Catch him .. Part 22

Catch him .. Part 22

تانى يوم فى مركز الشرطة كان تشولا بيحقق مع جون اللى قبضو عليه متلبس بشحنه السلاح

تشولا : البضاعه دي بتاعتك ؟
المحامي : انا ارفض التحقيق ده و بطلب بترحيل موكلي لبلده وهناك يتم التحقيق معاه
تشولا بنظرة حادة : هو اتقبض عليه هنا والبضاعه اتحرزت هنا والتحقيق هيتم هنا
المحامي باصرار : انا برفض ده شخص اجنبى وانا بصفتى محاميه برفض محاكمته هنا
خبط تشولا ايده على الطرابيزة اللى قعدين عليها : هاتلي قرار ترحيله ووقتها هنرحله لبلده… وعلي ما تجيبلي القرار ده هيتحقق معاه زيه زي اي شخص وانا اللي هحقق معاه
سكت المحامي و بص تشولا لجون و ابتدي يتكلم
تشولا : ها البضاعه دي بتاعتك ؟
جون : لا
تشولا رفع حواجبه : لا ازاي ده احنا مسكينك متلبس بيها ؟
مردش جون عليه
تشولا : البضاعه دي خارجه ولا داخله البلد
بصله جون و بعدين لف وشه و مردش عليه
تشولا : خلاص يبقي هتتكلم في المحكمه .. وسابهم وخرج

عدى طول النهار كل واحد فى شغله من غير اى احداث تذكر او مهمة الكل بيتابع يومه كالعادة .. لحد ما جه الليل .. كلم هيوك لولو فى التليفون عشان يتطمن عليها

دخلت لولو البيت وهى بتتكلم معاه وقفلت الباب وراها : انا لسه داخلة البيت اهو

هيوك : ماشى حبيبتى .. حمد الله على السلامة

دخلت لولو اوضتها وقعدت على سريرها : الله يسلمك .. وانت هتروح امتى ؟

هيوك : انا لسه قدامى شوية وبعدين هروح .. المهم انا عايز اقولك على حاجة مهمة

لولو : خير .. قول

هيوك برومانسية وصوت واطى لانه ف شغله : وحشتيييييييييييييييييييييينى .. وعايز اشوفك

لولو ضحكت بصوت عالى : انا كنت لسه معاك امبارح

هيوك : انتى بتوحشينى دايما .. اتصرفى بقى .. انا لازم اشوفك

لولو : خلاص انا فاضية بكرى مش عندى شغل كتير ممكن نتقابل

هيوك : خلاص يبقى معادنا بكرة

لولو بضحك : انت مجنون

هيوك : مجنون بيكى عندك اعتراض

لولو : لا بالعكس ده انا كده اتبسط واطمن

هيوك : طيب قومى بقى ظبطى نفسك وارتاحى وانا هكلمك وانا ماشى

لولو : ارسو .. خد بالك من نفسك .. سلام .. وقفلو

فى نفس الوقت ده فى قصر مينى كان كيونا وصل من السفر و روح البيت ارتاح و بليل دخل علي ميني بعد ما خبط علي الباب .. دخل وفي ايده ملف حطه علي المكتب قدام ميني و قعد علي الكرسي
ميني رفع عينه لكيونا وابتسم : حمد الله علي السلامه… انت جيت امتي ؟
كيونا قعد على الكرسى اللى قدامه : الصبح
ميني : عملت ايه في الصفقه
كيونا بتفاخر : انا رايح بنفسي اكيد خلصت بنجاح
ميني بابتسامه : بحب انا ثقتك في نفسك
كيونا قرر انه يستجمع شجاعته ويتكلم مع مينى  : هيونج .. انا عايز اتكلم معاك في موضوع
ميني و هو باصص علي الورق : اتكلم
كيونا : انت ليك علاقه بحادثه دوني وهنري
ساب ميني الورق اللي في ايده و بص علي كيونا
كيونا بترجي : ارجوك قولي انك ملكش علاقه بالموضوع ده
ميني بلا مباللاه : هما اللى بيتدخلو ف شغلي
كيونا بخيبه امل : بس ده شغلهم انهم يصححو الغلط وميسكتوش عليه .. وانت اللى بتعمل الغلط
قام ميني من مكانه وقعد ع الكرسى اللى قدام كيونا : انت مش عايزيني اذيهم ؟
كيونا بسرعه : اكيد طبعا
ميني : في حاجه واحده تخليني ماذيهومش
كيونا بص ليه باستفهام
ميني : هيوك
كيونا باستغراب :هيوك ايه دخله بالموضوع دلوقتي ؟
ميني : خلي هيوك يرجع تاني و يعيش معايا
كيونا : انت عارف انه مش عايز يرجع تاني
ميني : هي دي الطريقه الوحيده اللي تخليني ماذيهومش فكرو وردو عليا

بص كيونا لميني و اتنهد وسابه وقام .. فضل يفكر هيعمل ايه مع مينى وهيوك .. ازاى يقدر يقنع هيوك انه يرجع تانى .. وازاى يقدر يخلى مينى يبطل اللى بيعمله ده .. ودى اكبر مشكلة بتواجه كيونا لانه دايما موجود فى النص بينهم ميقدرش يجى على حد منهم عشان خاطر التانى

تانى يوم روحت لولو بيتها بعد ما خلصت شغلها قالت لامها انها خارجة ودخلت تاخد شاور  عشان تلبس وتستعد لحد ما هيوك ما يوصل

وكانت كل شوية تغير هدومها وتاخد راى امها وهنرى فيها وطبعا كان هنرى لازم يضايقها .. لحد ما استقرو على لبسها وشكلها وشعرها وكل حاجة .. نقدر نقول انها جننتهم لحد ما جهزت نفسها وراحت قعدت معاهم .. بعد شوية قامت الام عشان تعمل الاكل وسابت لولو وهنرى لوحدهم

هنرى بص وراه واتكلم بصوت واطى : لولو .. خدى بالك انتى مفضوحة على الاخر

لولو وهى عماله تبص على الساعة وتليفونها : قصدك ايه ؟

هنرى خبطها فى كتفها : اوماا طبعا .. انتى مش شايفة اللى بتعمليه .. وبعدين ترجعى تقولى ان انا اللى بفضحك

كانت لسه لولو هترد عليه بس جالها تليفون من هيوك

هيوك : انا تحت البيت .. انتى جاهزة ولا هستناكى ؟

لولو سابت هنرى وشنطتها وراحت تلبس جزمتها : لالا انا جاهزة ونازلة على طول .. سلام وقتى .. وقفلت السكة

بص هيوك للتليفون اللى فى ايده وابتسم لان لولو قفلت فى وشه من غير ما يرد عليها

وقفت لولو قدام المراية اللى جنب الباب تبص على نفسها للمرة المليون وحطت ايدها على راسها وبتكلم نفسها : انا ناسية ايه ؟

صفرلها هنرى ولما لفت عشان تبصله لاقت شنطتها طايرة عليها : ناسيه شنطتك يا كابتن

مسكت لولو شنطتها وابتسمت بغباوة وسابته وخرجت من البيت

ضحك هنرى بنفس الغباوة وقال بصوت عالى : متتاخريش

وبعدين بص قدامه وكلم نفسه : وانا هفضل قاعد بعمل ايه .. اروح اشوفلى فيلم رعب اتفرج عليه

خرجت لولو من البيت كانت لابسة بادى طويل باللون الموف نص كم ونازل على الدراع يعنى اكتافها باينه

 وتحته بادى كات لونه ابيض وبنطلون ابيض وجزمة موف وشنطة لونها ابيض وجايبه شعرها على كتف واحد

ابتسمت اول ما شافت هيوك اللى واقف وساند على عربيته وكان لابس تيشيرت ابيض وعليه جاكت جينز اسود خفيف وبنطلون جينز اسود وشوز ابيض فى اسود 

راحت لولو وقفت قدامه : اتاخرت عليك ؟

هز هيوك راسه واتعدل فى وقفته : لا خالص

لولو : اومال خرجت من العربية ليه ؟

قرب هيوك منها ووقف قدامها بالظبط وفتح باب العربية : عشان افتحلك الباب بنفسى

حبست لولو نفسها لما هيوك قرب منها واتكسفت ووشها احمر وقلبها كان دق جامد وركبت العربيه .. قفل هيوك الباب وركب من الباب التانى

هيوك بص للولو : ايه الشياكة دى كلها

بصت لولو على نفسها وبعدين بصت لهيوك : عجبك ؟ 

هيوك بصوت هادى : اى حاجة عليكى بتعجبنى .. وغمزلها بعينه وابتسم وبص قدامه

ابتسمت لولو بخجل وحطت ايدها على شعرها بتجيبه ورا ودنها بكسوف

ضحك هيوك على شكل لولو وكسوفها وبداء يتحرك بالعربية : يالا بينا ننطلق

بصت لولو على الطريق وبعدين بصتله : هنروح فين ؟

هيوك : مفاجاه

كانت لولو هتساله تانى بس سكتت ومتكلمتش بالرغم من فضولها الا انها فى نفس الوقت بتحب المفاجات

هيوك بيحاول يغير الموضوع : دونى وهنرى عاملين ايه ؟

لولو : دونى كويس الحمد لله .. وطبعا طول الوقت بيستغل ايمى ويخليها تعمله كل حاجة وهى يا عينى مش عايزة تتعبه وبتعمله كل اللى يقوله .. وبعديها نظرت عينها اتغيرت : وهنرى ابصملك بالعشرين انه كويس .. ده كان محتاج رقبته هى اللى تتلوح

بصلها هيوك باستغراب ورجع بص على الطريق تانى : طب ليه كده حرام عليكى

لولو بصتله : حرام عليا !! انت مش عارف هو بيعمل ايه طول اليوم .. ده كفايه النهاردة جننى على اللبس وشكلى وطول الوقت عمال يرخم عليا ... او يفضل يضايق فى ريما تحس انهم اتنين اطفال مع بعض .. والاكتر من كده انه دايما مشغل افلام رعب فى البيت وانت عارف انى مليش فيها .. وبيقعد بابا وماما وريما معاه بالعافية يتفرجو معاه وبيفضل يرعبهم بزيادة فى وسط الفيلم .. وبعد كل مرة ريما بتقلب البيت عياط لانها بتكون خايفة وهو يفضل يخوفها اكتر

فضلت لولو طول الطريق بتتكلم فى اى حاجة وتدخل من حاجة لحاجة وهيوك كل شوية بيصلها ويرجع يركز فى الطريق تانى لحد ما وصلو للمكان المطلوب .. وقف هيوك العربية ولولو لسه عماله تتكلم .. قرب هيوك منها وحط صوباعه على شفايفها وبص فى عينها .. سكتت لولو من الحركة المفاجاه وبلعت ريقها وفضلت باصه فى عين هيوك وقلبها بيدق جامد بطريقة غير عادية ووشها كله بيطلع سخونيه وبتبربش كان هيوك باصص فى عينها بعمق وفجاه حول نظره لشفايفها .. قلبه كان هينفجر من كتر النبض .. بلع ريقه وبدا يقرب وشه منها .. حس بانفاسها المضطربة وغمض عينه ولسه ها....

رن تليفونه وخرجهم من المود نزل هيوك راسه بخيبة امل وقعد كويس فى مكانه وطلع فونه وهو بيشتم اللى بيتصل دلوقتى فى عقله
رد هيوك ع التليفون : عايز ايه ؟
كيونا : حد يرد ع حد يقوله عايز ايه ؟
هيوك : وهو حد يعمل اللى انت عملته ده؟
كيونا : انا عملت ايه ؟
هيوك : ولا حاجة .. قول عايز ايه .. بتتصل ايه ؟
كيونا مهتمش بطريقة هيوك فى الكلام لانه عايزة ضرورى ومش عايز يخرج نفسه من الموضوع الاساسى : انت فين وقتى ؟
هيوك : انا خارج مع لولو .. وبص عليها لقاها متنحة وباصه قدامها

كيونا : اهااااااا مع لولو .. شكلى كده اتصلت فى وقت مش مناسب .. عموما لما تخلص يومك مع لولو كلمنى عشان عايزك ضرورى
هيوك وهو لسه باصص ع لولو : ارسو ... وقفل من غير ما يقول اى كلمة زيادة او ينتظر رد من كيونا اللى قعد يضحك جامد ويتوعد لهيوك لما يشوفه انه لازم يعرف حصل ايه بينهم عشان هيوك يرد عليه ويكلمه بالطريقة دى

حط هيوك الفون فى جيبه تانى وقال : احنا وصلنا .. يالا ننزل .. نزل هيوك ولولو من العربية .. بصت لولو ع المكان " برج نامسان " وحست بهيوك بيمسك ايدها راحت بصاله
هيوك : انا كان نفسى اجى هنا مع البنت اللى احبها

دخلو البرج وطلعو قعدو فى مطعم على طرابيزة لشخصين كان عليها شموع وورد احمر .. قعدو قدام بعض بصت لولو حواليها وبعدين بصت لهيوك : احنا جايين هنا عشان كده بس .. نقعد فى مطعم وناكل

مد هيوك ايده ومسك ايدها اللى على الطرابيزة : لا طبعا احنا جايين هنا عشان حاجتين اولها اننا ناكل عشان انا عارف انتى بتحيى الاكل قد ايه
اتحرجت لولو لانها حست انه شايفها مفجوعة وهمها على بطنها وبس وانها بقت مفضوحة .. ابتسم هيوك على شكلها ومسك ايدها بشكل اقوى راحت رافعة عينها فى عينه واول ما شافت ابتسامته اللى بتسحرها نسيت احراجها
هيوك : السبب التانى هتعرفيه كمان شويه
طلب هيوك ولولو الاكل وفضلو يتكلمو وطبعا لولو مبطلتش كلام حتى وهما بياكلو وبعد ما خلصو قام هيوك ومسك ايدها
هيوك وهو بيقوم لولو معاه : دلوقى الحاجة التانية اللى كنت عايز اعملها

مشيت لولو معاه لحد ما وصلو للسطح طلع هيوك قفل مكتوب عليه اساميهم .. القفل ع شكل قلب  .. راحو وقفو قدام سور كبير مليان اقفال كتيرة وكان الجو ليل ولطيف وكان فى اضاءات خفيفة على السطح .. فتح هيوك القفل واداه للولو عشان تحطه

 اخدت لولو القفل منه ولفت عشان تركبه بس قبل ما ايدها توصل للمكان حست بهيوك من وراها حست بصدره فى ضهرها وايده على ايدها وراسه جنب راسها وقفت لولو فى مكانها مقدرتش تتحرك وقلبها كان بينبض كانه اخر نبض ليه وكانت حاسه بضربات قلب هيوك وايدها كانت دايبة فى ايده وحست بنفس هيوك فى ودنها خلى جسمها يقشعر
هيوك بصوت رقيق : انا عايز نقفله مع بعض
ركبو القفل مع بعض حرك هيوك راسه بميل عشان يقدر يشوف وش لولو وهما لسه بنفس وضعهم .. كانت لولو فى دنيا تانية وشها كله احمر ومش حاسة باى حاجة غير انها فى حضن هيوك حبيبها وايده ماسكة ايدها
حرك هيوك ايده اللى على ايد لولو وشبكهم ببعض برومانسية .. وحضن لولو بايده وايدها المشبوكة مع بعض وقالها بصوت هادى خلى القشعريرة تمسك لولو : قلبك بينبض كانه هيطلع من مكانه
وهمس فى ودنها : بحبك يا لولو
بلعت لولو ريقها وحست بجمسها كله سايب منها .. غمضت عينها وفضلو مستمتعين باللحظة دى

بعيدا بقى عن الاتنين دول كان فى واحد تانى ماسك تليفونه وقلقان

تشولا كان بيحاول يكلم هيمى وهى مردتش من اول مرة .. اتصل مرة تانية بس المرة دى ردت
هيمى : يوبوسايو تشولى
تشولا : مش بتردى من اول مرة ع طول ليه ؟
هيمى : كنت بغير هدومى
تشولا : ليه .. انتى خارجة ؟
هيمى : اها رايحة اجيب شوية حاجات للبيت
تشولا : طيب استنى عندك انا هاجى اعدى عليكى ونروح مع بعض

هيمى : ارسو بس بسرعة او تقابلنى ف ....
تشولا : قولتلك هعدى عليكى ونروح مع بعض .. اوعى تفكرى تخرجى قبل ما اجى
هيمى : ارسو ارسو ... وقفلو

بعد نص ساعة كان هيمى وتشولا فى السوبر ماركت
هيمى بتختار الاكل السريع والمعلب .. وتشولا بيختارلها اللحم والخضار .. الاكل الصحى يعنى
هيمى : انت بتعرف تطبخ
تشولا بصلها : بتسالى السؤال ده ليه ؟
هيمى بتبص على الحاجات اللى هو بيختارها : بسبب الاكل اللى انت بتختاره
تشولا : ومين قال ان الاكل ده ليا .. الاكل ده ليكى .. وبعدين بصلها : ولا انتى مش بتعرفى تعملى اكل
بصتله هيمى بصدمة وفتحت بقها : هاا .. لا طبعا بعرف .. ده انا استاذة ... وابتسمت ابتسامه بلهاء
بصلها تشولا بشك من فوق لتحت وقرب منها : امممم طيب ايه رايك تعزمينى ع الاكل النهاردة
حست هيمى كان جردل ميه ساقعة نزل عليها بسبب الورطة اللى حطت نفسها فيها .. فضلت باصه لتشولا شوية بتحاول تفكر فى حاجة تقولها تطلع بيها من الموقف ده بس للاسف ملحقتش لان تشولا كمل كلامه : متحاوليش تفكرى كتير لان ده قرار نهائى .. هناكل النهاردة من ايدك انتى وانتهى الامر
هزت هيمى راسه وابتسمت : انت فهمتنى غلط .. انا كنت بفكر ايه اللى تحب تاكله
ابتسم تشولا ابتسامة جانبيه : كان ممكن تسالينى .. عموما انا عايز اكل على مزاجك انتى النهاردة

وسابها ومشى عشان يكملو شوبنج وهى مشيت وراه وبتشتم نفسها فى سرها على التدبيسة اللى دبست نفسها فيها ... بعد ربع ساعة كانت هيمى قعدة مع تشولا فى العربيه مروحين لبيت هيمى .. فى الوقت ده فكرت انها تستعين باى حد يساعدها وقررت انها هتسال ايمى
بعد ما وصل تشولا وهيمى البيت .. راح تشولا فتح التلفزيون وقعد يتفرج عليه ودخلت هيمى المطبخ ومعاها تليفونها وكلمت ايمى وحكيتلها على الموقف اللى حصل وان تشولا قاعد مستنيها تعمل الاكل
ايمى : والمطلوب منى ايه وقتى ؟
هيمى : بطلى ندالة وقوليلى على اى اكله اعملها
ايمى : يختى اتوكسى مانتى عارفة اللى فيها .. انا مفرقش عنك كتير
هيمى : ياااا اومال انتة بتاكلى دونى ايه ؟
ايمى : دونى بياكل اى حاجة مش بيعترض وبعدين بنجيب اكل من بره او .. امونى بتعملنا اكل .. او بتقولى على وصفات وانا بجربها فيه وساعات بتنجح وساعات بنحتاج غسيل معدة
هيمى : يادى الوقعة .. جبتك يا عبد المعين

ايمى : خلاص لاقيت حل
هيمى : احدفينى بيه بسرعة
ايمى : هقولك على اخر واصفة امونى قالتلى عليها واعمليها
هيمى : طب قولى بسرعة

بدات ايمى تقول لهيمى الوصفة والطريقة لحد ما خلصت وحطت الاكل عشان تاكل هى وتشولا
مسك تشولا المعلقة عشان يدوق وبص لهيمى ومسك ايدها وباسها : ابوس ايدك اتعلمى الطبخ قبل ما نتجوز

مسكت هيمى المعلقة وداقت هى كمان لاقت ان الاكل ملوش طعم خالص ناقص ملح ومش مستوى كويس .. حاولت هيمى تدور على اى عذر ينقذها من الاحراج ده

هيمى : ده ايمى هى اللى قالتلى على الوصفة دى وانا كنت بجربها لاول مرة

تشولا : يبقى تروحى انتى وهى تتعلمو الطبخ سوا .. واذا كان دونى عجبه اكلها او مستحمل وساكت .. فانا مش كده انا بحب اكل كويس مش ناقص وجع بطن

هيمى بصتله بغيظ وفضلت تبرطم بالكلام

تشولا : بتقولى حاجة

هيمى هزت راسها : لالالا بقول حاضر يا حبيبى هتعلم

تشولا قام : قومى عشان نروح ناكل برا انا جعان

اتبسطت هيمى وقامت بسرعة وخرجت هى وتشولا

نرجع بقى للاتنين الحبيبة اللى عايشين فى قصة حبهم الجديدة

بعد ما لولو وهيوك قضو اليوم مع بعض وصل هيوك لولو لبيتها ونزلو من العربية
هيوك : انا اتبسطت قوى انى قدرت احقق امنيتى معاكى  
لولو : انا كمان اتبسطت عشان شاركتك فى امنيتك وكمان لان اليوم كان حلو
قرب هيوك منها خطوة واتكلم بصوت هادى : لسه فى امنيات كتيرة عشان نشاركها مع بعض
ابتسمت لولو ونزلت راسها باحراج .. قرب منها هيوك ورفع راسها وبص فى عيونها .. فضلو يبصو لبعض كان هيوك بيتامل وش لولو كله من عينها لخدودها لحد ما وصل لشفايفها بلع ريقه وبدا قلبه ينبض بجنون
هيوك بصوت رقيق : لولو
لولو بشرود وهى باصه فى عين هيوك : همممممم
هيوك برومانسية : بحبك

ومن غير ما يستنى رد من لولو قرب من شفايفها وغمض عينه وبدا يبوسها .. كان هيوك حاسس انه بيحلم حلم جميل مش عايز يفوق منه وعايز يستمتع بكل لحظة فيه .. بالنسبه للولو مكنتش حاسة باى حاجة حواليها .. كانهم فى عالم تانى لوحدهم .. عالم جميل مفيهوش اى حاجة غير حبهم لبعض
بعد فترة بعد هيوك عن لولو بس كان لسه حاسس بانفاسها المضطربة وضربات قلبها السريعة ابتسم هيوك وباسها على راسها وقربها لحضنه شدت لولو على حضنه كانها بتغوص فيه لسه مفاقتش من العالم اللى هى فيه .. بعد شوية فاقت لولو وحست بالخجل من اللى حصل .. بعدت عن حضن هيوك وهى مش لاقيه اى حاجة تقدر تقولها او تعملها
لولو بارتباك وهى باصه فى الارض : انا لازم ادخل البيت .. وانت لازم تمشى
ابتسم هيوك على تصرفها وخجلها : ماشى انا هفضل واقف لحد ما تدخلى وبعدين همشى
هزت لولو راسها من غير ما تتكلم وسابته ومشيت بسرعة .. دخلت البيت وراحت على اوضتها بسرعة رمت نفسها على السرير وحطت ايدها على شفايفها وهى بتتخيل كل اللى حصل وكمية السعادة اللى حست بيها .. وفضلت لولو طول الليل تفكر فى الموضوع ده
وهيوك ميفرقش عنها كتير حاسس بسعادة كاملة لحد ما وصل لبيته .. لانه قدر يحقق امنيتين مع لولو فى يوم واحد .. وبيفكر امتى هيقدر يكررها تانى .. وكمان بيفكر فى باقى امنياته اللى نفسه انها تتحق .. وفى نفس الوقت فكر فى امنياته اللى خايف انها متتحققش .. بس فى النهاية قرر انه يستمتع بالوقت الحالى وميفكرش غير فى احساسه بالحب والسعاد وفى وسط ماهو غرقان بالتفكير جاله اتصال
هيوك : يوبوسايو
كيونا بنبرة لعب : هيوك
هيوك : ياااا .. انت جيت امتي ؟
كيونا : انا جيت امبارح ؟ انت فين دلوقتي ؟
هيوك : انا في البيت
كيونا : انا هعدي عليك بكره عايزك في موضوع مهم
هيوك : اراسو هستناك

----------------- 

BY

D&E

Lolo Adel  

Emy Tarek