Blind Date

Blind Date

ف هذا المنزل السعيد كان هيتشول قاعد ف كوكب البطيخ بيتفرج ع التليفزيون وهو مركز اوى ومنفصل عن حرب النظرات اللى بتدور بين جولى اخته وباتى مراته .. اللى كانو قاعدين باصين لبعض وكل واحده ف فكرة واحدة بس ف دماغها

جولى " هل انا لو قمت جريت من هنا هيحصل حاجة ؟"

باتى " انا مش هسيبك تهربى من تحت ايدى .. ربنا يسوقك ياللى ف بالى "

فصل نظراتهم صوت هيتش وهو بيشجع بحماس .. بصوله الاتنين باستغراب

رجعت بصت باتى ع الساعه : اتاخر ليه الواد ده ؟

جولى : احسن ياريته ما يجى اصلا

باتى : ابو شكلك .. وبصت لهيتش : ما تقول حاجة لاختك

هيتش وهو بيتفرج ع التلفزيون : براحتها .. لو عايزة تشوفه خير وبركه .. ولو مش عايزة خلاص هى حره محدش هيغصبها ع حاجة

باتى : جبتك يا عبد المعين تعينى .. وبصت لجولى : يابنتى عايزة اتطمن عليكى واخلص منك بقى

جولى : هو انا قاعدة ع قلبك .. ما تشوف مراتك ياعم

هيتش : بس بقى انتى وهى مش عارف اتفرج .. ايوة ادى بقى ادى .. اووووه

جولى : بتتفرج ع مصارعة حريمى .. من امتى يعنى ؟ .. وانتى سيباه كده

باتى : احب اقولك انى بقعد اتفرج معاه .. دى فيها شوية مزز يابت

جولى : ضيعتى اخويا اللى حيلتى .. وعايزة تضيعينى انا كمان

مسكت باتى فونها : فكرتينى .. وبدات تتصل وهى عماله تلف ف الشقة من المطبخ للصاله والعكس : انت فين يابنى كل ده ؟.. طيب اخلص احسن البت خللت جنبى واحنا مستنينك .. قفلت باتى ولاقت كف ثلاثى الابعاد نازل عليها غيرلها معالم وشها

جولى : مين دى اللى خللت .. انا اصلا بكره فكرة جواز الصالونات

بصلهم هيتش : جواز صالونات .. جواز كباريهات .. شوفيه الاول وريحينا من الصداع ده

جولى : فين الشخص اللى لسه قايل من ثوانى براحتها .. غيرت اقوالك ليه ؟

هيتش : عشان ام رغيكو ده مش عارف اركز .. واخرسو بقى .. اتخرس حسكم

بعد شوية رن جرس الباب .. شدت باتى جولى من ايدها ودخلتها اوضتها : خشى ظبطى شعرك وشكلك كده الواد وصل .. وسابتها وخرجت لاقيت جرس الباب لسه بيرن وهيتش قاعد ف مكانه بيتفرج ع التليفزيون

باتى : يعنى انت مش سامع جرس الباب ؟ 

مهتمش هيتش لكلامها لانه تقريبا مسمعهوش وفضل يتفرج وهو مركز..  راحت باتى طفت التليفزيون : سيبك من البتاع ده بقى .. قوم افتح .. هيوك وصل

قام هيتش وهو متضرر وعمال يبرطم .. فتح الباب لاقى مز واقف قدامه لابس بنطلون وقميص كلاسيك وماسك هديه ف ايده .. بصله هيتش من فوق لتحت وهو بيتفحص ويتمحص فيه

اتنحنح هيوك : احم .. مش ده بيت باتى ؟

هيتش : انت هيوك ؟

هز هيوك راسه بالايجاب بس كان باين ع شكله التوتر

بعد هيتش عن الباب : اتفضل

دخل هيوك لاقى باتى ف استقباله .. وهيتش واقف وراه عمال يبصله

باتى : اهلا وسهلا .. حمد الله ع السلامة .. اخيرا وصلت

قدملها هيوك الهديه : معلش بقى الطريق .. اتفضلى

باتى بابتسامة : شكرا .. اتفضل ادخل

دخلو الثلاثة قعدو مع بعض .. هيتشى وباتى جنب بعض .. وهيوك قدامهم ع كرسى لوحده .. بعد لحظات من الصمت اتكلمت باتى : تشرب ايه يا هيوك ؟

هيوك : شكرا متتعبيش نفسك

هيتش وهو باصص لهيوك مشالش عينه من عليه : هاتيلنا اى عصير

بصتله باتى بقلق وسابتهم هما الاتنين وهى بتدعى ان هيتش يفضل بعقله وميتهورش ويعمل حاجة يضايق بيها هيوك او يرعبه او يطفشه بمعن اصح .. ودخلت لجولى لاقيتها ماسكة فونها وعماله تلعب عليه : انا هلاقيها منك ولا من اخوكى .. قومى يختى نخرج العصير ونلحق الواد قبل اخوكى ما يفترسه

جولى ببرطمه : يارب ياكله

راحو جابو العصير وبمجرد ما دخلت جولى عليهم وبصت لهيوك تنحت وبلمت وثبتت مكانها .. ونفس الحال لهيوك اللى بمجرد ما لمحها فضل باصصلها ومردش ع هيتش اللى قعد يتفرج عليهم .. بصت باتى لجولى عشان تمشيها .. راحو قدمو العصير وقعدت جولى ف كرسى لوحدها .. لحظة صمت تانى الكل عمال يبص لبعضه جولى وهيوك بيبصو لبعض بطريقة غريبة .. وهيتش وباتى بيبصو عليهم ويبصو لبعض

لحد ما قطع الصمت ده باتى للمرة التانية : احم .. عامل ايه يا هيوك ؟

بصلها هيوك : تمام .. حياتى ماشية كويس الحمد لله

ورجع بص لجولى اللى بصتله وبصت الناحيه التانية .. بصت باتى ع هيتش لاقيته مركز قوى مع هيوك .. هزته باتى عشان يبصلها وكلمته بهمس : بس .. بطل تبصله كده .. هترعبه

هيتش بنفس الهمس : مانتى شايفه اللى بيحصل .. ورجع بص عليهم تانى

باتى ف سرها : ربنا يستر ويعدى الليله دى ع خير .. واتكلمت بصوت : هيوك بقى شاب هايل بالرغم انه جه اشتغل معانا من كام شهر بس قدر يثبت نفسه والكل بيحبه وبيشيد بيه ..

ابتسمت جولى بسخرية من غير ما تتكلم .. كملت باتى كلامها : مش عايزة اقولكو بقى .. ادب ايه واخلاق ايه وذوق ايه

جولى : واضح واضح سيماهم ع وجوههم

باتى : استنى يا حجة اخلص كلامى وبعدين هديكو المايك انتو الاتنين عشان تتكلمو وتتعرفو ع بعض اكتر .. دلوقتى بقى دور جولى .. صديقتى اللدودة وعملى الابيض ف الحياه ومن كتر حبى فيها بقيت مرات اخوها .. متخرجة من نفس الجامعه اللى هيوك متخرج منها بس الكليه والسنة مختلفه

هيوك باستفزاز : بجد ؟ ماخدتش بالى قبل كده

جولى بضيقة : اصلى كنت ملتزمة وبقعد مع اصحاب كويسين ملناش ف اللف والدوران ف كل حتة .. ومش اى حد بنتعرف عليه

باتى : هو ف ايه ؟

هيوك : مفيش حاجة كملى .. انا عايز اتعرف اكتر

بصتلهم باتى شوية : لا اكمل ايه بقى .. اتكلمو انتو .. اللى عايز يقول حاجة يقولها واللى عايز يسال التانى يتفضل .. انا عملت معاكو الواجب وعرفتكو ع بعض .. دلوقتى بقى دوركو

بص هيوك لجولى : بتعرفى تعملى اكل ؟.. ده سؤال مهم جدا ولازم يبقى اول حاجة اسال فيها

باتى : دى عليها طبق جبنه بالطماطم والخيار يجنننننن

هيوك بتريقة : هو الجبنه والبيض والبطاطس المحروقة ده اسمه اكل

جولى : دى كانت مرة واحدة اللى حرقت فيها البطاطس

هيوك : وبالنسبة لباقى الاكل بذمتك مش بتحرقيه

جولى بعصبيه : عشان كده كنت بتجرى ورا لينا ؟

هيوك بسرعة : قولتلك كذا مرة قبل كده انى مليش علاقة بيها .. واننا مجرد اصحاب عاديين

جولى : وانا مفروض بقى اصدقك واكدب نفسى

هيوك : لو مش عايزة تصدقى بالكلام .. صدقينى بالافعال .. يا مفترية ده انا كنت هموت بسببك .. لما شفتك بتغرقى رميت نفسى وراكى من غير ما افكر بهدومى وتليفونى اللى باظ عشان خاطر الحقك .. وبعد كل ده كنتى هتموتينى ف المية وانتى عماله تطبشى

اتنحنحت جولى : احم .. انا مطلبتش منك تنقذنى وتسيبها

هيوك : يعنى بردو اللى فدماغك ف دماغك

جولى بعند : اه بقى ها

هيوك بعصبيه : بطلى غباء بقى .. انتى عارفة انك اهم حد عندى .. بس ازاى متبقاش دماغك ناشفة ومتصدقنيش ؟ .. حتى بعد الفترة دى كلها لسه مش عايزة تتغيرى او تصدقينى

جولى : انت اللى سبتنى الاول

هيوك : انتى اللى مكنتيش بتردى ع تليفوناتى وغيرتى رقمك ومشفتكيش من وقتى غير النهاردة

جولى : ده لوحده يثبت انك نسيتنى وجاى تشوف واحدة تانية تتجوزها

هيوك : انتى شيفانى داخل بالماذون ف ايدى يعنى .. وبعدين انا كنت ....

قاطع كلامه هيتشى اللى كان قاعد بيتفرج ع الاتنين وهما بيتناقرو ومع كل كلمة بيتضايق اكتر وباتى ماسكة ايده بتحاول تهديه لحد ما انفجر فيهم بصوت عالى : انا عايز اعرف ايه اللى بيحصل هنا بالظبط ؟

اتخض الكل من نبرة صوته اللى بتحمل الغضب .. وقبل ما اى حد يقدر يرد عليه كان هيتش قام من مكانه ومسك هيوك من زوماره رقبته وعينه بتطق شرار وكانه هيفترسه : انت تعرف اختى منين وايه اللى حصل بينكو من ورايا ؟

 قامت باتى وجولى بسرعة مسكو ايد هيتشى بيحاولو يفكوها من ع رقبه هيوك اللى بيفرفر ف ايده يا عينى

باتى بخوف : يالاااااااااااااااااهوى .. سيب رقبه الواد هتموته ف ايدك

هيتشى بنظرته الشرسة : انا هطلع روحه لو معترفش بكل حاجة

باتى : طيب سيبه عشان يتكلم .. واهدى

فك هيتش ايده من ع رقيه هيوك اللى حط ايده ع رقابته ودعكها وهو بياخد نفسه

باتى وهى ماسكه هيتش جامد : اجرى يا هيوك .. انفد بجلدك

بصلها هيوك وهز راسه : لا انا مش ههرب وهكمل المشوار للاخر .. وبص لهيتش : انا هقولك ع كل حاجة

رجع الكل قعد ف مكانه تانى وهما باصين لهيوك اللى بدء يتكلم : انا اعرف جولى من ايام الجامعه .. الاول كنا اصحاب وبعدين واحدة واحدة حبينا بعض

جولى : محصلش .. اوعى تصدقه يا اوبا ده كداب

هيوك : لا مش كداب .. اومال انا عرفت حوار الاكل منين .. وهى بتضايق ليه من لينا ؟

هيتش : منطق بردو .. كمل

هيوك : اكبر مشكلة كانت بتواجهنا هى الغيره .. جولى بتغير بطريقة فوق الفظيعة

جولى : طبعا عايزنى مغرش عشان تعمل كل اللى انت عاوزة

هيوك : انا مقولتش كده .. انا بحب غيرتك عليا لان الغيره دليل الحب بس مش للدرجة اللى تخنق دى .. كل حاجة باعتدال تبقى حلوة .. غيرى لو لاقيتى حد بيحاول يقرب منى او لقتينى انا بحاول اقرب من حد .. بالرغم ان ده مش هيحصل لانى مش هبص لحد غيرك انا مش مستغنى عن نفسى

جولى : مانت كنت بتقرب من لينا

هيوك : لينا صاحبتى وزميلتى مش اكتر .. كل الحكاية اننا كنا ف نفس الكلية مع بعض عشان كده كنا بنتكلم مع بعض اكتر

جولى : اصحاب اه .. هو ف اصحاب بيقعدو يتكلمو مع بعض ف التليفون كتير ؟

هيوك : اهو ده عيب تانى .. انك مش بتصدقينى .. وعشان اثبتلك ان مفيش بينا حاجة .. خدى .. واداها تليفونه

مسكت جولى التليفون لاقت صور للينا مع واحد تانى وهما ماسكين ايد بعض ومشاهد رومانسية بينهم : مين ده ؟

هيوك : ده شيون صاحبى .. وخطيب لينا .. عشان كده كانت بتكلمنى كتير .. فهمتى بقى

اتنحنحت جولى : بس انت جيت النهاردة عشان تشوفلك عروسة .. افهم من كده انك نسيتنى ؟

هيوك : انا جيت لما باتى وريتنى صورتك

بص الكل ناحيه باتى باستفهام .. واولهم هيتش اللى بصلها باستفهام وغضب : صورة ايه دى يا هانم ؟

باتى : قبل ما تتحول انا هعترف ع نفسى .. منك لله يا هيوك مبيتبلش ف بؤك فوله .. بصو .. بما انى صاحبه جولى فكانت قرفانى سورى يعنى بسيرة هيوك وصورة ولما سابو بعض كنت عايزة اديها 60 قلم ع غفلة لانها فعلا متهورة وغيورة .. ولما شفت هيوك عندنا ف الشغل منقول من مكان تانى .. قعدت فترة اشبهه عليه لحد ما افتكرته .. وقتها جت ف دماغى فكرة انى اجمعهم تانى مع بعض بس كنت خايفة ان هيوك يكون نسيها فعلا او مبقاش عايزها .. فقولت منعا للاحراج اقوله ان عندى ليه عروسة ووريته صورة الهانم عشان لو مكانش عايز يشوفها تانى او خلاص مبقاش بيحبها هيقول لا من اولها ونوفر ع نفسنا الاحراج ووجع القلب .. انما اللى حصل انه ما صدق وقال ماشى من اول مرة .. وكنت مستنية يقولى انه يعرفها او يقول اى حاجة بس بصراحة متكلمش وده خلانى قلقانة .. وكنت هلغى الفكرة .. بس قولت انا اجيبهم والبسهم ف بعض وهما يتصرفو بقى .. ادى كل الحكاية .. انا كنت عايزة اعمل فيهم خير واوفق راسين ف الحلال

بصلها هيتشى بظرات قاتلة : لينا حساب بعدين عشان اللى بتعمليه من ورا ضهرى ده .. وبص لجولى بنفس النظرة : وانتى هطلع عينك بس اصبرى عليا .. وبص لهيوك : وانت

هيوك : انا ايه ؟.. انا جاى البيت من بابه اهو .. وعندى استعداد اتجوز دلوقتى حالا

جولى : وانا مش موافقة

قام هيتش مسك هيوك من رقابته تانى : طالما انتى مش موافقة يبقى اطلع روحه ف ايدى واخلصلك منه .. ايه رايك ؟

قامت جولى بسرعة مسكت ايده : لالالالالالا خلاص هفكر

هيوك : انتى لسه هتفكرى .. اخوكى هيموتنى  

جولى : خلاص موافقة موافقة .. سيبه بقى

سابه هيتشى .. مسكت جولى هيوك بتطمن عليه : انت كويس

ابتسم هيتش ابتسامة جانبيه : ايوة كده اتعدلو .. ع الله اعرف انك زعلتها ف يوم من الايام .. تقدر تعتبر نفسك بتلعب ف عداد عمرك .. وانتى يا غبية كبرى دماغك شوية وبلاش الغيرة الاوفر دى .. والخميس الجاى خطوبتكو

ابتسم هيوك ومسك ايد جولى اللى ابتسمت هى كمان : وانا معنديش مانع

باتى وهى ضامة ايدها الاتنين : هيييييييييييييييح عصافير الحب

هيتش : انا ملاحظ انكو مش عاملين اى اعتبار لوجودى .. وماسكين ايد بعض قدامى

مسكته باتى من ايده وبصتلهم : دلوقتى وقت الهروب

سحبت جولى شنطتها وخادتها جرى هى وهيوك بعيد عن براثين الاسد قبل ما يتهور عليهم ويبيتهم كلهم ف المستشفى

وبمجرد خروجهم من البيت والباب اتقفل بص هيتش لباتى : ايه رايك فيا ؟.. عرفت اسبك الدور صح مش كده ؟

ضحكت باتى : ده انا صدقت انك هتموته فعلا

هيتش : لو كان قال كلمة كده او كده ضايقتنى اوضايقتها كنت عملتها فعلا

باتى : الحمد لله هيوك طلع عاقل وكويس .. اختك هى اللى دماغها ضايعه منها

رجع هيتش فتح التلفزيون وقعد يكمل المصارعة : اختى تعمل اللى هى عيزاه براحتها

هزت باتى راسها : مفيش فايدة فيك انت واختك

وبكده رجع عصافير الحب لبعض بعد ما صفو كل الخلافات اللى كانت بينهم الفترة اللى فاتت كلها .. وبدء السلام يعم ع حياتهم واتخطبو والحمد لله .. بس ف النهاية مفيش حاجة بتفضل ع حالها .. ورجعت ريما لعادتها القديمة .. ورجعت جولى لغيرتها الاوفر .. بس الفرق المرة دى ان هيتشى وباتى كانو دايما بيتدخلو ف الموضوع .. وف النهاية بيطلع الغلط عليهم هما .. وع راى المثل .. ما ينوب المخلص الا .....

-------------

اول عيد ميلاد من غير جوهرتنا الغالية

الاحتفال من غيره ملوش طعم

بس بنتمناله كل الحب والسعادة

كل سنة وفراولتنا طيبة

ملحوظة صغننه : اسم جولى جاى من جويلز  

BY

D&E

Lolo Adel  

Emy Tarek