Catch him .. Part 26

Catch him .. Part 26

فى الكام يوم اللى قضاهم هيوك فى القصر كانت احواله مش حلوة .. دايما قاعد فى اوضته وقافل بابه عليه مش عايز يختلط بمينى ابدا .. بيخرج يروح محله ويفضل سهران بره لحد الصبح يرجع ينام ..  وفضلت ايامه ماشيه بالطريقة دى .. حاسس بطعم المرار فى حياته لحد ما فى يوم دخل كيونا عليه : كويس انى لحقتك قبل ما تخرج
مردش عليه هيوك اللى كان واقف يظبط هدومه قدام المرايه
كيونا : النهاردة خلص شغلك وارجع بدرى
لف هيوك ناحيته : ليه ؟
كيونا : عشان تيجى بكرة الصبح معايا الشركة .. ولا انت عجبك الطريقة اللى انت عايش بيها دى
هيوك ببرود : ومالها الطريقة دى ؟
وقف كيونا قدامه واتكلم بجدية : هيوك انا مش هسمحلك تدمر حياتك بايدك .. احنا اتفقنا انك ترجع وانك ميبقاش ليك علاقة بمينى .. بس مش بالطريقة دى انا فاكر اننا اتفقنا انك تروح الشركة الصبح وتروح محلك بعدها .. انما متفقناش انك تفضل سهران بره كل يوم لوش الصبح
هيوك بلا مبالاه : دى حياتى وانا حر فيها .. وسابه ومشى
مسكه كيونا من دراعة بقوة : انا قولتلك تخلص شغلك وترجع .. وبكرة الصبح هنروح الشركة ومش هتنافش فى الموضوع ده تانى

بص هيوك لكيونا اللى كان بيتكلم بمنتهى الجدية والشدة والحزم .. بالرغم ان كيونا طيب وعاقل ومتفاهم واقرب حد لهيوك بحكم ان الفرق بينهم سنة واحدة وقضوا وقت طويل عايشين مع بعض واكتر واحد بيقدر يريح هيوك بالكلام .. الا انه فى نفس الوقت شديد مش بيسمح بالغلط ولا ان حد يعانده واذا حط حاجة فى دماغه لازم تحصل والا هيتحول كيونا لشخص تانى صعب التعامل معاه حتى هيوك مش بيعرف يتعامل معاه وقتها ودايما بيتجنب انه يتسبب فى ظهور شخصية كيونا التانية .. وفى الوقت الحالى لو كان هيوك زود فى الكلام مع كيونا بالطريقة دى كان بالتاكيد هيشوف الوش التانى منه وقرر انه يوافقه على كلامه
هيوك : ماشى

فى اللحظة دى ساب كيونا دراع هيوك وخرج من الاوضه .. خرج هيوك وراه وراح لشغله .. وبالفعل رجع بدرى لاقى كيونا قاعد مع مينى فى الحديقة كانه مستنيه فعلا عشان يتاكد انه رجع .. بص هيوك عليهم فى نفس الوقت بص مينى وكيونا عليه وبعدها سابهم وطلع على اوضته من غير ما يتكلم معاهم

اتنهد مينى وبص لكيونا : هو يفضل يتجنبنى كده كتير
كيونا : اديله وقته وبعدين متفتكرش انه هيقدر يتعامل معاك بسهولة بعد ما اجبرته انه يرجع وخليته يبعد عن حبيبته والاذى اللى سببته للناس اللى بيحبهم .. ده غير اللى انت بتعمله وهو مش راضى عنه
مينى : بس انا قولت انى مش هاذى حد تانى .. وقولت بردو انى رجعته عشان انا خايف عليه .. وفى الاخر انتو الاتنين اهم حاجة عندى انا ممكن اضحى باى حاجة عشانكو .. ولو عايز الحق انا فعلا وحشنى هيوك القديم وحشتنى علاقتنا ببعض وكلامنا
فى الوقت ده جت فى دماغ كيونا فكرة وقرر انه يجربها : خلاص يبقى حاول تظهرله الكلام ده واكيد بالوقت ولما يلاحظ التغير اللى حصلك يبدا يرجع زى الاول
مينى : تفتكر انه هيلاحظ وهو حتى مش بيبصلى او يبقى فى مكان انا موجود فيه
كيونا : مش هنقدر نقول اللى هيحصل من غير ما نجرب .. جرب الاول وبعدها نشوف رد فعله هيبقى ايه
ابتسم مينى : نجرب مش هخسر اكتر من كده معاه
ابتسم كيونا جواه وقرر انه هيكمل باقى الخطة اللى جت فى دماغه بس مع هيوك : طيب انا هقوم انام بقى عشان عندى يوم طويل بكرة .. تصبح على خير
مينى : وانت من اهله

طلع كيونا لاوضته وهو بيرتب افكاره عشان يقدر يحقق اللى هو عايزة
فضل مينى قاعد عمال يفكر فى الذكريات وبيتمنى انه يقدر يرجع حياته تانى لورا ويصلح كل الاخطاء اللى عملها ووصلت بيه للوضع اللى هو فيه دلوقتى

تانى يوم الصبح خرج هيوك وكيونا من القصر رايحين الشركة .. طول الطريق كيونا ساكت وهيوك عمال يبصله ويبص قدامه او الناحية التانية ومكنش مستحمل الصمت ده لانه مش واخد على كده بينهم فقرر انه يتكلم معاه
هيوك : انت هتفضل ساكت كده طول اليوم احنا متكلمناش كلمتين على بعض من امبارح
كيونا ببرود : لما تبقى تعدل تصرفاتك نبقى نتكلم
هيوك : طيب تحب اعملك ايه عشان متفضلش متضايق منى .. سهر ومش هسهر تانى .. الشركة وهروحها معاك كل يوم .. عايز ايه تانى ؟
بصله كيونا : انت بتحسسنى انى بخليك تعمل حاجة غصب عنك .. انا بقولك على حاجات فيها فايدة ليك لو مش عايز تعملها انت حر
اتنهد هيوك : انت بتقولنى كلام انا مقولتوش ليه ؟ انا بقولك انت عايز ايه وانا هعمله عشان اصالحك
كيونا سكت شوية : اممممممم طيب فى حاجة انا فعلا عايز اطلبها منك
هيوك بسرعة : قول اللى انت عايزة
كيونا : تتكلم مع مينى
بصله هيوك بصدمة وسكت مردش عليه .. كمل كيونا كلامه : انت من ساعة ما رجعت لا اتكلمت معاه ولا حتى بصيت فى وشه ولما بيكون موجود فى مكان بتخرج من المكان بسرعة
هيوك بص قدامه : مش هكلمه .. اطلب اى حاجة تانية ملهاش علاقة بمينى وانا اعملهالك
كيونا ابتسم فى سره لانه عارف ان هيوك مش هيقبل وعامل حساب الرفض ده فى خطته : عموما انت حر .. بس بدل ما هيبقى مينى بس اللى مش بتكلمه اعمل حسابك هيبقى انا كمان مش بكلمك
بصله هيوك بغيظ : انت كده بتستغل الموقف

هز كيونا راسه من غير ما يتكلم وفضل ساكت لحد ما وصلو الشركة .. دخل كيونا على مكتبه من غير ما يهتم بهيوك اللى فضل باصص عليه وبعدين راح لمكتب مساعد المدير خبط على الباب ودخل لاقى راجل لابس بدلة سودا وقميص ابيض ورافع شعره لفوق ولابس نضارة
هيوك : صباح الخير هيونج
بص هان على اللى دخل وقام وقف من على مكتبه بسعادة : هيوك
راح هيوك حضن هان جامد اللى بادلة الحضن : وحشتني قوووووووووووووى
هان بابتسامه : انت كمان وحشتنى جدا بقالى كتير مشفتكش .. بعده عنه وبصله من فوق لتحت باعجاب : اتغيرت كتير .. وبقيت وسيم
هيوك ابتسم : من بعض ما عندكم هيونج
هان : كبرت ولازم نجوزك .. اكيد البنات بتتحدف عليك .. ها .. عندك حد في حياتك
هيوك : اه عندي… سكت شويه و اتغيرت ملامحه .. او كان عندي
عدل هان النضارة بتاعته : شكلك كده محتاج قاعده… انت جاي زياره لينا ولا هنشوفك كتير فى الشركة
هيوك : لا هرجع الشركة
سحبه هان وقعدو على المكتب قدام بعض : حلو اوى .. يبقى تحكيلى كل حاجة عنك
هيوك بابتسامه : اكيد

بدا هيوك يحكى لهان كل حاجة حصلتله من ساعة ما سافر ولما رجع وحكاله على لولو وحكاله على اللى حصل مع مينى واللى عرفه عن سورا واللى كيونا طلبه منه وهما جايين الشركة .. طبعا هيوك قدر يحكى كل حاجة لهان لانه من زمان وهو بيعتبر هان اخوه الكبير وكمان بيعتبره ابوة بحكم معرفة هان بعيتله وشغله مع ابوة الحقيقى من زماااااااااان وبعد موت ابوة كان واقف معاه وبيحاول يعوضه على احساس الاب اللى افتقده .. مش بس كده كان اكتر حد بيقوله على كل حاجة وبياخد رايه لانه دايما بيتصف بالعقلانية .. وبعد ما خلص هيوك كلامه بص لهان اللى كان ساكت بيسمعه مكنش بيقاطعه غير عشان يستفسر عن حاجة او يساله على حاجة
هان : تحب اقولك راى فى كل ده ؟
هز هيوك راسة : اكيد انت عارف دايما انى بحب اخد رايك وخصوصا لما الامور تتعقد معايا انت الوحيد اللى بتقدر تحلها
هان : بص اولا موضوعك انت ولولو صعب جدا .. مش هضحك عليك واقولك ان كل حاجة هتبقى كويسة .. متنساش انها فى الاول والاخر ظابط واكيد هى حاسة انك غدرت بيها .. الستات والبنات عموما عندهم شوية معتقدات ميقدروش يتنازلو عنها بسهولة واكتر حاجة تاثر فيهم هو الاحساس بالغدر والخيانة لو فقدت ثقتها فى حد مش سهل انها ترجع تانى
نزل هيوك راسه بخيبة امل لانه اتاكد من اللى كان دايما فى دماغه بس رفع راسه لما سمع باقى كلام هان
هان : بس مش معنى كده ان الامل معدوم .. انت بتقول انك اول حب فى حياتها وده ليه ميزة فى صالحك لان الحب الاول فى حياه البنت تقدر تضحى وتتنازل عشانه كتير خصوصا لو كانت واقعة فيه على الاخر .. ولو عايز الامور بينكو ترجع تانى اديها وقت تعرف ترتب فيه امورها بس متستلمش وحاول تكلمها تانى وتفهمها .. ووطى صوته : هتلاقيك واحشها جدا وحاول تستغل النقطة دى بردو وصدقنى هتاثر فيها .. غمزله بعينه ورجع اتكلم عاتى : بس لازم تعرفنى على البنوتة دى ههههههه .. ده بالنسبة لاحوالك العاطفية .. اما بقى بالنسبة موضوع سورا انا كنت عارفة بس للاسف لا انت ولا كيونا سالو على الموضوع ده .. حتى كيونا محاولش يقول حاجة وعشان كده انا افتكرت انكو عارفين .. اما بقى بخصوص اهم حاجة اللى هو مينى هقولك على حاجة وياريت تقبلها منى وتسمع راى فيها كويس متقفلش الباب مع مينى قوى
هيوك بصله باستغراب : حتى انت يا هيونج بتقولى الكلام ده
هان : شيل النظرة العجيبة دى من على وشك واسمعنى للاخر .. انا مش هدافع عن مينى لان انا كمان مش عجبنى اللى بيعمله بس دى مش حقيقته .. اللى ماثر عليه هو العقرب اللى معاه اللى اسمه شيون اللى بيطاوعه وبيقويه على كل حاجة وكل ما بيحتاجه بيلاقيه جنبه .. ده لو بعد عن مينى هيبقى احسن .. متنساش انه لما انت اتخطفت زمان شيون هو اللى ساعد مينى عشان يجيبك ومن وقتها وهو بيسمم عقله .. اينعم مينى اتجر للطريق ده عشان يقدر ينقذك ويحميكو بس محدش قدر يوقفه لانه دايما خايف يحصل حاجة تاذيكو فمش قادر يبطل .. انا راى انك تسمع كلام كيونا فى اللى بيقوله لانى عارف ان كيونا هو الوحيد اللى هيقدر يوصلكو تانى ببعض .. وانا وانت عارفين ان كيونا دماغه مش سهلة ومش بيطلب اى طلبه غير لما يكون النتيجة كويسة ممكن يكون بيفكر فى حاجة احنا منعرفهاش .. خليك وراه وهنشوف هو عايز يوصل لايه .. ومتنساش انا هنا دايما هتلاقينى معاك فى اى لحظة … قال اخر جملة وهو بيبتسم
ابتسم هيوك : بجد انت الكلام معاك زى السحر .. وقام مسك دماغه : نفسى اعرف انت جايب الدماغ دى ازاى
هان سحب دماغه من هيوك : ابوك هو اللى علمنى وانا عندى استعداد اعملك وطالما هتبقى موجود دايما فى الشركة يبقى هتتعلم كتيييييييييييييير واقولك كل اللى انتى عايزة

فضل هيوك قاعد اليوم ده مع هان وبعدها راح لكيونا عشان يتابع اعمال الشركة بعد ما قاله انه هيعمل اللى هو قال عليه .. طبعا كيونا اتبسط وبدا يعرف هيوك كل حاجة عن الشركة واعمالها .. فضلو طول اليوم هناك حتى ان هيوك مراحش اليوم ده لمحله

عدي كام يوم و هيوك يروح للشركه الصبح و لمحله بالليل .. وبالفعل بدا يتكلم مع مينى بس مجرد رد على قد الكلام وبطريقة ناشفة شوية بس على الرغم من كده كان مينى مبسوط ان هيوك بيكلمه ومش بيمشى لما يشوفه

وفى يوم فى قسم الشرطة جه اتصال لتشولا
تشولا : يوبوسايو .. بجد ؟ .. طيب تمام .. المعاد امتى ؟ .. اها .. طيب .. سلام
دونى باستغراب : ايه اللى مخليك مبسوط ومتحمس كده
تشولا بحماس : سونغمين عامل حفلة تنكرية يوم الخميس الجاى .. ممكن ساعتها نقدر نتسلل ونحط ميكروفونات فى قصره
دونى بصله بتعجب ورفع حواجبه : اكيد الحفلة هيبقى عليها حراسة ومش اى حد هيقدر يدخل
قام تشولا من على مكتبه وقرب من دونى : الحفلة بدعوة خاصه .. وقرب من ودن دونى : والدعوة معانا
بص دونى لتشولا اللى كان بيبتسم وخبط على كتف دونى مرتين ورجع قعد على مكتبه وفجاه نظره تشولا اتحولت للجدية
تشولا : جهز نفسك عشان انت اللى هتدخل الحفلة
دونى بيشاور على نفسه باستغراب : انا .. وقام وقف
تشولا بصله من فوق لتحت : لو مش عايز انا ممكن ا…
دونى قاطعه بسرعة وعلى وشه ابتسامه غبية : لا طبعا انا هجهز نفسى من دلوقتى
ابتسم تشولا ورجع ضهره على كرسيه وبص للسقف واتنهد بارتياح

بالليل روح دونى البيت لاقى ايمى متشعلقة على سلم وبتغير اللمبة المحروق وعماله تبرطم
ايمى : انا كان مالى ومال الجواز .. مانا كنت عايشة معززه مكرمة .. انما من ساعة ما اتجوزت وانا بقيت حاسة انى كهربائى ونجار وسباك وطباخة وغسالة …
اتسحب دونى وراح وقف تحت السلم ومسكه : بتعملى ايه ؟
اتخضت ايمى واتزحلقت من على السلم غمضت عينها مستعدة لوقعها على الارض بس فجاه لاقت نفسها بين ايدين دونى فتحت عينها وبصتله لاقت وشه قريب منها ونظراته بدات تقلب رومانسية فضلت ايمى باصه فى عينه وقلبها بيدق وهو بيقرب منها وغمضت عينها
اتكلم دونى بصوت هادى وهو باصص فى عينها : انا جعان
فتحت ايمى عينها بصدمة : جعان .. وفكت نفسها من ايده بغيظ وسابته ومشيت
دونى بصوت عالى : رايحة فين يا مجنونة ؟
مهتمتش ايمى بكلامه واتكلمت بعصبية : عندك الاكل فى المطبخ .. وبدات تربطم بالكلام بصوت واطى : حتى اللحظة الرومانسية تقلب فى الاخر بجعان .. يا عديم الاحساس
دونى : ايمى
بصتله ايمى بغيظ وربعت ايدها .. شاورلها دوني بصباعه معني الحركه تعالي .. راحتله ايمى وهو بنفس شكلها واول ما وقفت قدامه مسكها من وسطها
دونى : مش بقولك جعان ؟
ايمى : وانا قولتلك الاكل فى المطبخ
دونى خبطها فى راسها براسه : ومين قال انى عايز الاكل اللى فى المطبخ
ايمى : اومال انت عايز …..
قبل ما تكمل ايمى جملتها باسها دونى بوسة طويلة وبعد عنها بس كان لسه حاضنها
دونى بصوت هادى : انا عايز اكل من ده
اتحولت ملامح ايمى وابتسمت بسعادة وباست دونى .. وكملو يومهم بقى ملناش دعوة بيهم دول جوزين منحرفين

بعد مرور كام يوم لولو مشافتش اصحابها لانها مش عايزة تشوف حد وعارفة انهم بمجرد ما هيشفوها هيعرفو ان فى حاجة وهى مش هتقدر تقولهم اى حاجة ففضلت انها تبعد عنهم بحجة الشغل الكتير عليها.. بس ايمى وهيمى اتفقو ا نهم بروحو يعدو عليها
وصل البنات عند لولو في البيت دخلو بعد ما فتحت لهم ام لولو الباب
ايمي بتسلم على الام : اوما ازيك ؟
الام : كويسه ازيكم انتم يا بنات ؟
هيمي و ايمي : الحمد لله
هيمي بعد ما دخلت وقفت فى نص الصالة : لولو فين اوما ؟
اتنهدت الام : في اوضتها روحولها شوفو مالها يابنات

دخل البنات عليها من غير ما يخبطو علي الباب لقو لولو قاعده على السرير وباصه على الارض وفى ايدها كرة مطاطية بحجم قبضة ايدها عماله تخبطها فى الارض وترجعلها تانى ومحستش بالبنات لما دخلو عليها لانها كانت سرحانة فى عالم تانى .. قعدت ايمى جنبها واخدت الكورة من ايدها وراحت هيمى قعدت قدامها على كرسى المكتب بتاعها .. وقتها انتبهت لولو ليهم
ايمي بتلعب بالكورة فى ايدها : لولو عامله ايه ؟
هزت لولو راسها وسحبت الكورة تانى مين ايد ايمى : كويسه
هيمي وهى باصه على لولو اللى رجعت تخبط الكورة تانى فى الارض : لا ماهو باين
مسكت لولو الكورة وبصتلهم : انتم جاين ليه ؟
هيمي باستغراب : ايه الطريقه دي في الكلام
ايمي خبطت لولو على كتفها : ده بيت جوزي على فكره يعني اجي وقت ما احب
لولو : طيب طيب خلاص
هيمي : بقولك ايه ما تيجي نخرج بقالنا كتير ماخرجناش
فردت لولو جسمها على السرير : اخرجو انتم انا مليش نفس
ايمي بتضرب لولو على رجلها : من امتي و انتي ملكيش نفس
لولو باصه على السقف : من النهارده مش عايزه اخرج
هيمي قامت وبدات تشد لولو : يلا بقي تعالي نخرج مع بعض زى زمان
ايمي وهيمي فضلو يشدو في لولو : يلا يا لولو نخرج علشان خاطري
شدت لولو ايدها منهم وحطت ايدها علي ودنها : خلاااااااااص ماشي ماشي بطلو صداع
خبطت البنات ايدهم في ايد بعض yes: ههههههه
قامت لولو اخدت هدومها وراحت تلبسها فى الحمام

بالنسبه للبنات اللي حصل ده كان من بره واول ما لولو سابتهم بداو يتكلمو مع بعض بهمس
هيمي : هى لولو مالها اول مرة اشوفها بتتعامل بالطريقة دى ؟
ايمى اتنهدت : واضح ان فى حاجة كبيرة هى مش بتقلب كده غير لما بيكون فى حاجة مضيقاها جدا بس شكل المرة دى اكبر من اى مرة تانية

وبدات كل واحدة تيجى فى دماغها افكار كتيرة .. ايه سبب تغير لولو المفاجئ ده .. ازاي شخصيه زيها ايجابيه في حياتها تتحول بالطريقه دي .. وتتقلب حياتها و تبقي عصبيه .. حتي انها مبقتش عايزة تشوفهم او تخرج معاهم .. ولا بتحكي اللي بيحصل مع هيوك ..ياترى هيوك هو السبب

في وسط تفكيرهم خلصت لولو لبسها كانت لابسة بنطلون جينز وسويت شيرت شبابى اسود ولامه شعرها كله ولابسة كاب عليه
لولو : خلاص خلصت
بصلها ايمى وهيمى باستغراب اكبر على شكلها وبصو لبعض
ايمي : ها تحبو تروحو فين
هيمي بسعادة : المول
لولو بسرعه : لا
بصلها البنات باستغراب وصدمة .. ازاى مش عايزة تروح المول كده يبقى الموضوع ليه علاقة فعلا بهيوك .. وواضح ان الموضوع كبير فعلا

اتكلمت ايمي لتغير الجو : خلاص خلاص انا ماكلتش ايه رايكم نروح مطعم
هيمي : اوك موافقه
وبالنسبه لولو اكتفت بهز راسها و خلاص بعد فتره وصل البنات المطعم و طول الطريق كانو ساكتين كل ما واحده تحاول تتكلم تروح لولو معليه صوت الاغاني علشان محدش يتكلم فيسكتو تانى .. دخل البنات المطعم ويقعدو وكل واحده بتشوف هتاكل ايه

ايمي وهى عماله تبص على المينيو ( قايمة الاكل ) : ها هتاكلو ايه ؟
هيمي : ممممممم بيتزا .. وانتي يا لولو ؟
لولو حطت المينيو: اي حاجه
ايمي : يعني ايه اي حاجه .. ومن امتى وانتى بتقولى كده
لولو بصتلها ببرود : مره من نفسي
هيمي : خلاص نختار كلنا بيتزا احنا الثلاثة بنحبها ولولو بتعشقها وبتضعف قدامها

طلبو ال3 بيتزا و في وقت ما البيتزا بتجهز
هيمي حاولت تفتح اى حوار : اخبار دوني ايه يا ايمي ؟
حطت ايمي ايدها علي خدها و سندت ايدها علي الطربيزه : دوني هييييييييح اموت فيه وهو رومانسي اي نعم اوقات بيطلع عيني بذكائه اللي فوق الوصف وطلباته اللى مش بتخلص ولما بيلمس اى حاجة لازم تخرب وتبوظ بس على قلبى زى العسل
هيمي : ههههههههههههههههه… انا بقي تشولا غيرته هتجنني مش عايزني اتكلم مع حد و عصبيته عايزه الاقي حل ليها بس اما يبتدي فى الرومانسيه بنسي كل حاجه عملها
ايمي : ياعيني ياعيني وانتى طبعا ما بتصدقى يفتح فى الرومانسية
في الوقت ده كانت لولو بتتفرج عليهم ووصلت لحد انها تنفجر : بس بقي بس .. انتم ايه مبتبطلوش كلام
هيمي وايمى بصو لبعض و بعدين بصو للولو
ايمي حطت ايدها على ايد لولو : مالك يا لولو .. احنا عملنا حاجه تضايقك ؟
لولو بعصبيه : انتم مخرجينا علشان كل واحده تحكي عن جوزها او حبيبها مكناش خرجنا احسن .. وقامت من مكانها عشان تمشى
هيمي وقفت قدامها ومسكتها : اهدى يا لولو .. من امتي بتتعصبي لما بنحكي عن حد بالعكس انتي اللي بتسالينا عن حياتنا وبتفضلى تتكلمى معانا
لولو بضيقة : بس انا مسالتش ومش هسال و مش عايزه اعرف اي حاجه
ايمى بتحاول تقعدها تانى : خلاص مش هتنكلم عليهم اختارى انتى اى حاجة نتكلم فيها
لولو : انا مش عايزة اتكلم .. انا عايزة امشى
هيمى : طيب استنى ناكل الاول وبعدين نمشى
كانت لولو لسه هترفض بس فضلو البنات يهدو فيها ويقعدوها

في الوقت ده لولو مكانتش عارفه هي بتعمل كده ليه .. كل الل حصل انهم وقت ما ابتدو يحكو افتكرت حبها اللي راح منها .. كانت بتفكر ان هى كمان كان ممكن تكون بتحكي معاهم عليه و عن مواقفنهم سوا .. بس دلوقتى هى مش قادرة تتكلم ومش عارفة تقول ايه .. تقولهم ان الشخص اللى حبته ضحك عليها وكان بيستغلها .. وانه هو واخوه السبب فى كل البلاوى اللى حصلتلهم الفترة اللى فاتت .. مكنتش قادر تقول كده وبالتالى اكتفت بالصمت وبدات تطلع غضبها على اللى حواليها بالرغم ان ملهومش اى ذنب بس مكنتش قادرة تتحكم فى نفسها .. وفى نفس الوقت كان عندها احساس انها نفسها كل البشر يبعدو عن بعض مش عايزة تشوف او تسمع اى حاجة عن الحب او اى اتنين بيحبو بعض ده كان بيزود الغضب جواها بس بردو لان اللى قدامها هما اقرب ناس ليها وبتتمنى سعادتهم خصوصا ان واحدة منهم متجوزه اخوها ده كان بيخليها انها مش عايزة تتكلم معاهم او تسمعهم اكتر عشان متتمناش حاجة وحشه ليهم

يوم الخميس الصبح فى القسم
تشولا ادى دونى علبه فضيه رفيعة وعريضه : دى علبه سجاير بتاعت رجال الاعمال بس جواها موجود 4 مكيروفونات صغيره
اخد دونى العلبة وهز راسة : انا فاهم هعمل ايه متخافش
تشولا بجدية : تلبس بدلة شيك وتلبس الماسك واهم حاجة لازم تعملها تقص شعرك وترجعه لورا .. وادى دعوتك لدخولك الحفلة
دونى احد الدعوة : هيونج انا هعمل كل اللى انت قولت عليه .. بس شعرى مش هقصه
فضل تشولا باصص على دونى من غير ما يتكلم ونظراته كانت حادة
دونى ابتسم وشاور على شعره : هقصه طبعا .. انا كنت بهزر معاك
مردش عليه تشولا وبص بعيد عنه

بعد ما اتفقو على كل حاجة دخل الليل .. وصل دونى الحفلة وكان لابس بدلة سودا وقميص ابيض وجزمة سودا وقافل ازرار البدلة ورافع شعره لورا بطريقة شيك ولابس ماسك مخبى نص وشه .. قدم الدعوة اللى معاه قدام الباب ودخل القصر اللى كان فيه رجال اعمال كتيرة وكل واحد متنكر بطريقة مختلفة منها العادية ومنها المضحكة ومنها المخيفة .. بدا دونى يتجول فى القصر وكل ما بيلاقى مكان مناسب بيحط فيه ميكروفون وبيبتسم للناس ويحاول يندمج معاهم وبعدها يسيبهم ويمشى عشان يلاقى مكان تانى مناسب وكان بيدور على مكتب مينى لحد ما لاقاه .. دخل من غير حد ما ياخد باله وحط الميكروفون بس وهو خارج من المكتب خبط فى شخص ....

----------------- 

BY

D&E

Lolo Adel  

Emy Tarek