الأربعاء، 14 سبتمبر 2016
Super Show (SS1)
في مكان ما في بلد ما في بعد ما غير عالمنا اللي عايشين فيه .. مفيش سوبر جونيور
قفلتكوا من اول سطر تمام كده انا ماشية صح .. في ذلك البعد اللي منعرفوش سوبر جونيور مكانوش فرقة مشهورة زي دلوقتي .. كانوا شباب في جامعة واحدة ومش شلة واحدة كمان وعايشين حياة شباب الجامعة بأنواعها بطريقة طبيعية جداً , وبما ان قدرهم مهما كان العالم اللي هما فيه انهم يتجمعوا واللي يجمعهم الموسيقى كان لازم اكتبلكم قصة ازاي اتجمعوا في العالم المختلف ده .. اللي جمعتهم نيللي .. بنت .. يعني تقريباً بنت .. هو مكتوب في البطاقة انثى ودي تقريباً صلتها الوحيدة بعالم البنات بس بما انها السبب في تجميعهم لازم نديها شوية احترام عن كده , هي بنت بس .. مختلفة شوية , بصوا هحاول اشبهالكوا بحد .. شايفين الشاب اللي هناك ده ؟ اه اللي ضارب الهودي الاسود وبنطلون الترنج الواسع ولابس ساعة كبيرة فضة .. اللي قاعد عالرصيف وحاطط السماعة ده وبيخبط في الارض عاللحن بالصندل الرجالي الاسود ده .. شوفتوه ؟ دي نيللي
دوني : بصي لازم تظبطي اللفة من تحت لفوق والا هـ...
نيللي : يابني ارحمني بقى لو حد من الدكاترة شافك هتروح فداهية
دوني : ليه وانا عبيط هرميهم في حجرك واجري
نيللي : لا اصيل
دوني : اسمعي الكلام ده مهم مش هتلاقي حد يفيدك فيه زيي
نيللي : انا لو اخويا عرف اني بسمع الكلام ده هيقطم رقبتي
دوني : اهي دي غلطته بقى كان لازم يقولك بنفسه بدل ماتعرفي مالغريب
فجأة لقوا ضل حجب عنهم الصوت والضوء والحرارة خلوا دوني تلقائياً حدف السجارة في حجرها وعمل نفسه من بنها
كانج : هو ايه اللي يقولهولها ؟
كانجين .. صاحب اخوها الكبير ومعتبر نفسه اخوها غصب واقتدار وانه لازم يحميها من الاشكال الضالة اللي بتقعد معاها واولهم دوني
كانج : انا مش قولتلك متقعديش مع الواد ده تاني
دوني بفزع : هـ هدي اعصابك ياكابتن وانا بقولها كلام ابيح والعياذ بالله ده انا بشرحلها كيميا
كانج : كيميا ؟ والله لا ابلغ عنك واقول انك بتخبي الحشيش في الشراب
نيللي : ياعم اقعد بدل مانته قاطع علينا ميه ونور كده
كانج : يابنتي انا خايف على اخلاقك تتفسد
دوني : اكتر من كده ؟!
كانج بصله بشر واستحلف لايعلقه على باب الجامعة ولسه هيجيبه من قفاه لقى اللي وقف في النص بيهدي الوضع
هان : اهدى بس هو انته علطول كده ؟
كانج : انته مش شايف بيقول ايه ؟
هان : يابني هي اصلاً لاسامعاك ولا سامعاه ركزوا بقى عشان مش عايزين نشيل السنة دي كمان
هانكيونج .. الوحيد اللي مقتنع ان امل ووفاء لسه عايشين
هان : وانتي شيلي الهاند فري وافتحي كتاب الامتحانات كمان كام يوم
شالت الهاندفري وبصتله
نيللي : هي دي مناهج تتذاكر
هان : نحاول نذاكر ونفهم بعض صدقيني هننجح
دوني : * مسم * شوف الكلام العميق
فتح شنطته وطلع كتاب حوال 1800 صفحة بكل ثقة ولسه هيفتحه لقى اللي فقفاه
يسونج : انا حاسس اننا هنسقط
نيللي : لا اله الا الله ليه بس كده
كانج : ده انا كنت بدأت اقتنع منك لله
دوني : * مسم * شوف الكلام العميق
هان : حرام عليك انا ماصدقت شجعتهم ليه تقفلني
يسونج : مش بعبر عن احساسي .. احنا هنسقط مش محتاجة كلام
يسونج .. اللي قتل امل ووفاء وهرب مالجريمة
نيللي : الراجل عنده حق انا لو قريت سطر واحد مالكتاب ده هيجيلي جلطة .. بص احنا بدل مانضيع وقتنا في الكلام الفارغ ده نبرشم الاجابات
دوني : * مسم * شوف الكلام المفيد
كانج : تبرشمي ؟! طبعاً ماهي دي اخرة قعدتك مع الحشاش ده
دوني : الله يكرم اصلك
نيللي : مش البرشام ده
هان : صدقوني لو اجتهدنا هيبقى في امل
نيللي : امل ماتت محروقة في الصفحة التالتة في الكتاب اللي فأيدك
دوني : ركزي معايا انا ممكن اكتب على ورق الـ ...
نيللي : لا انته لا
يسونج : تفتكروا لو لقينا دحيح نظبط معاه ممكن ننجح .. لا اكيد لا
نيللي : انا مش حارق دمي الا اللي قاعد هناك ده
اتلفتوا مكان ما بتشاور لمقعد هادي في الجامعة قاعد عليه دحيح الدفعة ماسك الكتاب اللي هان شايله بالعافية وقاعد يفر فيه ويكتب في ورق وملخصات ممكن يحضر بيهم دكتوراه في المادة
نيللي : قاعد بقاله ساعتين مرفعش عينه من الكتاب وعمال يكتب يكتب ايييييييه الناس دي بتفهم ازاي ؟
هان : ناس مجتهدة عايزة تنجح مش زيكوا
نيللي : روح اقعد جمبه ياخويا
هان : ياريت بس الاخ مبيكلمش حد
كانج : مش ده كيوهيون
نيللي : كل ده اسم
كانج : اسكتي اللي مش عاجبك ده اول عالدفعة سنتين ورا بعض مبيتعاملش غير مع الدكاترة حتى المعيدين بيسألوه في حاجات ميعرفوهاش
دوني : يا راااااااجل ؟!
هان : اهي دي الناس بقى
نيللي : بلا وجع دماغ انا قايمة الحق الماتش
هان : ماتش ايه
نيللي : مش النهاردة في ماتش النهاردة بين جامعتنا والجامعة الخنيقة التانية
يسونج : هنتغلب كالعادة
نيللي : حد يقتل الواد ده
دوني : استني خديني معاكي
حط السجاير فجيبه وقام وراها خلا كانج يجري وراهم بفزع
كانج : مش هسيبها لوحدها معاه
يسونج : انا هروح عشان اثبت احساسي
هان لقى نفسه بقى لوحده هو والكتاب عرف ان مفيهاش فايدة وحطه في الشنطة وراح وراهم
يسونج : عشان تعرفوا اني صح
هان : لسه في امل فاضل 3 دقايق
دوني : الواد هيوك عليه شوطة رهيبة
نيللي : ده مدخل جون في نفسه رهيبة ايه ؟
دوني : بغض النظر عن شبكة مين المهم الهدف اللي فدماغه
كانج : انا عايز افهم حاجة واحدة , مين الحيوان اللي دخل هنري الفريق الواد بينزل ينضرب ويطلع مدغدغ
نيللي : تقريبا ده الهدف من وجوده بيستفز الفريق التاني فيجروا وراه ويسيبوا الكورة
دونجهى : * مسم * شوف التخطيط يلا يا هنري يا جااااااامد
لسه مكملش زعيق لقى اللي خبط الكرسي برجله من ورا بخنقة
هيتشول : هو الواحد ميعرفش ينام في الجامعة دي
قلع النضارة الشمس وبصلهم بقرف
نيللي : يعني انته سايب الجامعة كلها وجاي تنام في الاستاد اثناء الماتش وزعلان عشان الراجل بيشجع بضمير
كانج : الواد ده دسيسة
هيتشول : دسيسة ايه وماتش ايه انا نمت هنا الاول كان لازم يحترموا كده ويأجلوا الماتش
هان : نأجل ماتش عشان حضرتك نايم
لبس النضارة وريح راسه تاني
هيتشول : ماهم كده كده هيخسروا
يسونج : ماده اللي انا قوووووووولته
هان بعصبية : فاضل 30 ثانية لسه في امل
نيللي : لو قلت امل تاني هـ ...
دوني : اوباااااااا الكورة مع شيون
نيللي سمعت شيون واتلفتت ونصها بقى في الملعب عنيها على لون شراب شيون بتركيز لا مثيل له وقلبها بيدق كأنها بتجري جمبه
دوني : الواد مسيطر عالكورة
نيللي بسهوكة : اوووووي
بيقرب عالجون بيقرب عالجون , نيللي غارسة ضوافرها في دراع هان وهو بيصوت مالوجع .. شاط الكورة وقلبها وقف وهووووووب
دوني : جووووووووووووووووون
صرخة مدوية من نيللي خلت هيتشول اتقلب من عالكرسي بفزع ودوني فاق من الحشيش وهان دموعه نزلت وتقريبا دراعه بينزف
نيللي : شوفت الجون شوفت الجون
كانج : والموصحف شوفته
اتلفتت لهان تراجع بفزع
هان : اهدييييييي مش جون اللي هيعمل فيكي كده
يسونج : برضو خسرنا
نيللي : اوعوا انا عايزة اضرب الواد ده
كانج وهان ماسكينها بيحاولوا يهدوها ويسونج قاعد بهدوء ولا كأن في وحش كاسر حالف يبلعه قدامه لحد ماهيتش ابتسم بهدوء
هيتش : بس لعبة حلوة حتى مع انه عارف ان الجون مش هيعمل فرق برضو مهموش ولعب حلو للاخر
فجأة اتحولت من اسد لقطة رومي ديلها بيلعب وراها وهي باصة لهيتش
نيللي : اه .. ماده برضو اللي قولته
تجاهلها وقام مشي منغير ماينطق
كانج : ايه الكائن المستفز ده ؟!
دوني : انا رايح اشوف هيوك لازم اهنيه عالشغل الجامد ده
كانج : شغل ايه ده ضيعنا؟!
دوني : ايشفهمك انته في الكورة دي فن
نيللي : يلا نلحق نتطمن عليهم
جريت بحماس عشان تلحق شيون وهما وراها لحد اوضة الاستراحة دخلت لقت الفريق التاني واقف بإبتسامات شماتة واضحة
شيون بروح رياضية : لعبتوا حلو يا شباب مبروك
سوهو : لعبنا حلو ؟! هو احنا لعبنا اصلاً احنا اتمشينا في الملعب وانتوا اللي قومتوا بالشغل كله
تشانيول : يا راجل ده انتوا دخلتولنا الاجوان مش عارفين نرد جمايلكوا ازاي
شيون اتلفت لهيوك اللي بص في الارض بإحراج
شيون : اظن مفيش داعي للكلام ده الماتش خلص
كريس : ازاي بقى لازم صاحب الحق ياخده .. طالما مبتعرفوش تلعبوا غاويين تدخلوا ماتشات وتحرجوا نفسكوا اعترفوا ان جامعتكوا فاشلة وهتفضل كده
نيللي عصبها الكلام ومقدرتش تمسك نفسها اكتر دخلت ووقفت في وش كريس بعصبية
نيللي : احترم انك لسه واقف في الجامعة اللي مش عاجباك واتكلم عنها كويس
بصلها بسخرية وضحك
كريس : وانته مين انته كمان ؟
نيللي : مش عشان كسبتوا ماتش خلاص جايين تتنططوا
هنري مال على ودنها
هنري : خمسة
نيللي : وات ايفر يعني ماشي يا سيدي بتعرفوا تلعبوا كورة احسن مننا ده ميخليكوش احسن منا فحاجة اي مسابقة تانية هنجيبكوا الارض فيها
رفع الهودي بتاعها باحتقار
كريس : اتكلم على ادك
لقى كانج مسك ايده بغباوة وعلى وشك يكسرها لسه هيزعق فيه لقى فريقه بيضحك
بيكهيون : دي بنت
كريس : لا ده انتوا فعلاً جامعة غريبة لو ده منظر البنات عندكوا طبيعي تبقى حالتكوا كده
شيون : خد فريقك واطلع برا دلوقتي وكفاية لحد كده
سوهو : استنى بس اما نشوف اللي بتهددنا , يعني انتي مقتنعة انكوا تقدروا تغلبونا في اي حاجة
نيللي بعند : ومنغير مانتعب كمان تحب تجرب
سوهو : احب اوي .. نقول مثلاً مسابقة الاجازة
هيوك : احيه
تشانيول : حرام عليك هما ناقصين ذل
نيللي : ذل ؟! طب احنا هنوريك
هان : نيللي اهدي
نيللي : وهخليكوا تعتذروا لجامعتنا علني
كريس بإبتسامة مستفزة : ولو خسرتوا
بيكهيون : كفاية منظرهم ساعتها
كريس : هستنى بفارغ الصبر عشان اشوفك تاني في الاجازة .. يلا يا شباب
خرجوا وهما بيضحكوا بسخرية ونيللي نفسها تجيب رقبته تحت رجلها
نيللي : اكيد هنتقابل وابقى ساعتها اتجرأ تبص فعنيا وانته مذلول مع فرقتك التافهة
اتلفتت لزمايلها بحماس لقتهم باصينلها بفزع
نيللي : لازم ندمرهم في الاجازة لازم نثبتلهم اننا احسن جامعة و...
هان : نيللي .. انتي عارفة ايه المسابقة اللي في الاجازة
سكتت وتنحت لحظة واستعادت حماستها تاني
نيللي : مش مهم هي ايه المهم اننا هنحطمهم حتى لو اضطريت اني اطلع ارقص
هيوك : ماهو ده اللي هيحصل فعلاً دي مسابقة استعراض ياماما كل سنة الجامعات بيتنافسوا لتقديم افضل استعراض كامل عزف وغنا ورقص
يسونج : وكل سنة هما اللي بيكسبوا
هان : جامعتنا بطلت تشارك في المسابقة دي العميد قال انها تضييع ميزانية عالفاضي لاننا اكيد هنخسر زي كل سنة
دوني : وانتي دبستينا
بصتلهم وهما بيبصولها بلوم وهربت بعنيها لشيون اللي قابلها بلوم اكبر
شيون : اتهورتي واحرجتينا وخلاص حد قالك اننا مستنين دفاعك عنا
نيللي : انا ...
شيون : انسوا الموضوع هنقول ان العميد موافقش على مشاركتنا وخلاص خلينا نركز في امتحانتنا وبس
خرج وسحب باقي الفريق وراه وسابها مع شلتها
هان : مكانش المفروض تتسرعي كده
نيللي : اعمل ايه يعني هما اللي عصبوني انته مشوفتش استفزازهم
كانج : خلاص هنقعد نلوم انسوا الموضوع بقى زي ماقال
هان : يلا نروح نذاكر كفاية كده
يسونج : انا كنت حاسس ان اليوم النهاردة اسود
خرجوا ودوني بيطبطب على هيوك وبيناوله سجارة
دوني : ولعت في الماتش يا جامد
هيوك : انا عارف ان محدش هيفهم عظمتي غيرك
هنري : طب حد يسندني طيب
كانج : حد قالك تكعبل اللعيبة يابني ركز عالكورة ابوس ايدك
هنري : هما اللي بيزقوا بغباوة مش انته قولتلي مسيبش حقي
كانج : بعد الماتش ياهبل عاجبك التكسير اللي كسروهولك ده
خرجوا عالكافيتيريا يتغدوا وينسوا اللي حصل لقوا اللي داخل عليهم شايل صنية الساندويتشات
ريووك : احلى ساندويتش للي فاضحة الجامعة كلهااااااااا
شدت الهودي على وشها بإحباط
نيللي : هو الموضوع انتشر بسرعة كده
ريووك : يابنتي انا هعمل ساندويتش باسمك بعد اللي حصل ده .. لا بس سمعت انك احتقرتيه جامد
نيللي : والنبي مانقصاك يا ريوو
ريووك : استنوا هخلص اللي فأيدي واجيلكوا تحكولي عالتفاصيل بقى
كانج : الواد ده رخم اوي
هيوك وهو حاطط الرغيف كله فبوقه : بس عليه ساندويتشات رهيييييبة
قاعدة وسطهم وتفكيرها في شيون وبصته ليها مش مصدقة ان اخيرا لما جاتلها فرصة تقف قصاده تبقى دي بصته ليها
هان : خلاص بقى فكك
نيللي : طيب
دوني : الحق انته مش قولت انه كيو ده مبيكلمش ده , مش ده شيون اللي اعد معاه
اتسمرت ومقدرتش تتلفت اول ماسمعت اسمه وبصته ليها قصاد عنيها
كانج : اه ماهو شيون الوحيد اللي بيقعد معاه وكل فين وفين لما بيذاكروا مع بعض بس
هان : يا بخته شايفين الصحوبية المفيدة مش انتوا اللي حالفين تضيعوا مستقبلي
هيوك : كل وانته ساكت
نيللي : انا هقوم
هان : على فين مش هتاكلي ؟
نيللي : مش عايزه سلام
لسه هتمشي لقت ريووك جاي جري عليها
ريووك : نيللي العميد مخلي الطلبة قالبين الدنيا عليكي وعايزك في مكتبه حالاً
نيللي : انا ؟! ليه
ريووك : حسب ماسمعت جالتله مكالمة بخصوص مسابقة الاجازة وبشكل ما مليش اي علاقة بيه عرف ان انتي اللي فتحتي الموضوع
دوني : اوبااااا واضح ان لبستي
بصتلهم بقلق فقام هان
هان : متخافيش هيكون في ايه يعني انا جاي معاكي
كانج : انا فضهرك ولا يهزك
دوني : هخلص السجارة واحصلكوا
هيوك : هخلص الساندويتش واحصلكوا معاه
كانج رزع عالتربيزة فزع الاتنين خلى دوني يرمي السجارة وهيوك يحط الساندويتش كله فبوقه
دوني : احنا رجالتك يا كبير
هنري : انا بحب مكتب العميد اوي عنده تكييف
طلعوا على مكتب العميد واول ماقفوا قصاد الباب كل الشجاعة انهارت وتراجعوا وسابوها لوحدها قدام الباب
نيللي : في ضهري ورجالتي اخصص
هنري : اصل التكييف هيجيبلي برد
خبطت ودخلت لقت العميد بيمشي في الاوضة بغيظ رايح جاي اول ماشافها بصلها بغيظ
سومان : انته مين اللي سمحلك تدخل وفين البنت ام لسان طويل دي
نزلت الهودي بإحراج
سومان بفزع : ايه ده ؟! .. احم اه مش مهم .. انتي بقى اللي قولتي اننا هنشارك في المسابقة
نيللي : انا مكنتش ...
سومان : انتي ازاي تسمحي لنفسك تتدخلي في شئون الجامعة بالشكل ده , اعمل ايه انا دلوقتي والكلام وصل للاتحاد بالفعل واعتبروه رسمي
نيللي : ايه ؟ رسمي ازاي وانا مليش اي سلطة في الكلية ؟
سومان : وانتي فاكرة ان الموضوع بالبساطة دي ؟! انتي متعرفيش ان الجامعة اللي اتحدتيها مستنيالنا غلطة وعميدها ماصدق الكلام اللي قولتيه وصله ونقله للاتحاد على اساس انه اتقال باسمي
نيللي : بس انا ...
سومان : انتي المسؤولة قدامي لو مدخلناش المسابقة جامعتنا هتتجازى بسببك ومعندناش ميزانية للموضوع ده لاننا مكناش ناويين ندخله اصلاً يعني دلوقتي انتي اللي هتهتمي بالموضوع ده من الاول للاخر وتخلقيلي عرض من تحت الارض
تراجعت بفزع
نيللي : حضرتك استحالة انا مبفهمش في الحاجات دي خالص
سومان : اومال بتفهي في طولة اللسان بس الموضوع ميخصنيش يا تدخلي جامعتنا بعرض في الاجازة دي يا تعتبري نفسك مرفودة منها
نيللي : مرفودة ؟!
سومان : الكلام خلص اتفضلي اخرجي
قعد على مكتبه وادها ضهره حاولت تكلمه تاني ملقتش في فايدة فخرجت من المكتب ورجليها مش قادرة تشيلها وهي باصة لشلتها اللي سمعوا زعيقه بوضوح
نيللي : انا ضعت
هان سندها بسرعة
هان : نيللي اهدي بس تعالي
قعدها على كرسي قريب وكلهم واقفين باصينلها ومش عارفين يقولوا ايه
نيللي : هيرفدني من الجامعة
كانج : اكيد ليها حل
يسونج : حل ايه هتتحزم وتطلع ترقص
هيوك : مش وقتك دلوقتي .. بصي احنا نكلمه تاني بعد مايهدى
ريووك : وتفتكر ده الكلام ينفع معاه ده سومان يابا
نيللي : ملهاش حل انا ضعت
هان : يعني ايه هنقف نتفرج عليها كده
هنري : طب مانعمل استعراض بجد
بصولوا بعصبية
كانج : استعراض ايه انته كمان مش وقت افكارك الهبلة دي
دوني : وليه لا ؟ كل المطلوب ان يبقى في استعراض يشارك في المسابقة مش مهم يكسب ولا يتنيل المهم ان اي حد يطلع عالمسرح يخبط في الحلل ويعمل صوت وخلاص
هان : الواد ده بيفهم
دوني : اصل الصنف عالي
نيللي : تصدق صح احنا لو طلعنا اتشقلبنا عالمسرح وخلاص يبقى اشطه
سمع شيون اللي بيتقال وهو جاي يتطمن ايه اللي حصلها فوقف بغضب
شيون : هو ده اللي فدماغك ؟ بعد كل اللي قولتيله والتهديد ناوية تطلعي انتي وشلتك عالمسرح تفضحي الجامعة اكتر وخلاص
بصوله بين عصبيه واقتناع
نيللي : يعني مطلوب مني اعمل ايه بيقول هيرفدني لو معملتش استعراض
شيون : يبقى تعمليه صح وتنفذي كلامك ولا انتي بتتكلمي وبس
كانج : بالراحة يا اخ
شيون : قلتي ان جامعتنا احسن منهم بكتير .. تحبي تشوفي نفس النظرة من اللي اسمه كريس تاني اما تثبتيله كلامه
نيللي بعصبية : انا مبفهمش حاجة في الموسيقى والرقص والكلام ده
شيون بهدوء : بس عندك شجاعة تخليكي قادرة انك تعملي فريق بيفهم في الحاجات دي .. مش محتاجة تغني وترقصي , فكري ازاي تجمعي اللي يقدروا يعملوا كده
نظرته ليها والثقة اللي فعنيه خلوها تبصله وتسكت وكلامه بيدخل كل خلية فكيانها
هان : اعتقد ان عنده حق .. ليه متعمليش فرقة بجد
بص حواليه بحماس
هان : هنري بيعرف يعزف كمان وريووك كيبورد ودوني بيرقص
دوني : انا مش بتاع الكلام ده لاااااااا
هان : هنفوقه من اللي بيطفحه وهيرقص
دوني : لا مش اناااااااا
هان : وانا كنت بعزف bass من زمان اينعم بقالي كتير معزفتش بس اقدر احاول تاني
كانج : ورقص هيوك معروف في الجامعة كلها
نيللي : وانته انا سمعتك بتغني قبل كده مع اخويا
كانج : احم لا انا ...
نيللي : انا اقدر اجمع فريق بجد وبشوية تمرين ممكن نشارك
يسونج : وتفتكري ممكن تكسبي بينا احنا بس ؟ العرض لازم يبقى شامل واحنا مش كفاية
نيللي : يبقى نجمع اكتر
يسونج : الامتحانات قربت مين هيركز في اللي بتقوليه دلوقتي
كانج وهان زقوه على ورا ودوني مسكه كممه
اتلفتت لشيون لقته باصللها بإبتسامة واسعة خلتها تلقائيا تبتسم
شيون : تقبليني جزء من الفريق .. هكتب اغاني وصوتي مش بطال
دوني بيهمس لهيوك : احيه حريف كوره ودحيح وموز وبيغني ايه البوني ادم ده
هيوك : هيتحول في اخر الفلم ويقتلنا كلنا
دوني : انا برضو قلت كده
نيللي : بس انا معرفش حاجة عن الحفلة وتنظيمها خالص , حد فيكوا حضرها قبل كده
ريووك : ليتوك .. ليتوك شارك فيها اخر مرة جامعتنا شاركت , اينعم خسر لكن اكيد يعرف تنظيمها وهيقولنا ايه المطلوب ونعمل ايه بالظبط
هان : وده مش زمانه اتخرج ؟
ريووك : هي جامعتنا دي حد بيتخرج منها ده راشق عندي في الكافتيريا
يسونج : اكاد ارى بصيص امل .. الا لو كان اتعقد من اللي حصله وحلف ما يساعدنا ابداً
دي الكلمة الوحيدة اللي نطقها ليتوك اول ما راحوله وفهموه عالحوار وقالها بحماس مش طبيعي
ليتوك : اخيراً جاتلي الفرصة انتقم , لولا ان جامعتنا بطلت تشارك كان زماني محطمهم واخدت حقي من زمان لكن مش مهم دلوقتي في امل
طلع عالكرسي وهو بيشوح بأيده بحماس شكسبيري
ليتوك : هنعمل فرقة كاملة ونعمل بيها اكبر شو .. اعظم شو .. سوبر شو
الاشتراك في:
تعليقات الرسالة (Atom)
تحفة جدا فصلت من الضحك ... استمري أرجوكي متوقفيش
ردحذفتحفة جدا فصلت من الضحك ... استمري أرجوكي متوقفيش
ردحذفحبيتها جدااااا خاااااااااااالص اوووووووووووى يعنى مسخره و قصتها متنظمه فى نفس الوقت و مستنيه الجزء اللى بعده حقا جدا اوووووى :"DDDDDD
ردحذف