Catch him .. Part 20

Catch him .. Part 20

بصت ايمى ع التليفون بحقد وغضب : مين اللى بيتصل ده ؟.. مش وقته خالص

لما شافت الاسم راحت بصه للولو : ده اخوكى .. اعملك فيه ايه ده وقتى .. فصلنا من المود

لولو : اقتليه واخلصى منه .. اهو هيسيب براح بردو

ردت ايمى على التليفون : عايز ايه يا قطاع الارزاق ؟

رد عليها صوت شخص غريب : انتى تعرفى صاحب الرقم ده ؟

ايمى بقلق : ايوة

انتبهتلها لولو وهيمى : فى ايه ؟

اتملت عين ايمى بالدموع وبصتلهم : دونى فى المستشفى عمل حادثة بالعربية ومعاه واحد تانى

لولو قلبها وقع من الخضة وبصوت عالى : ايه ؟؟؟ مستشفى ايه ؟ انطقى بسرعة

وفى ثوانى كانت البنات فى عربية لولو رايحين للمستشفى .. واول ما وصلو المستشفى سالو موظفة الاستقبال

ايمى بنبرة صوت مهزوزة من الخوف : لو سمحتى اللى عملو حادثة العربية فين ؟

موظفة الاستقبال بصت فى الورق وبعدين بصتلهم : فى غرفة 27 فى الدور التانى

سابوها وطلعو الدور التانى للاوضة اللى فيها دونى .. اول ما دخلو ايمى وقفت فى مكانها لانها لاقت دونى وهنرى الاتنين متخرشمين .. دونى كانت دماغه مربوطة ودراعه وصدره مربوطين ووشه فيه خدوش كتيرة .. وهنرى كان وشه ودراعه فيهم خدوش كتيرة ورجله مربوطه

جريت لولو على دونى وهى عماله تعيط ومسكت ايده : دونى انت كويس .. ايه اللى حصلك ؟

هيمى اخدت ايمى اللى مش مستوعبة الموقف وراحت لناحية هنرى : هنرى ايه اللى حصل ؟

بس قبل ما يرد هنرى عليها قاطعهم صوت دونى وهو بينادى ع ايمى اللى مش مستوعبة اى حاجة ومش باين عليها اى رد فعل : ايمى

بصت ايمى على دونى وبعدين على هنرى واغمى عليها .. مسكتها هيمى قبل ما تقع وساعدتها لولو واستدعو الدكتور .. بعد شوية فاقت ايمى وكانت فى اوضه تانية

هيمى بقلق : ايمى .. انتى كويسة ؟

هزت ايمى راسها وهى بتحاول تقوم : هو حصل ايه ؟

هيمى مسكت ايمى عشان تساعدها ومتخليهاش تقف : اغمى عليكى مرة واحدة

بدات ايمى تعيط : دونى وهنرى حصلهم ايه ؟.. انا عايزة اشوفهم

هيمى : هشششش .. هما كويسين .. الدكتور طمنا عليهم

ايمى وهى عماله تعيط : انا عايزة اشوفهم دلوقتى

هيمى : خلاص خلاص تعالى نروحلهم

قومتها وسنادتها لحد ما وصلو لعندهم .. كان دونى على سرير ولولو قعده جمبه على نفس السرير .. وهنرى على سرير تانى وتشولا كان قاعد فى النص بين السريرين على كرسى اللى اول ما شافهم داخلين قام من على كرسيه وراح سند ايمى وقعدها جنب هنرى

قام هنرى قعد على السرير وحضن ايمى : احنا كويسين اهو قدامك .. هى شوية رضوض وكدمات بس حتى مفيش اى كسور فينا .. متخافيش

حضنته ايمى اكتر : انت مش عارف انا حصلى ايه لما شفتكو انتو الاتنين كده ؟

طبطب هنرى عليها ومش عارف يقولها ايه قاطعهم صوت دونى للمرة التانية

دونى : وانا مليش حضن انا كمان زى هنرى ولا ايه ؟

بصتله ايمى وقامت من جنب هنرى وراحت لدونى بس اول ما جت تحضنه اتوجع وهى بعدت عنه

لولو بتشدها بعيد عن صدره : انتى مش شايفه صدره مربوط

مد دونى ايده لايمى عشان تيجى جنبه تانى : تعالى

قربت منه ايمى وقعدت قدامها .. بدا يمسح دموعها : بطلى عياط بقى

فى نفس الوقت كان هيوك قاعد مع كيونا فى بيت هيوك

كيونا : اخيرا عملتها فعلا واعترفتلها

هيوك بابتسامه : اه يا كيونا اخيرا .. حاسس كانى ارتحت وقلبى ارتاح واتطمن

كيونا : قلبك هيرتاح اكتر لما تعترفلها بكل الحقيقة

هيوك : ازاى اقدر اقولها ان اخويا هو اكبر زعيم عصابه وانه هو نفسه اللى دونى وتشولا ماسكين القضية بتاعته وهو نفسه اللى بياذي اصحابها .. وازاى اقدر اقولها ان شيون دراع اخويا اليمين هو اللى ضربها بالنار ... تفتكر انها هتقدر تصدقنى لو قولتلها انى مليش دعوة بكل ده

قام كيونا قعد جنب هيوك وحط ايده على كتفه : لو بتحبك بجد هتقدر تصدقك وتسامحك 

بصله هيوك : مش عارف لو مكنتش معايا يا كيونا كنت عملت ايه .. انت الوحيد اللى بتقدر تريحنى وتقنعنى باى حاجة وبثق فيه من وقت ما اتقابلنا واحنا صغيرين

اخده كيونا فى حضنه : انت عارف انك عندى اهم حد .. انا معرفليش اهل او اخوات او عندى اصحاب .. انت اهلى واخويا وصاحبى الوحيد وعارف انى يهمنى سعادتك وراحتك

شد هيوك على حضن كيونا : انا كمان مبقاش ليا غيرك دلوقتى

كيونا بخباثة : مبقتش لوحدى بقى ليا شريك كبير اسمه لولو

بعد هيوك عنه : فكرتنى بلولو .. مكلمتهاش النهاردة

شد كيونا هيوك من ودانه : من اول يوم كده وتنساها .. ليها حق فعلا لو سابتك كده

شال هيوك ايد كيونا : اااااااااه .. خلاص خلاص هكلمها

ومسك التليفون اتصل بلولو اللى كانت قعدة مع دونى وايمى وهنرى وتشولا وهيمى واول ما تليفونها رن ابتسمت لما شافت الاسم والكل بص عليها

تشولا باستغراب : بتضحكى ع ايه ؟

اتلغبطت لولو من سؤال تشولا وابتسمت ابتسامه بلهاء وسابتهم وخرجت

ضحك الكل عليها ما عدا تشولا الوحيد اللى مش فاهم حاجة

بص تشولا عليهم كلهم ورفع حواجبه واتكلم بنبرة حادة : انتو بتضحكو على ايه ؟

قربت منه هيمى وهمستله : حبيبى ده هيوك .. امبارح اعترف للولو بحبه

تشولا بصوت عالى وصدمة : بوو ؟ لولو وهيوك ؟ وهى قبلت بيه ؟

سمعت لولو صوت تشولا العالى بس مهتمتش وردت ع الفون : الو

هيوك : وحشتينى

لولو بصوت واطى واحراج : وانت كمان

كان كيونا عمال يعمل حركات قلب بايده قدام هيوك وحركة البوبو .. ساعتها مسك هيوك تليفون كيونا وحدفه عليه

مسك كيونا تليفونه وبصوت عالى : يااااااااااا

سمعت لولو صوت عالى جنب هيوك بس مش عارفة مين ده : صوت مين ده ؟

ساب هيوك كيونا وقام بعيد عنه : ده كيونا عندى من بدرى وكان بيرخم عليا

كيونا بصوت عالى عشان هيوك يسمعه : سلملى عليها كتييييييييييير

لولو : هو كيونا بيقول ايه ؟

هيوك : بيسلم عليكى كتير

لولو ابتسمت : وانا سلملى عليه كتير قوى

هيوك : مش هنخلص من السلامات بقى ولا ايه ؟

ضحكت لولو عليه بس متكلمتش

هيوك ابتسم على ضحكها وغير الموضوع : انتى فين كده ؟

لولو خبطت راسها : فكرتنى صحيح .. انا فى المستشفى

هيوك بنبرة قلق : ايييه ؟ ليه ؟ انتى كويسة ؟ حصلك ايه ؟

لولو بتحاول تهديه : انا كويسة .. بس دونى وهنرى هما اللى فى المستشفى عملو حادثة

هيوك بقلق : مستشفى ايه ؟

لولو : مستشفى ******

هيوك : انا جايلك .. مسافة السكة وهكون عندك .. وقفل معاها

رجع هيوك لكيونا وعلى وشه ملامح الانزعاج والقلق وطبعا كيونا لاحظ كده

كيونا : فى ايه ؟ مالك وشك قلب كده ليه ؟

اخد هيوك مفاتيحه وبص لكيونا : دونى وهنرى عملو حادثة .. تفتكر ان مينى هو السبب ؟

حط كيونا ايده على كتف هيوك : مش عارف .. انا ممكن اتوقع كل حاجة منه طالما شيون معاه

غمض هيوك عينه ونزل راسه : انا رايح المستشفى

كيونا : انا جاى معاك .. وخبط هيوك على كتفه : يالا بينا

وخرجوا فى طريقهم للمستشفى

فى نفس الوقت وفى مكان تانى خالص تحديدا فى قصر سونغمين

سونغمين : ها .. ايه الاخبار ؟

شيون وهو حاطط وشه فى الارض : عملو حادثة وانتقلو على المستشفى ومحصلهومش حاجة خطيرة مجرد اصابات

غمض سونغمين عينه واتكلم فى نفسه : انا مش عايز ااذى حد بس هما اللى بيضطرونى لكده

شيون افتكر ان سونغمين مغمض عينه لانه اتضايق ان الخطة منجحتش زى ما كان عايز

اتنحنح شيون وسونغمين فتح عينه وبص لعين شيون نظرة خالية من اى تعبير

شيون : احنا ممكن نخلص عليهم فى المستشفى بدوا غلط او باى طريقة تانية

سونغمين بمنتهى البرود والهدوء ووشه لسه خالى من اى تعبير : لا مش مهم .. خليها اخر تحذير ليهم .. ولو اتدخلو فى امورى تانى ساعتها هننتقم منهم اشد انتقام

رن تليفون سونغمين .. بص على الاسم وبعدها على شيون : روح انت دلوقتى وعايز معلومات عن شيندونغ لانه عايز مننا بضاعة .. عايزك تعرفلى كل حاجة عنه .. ركز عليه الفترة دى وبس

هز شيون راسه : هصب كل اهتمامى عليه وهجيب كل المعلومات المطلوبة عنه .. وخرج

مسك سونغمين تليفونه واتصل على اخر رقم اتصل بيه

سونغمين : اها .. يعنى هو وصل دلوقتى للمستشفى مع كيونا .. تمام .. مش عايز عينك تغفل عنه لحظه واحدة وتفضل تقولى على كل حاجة اول باول .. وقفل التليفون

مسك سونغمين التليفون وشد ايده عليه جامد واتكلم ما بين اسنانه : هيوكى الغبى بيصعب الامور عليا وعليه .. انا كنت عارف انه هيروحلهم .. بس قريب اوى هبعده عنهم اذا مكنش بارادته هيبقى غصب عنه

فى الوقت ده وصل هيوك وكيونا للمستشفى ودخلو لاوضه دونى وهنرى

طبعا لولو اول ما شافته ابتسمت ووشها نور

بص هيوك لدونى وهنرى : حمد الله على السلامة .. كويس انكو بخير

دونى بابتسامه : كوماوا هيوك وكيونا مكنش فى داعى لتعبكو

راح كيونا قعد على سرير هنرى بس كان باصص لدونى : تعب ايه .. ده واجب علينا

.. بس حصل ايه بالظبط احنا منعرفش حاجة

بدء دونى يحكى انهم خرجو من القسم وفى الطريق دونى جاى يدوس على الفرامل لاقاها مش شغاله وعملو حادثه في عربيه من اللي كانت واقفه عند اشاره المرور بسبب سرعه دوني وش العربيه كان مدمر بالكامل و ازاز العرابيه واقع كله

كيونا : الحمد لله انها جت على قد كده ومحصلش حاجة اكبر من كده

بص كيونا على هنرى وخبطه على رجله السليمه وقال بهزار : اتخرشمت يا بطل اومال عامل فيها بس شقى ومفيش حاجة تقدر تهدك .. اديك اتشلفطت خالص

هنرى برخامه ولعب : دى ضريبة الشقاوة .. بس اوعدك هرجع اكتر من الاول

كيونا : لما نشوف مين فينا اشقى من التانى

مد هنرى صباعه لكيونا : ده تحدى بينا ومترجعش فيه

مد كيونا صباعه هو كمان لهنرى : مترجعش انت فيه

قاطعتهم ايمى : واضح انك اخيرا لاقيت منافس ليك يا هنرى

هنرى : ايمى انتى مفروض تبقى معايا انا وتشجعينى عليه

هيمى : خلاص تعالو نشوف مين هيشجع هنرى ومين هيشجع كيونا ؟

لولو رفعت ايدها على طول : انا اول واحدة هشجع هنرى .. ده تربية فريق الشر

ايمى : وانا هضم صوتى لصوت لولو .. انا عارفة امكانيات هنرى كويس

هيمى رفعت ايدها هى كمان : محدش يعرف امكانيات هنرى اكتر منى وبصت على تشولا .. انا بشجع هنرى

تشولا بصلها وضيق عينه : انا بقى هشجع كيونا .. وبعدها بص لكيونا : اوعى تخسر فى التحدى ده ساعتها هتقع تحت ايدى انا

رفع كيونا ايده بطريقه الاستسلام : انا كده يبقى لازم اكسب عشان انفد بعمرى

دونى بص لهنرى : بعد ما خسرنا فى التحدى اللى فات انا هشجع كيونا

بص الكل على هيوك اللى كان واقف جنب لولو وساكت خالص

لولو : هيوك انت هتشجع مين ؟

بص هيوك على الكل وبعدها على هنرى وكيونا : طبعا هشجع كيونا من غير اى تردد

كيونا رفع 3 صوابه على ايده اليمين و3 على ايده الشمال : كده بقى معايا 3 شباب وهنرى معاه 3 بنات

البنات بصو لبعض وبعدين بصو لهنرى ورفعو ايدهم وفى صوت واحدة : هنرى .. فايتنغ

هنرى رفع ايده : فايتنغ

دخل الدكتور يطمن على دونى وهنرى

ايمى : دكتور .. هما ممكن يخرجو امتى ؟

الدكتور عدل نضارته : ممكن يخرجو النهاردة بس على شرط الراحة اليومين الجايين مش لازم يعملو اى مجهود

ابتسم الكل بارتياح وشكرو الدكتور وبعدها خرج الدكتور

بصت لولو لدونى وهنرى : سمعتو راحة يومين من غير مجهود .. وبصت لهنرى وخصوصا انت

ايمى : انا هاخدهم الاتنين واهتم بيهم

لولو : اقدرى على  دونى بس وانا هاخد هنرى عندى .. ماما هتهتم بيه

دونى بحقد : يا بختك ماما بنفسها هتهم بيك

ايمى : لو عايز روح انت كمان معاهم وانا هرتاح منكو انتو الاتنين

دونى بفرحة : بجد .. بس ماما مش هتقدر عليا انا وهو

ايمى : دونييييييييي

ضحك الكل على رد فعل دونى لانه بصلها ببراءة وضحك ورد فعل ايمى لما خبطته

تشولا : خلاص انا هوصل هيمى وايمى ودونى .. وهنرى هيروح مع لولو

وهما خارجين كان هنرى ساند على كيونا وهيوك .. ودونى كان ماشى مع ايمى ولولو .. وهيمى وتشولا ماشيين قدامهم

ركب تشولا وهيمى ودونى وايمى ومشيوا

وكيونا ساعد هنرى انه يركب .. وهيوك كان بيكلم لولو

هيوك : انا هاجى وراكى بالعربية عشان نساعد هنرى لما توصلو البيت

لولو بابتسامه خفيفة : مفيش داعى احنا هنركن العربية قدام البيت على طول هى حتة صغيرة اللى هنمشيها بس

هيوك بغيرة : انتى اللى هتسنديه

لولو حطت ايدها على دراعه : هنرى اخويا الصغير ومتربى معانا من واحنا صغيرين

ارتبك هيوك لانه حس انها قفشته وحط ايده على رقبته : انا بس عايز اريحك

لولو بصت لكيونا اللى كان واقف بيتكلم مع هنرى وهو قاعد فى العربية : طب كيونا ذنبه ايه نتعبه معانا

بص هيوك ع كيونا : كيونا احنا هنوصل لولو وهنرى للبيت

بصله كيونا وابتسم وعمله علامه ok بايده.

بصلها هيوك والابتسامه على وشه .. اتنهدت لولو وابتسمت وهزت راسها بالموافقة

فى عربية لولو طول الطريق هنرى عمال يتكلم على تحديه مع كيونا

لولو : لازم تكسب التحدى ده .. والا انت عارف احنا هنعمل فيك ايه ؟.. هنخليك مش نافع تانى اساسا .. سمعتنا كلنا متوقفة عليك

هنرى : انتى كده بتخوفينى ولا بتشجعيننى ؟

لولو : انا بحذرك يا هرهورتى

هنرى بصدمة : هرهورتى !! .. يبقى الموضوع مش هيعدى على خير

ضحكت لولو بصوت عالى على شكل هنرى : بس واضح ان كيونا شخص كويس

هنرى بينكشها : اكيد هيبقى كويس عشان من ناحية هيوك

بصتله لولو وفضلت متنحاله : قصدك ايه ؟

هنرى : لولو كلنا عارفين اللى بينك وبين هيوك .. واى حاجة منه او اى حد من ناحيته اكيد هيبقى حلو

بدات لولو تضربه على دراعه وهو بدا يضايقها ويدافع عن نفسه وفضلت العربية تتمرجح بيهم على الطريق شوية وهما الاتنين عمالين يناقرو فى بعض

هنرى : ركزى فى الطريق ولا عيزانا نعمل حادثة تانى

رن تليفون لولو .. حطت السماعات ف ودنها وردت

هيوك بقلق : عربيتك بتتمرجح على الطريق ليه ؟

بصت لولو على هنرى : مفيش حاجة متقلقش بس كنت بتناقش انا وهنرى

هيوك : بتتناقشى انتى وهنرى تعملو كده !!!!

لولو : خلاص خلاص .. احنا بطلنا نقاش

هيوك بتحذير : ركزى فى الطريق وابقو اعملو اللى انتو عايزينه بعدين

لولو : ماشى .. وقفلت مع هيوك وبصت لهنرى وكانت هتضربه تانى

هنرى شاورلها على الطريق وعربية كيونا اللى وراهم وابتسم بخباثة

فى عربية كيونا .. هيوك كان طول الطريق سرحان وعينه على عربيه لولو .. بيفكر فى مينى واللى ممكن يعمله فى لولو واى حد تبعها لحد ما فاق على عربية لولو وهى بتتحرك اتخض هيوك وافتكر ان فى حاجة فى عربيتها واتصل بيها على طول .. وبعد ما قفل معاها

كيونا بيحاول يفتح حوار : ممكن اعرف كنت ساكت ليه طول الوقت ده ؟

سند هيوك راسه على الكرسى اللى قاعد عليه وغمض عينه : بفكر فى حظى اللى خلى ليا اخ مجرم وخلانى احب ضابط واتعلق بيها

بصله كيونا باسف وطبطب على رجل هيوك من غير ما يتكلم

فتح هيوك عينه وبص لكيونا وعينه فيها حزن وهو لسه ساند راسه على الكرسى : هو انا مكتوب عليا اعيش فى قلق وخوف دايما من صغرى .. وكل حاجة حلوة اتعلق بيها او احبها فى حياتى تضيع منى ؟

بصله كيونا : عشان كده بقولك الاحسن انك لازم تقول للولو ع كل حاجة .. ع الاقل هتكون خلصت من حاجة شايل همها

هيوك بصوت حزين : بس انا خايف انها تضيع منى هى كمان وتبعد عنى بعد ما تعرف الحقيقة .. انا بجد بحبها وبحس معاها بالراحة اللى مفتقدها

كيونا : قولتلك قبل كده انها لو بتحبك هتصدق انك ملكش اى ذنب وهتفضل معاك

اتنهد هيوك وسكت لحد ما وصلو لبيت لولو .. نزل هيوك وكيونا من العربية وساعادو هنرى انه يوصل لحد باب بيت لولو وبعدها مشيو

خبط باب بيت لولو فتحت ليها امها اللي اول ما شافت هنري وهو ماسك العجاز و لولو سنداه ووشه متعور اتصدمت من شكله
الام وهي بتسند هنري مع لولو : ايه اللي حصل و عمل فيك كده ؟
لولو : يا ماما نقعد الاول وبعدين نحكي

سند الاتنين هنري لحد الكنبه اللي في الصاله و نيموه عليها بحيث تبقي رجله مفروده علي الكنبه
الام بقلق : ها عملت ايه سبب اللى انت فيه ده ؟
لولو : شكله مش مرتاح في قعدته ماما هاتي مخده يسند عليها
قامت الام تجيب المخده لهنري
لولو : هنقولها ازاي على دوني ده مش بعيد تبلعنا
هنري : منك ليها بقي انا مفيش حيل خالص
لولو : بتبعني فى اول الطريق كده ماشي خليك فاكر اما………
ظهرت الام ومعاها مخده و سندت ظهر هنري عليها : طمنوني بقي

بص هنري ولولو لبعض وابتدت لولو تحكي وهي مش متوقعه ردت فعل امها هتكون ايه .. حكت ع اللي حصل والام طول الكلام علامات الصدمه علي وشها ومش بترد

لولو : اوما
هنري : اوما .. وبيحرك ايده قدام وشها
الام وسط عياطها : ليه مش بتقولو وقت ما تحصل لحد فيكم حاجه ؟ في الاول انتى وبعدين دوني .. ليه انا اخر واحده اعرف ؟
قربت لولو من مامتها ومسكت ايدها : اوما اهدي .. هو كويس .. دي شويه كدمات وبعدين مش بنقولك علشان حالتك دي
سابتهم الام وقامت : انا رايحه لدوني
لولو : دلوقتي
الام : اه دلوقتي

سكتت لولو وبصت هى وهنرى لبعض .. بعد خمس دقايق كانت الام لبست هدومها و خرجت  
لولو وهي باصه علي الباب : فلت منها الحمد لله بس قلبي مع ايمى بقى
هنري بتمثيل : الي اللقاء في جنه الخلد يا اختى .. اه صح هعمل ايه مع كيونا .. شكله مش سهل
لولو : اكيد مش هنغلب معاه .. احنا معاك
هنري : ياخوفي تبيعونى وقت الجد
لولو : احنا عمرنا عملناها و بعناك
هنري ابتدي يعد علي صوابعه وبعدين بصلها : بلاش اقولك علشان الزعل
لولو : وراك رجاله يا وحش انا هعرفلك نقطه ضعفه ايه ونستغلها .. وبعدين يعني لو حاول يستغل اي حاجه فيك احنا ال3 هنساعدك فيها
هنري : بس هو معاه دوني و تشولا و هيوك… هيوك .. وبص علي لولو و غمزلها
بصتله لولو باستغراب : مالك ؟
هنري : ايون يا عم محدش قدك
لولو : ها ؟
هنري : بصراحه الواد ميتعيبش .. عنده محل ملابس يعني هنلبس ببلاش .. وبعدين يعني شكله كده بيحبك قوووووي
لولو بصوت عالي : ها ؟
هنري : انتي علقتي بقول انه اول ما عرف ان دوني فى المستشفي جه علي طول و مشي ورانا لحد هنا و في عيد الميلاد كان مفضوح قوى .. ايون بقي مش بقول مش مرتاحلك اكابتن .. من ورايا كده اخص عليكي
قامت لولو من مكانها و مسكت المخده الي هنري ساند عليها ظهره وسحبتها و ابتدت تضرب هنري بيها

في الوقت ده وصلت الام عند بيت دوني .. خبطت علي الباب فتحتلها ايمي اللي اول ما شافتها ابتسمت و حضنتها
ايمي : اوماااا وحشاني .. اتفضلي
بصتلها الام : ليه متصلتيش بيا و قولتيلي ؟
سكت ايمي شوية : محبتش اقلقلك .. وبعدين هو بقي كويس .. قولت اسيبه ينام و يرتاح و بعدين نكلمك علشان صوته يكون ارتاح كمان
الام : انتي كمان محبتيش تقلقيني…  هو فين ؟
ايمي : في الاوضه

سابتها الام وراحت علي اوضه دوني .. وايمي وراها كان دوني ممدد علي السرير بس صاحي .. اول ما دوني شافها حاول يقوم راحت الام ناحيته
دوني بابتسامه : اوما
الام وهي حابسه دموعها : انت كويس
دوني : كويس قوي متقلقيش
ايمي : اتاكدتي اوما .. يعني مش بنكذب عليكي
دوني : انا كويس اهوه .. شويه حاجات بسيطه حتي مكنتش حابب انك تعرفي غير لما اكلمك انا علشان تطمني بس انتي سبقتينى
اتكلمت الام بصرامه : حسك عينك بعد كده يحصل لاي حد اي حاجه وتقولو بلاش تقلولى .. انا لازم اعرف مش اعرف بالصدفه
حضنها دوني : حاضر .. حضنته الام هى كمان

ايمي : اوووووه عصافير الحب كيوبيد بيرقص فوق راسكم اهوه
دوني : اومال لو مرقصش عندي انا و حبيبتي هيرقص عند مين
الام بابتسامة : حبيبي انت
ايمي : انا هعد من 1 لحد 3 لو مخدتونيش معاكم ف الحضن ده .. هولع في كيوبيد
الام وهي فارده دراع : وعلي ايه ده راجل غلبان تعالي تعالي
ضحكت ايمي و نطت في وسط الحضن

----------------- 

BY

D&E

Lolo Adel  

Emy Tarek