With You .. patr 06

With You .. Part 06

وصلت دومى الكافيه وبدات شغلها بس كانت متضايقة من كلام اصحابها ليها .. وكيونا بيحاول يضحكها بانه يتريق على كل الناس .. وفعلا ضحكت دومى ونسيت اللى حصل وكان مضايقها .. بعدها سكت كيونا وحط ايده تحت دقنه وعمال يفكر

دومى : بتفكر فى ايه ؟

كيونا : العلبه دي فيها ايه يا تري
ابتسمت دومي بسخرية : فيها فيل
كيونا : هنهرج بقى
دومي : تفتكر هتنفجر فعلا

انفجر كيونا ودومى ضحك علي كلامهم وطريقتهم الطفوليه .. قضو باقي اليوم كده ضحك و هزار لحد ما معاد الشغل خلص و روحو البيت .. حطت دومى العلبه على طرابيزة الانترية وفتحتها لاقت فيها كرة كريستال متحركة باضاءة

دومي  باعجاب : وااااااااااا
كيونا : واضح ان الهديه عجبتك
دومي : اه شكلها حلو و كمان ادت منظر للبيت
كيونا هز راسه باحباط : اها
حست دومي ان كيونا متضايق : مالك يا كيوني ؟
اتنهد كيونا وبصلها : مش قادر اعملك حاجه .. مقدرش اساعدك لو حصل حاجه .. مش قادر اجيبلك حاجه تفرحك .. او اعملك اى مفاجئة
شالت دومي الهديه و حطتها علي جنب وقربت من كيونا : انا مش محتاجه انك تعملي حاجه… كفايه وجودك معايا .. انا مقدرش استغني عنك
كيونا بصوت واطى : بس بسبب انك معايا انتي محرومه من حاجات كتير
دومي : بس مش محرومه منك وده اهم حاجة عندى .. حتي الموت محرمناش من بعض بدليل انك معايا هنا
كيونا : انا معاكي هنا لانك انتي اللي جيباني .. انا مجرد وهم ف خيالك
دومي : انا جيباك لاني محتجالك .. لاني بحبك ومش عيزاك تبعد عنى
بص كيونا فى عينها : دومي انا هنا بسببك .. و لو في يوم حسيتي انك مش محتجاني او عايزه تعيشي حياتك .. انتي بارادتك تقدري تخليني اختفي من حياتك
اتضايقت دومي وعينها بدات تدمع : لو فضلت تتكلم كتير كده انا هزعل منك .. لو مش بحبك مكنتش هفضل متمسكه بيك لحد وقتى .. وبعدين بطل تتكلم كلام ملهوش لزمه انت عارف ان الكلام ده بيضايقني
ابتسم كيونا وهز راسه : خلاص مش هتكلم فيه بس مش عايز اشوفك متضايقة تانية .. او اشوف الدموع اللى فى عينك دى ابدا

ابتسمت دومى ومسحت الدموع اللى فى عينها وفضلت باصه لكيونا .. وقعدو شوية مع بعض وبعدها دخلت عشان تنام

عدى كام يوم بطبيعية .. وفي يوم اجازه دومي صحيت من النوم كالمعتاد علي صوت كيونا
كيونا بابتسامة : صباح الخير
دومي وهى بتتمطع : صباح النور
كيونا : ها هنعمل ايه النهارده ؟
قعدت دومي علي السرير و هي بتفكر وبعدها بصتله و ابتسمت
كيونا بشك : خير ايه سبب الابتسامه دي .. مش مرتاحلك
دومي : كل خير يا بيبي… افطر الاول و بعدين اقولك

دخلت دومي الحمام اخدت دوش علي السريع وبعدها غيرت هدومها و طلعت للمطبخ عملت فطار و فطرت و اثناء ماهي بتفطر
قعد كيونا قدامها وحاطط ايده على خده : ها قولي
دومي باستفهام " معلش الزهايمر وذاكرة السمك " : اقول ايه ؟
كيونا : اللي كنتي بتفكري فيه .. اللى هنعمله النهاردة يا دومى
  خبطت دومي راسها وافتكرت  : اهاااا .. بص يا سيدي بما ان هديه هيوك معجبتكش فانا قررت اننا نزل نجيب احنا حاجه للبيت وهي اللي تديله روح .. واهو تغير .. منه خرجنا لوحدنا و منه جبت حاجه للبيت .. ها ايه رئيك ؟
ابتسم كيونا باشراق لان دومى اهتمت بيه وبرايه : هي فكره حلوه .. بس هتجيبي ايه ؟
هزت دومي راسها وهي بتاكل : مش عارفه .. خلينا نلف ونشوف
حط كيونا ايده الاتنين على راسه وغمض عينه وبدا يهز دماغه : اهلا بالصداع يعني هيعجبك 600 حاجه و هتحتاري فى الاختيار بينهم كالمعتاد
ضحكت دومي وبينت سنانها زي اعلان معجون سجنال : هيهيهيهيهيههييههيييي
قلدها كيونا هو كمان و بين سنانه وحرك ايده : كلي كلي

خلصت دومي اكلها و ظبطت نفسها و بعدها خرجو .. وهما في الطريق
كيونا بسعادة : بقالنا فترة مقضيناش اجازه بره البيت .. لان اخر اسبوعين كنا بنقعد فى البيت
دومي : اه فعلا

في الوقت ده بص كيونا علي بنت معديه قدامه

بصتله دومى وضيقت عينها : وشكلها هتكون اخر مره .. كيوهيون
انتبهلها كيونا : بتقولى حاجه يا حبيبتي
دومي : بقول ايه رايك نرجع البيت احسن ؟
قرب كيونا منها ولف ايده ع كتفها : وده كلام برضو ده حتي الجو لطيف
دومي : وهيبقي الطف لو بطلت تبص علي اللي رايحه واللي جايه
كيونا : الطف من كده .. لا انا عاجبني وهو كده
دومي من بين سنانها : كيونا
بعد عنها كيونا خطوة وحرك ايده قدامه : خلاص خلاص بهزر معاكي

وصلو للمول و دخلو محل ابتدت دومي تختار
دومي : ايه رايك فى شكل الفاظه دى .. جميلة مش كده ؟
رفع كيونا حواجبه وهو بيبص على الفاظه : هو الورد بيدخل بيتنا اصلا
سابت دومي الفاظه مكانها : تصدق صح .. وقفت قدام برواز فيه صوره منظر طبيعي .. ايه رئيك ف ده ؟
ميل كيونا راسه : مممممم حلو
دومي : اه فعلا .. استني استني .. وقفت قدام برواز تاني .. ولا ده احلي ؟
حس كيونا ان الحيرة هتبدا : الاتنين حلوين
دومي وقفت قدام برواز ثالث : طيب بص ده يجنن
طلع كيونا 3 صوابع قدامه وبدا يعدهم : 3 براويز واحد فى المطبخ .. وواحد فى اوضه النوم .. وواحد فى الصاله
بصتله دومي بطرف عينها : خلاص بلاش براويز
ابتسم كيونا ابتسامه جانبيه وحرك راسه بياس : وده المتوقع

فضلو على كده كتير دومى كل شوية تختار حاجة وفى الاخر تحتار بينها وبين حاجة تانية وفى النهاية بتسيبها .. وبعد حوالي نص ساعه من جوله دومي فى المحل اخيييييييرا و بعد عناء اختارت اللى هى عيزاه و دفعت الفلوس ومشيت هى وكيونا .. وهما فى طريقهم للبيت

كيونا : هو البتاع اللي انتي جيباه ده جيباه ليه كنتي اختارتي برواز احسن ؟
اتنهدت دومي بحالمية : علشان نقعد مع بعض قعده رومانسيه ( اشترت .. فروع نور علي اشكال ورد وورق شجر بالوان كتير .. الفرع كبير لدرجه انه بياخد الحيط كله و مجرد النور ما يطفي هو بيولع لوحده بالوان هادية ) وبعدين بصت لكيونا .. هو مش حلو ؟
هز كيونا راسة وابتسم : لا طبعا حلو مش فيها رومانسيه
دومي ابتسمت : هييييييييييييييح ايوة

وصلو للبيت قلعت دومي الجاكت واتغدت .. وبعدها جابت سلم وقفت عليه وابتدت في تعليق الفرع مع توجيهات كيونا اللي مبتخلصش .. وبعد ما الفرع اتركب نزلت دومي من علي السلم بسرعه طفت نور البيت وهي بتبص علي نور الفرع
وقفت دومي جنب كيونا وهي مبتسمه ابتسامه واسعه : وااااااا .. ايه رئيك ؟
بصلها كيونا بحب : يجنن… لا بجد احسنتي الاختيار

راحت دومى رمت نفسها على الكنبه وكيونا قعد جنبها

دومى : شفت بقى انى مش محتاجه اى حاجة تانية او اى حد يعملى حاجة .. ولفت وشها ناحيه كيونا : انا وانت نقدر نعمل كل اللى عيزاه او محتاجاه

كيونا : بس انتى اللى كنتى بتعملى وانا مجرد بقول راى

دومى : انا مش عايزة منك اكتر من كده .. وبعدين اى حاجة من غيرك مش هيبقى ليها طعم

كيونا : خلاص سيبك من السيرة دى .. فى حاجة تانية اهم عايز اقولك عليها

ميلت دومى راسها بشك : خيييييييييييير

كيونا : راس السنة قربت فاضل عليها كام يوم

دومى : ايوة .. ايه المشكلة يعنى .. عايز ايه ؟

كيونا : عايز هدية فى اليوم ده

دومى : هدية !!! وانت شبح هتعمل بيها ايه ؟

كيونا : هاتى الهدية وانتى ساكته

دومى : بقى كده اجيب الهدية وانا ساكته ... وقامت وقفت : طيب شوف مين هيعبرك اصلا

سابته دومى ودخلت اوضتها وقفلت الباب .. بصلها كيونا وهز راسه .. وفجاه ظهر فى الاوضه بس كان واقف ورا دومى وكانت هتبدا تغير هدومها وهى ماخدتش بالها منه

قرب كيونا من ودنها : بوووو

لفت دومى بسرعة وبصوت عالى : ياااااااااا .. خضتنى .. وبعدين ايه اللى دخلك كده ؟ .. قولتلك كذا مرة متدخلش طول مانا قافلة الباب

كيونا برخامة : وهتمنعينى ازاى ؟

فضلت دومى تتناقر مع كيونا لحد ما سابها تغير هدومها .. وفضل يرخم عليها طول اليوم وطبعا يهزرو ويلعبو مع بعض

بعد يومين فى الجامعه كانت دومى قاعدة مع اصحابها ومعاهم هيوك .. بيتكلمو على حفلة راس السنة

دوني : دومي هتيجي معانا حفله راس السنه المرة دى ؟
دومي هزت راسها : دوني كل سنة او كل حفله نتكلم فى الموضوع ده .. وانت عارف الرد .. يبقى بتسال ليه من الاول ؟
مسكت هيومي ايد دومي : دومي بلييييييز تعالي معانا الحفله دي .. بجد انتي بيفوتك كتير
هيوك : انا عايز اعرف بس سبب رفضك ايه ؟
بصتله دومي :  مفيش سبب محدد .. بس انا بحب اقضي اليوم ده لوحدي
نورين : مش هيحصل حاجه لما حضرتك تغيري من روتينك شويه و تيجي معانا
هيومي عماله تشد ايد دومى : يلا بقي علشان خاطري
دوني : الكل بيتحايل عليكي .. تعالى معانا المرة دى بس
هزت دومي راسها : هفكر
هيومي بصوت عالى : بجد yes .. 
سحبت دومي ايدها من ايد هيومى : انا قولت هفكر
حضنتها هيومي من جنبها : وده في حد ذاته تقدم ملحوظ

نورين : انا كمان عايزة احضن اشمعنا هيومى

بصتلها دومى وابتسمت .. قامت نورين وحضنتها من جنبها التانى

دومى وهى متفعصة بينهم : انتو كده هتفطسونى قبل ما افكر

بعد شوية قامو عشان محاضراتهم .. وبعد كده راحت دومي شغلها .. عدي اليوم كالعادة زي اي يوم طبيعي لحد ما روحت البيت .. دخلت و حدفت شنطتها علي الكرسي و دخلت المطبخ عملت ساندوتش و كوبايه عصير و طلعت قعدت علي الكنبه و ابتدت تاكل
قعد كيونا جنبها : دومي… انتي هتروحي الحفله اللي بيقولو عليها دي ؟
دومي وهي بتاكل : بفكر فى الموضوع…  ممكن اروحها وممكن لا
كيونا بعبوس : بس المفروض ان اليوم ده لينا … احنا بنبتدي اول دقيقه فى السنه الجديده مع بعض دايما
دومي : مش مهم المكان اللي هنحتفل فيه .. المهم اننا هنكون مع بعض وهنبتدي السنه الجديدة سوا .. وبعدها بصتله بابتسامه

اتنهد كيونا ونزل راسه وبعدين بصلها وهز راسه بابتسامه بس كان فى حاجه معكره الابتسامه اللي هي بتعشقها ..  مش عارفة هى ايه .. ابتسمت دومى ورجعت كملت اكلها بس كانت دماغها مشغولة بحاجات كتيرة عن اللى بيحصل فى حياتها مع كيونا وايه اللى اتغير بينهم عشان كيونا يبقى متضايق كده وبعد فترة قامت غيرت هدومها ونامت .. ودى كانت اول مرة كيونا يسيبها تدخل اوضتها وتغير من غير ما يضايقها او يهزر ويلعب معاها .. بس ده اداها مساحة انها تقدر تفكر كويس فى اللى بيحصل

في يوم راس السنه اتفق الكل ان هيوك هيعدي عليهم بعرابيه بتاعت حد من قرايبه و يوصلهم لمكان الحفله راح لدوني الاول و بعدها عدي علي نورين و هيومي وبعدها دومي .. اتفاجئ الكل من شكل دومى لان دي اول مره يشوفوها بلبس سهره .. خلينا نوضح كانو لابسين ايه
<<

هيوك .. بدله سودا و تحتها قميص ابيض و رافع شعره لورا
دوني.. بدله سودا وتحتها قميص ابيض و فاتح اول زورارين من القميص و جايب شعره علي قدام
يورين .. فستان روز كات لحد الركبه وفيه رسومات بلمعة بسيطه بدرجه روز اغمق من الفستان و جزمه بكعب عالي لون الرسومات اللي ع الفستان و سايبه شعرها الطويل علي ظهرها
هيومي .. فستان اسود كب منقوش عليه من عند الصدر و الوسط برسومات باللون الابيض و منفوش من عند الوسط واصل لركبتها و جزمه بكعب عالي سمرا
دومي .. فستان رمادي .. منطقه الصدر و الكم شفافه طويل ومن علي الجنب فيونكه رقيقة لون الفستان وجايبه شعرها كله علي جنب واحد علي كتفها و جزمه بكعب درجه من درجات الرمادي

وركبت دومي جنب البنات ورا .. لف دونى اللى قاعد فى الكرسى اللى قدام نفسه وبص للبنات

دونى بيمثل الاستغراب وبيشاور على دومى:  مين دي ؟ اعتقد حضرتك ركبتي غلط معانا .. هي فين دومي ؟
خبطته دومي علي راسه : ها عرفت هي فين ؟
دوني وهو حاطط ايده علي راسه : لولا الضربه دي مكنتش صدقت انك دومي

ضحك الكل علي دوني انما بالنسبه لكيونا كان وضع تاني كان قاعد علي رجل دوني بيحاول يخنقه و شويه كمان علي رجل هيوك وعمال يضربه بالبوكس و دومي تبصله وتضحك و في نفس الوقت مركزه مع كلام البنات اللي شويه يتكلمو عن تغيرها وشويه كمان يعاكسو فى اللي ماشي فى الشارع

لحد ما وصلو لمكان الحفلة .. نزل الكل ودخلو القاعه
اول ما دومي دخلت و شافت المكان انبهرت طبعا لانها مش بتحضر اى حفلة فى الحقيقة .. يادوب بتشوفهم فى التلفزيون بس او بتسمع عنها من اصحابها

<<

  وصف للمكان…  المدخل مزين ببلالين احمر وابيض  .. ومن جوه فى مكان مخصص للرقص و جانبه Dj  مخلي المكان كله موسيقي وبلالين كبيره علي اشكال مختلفه موجودة فى كل مكان وبكل الالوان .. وكره حفلات كبيره بتلمع فى السقف وقصاصات ملمعه باللون الدهبى والفضى على الارض وبلالين معلقة فى الهواء  وطبعا البوفيه .. المكان مليان ناس كل واحد فرحان و بيقضي وقته بياكل و يشرب و يرقص و يلعب من الاخر كان المكان فيه حياه >>

قلعو الجواكت وحطوها فى الاماكن الخاصة بيها
دومي بانبهار : واااااا
حط هيوك ايده علي كتفها : خلي حبه لحد ما الحفله تبتدي اكتر

راحت هيومى ونورين لمكان الرقص وسحبو دومى معاهم عشان ترقص .. فى الاول كانت معارضة ومحرجة بس بعد كده بدات ترقص وتستمتع بالحفلة لان كيونا بدا يستمتع هو كمان ويرقص معاها  

اما بالنسبه لدوني بقي فده فى عالم تاني خاااالص واقف عمال يعاكس في البنات اللي رايحه واللي جايه و شويه يروح ياكل و بعدها يرجع يعاكس تاني

اما هيوك فكان بيتكلم مع اصدقاءه وزمايله فى الجامعه وعمال يبص على البنات وهى بترقص باستمتاع 

بعد ما خلص البنات رقص راحو لدوني و استاذن هيوك من زمايله و راح للشله وكلهم قعدو علي طرابيزه واحده

وقف دوني وعدل البدلة : والان مع فقرت الساحر لي دونغهي .. وانحنى
نورين ماسكه ايدها الاتنين ببعض وسانده على الطرابيزة وبصت لدونى اللى واقف جنبها : وااا حضرت الساحر هتعمل ايه .. هتطلع الفيل من المنديل ؟
دوني ببرائه وابتسامه جميلة بس فى نفس الوقت مستفزة : و اطلعه ليه وانتي هنا
خبطته نورين فى دراعه : ياااااا
دوني حط ايده علي وشها : اسكتي بقي متعطليش الابداع
وبعدها مسك دوني عمله وابتدي يحركها قدامهم علشان يشوفوها كويس و بعدها هوب اختفت
هيوك باستهزاء : هوباااا لا سحر ولا شعوذه
هيومي وهي حاطه ايدها علي خدها و بصاله بملل : كم انت قديم لي دونغهي
دوني طلع صوباعه وبدا يشاور عليهم  : انتم كده اعداء النجاح .. بعدها بص لدومي .. ايه رايك انتي ؟
دومي اتنحنحت وعضت شفايفها : لازم تعرف راي ؟
دوني وهو مادد شفايفه قدام : لا مش لازم اعرف .. عالم محبطه .. انا بتدرب عليها بقالـ ....

وقتها عدت بنت من جنبه بص عليها لحد ما اختفت وسط الناس : ايون بقي
هيومى : ازاي تعاكس وانت قاعد جنبك 3 بنات قمرات
دوني بصلها باستغراب : فين البنات دي؟ .. بعدها بص لدومي : اه بيانيه دومي .. طب ادي بنت فين ال2 التانين؟
هيومى بصتله من فوق لتحت : عديم الزوق بصحيح
حطت نورين ايدها على ايد هيومى : يابنتي سيبك منه اصلا مفيش غير تشولا اوبا هو اللي مدلعنا
هيومى : هييييييح اه .. ياريته كان جه معانا
و ابتدي الاتنين يعاكسو في تشولا
دوني : يا ازاي تعاكسو وانتم قاعد جنبكم 2 رجاله وسيمين
نورين قلدت نظرته : فين الرجاله دي ؟.. وبعدها بصت لهيوك : اه بيانيه هيوك .. طب ادي واحد فين التاني ؟

ومجرد ما خلصت جملتها انفجر الكل من الضحك و نورين باصه لدوني بابتسامه نصر

بص كيونا لدونى بشماته : تستاهل

فضلو مستمتعين بالحفلة .. يهزرو ويلعبو مع بعض وكمان بيرقصو .. قامت نورين ترقص مع دونى .. وهيومى قامت رقصت مع هيوك بعد ما رفضت دومى انها ترقص مع هيوك وفضلت قعدة مع كيونا تبص على اللى بيرقصو وتتكلم مع كيونا وهى مبسوطة

وجه وقت العد التنازلي لبدايه سنه جديده .. قامت دومى وقفت على جنب مع كيونا

 
وقف كيونا قدام دومي و عينه كلها حب : غمضي عينك
ابتسمت دومي و غمضت عينها لان دى الطريقه الوحيدة علشان تحس بلمسات كيونا ليها .. انها تغمض عينها و تتخيل كيونا وقتها بتحس بيه… او ده اللي بيتخيل ليها

وصل العد التنازلي 5
4
3
2

1

هيص الكل بصوت عالى .. وحست دومي بالاحساس اللي خلاها دابت ... البوبو من كيونا كان قلبها بيرقص من الفرحه ابتدت تتجاوب معاه وبعدها بعد كيونا عنها وبدات تفتح عينها واحده واحده .. وكل ما الصوره توضح ليها اكتر كل ما كيونا يختفي بالتدريج من قدامها و يبان صاحب البوبو الحقيقي وبعدها اختفي كيونا بالكامل من قدامها 

----------------- 

BY

D&E

Lolo Adel  

Emy Tarek