Break My Spell
Part 1
ملل
.. مش عارف عدى اد ايه عليا وانا كده .. الناس كلها قاعدة مع بعض بترغي وتهزر او
تتخانق والكوبلز ماشيين يسبلوا لبعض حتى القطط والكلاب بيتخانقوا .. وانا قاعد كده
بتفرج وبس .. مش فاكر اذا كنت فيوم بعمل زيهم ولا انا طول عمري كده , يمكن اكون
عملت مصيبة فحياتي وبتعاقب عليها وانا معرفش .. انتي ايه رأيك ياحجة ؟!
سند
دقنه بأيده وهو باصص للست العجوزة اللي قاعدة جمبه في الجنينة مشغولة باللعب مع
قطتها ومتجاهلة وجوده تماماً .. حرك ايده قدام وشها لكن برضو معبرتوش .. قام اتنطط
قدامها بهبل لكن متهزتش حتى .. اخر مازهق شد ديل القطة اللي اتفزعت ونطت من على
رجلها وجريت فأجبرت الست انها تقوم تحاول تلحقها برضو منغير ماتبصله .. قعد تاني
عالبنج واتنهد بملل وهو بيراقب الناس حواليه لحد مالقى كوبل لطيف ماشيين وماسكين
ايد بعض برومانسية معديين من جمبه , استنى اما قربوا منه ومد رجله كعبل الشاب
وخلاه يقع
البنت
: انته كويس ؟!
الشاب
: اه .. مش عارف اتكعبلت فأيه
هيتشول
: عشان تبص قدامك وانته ماشي وتبطل تسبيل
البنت
ساعدته يقوم ومسك ايدها تاني وكملوا مشي بنفس الابتسامة
هيتشول
بقرف : يابني متخلينيش البسك في شجرة .. ناس تافهه
الوقت
عدى وهو قاعد بيتفرج عالناس وبيرخم عليهم ومحدش فيهم معبره لحد مازهق ساب الجنينة
وقام يدور على حتة تانية .. جرب يدخل محلات الهدوم يتفرج عاللي جوا او بمعنى اصح
يرخم عاللي جوا .. يزق ستاند الهدوم .. يزق باب البروفه يقيس في الهدوم ويرميها ..
الغريب ان محدش بيعلق على تصرفاته خالص كأنهم مش شايفينه اصلاً .. عجبته طاقية
كبيرة فرفعها عن راس المانيكان ولبسها ووقف قصاد المراية يتأمل جماله وضحك .. ضحك
لحد ماكان هيتقلب على ضهره وهو باصص في المرايه
هيتشول
: ذكاء ذكاء يعني .. بس منغير ماشوف اكيد لايقة عليا
قرب
من المرايه اكتر يمكن .. بس يمكن .. يعرف يشوف انعكاسه فيها .. لكن مفيش حاجة
ظاهرة غير الطاقية طايرة مع نفسها
دي
الحقيقية .. هو ده كيم هيتشول اللي صحي من النوم فجأة في نص الشارع لقى نفسه مش
موجود .. او بمعنى اصح مختفي .. محدش بيشوفه محدش بيسمعه لكن بيحسوا بيه وبتصرفاته
المزعجة .. وهو احياناً بيستمتع بكونه كده عشان يمارس هوايته في ازعاج الاخرين ..
او على الاقل ده اللي اقنع نفسه بيه عشان ميتجننش .. ميعرفش عن نفسه اي حاجة غير
اسمه وحتى ده عرفه صدفة لما لقى موبايل فجيبه وجرب يتصل بأي رقم عليه .. طبعاً
مستفدش اي حاجة غير ان اللي اتصل بيه نطق اسمه بس .. لكن مسمعش اي حاجة من اللي
حاول يقولها لأنه بالنسبة للبشر .. ملوش وجود
قلع
الطاقية ورماها عالارض وخرج من المحل حاسس انه جعان .. كعادته اختار افخم مطعم في
المكان ودخل عالمطبخ علطول ياكل اي حاجه قدامه وهو بيراقب الطباخين وهما بيشتكوا
ان الاكل بينقص وبيحلفوا انهم لسه مقدمين الاطباق كاملة .. خلص اكله وخرج من
المطعم بيفكر هيعمل ايه النهارده لحد مالقى شلة شكلهم رايحيين يتفسحوا نط معاهم في
العربية ومطرح ماياخدوه بقى مش مهم
الغريب
انه قاعد معاهم في العربية بيشاركهم الرغي والغنا كأنه واحد منهم او كأنه موجود
معاهم بجد .. لحد مامعظمهم ناموا فأكتفى بأنه يزعجهم وهما نايمين .. اللي يشد
شعرها واللي يلعب فوشه وشوية وبقى ينفخ في قفا السواق لحد مالهبل ضرب فنفوخه وراح
لاسع السواق بالقفا خلاه يتنفض برعب ويحود بالعربية بقوة من الفزع في نفس اللحظة
اللي صفا كانت بتعدي الطريق فيها .. اتفاجئت بالعربية جاية ناحيتها بقوة خلتها تنط
لورا وتقع على ضهرها وسواق العربية فرمل قبل مايجيبها تحت العجل واتلفت وراه للشلة
اللي صحيوا مفزوعين .. السواق زعق وهما زعقوا فيه ان محدش جه ناحيته هيتشول حس ان
وظيفته هنا انتهت وخرج من شباك العربية بإبتسامة رضا .. لقى صفا على الارض بتتلفت
حواليها بفزع كأنها بتدور على حاجة .. بص جمبها لقى نضارتها الكبيرة واقعة ..
تعاطف مع منظرها وزقلها النضارة برجله وكمل طريقه
صفا
: شكراً
اتلفتلها
بدهشة لقاها بتلبس النضارة اللي خلت عنيها بقت شبه عيون الفران فضحك
هيتشول
: ده انتي مبتشوفيش خالص
قامت
من عالارض وبصت عالعربية اللي اصوات اللي فيها عليت بالخناق ففضلت انها متعملش
مشاكل وكملت مشي في طريقها .. ابتسم هيتشول وهو شايف لعبه جديدة قدامه ومشي وراها
بيتفرج عليها عشان يحط الخطة المناسبة .. قصيرة بنضارة كعب كوباية ولامة شعرها
كأنها بتنتقم منه .. حس انها ناقصها ديل وتبقى فار رسمي , التخيل خلاه سخسخ من
الضحك وقرب منها لحد مابقى ماشي جمبها
هيتشول
: انتي راضية عن منظرك ده بذمتك .. معداش عليكي حاجة اسمها عدسات بدل نضارة جدو
اللي لابساها دي يابنتي انا عايز ارخم عليكي بس صعبانة عليا منتيش ناقصة رعب .. لو
فزعتك هتكشي ايه عن كده .. طب ان هعمل فيكي جميلة يمكن اعرف اعدل حاجة في المنظر
ده
مد
ايده ناحية شعرها عشان يفكه لقاها فجأة زقت دراعه بقوة والتفتت وهي بصاله بغل من
تحت نضارتها
صفا
: خلصت استظراف ولا تحب افرج عليك الناس دلوقتي
هيتشول
من الصدمة تراجع لورا وهو مش مصدق انها بتكلمه فعلاً
هيتشول
: ا.. انتي بتكلميني انا ؟!
صفا
: ايه السخافة اللي فيك دي يا اخي وانته مالك بشكلي ولا شعري .. الفروض انك كده
ظريف بقى وتقعد تحكي وسط اصحابك عن البنت اللي هزقتها
هيتشول
قرب منها بلهفة وهو مش مصدق
هيتشول
: انا بتكلميني انا مش كده ؟ انا اللي واقف قصادك دلوقتي ؟ طب .. طب انا رافع كام
صباع دلوقتي
صفا
: عالاقل اما تتريق عالنضارة شوف طريقة جديدة بلاش الهبل بتاع الحضانة ده
ضحك
لحد ماعينه كانت هتدمع من الفرحة وهو مش مصدق اخيراً في حد شايفه وسامعه
هيتشول
: ازاي ؟ انتي زيي ؟ اكيد انتي زيي والا مكونتيش شوفتيني صح
صفا
: ده انته مجنون رسمي
سابته
ومشيت فأتفزع وجري وراها وهي مقتنعة انه فعلاً مجنون فبقت تمد فخطوتها وهو وراها
هيتشول
: استني بس .. انتي عارفة احنا كده ليه طيب .. طب في حد غيرنا كده
سرعت
اكتر في مشيها لحد مادخلت حضانة اطفال .. ابتسمت عشان الحراس اكيد هيوقفوه ..
لكنهم معملوش حاجة سابوه يدخل عادي جداً فأتلفتتلهم بعصبية
صفا
: انتوا ازاي تسيبوا اي حد يدخل اومال انتوا وظيفتكوا ايه افرضو حد مجنون خطف طفل
من هنا
الحارس
: ماحنا عارفينك يا انسة صفا هنوقفك ليه
هيتشول
: ايه ده ؟ دول كمان زينا
صفا
: انا مبتكلمش على نفسي انا بتكلم عالكائن ده
شاورت
على هيتشول فالحراس اتلفتوا مطرح ماشاورت
الحارس
: كائن ايه حضرتك ؟!
صفا
: انته هتستعبط
الحراس
بصوا لبعض بإستغراب وبصولها تاني بيحاولوا يفهموا هي بتتكلم عن ايه
هيتشول
: دول مش شايفيني .. اومال شايفينك انتي ازاي
صفا
بعصبية : ايه يوم المجانين ده
الحارس
: هدي نفسك بس يا انسة صفا انتي شكلك اعصابك تعبانة
صفا
: تعبانة ايه بقولكوا خرجوا الراجل ده برا
الحارس
: لا حول ولا قوة الا بالله والله كانت كويسة امبارح
هيتشول
خرج من حالة التتنيح وسخسخ مالضحك اما استوعب الموقف فبصلته بعصبية
صفا
: انته متفق معاهم
هيتشول
: استني بس ده الموضوع طلع كبير
صفا
: انا هكلم البوليس
الحارس
: بوليس ايه بس يا بنتي .. ماترجعي بيتك وترتاحي النهاردة شكلك تعبانة
هيتشول
: اوعي تتعصبي عليه انا هريحك
راح
ناحية الحارس ولسعه على قفاه خلاه يتنطط
الحارس
: بسم الله الرحمن الرحيم اعوذ بالله من الشيطان الرجيم
صفا
: انته مجنون ايه اللي عملته ده
الحارس
التاني : والله ماعملت حاجة
صفا
: لاااااا انتوا بجد مجانين
سابتهم
ودخلت الفصل وهو بيجري وراها .. الاطفال اتجمعوا حواليها بسعادة فرجعتهم لورا
ووقفت لهيتشول
صفا
: اظن كفاية اوي لحد كده احترم وجود الاطفال وامشي لو سمحت قبل ماطلبلك البوليس
ربع
ايده واتستند بكتفه عالباب وهو باصللها بإستمتاع
صفا
: ولاد ارجعوا ورا محدش يقرب منه انا هكلم البوليس يجي يشيله
طفلة
: هو مين ده يا ابلة ؟!
صفا
: حد وحش ياحبيبتي
طفل
: فين ؟!
بصت
للطفل اللي باصصلها بتساؤل حقيقي موجود فعيون الفصل كله .. اتلفتت لهيتشول لاقته
لسه باصللها وكاتم ضحكه
طفل
: متخافيش يا ابلة لو برا يبقى الحراس زمانهم مشوه
قرب
هيتشول منها فتراجعت بسرعة .. مر بين الاطفال اللي محسوش بوجوده اصلاً لحد ماوقف
قصادها علطول
هيتشول
: هوريكي حاجة يا ابلة بس اوعي تتفزعي
صفا
: انته مجنون وسافل وقليل الادب
هيتشول
: انتي اللي دماغك شمال .. بصي
شاورلها
على ازاز الشباك فأتلفتت بتردد عشان تشوف انعكاسها وكل الاطفال اللي حواليها ..
لكن مشافتش ليه هو اي انعكاس .. ثواني حاولت فيها تستوعب اللي شايفاه وتدورله على
تفسير منطقي لحد ماحست بيه بيتحرك جمبها فأتلفتت بسرعة لقته نزل على ركبه وسط
الاطفال وبيعمل حركات بوشه قدامهم .. وهما ملامحهم بتقول انهم مش شايفينه اصلاً
هيتشول
بإبتسامة مستفزة : ايه رأيك في اللعبة دي يا ابلة ؟!
مقدرتش
تستحمل اكتر من كده وحست الدنيا بتلف بيها واخر حاجة شافتها ابتسامته .. اللي
ادركت ان محدش شايفها غيرها
يا حبيبى يا هيتشى .. رخم رخم يعنى عمال تضايق ف خلق الله البشر والحيوانات كمان بس احسن يستاهلو ازاى ميردو عليك حتى لو مس شايفينك مفروص يشفوك باحساسهم هييييييييح بقى خصوصا الواد والبت دول هههههههههههههه .. قمر يا هيتشى قمررررررر اجمل مزة قصدى مز ممكن الواحد يشوفه .. ما هذه المفاجعة اشمعنا البت دى بس هى اللى شيفاه اكيد بسبب كعب الكوباية اللى لابساه ده لازم تشوف كل حاجة وهيتشى مش يتحرج ويتكسف ع دمه ان البت شيفاه وسامعه كلامه السخيف عليها لا ده فرحان ومظاطط اخيرا حد عبر اهله ف الليله دى.. يالا يا عيل عمال تلعب قدام الاطفال .. انت عملت ايه ف البت يا منيل كده تخرعها يالا احسن بنت حلال وتستاهل كل خير .. القصة حلوة اوى وكوميدى مسخرة كده .. فايتنج
ردحذف