Catch him .. Part 24

Catch him .. Part 24

هيوك واقف بعربيته مستنى لولو تخرج من البيت لانهم اتفقو يتقابلو .. بعد 5 دقايق طلعت لولو من بيتها لابسه بنطلون جينز وسويت شيرت ازرق وشوز ابيض ولابسه على ضهرها شنطة .. ركبت جنب هيوك وحطت الشنطة فى الكرسى اللى ورا

هيوك : ها بقى هنروح فين ؟

لولو : اطلع على البحر

هيوك باستغراب : بحر ؟؟

لولو هزت راسها : ايوة البحر .. ويالا بسرعة بقى عشان نلحق اليوم من اوله

بص هيوك باستغراب على الشنطة وبص للولو : ايه الشنطة دى كلها .. احنا مش هننزل المية لان الجو بداء يبقى ساقع

لولو ببراءة : ومين قال انى هنزل المية

هيوك شاور على الشنطة : اومال الشنطة دى كلها فيها ايه ؟

مدت لولو ايدها وفتحت الشنطة وبدات تقلب فيها : فيها ساندوتشات وشيبسى وعصير وحاجات حلوة ولب و ....

هيوك قاطعها : ايه كل ده يا لولو .. انتى طالعة رحله !!!

لولو رفعت ايدها قدامه واتكلمت بجدية : انا لا يمكن استغنى عن الاكل ابدا وانت عارف كده كويس

هيوك مسك ايدها اللى قدام وشه : نفسى افهم كل الاكل اللى بتاكليه ده بيروح فين ؟.. انتى مش بيبان عليكى

لولو سحبت ايدها : بيروح مع التمارين والجرى .. وبعدين سيبك من الشنطة والاكل وخليك فى الطريق

وهما فى الطريق كانو مشغلين اغانى وبداو يغنو ولولو بتغنى غلط

هيوك عمال يبص للولو اللى مندمجة مع الاغانى وبتقول كلام مختلف عن كلامتها : ايه اللى انتى بتقوليه ده .. انتى بوظتى الكلام خالص

لولو : هو انت شايفنى فاضية عشان احفظ كلام الاغانى .. وبعدين انا اقول كلام حد قاله ليه .. انا اغنى باللى انا عيزاه

وطى هيوك صوت الاغانى : انا بقول بلاش نسمع حاجة .. مش ناقص تلوث سمعى

لولو بصتله وسكتت .. بصلها هيوك .. ورجع بص على الطريق

هيوك : انا مبسوط قوى اننا هنقضى اليوم كله مع بعض لوحدنا من اوله لاخره

لولو : وانا كمان مبسوطة قوى .. خصوصا انى بقالى كتير مرحتش هناك

هيوك : انتى بتحبى البحر قوى كده ؟

لولو بحماس : انا ليا زكريات جميلة قوى فيه .. طب وانت بتحبه ؟

هيوك : انا كمان بحبه بس من زمان مرحتش هناك لان مكنش عندى حد اروح معاه

حطت لولو ايدها على دراع هيوك : استنى هحكيلك على شوية من مغامراتنا ف البحر

بصلها هيوك وابتسم : قبل ما تحكى انا عارف انها مش مغامرات بس .. دى اكيد فضايح او مصايب

لولو غمضت عينها ومثلت الصدمة : دايما ظالمنى كده

هيوك قرصها من خدها : خلاص احكى يا ملاكى

فتحت لولو عينها واتحمست وبدات تحكى : اولا بحكم ان اهلى واهل ايمى جيران واصحاب من زمااااااااااااان فدايما كنا بنروح البحر كلنا مع بعض يعنى عيلتى وعيلتها .. المهم هحكيلك على موقف حصل يفطس من الضحك .. واحنا صغيرين .. مش فاكرة عندنا كام سنة .. المهم مسكت انا وايمى كابوريا من على الشاطئ واتفقنا اننا نحطها لدونى اللى كان واقف بيعلم هنرى السباحة فى المية .. دخلت ايمى الاول عشان تتكلم معاه وتلاهييه ومسكت هنرى واخدته من دونى .. دخلت انا من ورا دونى وحطيتله الكابوريا فى الشورت بتاعه اللى كان لابسه .. قعد يتنطط فى البحر عايز يطلعها ومش عارف وانا وايمى فاطسنين على نفسنا من الضحك على منظره .. وهو عمال يشتم فينا واول ما خرجت الكابوريا منه طلع يجرى ورانا .. وطلع عينا اليوم ده كنا عاملين فى ايده زى الفراخ المسلوخة

هيوك قعد يضحك على الموقف : انا مش قولتلك انها مصايب .. حرام عليكو اللى عملتوه فيه ده

لولو بسرعة : استنى استنى هحكيلك على موقف تانى حلو بردو

سكت هيوك بس كان لسه عمال يضحك وبدات لولو تحكى الموقف التانى

لولو : بردو الموقف ده حصل واحنا صغيرين .. كنت انا وايمى ماسكين هنرى وهو فى العوامه وعمالين نلعب مع بعض ودونى قاعد مع ماما وبابا على الشط عمالين يتفرجو علينا .. فجاه لفت نظرنا انا وايمى سمكة فى المية حاولنا نمسكها وسبنا هنرى لوحده فى العوامه .. جت موجه قلبته واحنا مش حاسيين بيه وفجاه سمعناهم بينادو بصوت عالى ولاقيت دونى وبابا وابو ايمى داخلين يجرو .. اتخضينا وبصينا ناحية هنرى لاقينا رجله فوق وبيرفس فى الهوا برجله وراسه تحت المية .. وصلولو وطلعوه بسرعة من العوامة والواد ياعين امه كانت عينه حمرا قوى ومش عارف ياخد نفسه وعمال يكح ويعيط .. بعدها طبعا اتعاقبت انا وايمى وفضلنا كام يوم ممنوعين من النزول للمية وفضلو مذنبينا جنبهم

مسك هيوك بطنه من كتر الضحك وعينه دمعت : ههههههههههههههه  لا بجد حرام عليكو .. هو هنرى ده متبهدل معاكو من صغره كده .. والعقاب اللى اخدتوه ده اقل حاجة تحصلكو .. اصلا انتو تستاهلو اكتر من كده

لولو : هحكيلك بقى على موقف تانى بس المرة دى كان على ايمى ودونى .. بعد ما كبرنا شوية كنت انا وايمى فى المرحلة الثانوية .. ودونى فى الجامعه .. المهم كنا واقفين انا وايمى ودونى وهنرى فى الميه وبعدين قفشت انا وايمى مع بعض وراحت سابتنا عشان تخرج من المية ودونى وهنرى عمالين ينادو عليها وهى مش بترد عليهم ومكمله طريقها للخروج من المية وفجاه اختفت ايمى لانها وقعت فى حفرة فى وسط المية .. فجاه لاقينا دونى طلعها بسرعة من المية لانه كان اقرب واحد ليها وحضنها وهى مسكت فيه وخرجها من الميه وقعدو الاتنين على الرمل جنب بعض وهو عمال يطبطب على ضهرها وهى شرقانة .. لان الهانم كانت عماله تبرطم بالكلام ولما وقعت شربت مية كتير .. خرجت انا وهنرى وراهم وفضلنا ماسكينهم طول اليوم تريقة وبنقول بطريقة درامية منقذى .. وامثل انا وهنرى انى بغرق وانادى على هنرى اقوله دونى منقذى الحقنى ويجى هنرى يقوم شايلنى زى الشوال .. ودونى يفضل يضحك علينا وايمى تفضل تجرى ورانا .. مع العلم ان فى الوقت ده مكنوش مرتبطين ولا حاجة بس دونى بدات تتكون عنده مشاعر لايمى

هيوك : دونى عرف يستغل الوضع كويس فى صالحه .. بس انتو لازم تعملو كتاب اسمه مواقف وطرائف  او كيف تتعلم صنع المصائب

لولو بتفاخر : دى اقل حاجة عندنا .. ده احنا كنا كل مرة نروح فيها البحر لازم نعمل بلاوى وكل ما بنكبر كانت بلاوينا ومصايبنا ومقالبنا بتكبر معانا

وفضلت لولو طول الطريق تحكى لهيوك على اللى كانو بيعملوه وطبعا فى الطريق طلعت لولو الاكل وبدات تاكل وتدى لهيوك ساندوتش

جت فى دماغ  هيوك فكرة خبيثة بص على ايد لولو اللى ماسكه الساندوتش وعليها وبعدين بص على الطريق : انا مش هعرف اكل وانا سايق بسرعة

لولو : يعنى مش هتاكل ؟

هيوك بطيبة : اكلينى انتى .. ولا عيزانا نتقلب

بدات لولو تاكل شوية وتاكل هيوك شوية اللى قرر انه يلعب معاها اكتر .. لما جت تاكله عض صوباعها فهى سحبت صوباعها بسرعة وبصتله

لولو : ااااه صباعى .. انت بتاكل الشاندوتش ولا بتاكل ايدى

هيوك ببراءة : بيانيه لولو ماخدتش بالى لانى كنت باص على الطريق

وبعدها جت تاكله تانى بص على ايدها وميل راسه وباس ايدها بوسة سريعة ورقيقة .. اتكسفت لولو بس فى نفس الوقت ابتسمت من الاحساس اللى حست بيه

هيوك بصوت هادى : انا اسف عشان عضيتك وكان لازم اصالح ايدك

نزلت لولو راسها وهى مبتسمة ومسكت ايدها مع بعض .. وفضلو يتكلمو لحد ما وصلو للبحر وقفو العربية ونزلو منها وشبكو ايدهم مع بعض ومشيو على الشط لحد ما وصلو للميه وبدات لولو تلعب برجلها فى المية والرمله وسابت ايد هيوك اللى طلع فونه وبدا يصورها .. اخدت لولو بالها منه راحت راشه عليه ميه بايدها وهى بتضحك .. حط هيوك الفون فى جيبه وبدا يقرب من لولو عشان يمسكها وهى تبعد وترش عليه الميه لحد ما مسكها من ضهرها " يعنى ضهرها فى صدره "

لولو بتحاول تفك نفسها منه : سيبنى

هيوك مسكها اقوى وقرب من ودنها : هسيبك بس بشرط واحد

لولو : انت كده بتستغل الموقف يعنى .. عموما ايه هو الشرط ؟

هيوك بهمس : تدينى بوبو

دورت لولو وشها ناحيته : على فكرة انا لو عايزة افك نفسى منك هفكها بس انت اللى هتصعب عليا بعدها

هيوك : خلاص عندى شرط تانى

لولو : ياترى هتطلب ايه المرة دى

هيوك باسها من خدها بسرعة : نتصور مع بعض

لولو عملت نفسها بتفكر : امممممممم .. موافقة

سابها هيوك وطلع فونه تانى وبداو يتصورو مع بعض شوية صور رومانسية شوية وصور هبله وعار شوية وبعدين صورها لوحدها

وبعدين قعدو على الرمله جنب بعض .. سندت لولو راسها على كتف هيوك وهو حط ايده على كتفها وقربت لولو منه اكتر

هيوك شدها عليه اكتر وبدا يحرك ايده على دراعها : انتى سقعانه

هزت لولو راسها : اها شوية .. بس انا بحب الاحساس ده بحب احس بهوا البحر مع الميه والنسيم اللى طالع منه .. بحس بالانتعاش

هيوك وهو لسه بيحرك ايدها على دراعها .. باسها فى راسها : تحبى ادفيكى انا بطريقتى

رفعت لولو راسها من على كتفه وبصتله .. كانت لسه هتساله ازاى او قصده ايه بس هيوك فاجئها ببوسة على شفايفها طويلة ورقيقة .. بعد شوية بعد هيوك عنها وبص عليها لقاها مغمضة عينها ووشها احمر

هيوك بصوت هادى : حاسة كده بالدفا ؟

دفنت لولو راسها فى صدر هيوك وهزت راسها بمعنى ايوة .. باسها هيوك على راسها تانى وقربها ليه وحاوطها بايدة الاتنين

هيوك : انا جنبك على طول ادفيكى فى اى وقت 

لولو : انا كده مش عايزة اى حاجة فى الوقت الحالى

مسك هيوك ايدها وشبكهم مع بعض : تحبى تعيشى جنب البحر

هزت لولو راسها : اى مكان .. المهم انى اكون معاك

ابتسم هيوك ورفع ايده اللى شابكها مع ايد لولو وباس ايدها

رفعت لولو راسها : بس لو هنعيش جنب البحر يبقى احسن طبعا

ضحك هيوك وهز راسة : مش كان اى مكان من شوية ؟

لولو : كفاية انى اصحى الصبح على جو هادى ونسيم البحر يخلى الواحد يحس بانتعاش وهدوء وصفاء وراحة .. والاهم من كل ده انى احس بكل ده معاك

هيوك : انا بقى احلى حاجة انى اصحى على ابتسامتك اللى بتنور دنيتى وتبقى معايا دايما .. مش قادر اقولك يا لولو قد ايه انا نفسى الحلم ده يتحقق

نسى هيوك كل اللى كان مضايقه وشاغله اليومين اللى فاتو وفعلا استمتع باليوم ده مع لولو .. وكان هيوك بيتمنى فعلا انه يقدر يحقق الامنيه دى كمان مع لولو .. حضنها وفضلو مستمتعين بهوا البحر حواليهم

اليوم ده قضى لولو وهيوك يوم كله سعادة وشقاوة محدش فيهم فكر فى اى حاجة غير انهم يقضو يوم حلو ويسعدو بعض لحد ما الليل بدا يدخل ركبو العربية عشان يروحو

وهما راجعين فى العربية

هيوك : اتبسطتى النهاردة ؟

لولو بسعادة : ده احلى يوم فى حياتى .. كفاية ان طول اليوم واحنا مع بعض

هيوك : ايه رايك لو نشترى بيت على البحر فعلا ؟

لولو : بجد !!!!

هيوك : اى حاجة نفسك فيها هعملهالك طالما هتفرحك .. ووقت ما تبقى تحبى تروحى هناك يبقى نروح نقضى وقت حلو وهادى مع بعض

فجاه حضنته لولو وهى مبسوطة بس اول ما حضنته انحرفت العربيه عن طريقعا لان لولو خبطت فى هيوك جامد بس هو رجع سيطر على العربيه تانى

هيوك ضحك على رد فعل لولو : يا مجنونة .. انا سايق كده هنعمل حادثة

بعدت لولو عنه وحطت صوباعها قدامه : خلاص ماشى .. بس فكرنى اول ما نوصل اديك الحضن بتاعك

فجاه انتبهت لولو للى قالته ومعرفتش تعمل ايه

حاول هيوك يعض صوباع لولو اللى قدامه بس هى سحبته : اكيد مش هنسى وهفكرك .. بس انتى مترجعيش فى كلامك

لولو بتحاول تطلع من الموقف اللى حطت نفسها فيه : هو انا قلت ايه اصلا

هيوك بصلها بصدمة : يادى الزهايمر .. انتى لحقتى تنسى

فضلو طول الطريق هيوك بيفكرها ويتناقرو مع بعض لحد ما وصلو حاولت لولو تنزل من العربية بس هيوك مسكها

هيوك : مش هسيبك غير لما اخد الحضن بتاعى

لولو بتتصنع الغباء : حضن ايه اللى بتتكلم عنه ؟

هيوك : انا عارف انك مش هتيجى بالذوق

وسحبها لحضنه ابتسمت لولو وبادلته الحضن

لولو وهى مستمتعة بحضن هيوك : اهااااا مش تقول ان هو ده الحضن

بعدها لولو عنه : امشى يا لولو .. انزلى من العربية وادخلى البيت

ابتسمت لولو واخدت شنطتها وفتحت الباب بس قبل ما تخرج باست هيوك فى خده وجريت لبيتها .. حط هيوك ايده على خده وابتسم لان دى اول مرة لولو تعمل حاجة منها لنفسها وروح البيت وهو فى منتهى السعادة .. كان نفسه يفضل فى اليوم ده ميخلصش ابدا .. وبيتمنى ان ايامه مع لولو تفضل حلوة كده

تانى يوم الساعة 6 بالليل .. هيمى كلمت تشولا فى التليفون

تشولا : يوبوسايو

هيمى : تشولى حبيبى

تشولا : تشولى وحبيبى فى جملة واحدة .. مش مرتاحلك

هيمى : ليه يعنى هو انا مينفعش ادلعك ولا اقولك يا حبيبى ؟

تشولا : هيمى انا حافظك وفاهمك كويس .. انتى مش بتتكلمى كده الا لو فى حاجة يا اما عايزة حاجة او هتقولى حاجة مش هتعجبنى او عملتى حاجة .. فانتى قولى من الاخر فى ايه

هيمى : دايما حابطنى كده .. عموما انا بتصل عشان اقولك انى خارجة مع لولو

تشولا : طيب تمام .. متتاخروش

هيمى : يعنى مطلعتش عايزة حاجة او هقول حاجة مش عجباك او عملت حاجة .. دايما نيتك وحشة عليا كده

تشولا : تحبى اقولك متخروجيش عشان تشوفى النية الوحشة ؟

هيمى : لا يا بيبى انا بهرج معاك .. وقالت فى سرها .. ربنا على الظالم .. ورجعت كملت كلامها : انت هتروح امتى ؟

تشولا : انا خلاص خلصت ورايح اركب العربية ومروح

هيمى : ماشى ابقى طمنى عليك لما تروح .. سلام

قفلت هيمى مع تشولا وكلمت لولو بس الرقم دايما مشغول او بيدخل على الانتظار لحد ما ردت عليها

هيمى بصوت عالى : ياااا .. انا بقالى كتير بكلمك مشغولة دايما .. بترغى مع مين كل ده ؟

لولو باستفزاز : بكلم هيوكى هيييييييييييييح

هيمى : هيوكى هييييييييح !! .. انتى يابت مش كنتى معاه امبارح طول اليوم .. وبعدين كل ده بترغى فى ايه ؟

لولو : انتى مالك انتى احنا بنرغى فى ايه .. اتنين بيحبو بعض هيرغو فى ايه يعنى ؟

هيمى : شكلك هتضربى النهاردة .. انتى فين انا جاهزة ومستنياكى ؟

لولو : انا داخلة على بيتك انزلى يالا هتلاقينى فى وشك

هيمى : ارسو يالا سلام هلبس الشوز وانزل

قفلت هيمى ونزلت ركبت مع لولو فى عربيتها واول ما شافتها راحت ضرباها على راسها

لولو حطت ايدها على راسها : بتضربينى ليه ؟

هيمى : عشان سخافتك فى الكلام معايا وتاخيرك عليا

لولو : كده .. طيييييييب .. مش هقولك حصل ايه امبارح معايا

هيمى مسكت راس لولو وباستها : لا يا لولو يا حبيبتى .. انا لازم اعرف.. انتى عرفانى بحب الحاجات دى

لولو بصتلها وبعدين بصت قدامها : هفكر

برطمت هيمى بالكلام " اصبرى عليا بس لما اعرف وبعدها هطلع عينك "

لولو بصتلها : بتقولى ايه ؟

هيمى ابتسمت : بقول انك طيوبة وهتقوليلى على اللى حصل

لولو : اصلا انا هقول لوحدى مش هعرف امسك نفسى انى محكيش

وبدات لولو تحكى  لهيمى اللى حصل امبارح مع هيوك .. طول الطريق وهى بتتكلم وهيمى بتنق وترخم عليها

فى الوقت ده كان تشولا وصل لبيته فتح باب الشقه و دخل لقي الصاله مكركبه وكل حاجه مكسره دخل للشقه طلع مسدسه وفي وضع الاستعداد .. وقتها الشخص اللي فى الشقه لما سمع الصوت استخبي ورا باب الاوضه فتح تشولا باب الاوضه ودخل في اللحظه دي طلع الشخص ده من ورا الباب ضرب تشولا علي ايده وقع المسدس وابتدا الاتنين يضربو في بعض وقدر تشولا يشوف وش الشخص اللى بيضربه بس بعد فتره ذق الشخص ده تشولا وقع وراسه اتخبطت في طرف الطرابيزه اغمي عليه و الشخص ده هرب

في نفس الوقت عند هيمي و لولو  <<بيشربو عصير قصب من عند فرغلي>>
هيمي و الفون علي ودنها و بتتكلم بقلق : هو مش بيرد ليه بس ؟
لولو بتحاول تطمنها : استني بس ممكن يكون في الشغل
هيمي بتهز راسها : لا هو مكلمني و قال انه رايح على البيت و لما يوصل هيكلمني
سابت لولو الكوباية اللى بتشرب فيها : خلاص ياستي تعالي نروح نطب عليه و اهو نطمن عليه بدل مانتي مصدعاني كده

ركب لولو وهيمى العربيه ورايحين لتشولا طول الطريق هيمي قلقانه شويه ترن علي تشولا و شويه تانيه تبص من الشباك .. والقلق اتملك منها و لولو بتطمنها لحد ما وصلو لبيت تشولا لقو الباب مفتوح دخلو لقو الشقه مكركبه .. فضلو يدورو في قلب الشقه لحد ما لقو تشولا في الاوضه علي الارض و مغمي عليه .. اول ما شافته هيمي جريت عليه ووراها لولو حاولو يفوقوه بعد فتره ابتدئ يفوق معاهم وقت ما استعاد وعيه بالكامل وقف بسرعه و بص حواليه وهيمي و لولو باصين ليه باستغراب
هيمي باستغراب : اوبا !!
تشولا : انتي ايه اللي جابك هنا ؟
هيمي : انت قولت انك هتكلمني لما توصل و لما لاقيتك مكلمتنيش اتصلت عليك انا وانت مش بترد لحد ما لولو قالت اننا نيجي… و كويس اننا جينا… هو ايه اللى حصل هنا ؟
حط تشولا ايده علي راسه مكان ما اتخبط و قعد علي السرير : كان في حد في الشقه و استخبي هنا لما انا جيت و كركب الشقه كده مش عارف كان عايز ايه … واحنا بنضرب بعض زقنى ووقعت .. راسي اتخبطت و اغمي عليا و هو هرب… اتكلم بعصبيه بس هلاقيه انا شفته قبل كده وهجيبه يعنى هجيبه
هيمي حطت ايدها علي كتفه : المهم انك كويس … انا كنت هموت من الرعب و حضنته وهو كمان حضنها و ابتسم

فضلت لولو باصه عليهم وبعدين فونها رن .. طلعته عشان تشوف مين اللى بيتصل وابتسمت اول ما شافت اسم المتصل .. بصت تانى على هيمى وتشولا : كملو كملو ولا كانى هنا .. وسابتهم وطلعت وهي بترد علي الفون
لولو : يوبوسايو

هيوك : انتى فين كده  .. روحتى ولا لسه ؟
لولو : لا انا عند تشولا
هيوك باستغراب : تشولا !! ليه ؟

حكتله لولو اللي حصل كله

هيوك بقلق : طب هو عامل ايه وقتى ؟

لولو : كويس مفيهوش حاجة وسيباه هو وهيمى بيحبو فى بعض .. عموما احنا مش هنطول وهنمشى كمان شوية

هيوك : اراسو سلميلى على هيونج وخدى بالك من نفسك
لولو : اراسو…  سلام

قفلت معاه و نطت لتشولا و هيمي تاني
لولو بصوت عالى : بتعملو اييييه ؟
بصلها تشولا بصه كافيه بانها تطير جبهتها من غير اي كلمه
لولو ابتسمت : ولا كاني اتكلمت ذي ما انتم كملو

راحت هيمى حدفاها بالمخدة الصغيرة وبداو الاتنين يناقرو فى بعض وصدعو تشولا لحد ما طردهم هما الاتنين
كان الوضع هنا عكس الوضع عند هيوك اللي مجرد ما قفل مع لولو غرق في بحر افكاره

هيوك بيكلم نفسه : يا تري يا ميني انت السبب ورا اللي حصل المرة دى ؟ ..  يا تري هتاذي مين تاني ؟.. اخيرا لقيت ورقه تقدر تضغط بيها عليا .. انت بتعرفني لو معملتش اللي انت عايزه ممكن تعمل ايه .. ممكن المرة الجاية تاذي لولو *هنا فتح عينه علي الاخر و هز راسه كانه بيطرد الفكره من راسه * مفيش بايدي غير اني اعمل اللي هو عايزه علشان احميهم و احميها .. واتنهد بقله حيل  وطلع فونه وكلم كيونا

هيوك بدون اي مقدمات : انا فكرت في كلامك وعرض مينى
كيونا باهتمام : و قررت ايه ؟
هيوك اتنهد تانى : انا موافق
كيونا : هو ده احسن حل .. انا عارف انك مش عايزه بس للاسف مش قدامنا غيره على الاقل دلوقتى .. عموما ظبط امورك وبعدين كلمني علشان اعرف هتروح البيت امتي
هيوك : اراسو بس قبل كل ده فى حاجة لازم تتعمل الاول

كيونا : حاجة ايه دى ؟

هيوك : اللى انت دايما كنت بتقولى اعملها .. انا هصارح لولو بكل حاجة

كيونا : انت متاكد انك عايز تعمل كده دلوقتى ؟

هيوك : لازم الموضوع ده يخلص .. وبعدين كده او كده الموضوع هيتعرف متنساش انهم مراقبين مينى والقصر .. يبقى تعرف منى انا الاول وافهمها احسن ما تعرف من بطريقة تانية

سكت كيونا لانه حس ان هيوك كده بيعمل اكتر ما يقدر يستحمل هيتخلى عن حبه ويبعد عن حبيبته وكمان هيرجع يعيش مع اخوه اللى مش عايز يشوفه اصلا

هيوك : بعد ما اخلص كل حاجة هكلمك .. سلام ..

قفل السكه وبعدها حدف الفون علي الطرابيزه و رجع جسمه لورا سنده علي الكرسي و غمض عينه و اتنهد بضيق و ملامح وشه عليها 100 تعبير من حزن و قلق و خوف

----------------- 

BY

D&E

Lolo Adel  

Emy Tarek