Super Show
SS3
الأربعاء، 21 سبتمبر 2016
Super Show (ss3)
دوني : دحيح الدفعة ؟!
شيون : اه .. كيو موهوب جداً وصوته بجد حلو
هيتشول : يابني ده بيحتقر الكوكب كله يمكن اكتر مني انا شخصياً تفتكر هيرضى يدخل مع شلة فشله زيكوا
كانج : اللي دخلك يدخله
هيتشول : انا فاشل وافتخر انما ده لو ساب الكتاب يتحرق
شيون : مش هنخسر حاجة لو طلبنا .. انا هحاول اقنعه يجي هنا وبعدين نكلمه كلنا .. ايه رأيك يا نيللي
نيللي بسهوكة : وهو في رأي بعد رأيك يا كبير
كانج : اطلع برا الله يرضى عليك شوف هتجيبه ولا هتهبب ايه
بصلهم بعدم فهم وخرج يدور على كيو
ليتوك : في واحدة كلمتني الصبح وقالت انها بتعزف بيانو وعايزة تدخل الفرقة وهتيجي بعد شوية
هان : اما تيجي دخلها
ليتوك : على اساس اني في العادي بقعد المتقدمين في الاستراحة برا لحد تجارب الاداء يا بتاع سومان جوت تالنت
هان : انا غلطان اني واقف معاكوا اصلاً انا رايح الخص المادة
شوية ورجع شيون وهو ساحب كيوهيون وراه والتاني داخل قرفان
كيو : شيون بجد انا مش فاضي
شيون : استنى بس واسمع
وقفة قصاد نيللي
شيون : كيوهيون اعرفك بنيللي المسؤولة عن فريق الاستعراض في الكلية
كيوهيون بتجاهل : تشرفنا , ممكن تقولي بقى انته ساحبني لهنا ومسيبني مذاكرتي ليه
نيللي مسكت نفسها وبلعت التجاهل
نيللي : احنا سمعنا ان صوتك حلو فأيه رأيك لو تجرب تشارك معانا ممكن تدخل الاستعراض
كيو رفع حاجبه وبصلها بقرف
كيو : نعم ؟!!
شيون : ايوه يا كيو انا عارف ان صوتك حلو بجد محتاجينك في الاستعراض وانته كمان هتحب الفكرة ايه رأيك تجرب
كيو سحب ايده من شيون بقرف
كيو : طيب يعني انته دلوقتي بتقولي اسيب مذاكرتي واسيب الامتحانات عشان اشارك معاكوا في التفاهه دي , فعلاً يا شيون يعني يا راجل انا كنت بحترمك بغض انظر عن مشاركتك في افشل فريق كورة ممكن تتخيله لكن دلوقتي ده وكمان عايزني اشارك معاك ومع شلة الفشلة دول
نيللي وشها احمر بغيظ
نيللي : انته بتقول على مين فشلة يا كائن انته ؟ وياترى احنا مش عاجبين السيادة في ايه يمكن عشان مش مقضيين حياتنا كلها متنحين في الكتب وبنحاول نعيش ولا انته ...
دونجهى حط ايده على كتفها بهدوء : ولا تعصبي نفسك , كاااااااااااانج الكائن ده حاول يتحرش بنيللي
كانج اللي كان واقف عالمسرح اول ماسمع الكلمة اتلفتلهم وفجأة بدا وكأنه بيتحول في فلم هالك والكل وسع
كانج : ده انا هطلع عين اللي ...
فجأة التحول وقف وساد الصمت ماعدا صوت رقيق من عند الباب
ندى : هو هنا تجارب الاداء مش كده ؟!
صمت تام في المسرح والكل متنح ومزبهل ومن ضمنهم كيوهيون مما يستدعي اني اعرفكم بكائن الندى واللي عشان نعرفه بطريقة دقيقة لازم ناخده من اربع جوانب
نيللي : والانسة عايزة حاجة من هنا ؟
ليتوك جري ووقف جمبها
ليتوك : نيللي دي ندى اللي كلمتكوا عنها اللي بتعزف بيانو
هيوك : ياديني كل ده وكمان بيانو
دوني سنده قبل مايغمى عليه
نيللي : وفين البيانو مش شايفاه
ضحكت برقة خلت الهيييح يتطاير في الاجواء
ندى : اكيد مش هشيله معايا لهنا .. بس انا بعرف اعزف عالكيبورد برضو ممكن تسمعي ومعايا تسجيلات عالموبايل لعزفي
ادتلها الموبايل بإبتسامة
ندى : ممكن تسمعوها لحد ماظبط الكيبورد
ريووك بلهفة : اظبطه معاكي
دوني ببلطجة : محدش بيظبط هنا غيري
نيللي : اخرس يا كلب منك له , هنري خليك معاها
هنري : هييييييييييييه هنظبط
دوني : يلا يابن المحظوظة والموصحف مانته فاهم اي حاجة
اتلفتت ولسه هتشغل الموبايل اكتشفت ان كيوهيون لسه موجود
نيللي : انته لسه هنا ؟
كيو ببلاهة : هه ؟!
نيللي : ماله ده ؟
وده يودينا لوجهة النظر الرابعة كيوهيون : ندى هي البنت اللي بتخلي كائن الكيوهيون قاعد حاطط عينه في الكتاب وعامل نفسه بيدح بس عشان يراقب ضحكتها من بعيد لبعيد ويتخيل لو اتكلموا مع بعض هيبقى الحوار عامل ازاي وممكن تضحكله كده فيوم ولا لاً بس عمره ماكان عنده الشجاعة عشان يكلمها بجد ودلوقتي هي قدام عينه وسط شلة فشلة بتضحك مع كائن قصير عمال يتنطط حواليها وهو متكعبل في اسلاك الكيبورد
هان : سيبك منه وشغلي التسجيل خلينا نتمزج
نيللي : هو انا هشغل فلم اباحي ماتتلموا مالكوا متكومين فوقي ليه
كانج : يا نيللي مترغيش كتير وشغلي
نيللي : ابو اشكالكوا عيال مسهوكة
وشغلت التسجيل .. عزف جميل لدرجة انك ممكن تشوف الالحان بتطير في الهوا ووراها كمية قلوب رهيبة كانت بالنسبة لنيللي هجوم سرب من الجراد عالمسرح .. بس مقدرتش تنكر ان العزف جميل جداً
ندى : ايه رأيك ؟
نيللي : اه احم جميل .. حلو اوي عندك موهبة
دوني : اووووووووووي
ندى : طب انا جاهزة اعزف
هان : اتفضلي
بدأت تعزف عالكيبورد ونفس القلوب بتطير حواليها ونيللي استمتعت فعلاً بعزفها لحد ماشيون همس
شيون : موهوبة بجد لازم تدخل معانا
نيللي اتجمدت في مكانها وهي بتحاول تستوعب ايه الدبوس اللي دخل فضهرها فجأة ده .. نعم يا سادة انها الغيرة
نيللي : اه كويسة
شيون : ده غير ان مظهرها جميل كمان ويليق بالمسرح
الدبوس بقى خازوق
نيللي : اه جميلة
شيون : وبعدين ان يبقى معانا بنت زيها عالمسرح هيفيدنا كتير
الخازوق بقى تنين مجنح بينفخ نار في قفاها فأتلفتتله بغيظ
نيللي : طب اروح اخطبهالك ؟!
شيون : هه ؟ انا مش ...
صوته راح وسط تسقيف كل الموجودين بعد ماخلصت عزف ووقفت باصة لنيللي مستنية القرار ونيللي هاين عليها تضربها بالكيبورد
هان : مش محتاجة تفكير طبعاً
كانج : تفكير مين ياباشا دي لو مدخلتش اومال مين اللي يدخل
نيللي بصتلهم بغيظ ولشيون بفرسة ومش عارفة تقول ايه لقت اللي ظهر فجأة من اللامكان * احتمال نزل من السقف *
كيبوم : متدخليش المشاعر الشخصية في الشغل
نيللي بسخرية : شخصية ؟ مشاعر ؟ انا ؟ هههههههههههه .. هههههههههههههههههههههههههههههههه .. ها ها ها بتكلم عن ايه انته ؟!
هان : هو في ايه ؟
صرخت فوشه : مفيش حاجة
هان : هو انا هقطع الخلف كام مرة في اليوم بسببك
هنري : اعتقد انها بتبقى مرة واحدة بعد كده ...
هان : سؤال مجازي يا هنري سؤال مجازي
نيللي : احم برافو عليكي يا انسة ندى .. اهلاً بيكي في الفريق
ندى نطت من الفرحة وجريت حضنتها والغريب انها متلسعتش من النار الوالعة فيها
ندى : انا سعيدة جداً طول عمري كان نفسي اشترك فحاجة زي كده
نيللي : طيب طيب تمام كملي تدريب عالبيانو لحد مانشوف طريقة ندخله بيها الجامعة
ندى : حاضر
نيللي : ممكن تتفضلي دلوقتي اكيد عندك محاضرات
هيتشول : لا تتفضل ايه ميصحش مش لازم تتعرف عالفريق والمسرح والمكان .. شوفتي الكواليس من ورا ؟
ندى ببراءة : لأ
هيتشول : وده يصح ازاي تدخلي ومتتفرجيش عالكواليس
دوني : احيه ده هيستفرد بالبت
كانج : انته يا اخ اللي ياكل لوحده يزور
هيتش : ششششششش
تجاهلهم وماشي معاها يفرجها عالكواليس لقى اللي سحبه من قفاه بعصبية
كيو : هو انته معندكش احترام لأي حاجة ؟!
صمت تام في المسرح حتى صرصور الحقل مقدرش ينطق وهو مش قادر يستوعب ان كيم هيتشول بيتعرض للأهانة دلوقتي , هيتش بص لإيده بقرف
هيتش : ناوي تنزلها بنفسك
كيو : لما تتعلم انته الاول تحترم نفسك وزمايلك في المكان
ندى : في ايه يا ...
هيتش اتلفتلها بإبتسامة
هيتش : متاخديش فبالك تقريباً عنده مشاكل فدماغه
كيو : انا هوريك المشاكل
كور قبضته ولسه هيديه فوشه كانج لحقه ومسك ايده
كانج بزعيق : فيه ايه انته اتجننت ؟
كيو : انته مش شايفة بيفكر فأيه ؟!
هان : هو ايه اللي بيفكر فأيه انته اللي دماغك راحت فين
شيون اتدخل : كيوهيون اهدى انته فاهم غلط ورا الكواليس في الادوات والالات بتاعتنا والمسرح مفتوح من الضهر اصلاً
كيو : هه ؟ مفتوح ؟! .. يعني انته مش ...
هيتشول نزل ايده بهدوء ومال عليه يوشوشه
هيتش : من ساعة ماشوفتك بتبصلها وانا شاكك .. كان لازم اتأكد
كيو برقله وتراجع : انا .. انته غلطان انا ...
هيتش طبطب على كتفه
هيتش : المرادي كنت بتأكد بس .. المرة الجاية لو خدتها على جمب يبقى حقك تقلق .. انا لو مكانك الحقها قبل ماتطير مني
اتنهد وبصلهم بملل : زهقت هروح انام في الملعب شوية محدش يناديني
سابهم وخرج فأتجمعوا حوالين كيو
هيوك : كان بيقولك ايه ؟
دوني : من منظره ده اكاد اجزم انه ههده بالقتل
كانج : جبت اكاد اجزم دي منين ياض
دوني : فاكرها من اعدادي يا عم
نيللي : ششششش اتهدوا بقى .. بص يا اخ انا مش عايزة مشاكل هنا خلاص غلطنا اما طلبناك وعرفنا غلطتنا لو مش ...
كيو : هشارك
نيللي : نعم ؟!
حاول يرجع للشخصية اللي عايش فيها بصعوبة
كيو : احم بعد ماشوفت العرض ده اعتقد انكم مش زي ماتصورت يمكن ميبقاش تضييع وقت لو شاركت ده غير ان الواحد لازم يبقى عنده نشاط جانبي ده مفيد للصحة فهشارك معاكوا
كانج : لا والنبي متشاركش لا والله مانت تاعب نفسك ودي تيجي
دوني : تحب نمسحلك الجزمه بالمرة
شيون : ششش في ايه ؟! .. انا سعيد انك خدت القرار ده صدقني مش هتندم عليه ومشاركتك هتفيدنا كلنا
سوسن رجعت من الحمام عالكلمة دي واتعصبت
جومي : هو ايه اللي تفيد ومتفيدش مين انته عشان تقرر انا هنا بس اللي اقول , اتفضل سمعني صوتك
كيو بصلة بشك
نيللي : دي سوسن اااا جومي مدرب الصوت بتاعنا .. اتفضل غني
كيو : اه ماشي احم
بصلهم بتوتر مش متأكد المفروض يغني ايه لدرجة انه كان عايز يلطش نفسه بالقلم كيوهيون اللي عمره ماتوتر وهو بيفهم دكتور في الجامعة انه حمار متوتر وهو واقف وسط شلة متخلفة عقلياً عشان يغني .. لحد مالقى ندى وقفت وسطهم بصالة بحماس ومستنياه يبدأ .. منغير مايحس حتى اللحن ظهر ووراه الكلمات .. اغنية نكد بنت باجزي بس بيحبها .. غنى للأخر وهو باصصلها هي بس وهي لسه بصالة بين حماس وتأثر لحد ماخلصت الاغنية .. وساد صمت تام في المسرح وكلهم مزبهلين وكما يبدو كان في ناس بتعيط ورا ومن ضمنهم كانج لحد ماقطع الصمت تسقيف ندى ليه والكل سقف وراها بإنبهار
نيللي : انته عظيم يابني فينك من زمان
كانج : احم انا مبعيطش ده صباع هنري دخل فعيني
دوني وهو بيسح : انا بعيييييييييييط
هان : وانا هعيط لو متأثرتش بعيد عن دراعي
اتلفتوا لجومي اللي كان باصص بإنبهار وحرفياً واقف على طراطيف صوابعه
نيللي : ها ايه رأيك هو ده الحتة الخريفي اللي كنت عايزها ؟
جومي : نكد .. قمة النكد انته لو بتحاول تقتلنا مش هتعمل كده .. انا في قمة السعادة .. انا لازم احضنك
كيو تراجع بقلق وهو لسه مش واثق في الكائن ده
جومي : متحاولش تهرب لازم احضنك
كانج : جرا ايه ياسطى احنا مسرحنا اشف مالشرف
جومي : انته مش مقدر الموهبة
كانج : انته اللي مش مقدر حاجات تانية
جومي : خلاص خلاص .. عموماً اهلاً بيك كده فريق الفوكالز معايا كامل
شيندونج : وانا ظبطت رقصة مفيش زيها لو ركزتوا معايا بس هتولعوا الدنيا
يسونج : انا فجأة حاسس احساس غريب .. حاسس ان في امل .. حد يجيبلي كوباية ميه بسرعة
ليتوك زقه على ورا وطلع عالكرسي عشان الخطبة العصماء
ليتوك : كده كل حاجة اكتملت والجاي كله علينا وعلى مجهودنا واحنا نقدر نوصل , هنعمل عرض مفيش زيه .. هيبقى .. هيبقى ...
دوني : سوبر شو ياريس
ليتوك : ايوه صح
نفخ صدره بطرقه شكسبيرية
ليتوك : هنعمل سوووووووووبر شوووووووووو
الكل صقف من التأثر وفي زغاريط طلعت مش لازم نقول مصدرها منعاً للأحراج المهم كده اننا بقى معانا كوبلين مستقبليين في القصة عشان انا لو مدخلتش سهوكة اتحرق
نيللي وندى مربعين عالمسرح وسط 15 من امزز مزز الجامعة لدرجة ان في ناس برا ماسكيين مشاعل وبيهددوا يولعوا في المسرح بس ده اخر اهتماماتهم دلوقتي وهما قاعدين بيسمعوا لليتوك في احدى لحظاته الجدية النادرة وهو بيشرح الحفلة بتمشي ازاي
ليتوك : بصوا يا رجالة .. ويا ندى
اتلفتوا لنيللي عشان يضحكوا لقوها مخدتش بالها من الاهانة اساساً
دوني : متحاولش ده الحج نيللي
ليتوك : عموماً ترتيب العروض بيبقى ثابت في كل حفلة اولاً بيبدأ بعزف عالالات بس طبعاً معانا ندى وهنري وسونجمين وهيتش عايزينكوا تظبطوا مع بعض عرض يخليني اعيط كده ولاحظوا اني مبعيطش بسهولة
هيوك : انته عينك لسه وارمة من غنا كيوهيون امبارح
حدفة بالكشكشول وكمل كلام
ليتوك : احم .. بعد كده العرض التاني وده بيبقى يا سولو يا دويتو حالياً احنا معانا الكائنين دول * هيوك ودوني * مظبطين دويتو مع بعض مش كده
دوني : احنا عملنا رقصة على اغنية هتبهركوا
ليتوك : ربنا يستر , ومعانا كيوهيون طبعاً في السولو ده اساسي
كيو : انا ؟!
ليتوك : شايف كيوهيونات غيرك هنا
كيو : احم مش قصدي بس انا لسه متدربتش ومش معايا اغاني و ...
جومي : بالنسبة للتدريب متقلقش انا هظبطك اما الاغنية بقى فالمفروض شيون يتكفل بالموضوع ده
شيون : انا .. بس انا لسه مخلصتش اغنية العرض الرئيسي مش عارف هلحق ولا لا ومفيش فدماغي حاجة حالياً
ليتوك : طب وبعدين ؟ يغني اغنية قديمة ؟
كيو : هو انا احم .. كاتب اغنية
ندى : بجد ؟! وااااو
وشه احمر من انبهارها بيه بس حاول ميبينش
كيو : اه كنت كتبتها في الاجازة وانا فاضي يعني محتاجة شوية تظبيط بس كويسة
جومي : كويس سمعهالي بعدين
ليتوك : اخر حاجة بقى العرض الرئيسي وطبعاً ده اهم من اي حاجة
نيللي : انا كنت فكرت فحاجة .. ايه رأيكوا لو الكل يشارك في العرض ده
ليتوك : ازاي ؟
نيللي : يعني ده العرض الاهم وهيظهر كل حاجة تعبنا عليها اغنية كاملة غنا ورقص وراب وكل حاجة يبقى الكل يشارك فيها طبعاً بعيداً عني لأن اقصى مجهود ممكن ابذله في الحركة هو اني اروح اجيب ساندويتش مالكافتريا
شيندونج : انتي قصدك تطلعي 13 شاب عالمسرح يرقصوا ويغنوا مرة واحدة
نيللي : اه ليه لأ
كانج : هو في مسرح يستحمل العدد ده كله
شيندونج : وانا مفياش صحة ادرب كل دول انا
ليتوك : هي فكرة حلوة .. سيبكوا من ان العدد كبير والتدريب هيبقى صعب عندنا وقت ننسق كل ده , بس فعلاً كلنا تعبنا فلو كلنا شاركنا بالتعب ده هنبهر الكل , ثم انته متخيل لو 13 شاب بالوشوش دي على مسرح واحد ايه اللي هيحصل
دوني : هيجيبولنا بوليس الاداب
ليتوك : بالظبط .. ده غير ان حتى اللي مش هيشاركوا عالمسرح هيشاركوا بالموسيقى زي ندى
هيوك : هو ايه اللي زي مفيش غيرها اصلاً
يسونج : متقاطعوش وهو عميق
ليتوك : دي فكرة عظيمة ولازم نتمرن عليها من دلوقتي .. شيون تقدر تكتب اغنية مبنية عالاساس ده
شيون : اقدر بس محتاج حد يساعدني في الراب
هيوك : انا فضهرك ظبط الفكرة وقولي
نيللي : اشطه جداً يا رجالة كده احنا هنبدأ الشغل بجد
هان وكيو صرخوا فصوت واحد : والامتحانات ؟!
كانج : بلا وجع قلب بقى هي سنة ولا اكتر
كيو : لا لا لا متفقناش على كده
شيون : خلاص مش لازم نتمرن كلنا في نفس الوقت كده كده المسرح مش هيكفي فنقسم نفسنا ناس تتمرن وناس تحضر المحاضرات وتعمل ملخصات وفي الاخر نتجمع كلنا ونذاكر تمام كده
نيللي : اكيد تمام
مدت ايدها في النص عشان يحطوا ايدهم فوقها
كانج : حرتك احنا 17 بني ادم الحركة دي متنفعش خالص
نيللي : ماحنا لازم يبقى عندنا حركة تشجيعية
يسونج : بلا تشجيع بلا بتاع زي ما تيجي تيجي
قام ينزل من عالمسرح
يسونج : انا رايح اشوف الـ .. اوووووووووويوووووووووو
اتكعبل من عالمسرح ووقع على وشه وكلهم نطوا يلحقوه الا ليتوك اللي نط وسطهم وهو بيصرخ
ليتوك : هو ده هو ده الهتاف اللي محتاجينه
نيللي : هتاف ايه اراجل اتدشدش
ليتوك : وهو بيقع قال ايه ؟ اويووو هو ده الهتاف
دوني : يعني لو كان قال احيه ياني ياما يبقى ده الهتاف
ليتوك : اخرس انته .. انا هعد ونقولها كلنا مع بعض جربوها صدقوني هتعجبكوا
قوموا يسونج وبصوله وهو واقف بحماس
ليتوك : يلا بأعلى صوت .. محدش يفتكر اني مش شايفه
بص لهيتش وكيو وكيبوم بغل
هيتش : هبل بهبل اتفضل
ليتوك : واحد اتنين تلاتة
" اويووووووووووووووووووووووووو "
متبقاش مبالغة لو قلت ان حماسهم وهما بيصرخوا بيها وصل للجامعة التانية وهزهم كمان
ليتوك : الى الجهاااااااااااد
يسونج : انا صوتي راح اصلاً
الاشتراك في:
تعليقات الرسالة (Atom)
ليست هناك تعليقات:
إرسال تعليق