتشول
صفا : اه متأكدة
سهر : مستحيل .. مينفعش ده يحصل مينفعش تكوني شوفتيه بجد
صفا بهدوء متعرفش جابته منين : شوفته .. بعنيا .. والكل كان شايفه كمان .. سحرك اتكسر
بصتلها برعب
سهر : انتي ...
صفا : عارفة كل حاجة .. ليه عملتي كده ؟ مهما كان اللي عمله فيكي ازاي جالك قلب تحكمي عليه انه يعيش كده ؟ بأي حق تدمري حياة بني ادم بالشكل ده
هيتشول مصدقش انها بتدافع عنه بالعصبية دي وخصوصا انها عارفة كويس هو عمل ايه
انفجرت فيها مرة واحدة كل اللي كاتماه جواها
سهر : حق ؟! .. ليا حق وحق كبير اوي كمان .. انا معملتش حاجة وحشة انا خليته يجرب الاحساس اللي انا عشته سنين .. من يوم ماعرفته .. اول مرة قلبي يدق لحد .. سنين وانا جمبه بتأمله بس بتمنى انه يبصلي ولو بصة واحدة مكنتش عايزة غير كده .. عرفت انه بتاع بنات ومهمنيش قلت وفيها ايه يمكن لو عرف انا بحبه اد ايه يتغير .. وبعد ماتعبت من كتر الانتظار قررت اواجهه بمشاعري .. وطلبت اخرج معاه ووافق .. اخدني مكان مقرف من بتوعه بس مهمنيش المهم اني معاه وهعترفله النهاردة .. واول ماجمعت شجاعتي وكنت على وشك انطق فوجئت بيه بيقوم ويروح لواحدة تانية بكل بساطة .. قالي انا زهقت وهمشي عالطريق برا وقفي اي تاكس وروحي .. ومشي .. بالبساطة دي سابني وخرج معاها .. عشان فجأة الاقي نفسي لوحدي في مكان زي ده كل اللي فيه سكرانين طينه بأفكارهم الزبالة .. معرفش ازاي ولا امتى جريت برا المكان ده .. ولقيت نفسي قدامها .. ومنغير ماعرفها قبل كده كانت عارفاني .. وقالتلي نفسك تنتقمي منه ازاي .. كل اللي عايزاه انه يعاني زي مانا عانيت .. ان يلاقي نفسه لوحده .. يبقى كل امنيته ان حد يبصله بس وميلاقيش .. انا مكنتش عايزة اأذيه .. كل اللي كنت عايزاه اني اخد حقي وبس حتى لو كان تمن السحر ده الالم اللي اتألمته واللي عمرك ماهتتخيليه
صفا سمعتها بأسى .. ومقدرتش تعلق او تعترض على كلامها
صفا : ودلوقتي .. حاسة بالراحة
سهر : لا .. انتقمت منه .. وبعدين .. لسه قلبي بيوجعني بسببه , بالعكس دلوقتي اسوأ .. تخيلي اما حب سنين يتحول لكراهية .. بيوجع اكتر
لسه هتنطق وقفها هيتشول
هيتشول : كفاية
بصتله بدهشة وبصتلها لقت دموعها بتسيل بصمت فقامت بهدوء
صفا : انا اسفة على كل حاجة
ومشيت وهو معاها .. وسابوها تعيط لحد ما تعبت من العياط فرجعت مكتبها بصمت اول ماشيون شافها بالشكل ده جري عليها بلهفة وقلق
شيون : سهر .. انتي كنتي بتعيطي ؟ حصل حاجة ؟
بصتله منغير ماتنطق لثواني وتخطته ودخلت مكتبها وقفلت على نفسها وسابته واقف .. عارف ان دموعها دي اكيد سببها هيتشول .. ميعرفش اللي هي عملته فيه لكن يعرف كل حاجة من الاول .. مشاعرها ناحيته وتجاهله المتعمد ليها مع انه عارف وفي الاخر ازاي رماها وازاي صدمتها جابتلها انهيار عصبي وخلتها تفضل في المستشفى شهر كامل .. عارف دموعها الصامتة دي هو سببها .. واد ايه بيكرهه بسببها
هيتشول : كل يوم بحس اكتر اني استاهل اكتر من كده بكتير .. ان العقاب ده رحمة للي حواليا
هيتشول : ازاي انا كده ؟! .. وازاي حد زيك يلاقي نفسه فجأة مع واحد زيي .. ولو رجعت لطبيعتي .. هرجع زي ماكنت مش كده ؟!
صفا : انته عايز ترجع كده ؟
هيتشول : لا .. انا مبقتش عايز ارجع اصلاً .. لو رجعت الكائن ده تاني .. ممكن اجرحك انتي كمان زيها .. واسوأ
صفا : انته ليه بتتكلم عن نفسك كأنك شخصيتين ؟ هيتشول انته بني ادم واحد .. عشت حياتك بإستهتار وعمرك مافكرت تقف ثانية وتفكر في اللي حواليك .. دلوقتي جاتلك الفرصة انك تشوف حياتك كشخص تاني .. ولو رجعت .. هترجع برضو كيم هيتشول .. بس بعد مااخد فرصة كتير غيره ميعرفوش انها موجودة اصلاً .. وطالما ندمان دلوقتي بجد يبقى عمرك ماهتجرح حد تاني في حياتك
قعدت قدامه بإبتسامة ثقة
صفا : كنت هخاف منك وارفض مساعدتك لو مشوفتش الندم فعنيك من الاول وعلى حاجة انته مش فاكرها اصلاً .. لكن انته مش كده .. انته اتغيرت بالفعل
بصلها بس .. بيحاول يفهم هي ازاي كده .. ازاي واثقة فيه كده وازاي بتمسح المه بإبتسامة هادية .. فكر لو قابلها في حياته العادية .. كان هيسخر منها اكيد .. وممكن اوي يعتبرها لعبة ويجرحها
هيتشول : لأول مرة اكتشف ان اللي حصلي ده نعمة .. عشان لو كنت قابلتك قبل كده وجرحتك .. كان هيبقى الموت شوية عليا .. ولو مقابلتكيش .. هبقى معرفتش الحياة اصلاً حتى وانا عايشها
نظرتها الخجولة .. واه من النظرة دي واللي بتعمله في قلبه .. حمرة خدودها اللي خلته من القرب ده ميقدرش يقاوم ورفع ايده بهدوء وحطها على خدها .. دفا ايده اللي بيخدرها .. لمسة واحدة تقدر تدوب جبال تلج فمابالك باللي بتعمله في قلبها الصغير .. نظرة عنيه اللي سحرتها ورجفة شفايفها اللي نسته كل حاجة .. بهدوء قرب منها وهي غمضت عنيها بإستسلام
وعلى بعد شعرة بينهم انتفضت وزقت ايده اللي على خدها بذعر .. رجعته الواقع بعنف خلاه يبصلها بعدم فهم .. وكعادتها جريت واستخبت في اوضتها عشان متظهرش المها قدامه .. بعد دقايق من التتنيح ضرب على دماغه بيلعن غبائه , ازاي اتسرع كده وخصوصا بعد اللي عرفته عنه اكيد هتفكر انه بينتهز الفرصة معاها هي كمان ومع ذلك همس بغيظ
هيتشول : بس الكسوف اللي بيبوظ الاوقات الحاسمة ده
الالم زاد بجد .. ومأخدش وقت زي كل مرة ده بمجرد مالمسها .. فكرت انها مش ممكن تستحمله لو زاد عن كده .. لازم تبعد عنه بأي شكل .. ده معناه .. انها تتحرم من دفا ايده .. من احساسها بقربه .. من ...
صفا : بتعمل ايه هنا ؟!
هيتشول : والله العظيم ماعملت حاجة لسه
صفا : ايه ؟!
هيتشول : قصدي مكنتش هعمل حاجة انا خبطت كتير وبعدين مفتحتيش خفت يكون حصلك حاجة وبعدين خفت يجيلك برد بقى والجو سقعة قلت ادفيكي اا اغطيكي قصدي .. انا اسف
وقف متنحلها وهو رافع الغطا كأنه دليل برائته فأخدت نفسها بهدوء
صفا : خلاص .. بس انا قلتلك متدخلش هنا
هيتشول : اعملك ايه ده لو ميت كان صحي عالخبط
صفا : بتخبط ليه اصلاً
هيتشول : كنت عايز اقولك اني خارج .. هروح المستشفى اتطمن على امي
صفا : اه طيب سلام
هيتشول : انتي هتكملي نوم ؟؟
صفا : اومال اقف في البلكونة اشاورلك بالمنديل الاحمر مودعة يعني
هيتشول : انااسف اني عبرتك اتخمدي
صفا : منا هتخمد ملكش دعوة
شدت الغطا منه واتغطت ونامت وهو شتمها في سره وخرج راح عالمستشفى .. وصل وطلع اوضة والدته متحمس يشوفها ويتطمن عليها عايز يقولها هانت وانته هيرجع ويكفر عن كل اللي عمله اول ماوصل لقى الدكتور وممرضة خارجين من اوضتها والقلق باين عليهم
الدكتور : وبعدين في عنادها ده
الممرضة : انا حاولت اقنعها بكل الطرق برضو مش راضية مصرة متعملش العملية الا لما ابنها يرجع ويدخلها اوضة العمليات بنفسه
الدكتور : ابنها اللي مسألش عنها من ساعة ماجت ومحدش عارف هو فين , اقنعها ازاي انها لو فضلت على كده تبقى بتموت نفسها الورم خلاص في مرحلة خطر لو مستأصلناهوش في اقرب وقت هيقتلها
الممرضة : مفيش فايدة مهما حاولت اقنعها مفيش فايدة
الدكتور : تبقى حكمت على نفسها بالموت واحنا مش مسؤلين عن قرارها
مشي بعصبية والممرضة بصت بأسى عالاوضة ومشيت هي كمان وسابوا هيتشول واقف بيحاول يستوعب اللي سمعه وجسمه كله بيرتجف .. هتموت لو مرجعش .. هتموت نفسها عشان هو مش معاها .. دخل اوضتها ووقف قدامها .. شحوب وشها الزايد عرفه ان فعلا مفيش وقت .. مفيش وقت حتى لدموعه انها تنزل وجري برا المستشفى لصفا ودخل البيت بسرعة وهو بيصرخ
هيتشول : صفا
خرجت بسرعة لقته جري عليها بتوسل
هيتشول : امي هتموت لو مرجعتلهاش ساعديني
صفا : اهدى بس اهدى وفهمني
هيتشول : امي رافضة تعمل العملية الا وانا جمبها ومفيش وقت لو معملتهاش هتموت وانا مش عارف اعمل ايه
صفا : طب .. طب اروح معاك انا اقدر اظهرك واخليها تشوفك
هيتشول : لا .. سهر .. لازم نخليها تفك السحر
صفا : ازاي ؟
هيتشول : لازم تسامحني ..هخليها تغفرلي اني جرحتها بالشكل ده مهما حصل .. انا مستعد اتحمل اي عقاب انما امي ذنبها ايه , تسيبني انقذ امي بس وبعد كده تعمل فيا اللي هي عايزاه انا راضي
قام بسرعة وجري عالباب
صفا : رايح فين
هيتشول : رايحلها
صفا : ازاي بس استني لازم ابقى معاك
خرجت معاه جري ونطوا في اول تاكس قابلهم وطلعوا عالشركة .. شيون اتفاجأ بالباب وهو بيتزق وبعده دخلت صفا جري منغير ماتبصله حتى وجريت على مكتب سهر وقبل ماتقربله الباب اتفتح لوحده ودخلت .. سهر اول ماشافتها بصتلها بذهول وصدمة
صفا : قبل ماتقولي اي حاجة .. اسمعي الاول .. انا عارفة ان جرحك كبير وعارفة انك صعب تسامحي لكن ...
مكملتش هيتشول شارولها تسكت , مسك ايدها قصاد عنين سهر اللي مش فاهمة اللي بيحصل لحد ما شافته .. بيظهر من العدم قصاد عنيها , شهقت وتراجعت بذعر وهي بتهمس باسمه .. بعيون متوسلة بصلها
هيتشول : سهر .. مش عارف بأي حق اقولك سامحيني عشان انا مستحقش .. انا عارف انا عملت فيكي ايه وعارف لعبت بقلبك ازاي بس ...
عارف انه وصل لنقطة لازم يتنازل فيها عن كبريائه , صفا وسهر مصدقوش وهما شايفينه نزل على ركبه بخضوع
هيتشول : انا شوفت كل اللي عرفتهم قبلك قبل ماوصلك .. مفيش واحدة فيهم اهتميت بيها او فكرت اعتذرلها .. مفيش واحدة فيهم جرحتها .. يمكن مكنتش اعرف اصلاً اني جرحت حد .. انا شخص اناني .. اناني لدرجة اني مشوفتش غير نفسي وفقدت احساسي بكل اللي حواليا .. وللاسف كنتي انتي من اللي حواليا واتأذوا بسببي .. لكن انا شوفت .. شوفت حياتي على حقيقتها بعد اللي حصلي ده .. شوفت انا كنت عايش ازاي .. شوفت انا عملت ايه في اقرب الناس ليا
شد على ايد صفا برفق
هيتشول : شوفت اللي قالي اني اقدر مبقاش كده .. اني لو جتلي فرصة هصلح كل ده .. والفرصة دي فأيدك
ذهولها راح وبصتله
سهر : يعني لو رجعتك .. هتكون ليا
رفع راسه وبصلها .. الا السؤال ده .. حتى لو اتنازل عن كبريائه وكرامته .. الا السؤال ده .. هو عارف انه عمره ماهيبقى ليها .. ولا لأي حد غير اللي ملكت قلبه بالفعل , نظرته لسهر طالت وهو متمسك بأيد صفا اكتر .. وفهمت سهر وابتسمت بخيبة امل
سهر : شوفت .. حتى لو رجعت وبقيت مخلص فعلاً زي مابتقول .. مش هيبقى ليا .. يبقى خليك تتعذب كده بالعكس انا دلوقتي عايزاك تتعذب اكتر
هيتشول : سهر ...
قبل مايكمل انفتح باب المكتب ودخل شيون اللي بصله بيحاول يستوعب .. سمع اللي اتقال لكن مفهمش , ومفهمش هو دخل ازاي وامتى
شيون : انته بتعمل ايه هنا ؟
بص للاتنين وحس ان الدنيا اسودت قدامه في اللحظة اللي سمع فيها انين صفا وحس اخيرا برجفة ايدها في ايده .. اتفتلها لقاها بتعض على شفايفها بألم وهي ماسكة صدرها وقبل ماينطق لقاها وقعت بين ايديه .. حالة فزع سيطرت عليه نسته كل حاجة وهو بيهزها بخوف
هيتشول : صفا , صفا ردي عليا مالك
قدام عيون شيون المذهولة .. اختفى .. ببطء اختفى وفضل جسم صفا بيتهز لوحده .. تراجع شيون بخوف وسهر المشهد فزعها
شيون : ايه .. اللي حصل ده ؟
بصتله وهي مش عارفة ترد بأيه سكوتها عصبه اكتر فزعق
شيون : فهميني
رجليها مقدرتش تستحمل اكتر ووقعت على كرسيها .. وبدأت تحكيله على كل حاجة
هيتشول : صفا .. انتي الوحيدة اللي تقدري تساعديها
فريدة : ايه اللي حصل
شاورتله ينيمها عالارض وقعدت جمبها ومسكت ايدها وبصتله بعصبية
فريدة : غبي انته بتحاول تقتلها
هيتشول بفزع : انا ؟! انا معملتش حاجة احنا كنا ...
هيتشول : ا...
فريدة : برضو مفكرتش غير في نفسك وتجاهلت وجعها
هيتشول : وجعها ؟! انا مش فاهم حاجة
بصتله بدهشة وبصت لصفا
فريدة : هي مقالتلكش
هيتشول : مقالتش ايه ؟!
سابت ايدها واتنهدت بقلة حيلة
فريدة : انته فاكر ان كسر السحر حاجة عادية .. كسر السحر بياخد جزء من روحها .. صفا كانت بتتألم كل ماتلمسها وكل ماتكسر جزء اكبر من السحر كل ماالالم يزيد والنهاردة وصلت لمرحلة ان عقلها مقدرش يستحمله وانهارت اكتر من كده ممكن تموت
بصلها بذعر واتضحت الصورة قدامه .. كل مرة هربت منه .. رجفة ايدها اللي دايما يتجاهلها .. كانت بتتألم وتسكت .. خافت تقوله متقدرش تساعده تاني
فريدة : برغم انك اناني انما خافت لو قالتلك ترفض مساعدتها ؟! مع انها عرفت عنك كل حاجة ؟
هيتشول : لأنها وثقت فيا .. وثقت ان انا مش كده واني ممكن اتغير .. خافت لو عرفت ارفض مساعدتها
فريدة : وانته .. كنت هترفض فعلاً ؟!
بصلها وسكت .. معرفش يجاوب بإيه .. كان هيرفض فعلاً ولا لا .. لو عرف انها بتتألم بسببه والالم بيزيد كل يوم كان هيرفض ويبعد عنها ويرضى انه يكمل حياته كده
هيتشول : هي .. كويسة ؟
فريدة : لو عايزها تبقى كويسة مفيش غير حل واحد .. امنعها من انها تكسر السحر تاني .. انته موافق على كده
هيتشول : يعني .. مش هتشوفني تاني ؟
فريدة : هتشوفك .. لكن لمستها مش هتظهرك تاني يعني مش هتبقى مفيدة ليك فحاجة .. انته عارف كويس انها لو فضلت محتفظة بقدرتها دي هتستعملها عشان تساعدك حتى لو انته رفضت .. وده هيقتلها .. اختار ياتنقذها وتضيع فرصتك يا تجازف بحياتها عشان تنقذ نفسك
بص لصفا وعاد الكلام في دماغه .. حياته ولا هي
هيتشول بقوة : امنعيها
فريدة : واثق من كده
هز راسه ( اه ) .. ابتسمت وحطت كفها على راسها وغمضت عنيها .. حاجة غريبة حصلت خلت جسم صفا يتنفض فجأة وهيتشول واقف باصصلها مش عايز حاجة غير انها تفتح عينيها بس .. رفعت فريدة ايدها وبصتله
فريدة : خلاص .. اتمنى متندمش على اختيارك
هيتشول : المهم اني مأذيهاش تاني
في المكتب شيون قاعد مش مصدق اللي سمعه من سهر لولا انه شافه بعينه كان استحاله يصدق لكن هيكدب عنيه ازاي
شيون : يعني انتي السبب في اختفائه طول الفترة دي
سهر : متحسسنيش اني مجرمة انته عارف انه يستحق
اتنهد كأنه بيحاول يمسك اعصابه
شيون : تعرفي انا بكره هيتشول اد ايه ..مع انه عمره ماعملي حاجة احنا اصلا متكلمناش تقريبا .. بس انا كرهته بسببك .. بسبب نظراتك اللي بتشحت منه البصة .. بسبب تجاهله ليكي اللي كان بيخليكي تعيطي لوحدك وانا بسمعك وبسكت .. وبسبب اللي عمله فيكي واللي خلاني افتكر انك دخلتي المستشفى بسببه .. تعرفي انا قعدت مستني هنا اد ايه عشان يرجع واجيب رقبته تحت رجلي
بصتله وحست بالراحة انه فاهمها ولسه هتنطق مداهاش فرصة
شيون : اول مرة اخد بالي انك مش احسن منه يا سهر .. كل واحد فيكوا اناني على طريقته .. كل واحد فيكوا مبيحسش بغيره .. السنين اللي قضتيها بتتمنيه كان في عيون تانية بتراقبك بحزن .. عارفة انك عمرك ماهتشوفيها ومع ذلك راضية .. راضية بدور الصديق اللي اتحطت فيه .. كل يوم جرح بيوسع بسببك كل ماتشوفك بتعيطي عشانه او بتفكري فيه .. وانتي عمرك ماحسيتي .. اول مرة افكر في كده .. لو كل واحد انجرح عشان بيحب من طرف واحد عمل زيك كان زمان البشر كلهم مش موجودين .. وانتي اولهم
سهر : انته مش فاهم حاجة
شيون : كل اللي قولته ده ومش فاهم حاجة انتي مش سامعة غير نفسك عايزاني اطبطب عليكي وخلاص ارحميني وافهمي بقى انا قعدت ساكت على امل انك هتنسيه معرفش ان مفيش فدماغك غير تخيلك لأنتقامك منه يعني حتى كده مفيش امل
هدي انفعاله وبصلها بقلة حيلة
شيون : امتى هتفهمي بقى .. امتى انتي كمان هتشوفيني .. انا بحبك يا سهر , والله العظيم بحبك
قال فوق طاقته .. كتير تخيل الحوار ده لكن عمره مافكر انه ممكن يقوله بجد .. منغير مايستنى ردها خرج من المكتب وسابها مصدومة باللي سمعته .. معقول كل ده وهي بتجري ورا هيتشول .. مشافتش اللي قدام عنيها .. بعد كل ده تكتشف ان هي وهيتشول نفس الشخص .. حاولت تبرر لنفسها حاولت تدور على عذر عشان تثبت انها مختلفة .. ملقتش يمكن الفرق الوحيد ان هيتشول كان مش شايف حد اصلا لا هي ولا غيرها كل يوم مع واحدة .. انما هي وقدام عيون شيون كانت بتجري وراه .. جرحت شيون منغير ماتعرف وعمرها ماكانت هتاخد بالها .. ولأول مرة تقعد وتفكر في شيون بجد .. في كل حاجة عملهالها في كل موقف بينهم كان اعتراف غير مباشر بحبه ليها وهي زي العميا مشافتش ومفهمتش .. وكل مافكرت اكتر .. كل ماشافت شيون بطريقة تانية
فتحت صفا عنيها بضعف لقت نفسها على سريرها وهيتشول قاعد جمبها على طرف السرير
هيتشول : كان لازم ادخل بس والله ماعملت حاجة .. يعني هو عشان مبقاش كداب لعبت في شعرك شوية
صفا : امتى رجعنا و ... سهر ايه اللي حصل سامحتك ؟ هتكسر الـ...
هيتشول : ليه مقولتيش ؟
قاطعها بنبرة هادية خلتها تبصله وعرفت من عنيه انه فهم اللي بيحصلها .. سكتت
هيتشول : سيبتيني زي الغبي اوجعك اكتر واكتر وانتي استحملتي .. ليه
صفا : كنت خايفة .. في الاول كنت خايفة منك لو عرفت تستغل ده
بصلها بعيون لمعت دموعه فيها فلحقته
صفا : وبعدين بقيت خايفة عليك .. لو عرفت تبعد عشان تحميني
هيتشول : غبية .. كان في الف طريقة تساعديني بيها منغير ماتسبب في أذيتك حتى لو مشيت كنت هصرف نفسي بعد ماعرفت كفاية عن حياتي مكنتش هغلب يا صفا كان لازم تفكري فنفسك
نزلت عنيها بخجل واتكلمت من قلبها
صفا : منا كنت بفكر فنفسي .. وعشان كده مكنتش عايزاك تبعد .. كنت خايفة تسيبني يا هيتشول .. انا في لحظة فكرت هو انا لو بطلت اساعدك ومعرفتش ترجع هتفضل جمبي علطول .. انا اسفة
عيطت غصب عنها فابتسم وضمها لصدره بحب وهو بيهمس
هيتشول : خلاص .. مفيش وجع تاني
رفعت راسها وبصتله بدهشة .. فعلا مش حاسة بوجع وهو حاضنها
صفا : ازاي ؟!
اتلفتت للمراية لقته مش ظاهر خالص
هيتشول : ياستي فريدة قالتلي يا تسيبها تكسر السحر ومتقدرش تيجي ناحيتها يانمنعها من كده وتقفش فيها براحتك طبعا انا كبني ادم قمة في الاحترام اخترت القفش
صفا : يعني ايه ؟ مش هقدر اساعدك تاني ؟ مش هترجع ؟
هيتشول : رجوعي حاجة انا هتكفل بيها متقلقيش والمساعدة اللي انا طالبها منك .. انك تفضلي جمبي .. حتى بعد مارجع لطبيعتي عايزك تفضلي كأنك الوحيدة اللي شايفاني .. وانا مش عايز اشوف غيرك
صفا : هيتشول
ضمها لصدره تاني وهو بيحسس على شعرها بحب
هيتشول : متفكريش تاني .. خليكي كده وبس ده كل اللي انا محتاجة
معترضش وقررت تسمع كلامه .. نأجل التفكير لبعدين .. دلوقتي مش هفكر في حاجة غير صوت دقات قلبه الهادية .. غمضت عينيها .. وراحت في عالم تاني
الاشتراك في:
تعليقات الرسالة (Atom)
البارت السادس مش موجود؟؟!!
ردحذف