الجبابرة الخمسة الحلقة التالتة
للفساد عنوان : الجبابرة الخمسة 3
ترن ترن ترن ترن طق طق طق (خبط
باب شقة السوجو)
توكي جري يفتح الباب يمكن تكون
نجدة وجاتله
ييسونج : معلش هيونج
اتأخرت في التسجيل عشـ
توكي راح متشعلق في رقبته
توكي بعياط : الحقني
ياخويا – في سطو مسلح على البيت
ف وسط الكلام كانت دوني طالعه
من اوضة توكي
دوني و هى بتسحب توكي من
رجلو زي فيلم الارض : يلا بئا يا اوبااا مش اتفقنا هنتكلم في الحب
توكي و هو بيحاول يتشبث
في قميص ييسونج : اجري يا ييسونج انجو بحياتك
وفجاه يسونج يسمع صوت طالع من أوضته
اميرة : صرصاااااااار
ييسونج جري على اوضته
اميرة و هى ماسكة سلحفة ييسونج
من رجليها : اوباااا انا لقيت صرصار تحت سريرك - ناولني اشبشب علشان افعصو :D
يسوونج بيجري ياخد السلحفه
: صرصار يخش من منخيرك يطلع من زورك يا شيخة انتي ايه الي دخلك هنا
اميرة بتبصلو بوش مفيهوش
اي تعبير : و انت مالك !!!
راحت تفتح دولابه وطلعت مجله
شكس منها ...
اميرة : مش دي مجلة قلت
ادب يا اوبا؟ اتوقعها من انهيوك لكن انت ؟؟ اخخخخص (بتهز راسها)
ييسونج جابها من قفاها ورماها
بره الاوضة وقفل الباب
نرجع لمريم الي مأنتخة على سرير
كيوو
سونجمين : هى مالها مش
بتتحرك ليه؟
كيو : تكون يارب ماتت -_-
سونجمين : يمكن و الحمد لله
كيو بينغزها في وشهاا :
انتي يا حجه - انتي يا انسه
و فجاه راحت مريم مشخره و
سكتت
سونجمين من الخضه نط اتشعلق في
النجفه
كيو -_- : انزل انزل فضحتنا
وسط الاجانب
ليتوك وقف عاجز قدام هجوم
التتار اللي حصل في شقتهم , وبعد مقعد يلطم ويندب وشايف الشياطين الخمسة مبهدلين ف
عياله الحيلة (السوجو) غريزة الأبوة حكمت واتحول ليتوك ل Hulk وف فسوة من الزمن كان جايب مريم وندى من قفاهم بايد
واحدة , ودوني واميرة جابهم من دراعاتهم بالايد التانية وبصباع رجله مسك امنية من
شعرها سحلها في الارض ,
السوجو اترعبو من ليتوك اللي
اتحول لتنين مجنح لدرجة ان البنات صعبو عليهم ,
ليتوك وهو مكتف ال 5
شياطين شخط في شيوون : افتح الباب ياض
شيوون جري وهو مفزوع على باب
الشقة يفتحه ,
ليتوك بعنين حمرة زي بسم
الله الرحمن الرحيم بص لل 5 شياطين في نفس الوقت متسألوش ازاي وقالهم : لو جربتو
تتعرضولنا تاني هضطر اوريكو الوش الوحش مني
مريم وهي متعلقة من
قفاها ف ايده : ليه ياخويا على اساس ان ده وشك الحلو
ليتوك بصيلها بعنيه
الحمرة : بتقولي حااااااااااااجة؟؟؟؟
ندى عيطت : ابليييييس
امنية كانت بتفرفر ف
رجليه : سيب شعري انا لسة كوياه والنبي ملحقتش افرح بيه
اما دوني وميرا فكانو عمالين
يحاولو الفرار من ايد هذا المتوحش
دوني ماسكة ف ستارة البلاكونة
وميرا ماسكة ف ودن ييسونج
ليتوك جيه يشدهم راحت الستارة
مقطوعة ووييسونج طلع بطبقة صوته اسم الله عليه تقولوش اوبرا
ييسونج :
ااااااااااااااااااااااااااااا
ليتوك O_o : في ايه
ميرا :D : قطعت ودن واحد من عيالك
ليتوك ودانه طلعت دخان
ورما من ايده الاولانية مريم وندى طيرهم في الهوا ومسك دوني طوحها اتهبدت على
الكنبة , واتبقا ف ايده ميرا قربها من وشه : انتي أد الحركة دي؟
ميرا -_- : مبخافش على
فكرة
ليتوك ابتسم ابتسامة
شيطانية غلبت ابتسامة كيو وراح قايلها : حد فرجك على التراس؟
ميرا -_- : التراس اهلي
ولا زمالك؟
ليتوك *_* : التراس اللي
هي البلاكونة
ميرا -_- : لا محصليش
الشرف
ليتوك : طب تعالي يا
حبيبتي افرجهالك
دخل البلاكونة وراح لافحها شالها زي مالواحد بيشي عروسته
ميرا احمرت خجلا : انا
كنت حسة من اول مجبتني من دراعي انك وقعت فيا
ليتوك ضيق عينه : انا
فعلا وقعت – ودلوقتي انتي كمان هتقعي
ميرا : -_- لا انت مش
نوعي اصـ
ملحقتش يا قلب امها تكمل الكلمة
غير وحست بهوا – اما ركزت شوية استوعبت انها طايرة في الهوا :D
سونجمين اغما عليه ماستحملش
العنف ده كله ,
ودوني
صرخت : ميرااااااااااا رميتها يا ابن المجنونة
ليتوك -_- : تحبي تحصليها
يا بنت العاقلين؟
دوني :D : لا تسلملي انا مبحبش اترمي من البلاكونات بالليل
ليتوك : طب برة يا أوباش
مريم من فوق التلاجة :
بسسسس بسسسس أكابتن
كيو بصلها باستغراب :
ايه اللي طلعك فوق؟
مريم : الهوا ف كوريا
رهيب – يباركلك ف عفيتك تعالا ألقفني
كيو : -_- لا طبـ (
واذا بها تهبط عليه جاعلة منه سجاد )
شيوون كان مندهش من الموقف برضو
بس حاسس ان فيه نموس بيخبط ف وشه وكل ميهشه يرجع
شيوون : اوف نموس نموس
انهيوك : لا يا خويا ده
بوس :D
شيوون O_O : بوس !!!!
ندى اما اتحدفت في الهوا هبطت
على ضهر شيوون بس هو محسش اسم الله عليها ريشة ياخواتي , البت مش تتشعلق ف ضهره
وتحمد ربنا عالنعمة اللي طالتها لأ بكل بجاحة ووقاحة استغلت الموقف وكانت هرياه
بوس ف خده
ليتوك قبل مالباور بتاعته تخلص
شال دوني وندى و مريم وجرجرهم للسلم ولسة هيدحرجهم عالسلالم سمع صوت اقدام مألوفة
او حلوفة بمعنى اصح
ريووك لطم : احيه ده لي
سومان
ليتوك قلب قطة ولطم : يا
دهوتي يانا
لفح مريم ودوني وندى بعد مكان
بيجاهد عشان يزقهم من عالسلم وجري بيهم رماهم ف احدة الأوض وقفل الباب , واخد نفس
عميق عشان يهدا
ليتوك : يا ولاد ولا كأن
حصل حاجة يلا كل واحد يقعد ونتصرف عادي
ليتوك قعد والباقي اتفركشو اللي
راح المطبخ واللي قعد قدام التلفزيون , سونجمين جاي يعدي من قدام ليتوك اتكعبل وقع
على وشه
ليتوك -_- : مش عارف تمشي
ياخويا؟
سونجمين : اااااااا انا
اتكعبلت ف ايه !
ليتوك بص تحت رجله وراح
راقع على صدره زي خالتي مديحة : احيه!!
امنية مبتسمة ابتسامة سيجنل
وشعرها اتلعبك خلاص في رجل ليتوك ومسلمة امرها لله , عملتله باديها باي بكل لطافة
ليتوك بص على باب الشقة لقة
سومان بيقلع جزمته , وهنا كان دونجهي ممدد عالكنبة نايم نومة العصرية زي عوايده ,
راح ليتوك شايل امنية وراميها جنب دونجهي وشد الغطا :D
دونجهي بيفتح عينه لقا كائن حي
جمبه وعمال يبربشله
دونجهي O_O : هيونج ايه اللي هببته ده
ليتوك كتم بؤه : اخرس يا
كلب عايز تفضح الهيونج؟ استحملها لحد مزفت الطين ده يمشي
دونجهي بص للكائن المرزوع جنبه
بغضب ×_× , الكائن عدا ابتسامة سيجنل 2 وبقت سيجنل 22 :D :D
دخل سومان
: ايه يا شباب عاملين ايه
ليتوك (ببرطمة) : عاملين
حواجبنا -_-
سومان : نعم؟؟
ليتوك : بقولك تمام يا
ريس – خير ايه سبب الزيارة المفجأة دي؟
سومان وهو بيقلب بعينه في
المكان : مفيش جيت أشقر عليكو
انهيوك وهو بيترعش : ط ط ط
ط طب هتمشي امتة ها؟
شيوون نط على هيوك فعصه عشان
كان هيفضحهم
ليتوك ابتسم بهبل لسومان
: هيهيههيهيهي منت عارفهم أشقية ربنا يخلي
سومان : امممم انا هبات
هنا انهاردة
طلع من ناحية احدى الأوض صوت
تزييء : يييييييييييييييـ
سومان O_o : ايه ده
ليتوك فقد النطق وهو باصص
للأوضة اللي رما فيها ال3 شياطين وبعدين ابتسم ابتسامة اعمل نفسك اهبل : دي سلحفة
ييسونج بتولد – روح يا سونجي شوفها :D
ييسونج O_o : بس دي مش مرتبطة
ليتوك قلع الشبشب وحدفه ف
وش ييسونج : يلا ياض من هنا هتكسر كلمتي على اخر الزمن
ييسونج راح وهو عمال يشوح
ويبرطم ودخل الاوضة وقفل الباب وراه , وبعدين مسمعوش صوت من بعدها
سومان -_- : طب مش
هنتعشا؟
ريووك -_- : سوري
الانبوبة فاضية ومش هعرف اعمل اكل
سومان : -_- انا كنت عامل
حسابي عشان كده جبتلكو ده (طلع شنطة فيها اكل جاهز)
ريووك شد شعره وقعد يعيط
سومان -_- : ماله ده؟
ليتوك :D : عمته ماتت
في هذه الاثناء كان ييسونج
مربوط ف رجل السرير وواقف فوق راسه 3 اشباح ,
دوني : نورت يا حبيبي
دنت جيت لقضاك
مريم : بقا احنا على اخر
الزمن نتكحرت عالاسفلت الكحرتة دي
ندى : حرام يا بنات هو
ماله مش ليتوك هو اللي عمل كده؟
دوني بنظرة كيو
الايفيلية : قصدك ايه يابت؟
ندى : :D مقصديش ياختي دنا بكح – اه والنعمة
ييسونج : حرام عليكو
اعتقوني مش كفاية صحبتكو المرحومة قطعت ودني ف اديها
مريم طلعت منديل نفت فيه
: اهيء اهيء كانت طيبة وسافلة ف نفس الوقت الله يرحمها
دوني بتهز راسها وهي
بتتأمل في الفضاء : اااااااه يا ميرا ااااه اخدتي حتة من قلبي وروحتي
ندى حطت راسها ف كتف
ييسونج وقعدت تسح : عااااااااااا كانت سالفة مني 34 جنيه ومأخدتهمش منها
ييسونج ضربها بكتفه وهو
مستحقرها : اوعي دنتي معفنة – زعلانة عالفلوس ؟
ندى ×_× : قصدك ايه ياض
ييسونج : لولا انكو بنات
كنت مديت ايدي عليكو
دوني شدته من ياقة
القميص : ولولا انك مش الاوبا بتاعنا كنت اتبهدلت هنا ×_×
ييسونج بلع ريقه وبص في الارض
بخوف
مريم :
موااااااااهاهاههااههاهاهاها
دوني : يبقا جاتلك فكرة
شريرة
مريم هزت راسها (اه)
وعلى جانب تاني خااااالص كان
هناك كائن هلامي نص قرد ونص بنت , طلع عالشجرة ونط لبلاكونة بيت السوجو , وقفت ورا
ازاز البلاكونة تدور بعنيها عالمجرم اللي حدفها ,
ليتوك وهو بيضحك بتصنع ل سومان
الزفت , عينه جت عالبلاكونة , شاف واحدة واقفة وشعرها برضو واقف وودانها فيها ورق
شجر وبنطلونها الرجل الشمال برمودا والرجل اليمين هوت شورت وحالتها بالبلا , شهق
ورقع على صدره ,
الكل بصوله باستغراب وسومان كان
هيلف بوشه يشوف ليتوك باصص على ايه
راح ليتوك
مشاور عالحيطة بعبط وقال : نسيت اصبن الحيطان انهاردة هيههيهيهيهيهي ,
سومان بصله باستحقار وكمل طبق
الطفح اللي بيطفحه , اما ليتوك فبعت رسالة لشيوون عالموبايل عشان عارف ان شيوون
الوحيد اللي مبيطلعش موبايله من جيبه ابدا
شيوون لقا رسالة وصلته
بيفتحها لقا مكتوب : البت اللي حدفتها من البلاكونة واقفة زي العفريت ورا ازاز
البلاكونة ولو سومان شافها هنروح ف حديد – ابوس ايدك اتصرف
شيوون لطم ,
سومان O_o : في حاجة؟ ,
شيوون *_* : مفيش بس نسيت
ألم الغسيل وزمانه كمكم عالحبل هقوم ألمه كملو انتو اكل بالهنا
وهو ماشي بص لليتوك شزرا راح
ليتوك دب وشه ف الطبق وعمل عبيط
شيوون دخل البلاكونة لقا
العفريتة ف وشه
ميرا : انا مرضتس ادخل
علسان سوفت سومان جوة لكن وحياة امي مس هسيب حقي وهنتقم من الليدر بتاعكو
شيوون O_o : انتي مال حرف الشين مخاصمك كده ليه؟
ميرا : قصدك ايه ماله
حرف السين؟ سين سين انا ليه مس عارفة اقول سين اييييييييييه ده !!!! مس عارفة
انطقه
شيوون كان هيموت ويضحك بس
خاف منها وقعد يشاورلها بايده : بس اهدي وكله هيبقا تمام
ميرا قعدت عالارض تعيط :
تمام ايه بس دنا هبقا مهزقة العيال
شيوون ماسك نفسه بالعافية
وبعدين القافية حكمت وقالها : طب بصي جربي تقولي شيماء اشترت بعشرة جنيه شرابات
ميرا ضيقت عنيها وبصتله
وهي بتطلع شرارة وبعدين انقضت عليه ومسكت رقبته وقعته ف الارض ووقعت عليه بس فضلت
ماسكة رقبته تخنقه
ليتوك وهو بياكل ومبتسم بيبص
عالبلاكونة لقا رجلين شيوون بترفص ف الارض , فضل مبرأ وبعدين شرق وتف الاكل ف وش
سومان
سومان *_* (بيمسح وشه) :
ايه اللي عملته ده يا افندي !!!!
ليتوك وهو بيكح : لمو
اخذة يا ريس مش قصدي
وهم قاعدين بياكلو في شكل دائري
بعد مشافو منظر سومان ووشه عليه راميون < انهيوك وقع على ريووك من كتر الضحك ,
وريووك وقع على سونجمين وسونجمين وقع على كيو وكان كيو رايح يقع هو كمان عاللي
جنبه وهو بيضحك بص لقا سومان ف وشه -_- , راح زاقق سونجمين وسونجمين زق ريووك
وريووك زق انهيوك راح انهيوك زق ليتوك راح ليتوك واقع في الارض :D
وفي تلك الغرفة المسكونة ب 3
اشباح وواحد مسكين اسمه ييسونج ,
طلع صوت خافت بيقول : يا كيوووو
دوني شاطت ييسونج ف جنبه
: بصوت عالي ياض
ييسونج بنبرة اعلى : احم
يا كيوووووووووو
كيو وهو قاعد عالسفرة استغرب من
الصوت المسرسع ده
ليتوك : احم قوم يا حبيبي
شوف اخوك عايز ايه
كيو مكنش واخد باله ان
دي الاوضة اللي ليتوك رما فيها البنات , فقام المسكين بكل سذاجة وفتح باب الاوضة
وهو بيقول : عايز ايه يابني ! ,
وفجأة باب الاوضة اترزع ومسمعوش
صوت كيو ~
دونجهي اعتبر الكائن الهلامي
اللي نايم جمبه مخدة وحضنها ,
امنية حست انها بقت بطاطا
مهروسة ولسة هتبتسم وتدوب ف الاحساس غمضت عينها تحس بحضنه وفجأة تخيلت
الناااااااااار اللي هتتشوي فيها يوم القيامة راحت رافصة دونجهي برجلها الاتنين
وقعته ف الارض ,
سومان وهو بياكل سمع صوت حاجة
اتهبدت جيه يبص وراه راح ليتوك نط فوق السفرة وبدأ يرقص بلدي ولا كأنه متخرج من
فرقة رضا
ريووك وانهيوك فهمو انه تمويه
راح انهيوك مطبل عالسفرة وريووك زغرط وسونجمين كان مبسوط بالعرض من غير ميفهم حاجة
فقعد يصقف
سومان حط ايده على راسه
وهزها وهو بيقول ف باله : الله يعوض عليا فيكو
دونجهي قام من عالارض بسرعة ونط
عالكنبه تاني واتغطا ,
وعلى جانب اخر كيو مربوط ف
اوكرة درج المكتب وراسم على وشه تعبيرات الملل ,
كيو : بقا انا يوم
ماتربط اتربط ف اوكرة الدرج !!!! دي قمة الاهانة اصلا لو شديت ايدي الدرج هيقع -_-
متخلفين
مريم قعدت في الارض
حاضنة رجله وبتعيط : قول كمان قول وسمعني صوتك ماتحرمش منك يا حيوان
كيو O_o : اقول ايه انا بشتمكو اساسا
مريم : وهي بتمسح
مناخيرها ف بنطلونه وعمالة تشن : مش مهم اي حاجة منك عنب
كيو هيرجع من القرف بعد مشاف
بنطلونه بقا لا يصلح للاستخدام
دوني شدت مريم من قفاها , ومريم
متبتة ف رجل كيو , ودوني بتشد , راحت شدة مريم اللي شدت رجل كيو اللي وقع بالكرسي
على ضهره اتهبد
سومان بص ناحية الاوضة المشكوك
ف امرها ,
راح ليتوك
مشوح بايده : وربنا ما هرقص تاني وسطي اتقطم – قوم هز يا ميني
سونجمين O_o : انت هتشغلني رقاصة بعد الضهر
سومان -_- : انتو مش
طبيعيين انهاردة
انهيوك : لأ حضرتك اللي
حابب دور المحقق كرومبو احنا كده على طول اصلا
وعودة الى احداث البلاكونة
شيوون مش شوية برضو زق ميرا من فوقيه طيراها لاخر البلاكونة ,
شيوون ماسك رقبته وبياخد
نفسه كأنه كان بيغرق : ايه ده فيه بنت تبقا كده – فين الرقة فين الاخلاق
(بيدير وشه وهو بيتكلم فعينه
وقعت عالكنبة اللي عليها دونجهي وشاف طالع من تحت الغطا 4 رجلين)
شيوون O_o : فين بوليس الآداب !!!! (مهو مشافش ليتوك وهو بيحدف
الكائن الحلزوني جمب دونجهي)
ميرا بصتله -_- : ليه
ياخويا بوليس الاداب انا كنت بخنقك يعني مش بغتصبك دنت كائن اوفر
شيوون لسة مبرأ والمصيبة انه
شايف ال4 رجلين بتتحرك وبتوحي بسيفالة , ميرا قامت تشوف بيبص على ايه ده ,
ميرا رزعت بكفها على
خدها + شهقة : هو اللي عالكنبة ده اللي ف بالي؟؟
شيوون بابتسامة معجون سيجنل هز
راسه (اه)
ميرا ^_^ : يا
كوووووكووووو نايم عالكنبة المسكين
شيوون -_- : مش لوحده يا
حنينة
ميرا ركزت شوية وشافت الرجلين ,
رجل مقاس رجالي من غير شراب ورجل مقاس اطفال بشراب مرسوم عليه السنافر
ميرا بصدمة O_O : السراب ده مس غريب عليا (وبعدين لطمت) اه يا
محترمة يا بنت المحترمين !!!!!!! (كانت هتنط تخترق ازاز البلاكونة وتخشلهم راح
شيوون شاددها)
شيوون : هتودينا ف داهية
– عمك سومان برة يرضيكي نتفضح ونترمي ف الشوارع وناكل من صفافيح الزبالة و نـ
ميرا كتمت بؤه : اخرس
بقا ايه برنامج خلف الاسوار ده (وبعدين بصت للكنبة تاني والحرقة مالية قلبها)
شيوون اشفق عليها وطبطب
على ضهرها : اتصدمتي ف الاوبا بتاعك؟ معلش هو كده بس طيب والله
ميرا بصتله بعنين حمراااااا ,
شيوون ف فسوة كان لازق ف سور اخر البلاكونة من خوفه منها ,
ميرا مشيت على اديها
ورجليها زي البت الميتة بتاعة فيلم the ring
واول موصلت لشيوون ضيقت عنيها وقالتله : لازم اخونه زي ما خاني
شيوون لطم : احيه ! وانا
مال اهلي
ميرا -_- : اللي قدامي
شيوون بص حواليه ولقا شباك اوضة
كيو مفتوح راح ناطط اتشعلق ف درفة الشباك وزق بكوعه الازاز ونط ف قلب الاوضة
واول مدخل لسة بيبتسم ابتسامة نصر
وبينفض ايده لقا قدامه 3 اشباح و 2 اسرى حرب منهم واحد مربوط ف رجل السرير وواحد
واقع على ضهره بالكرسي
شيوون هز كتافه وهو بيعيط
زي نبوية المتطلقة :اهيء اهيء اهيء يا ميلة بختكو يا سوووووجووووو
دوني بابتسامة شر : نورت
يا عـ
لقت حد زقها لزقها في الحيط ,
ونفس الحد ده نط على شيوون وقعه عالسرير
ندى : شوشتي حبيبتي انت
جيت تنقذني يا قلبي ؟؟؟؟
شيوون بيزقها من عليه :
يا شيخة اووووعي ياريتني سيبتها تبوسني عالاقل مكانش هيبقا عندها فيلينجز
ندى قامت من عليه ووشها
عليه غضب التنين وحطت اديها ف وسطها : مين دي اللي تبوسك – باستك عقربة ان شالله
وهنا كائن تاني خالص نط من شباك
الاوضة وقع عالسرير برضو فوق شيوون
ميرا وهي ماسكة ف ياقة
قميصه : كنت فاكر انك هتهرب يا حلو ؟؟؟ مبقاس ميرا لو منفذتس اللي ف دماغي
ندى حطت اديها على بؤها
ورجعت كام خطوة لورا وهي بتقول : لأ لأ – عايز تبعد ما تبعد واجرح قلبي وعنيا –
خوني مع واحدة غيرها مش اقرب واحد ليااااا ((( اغنية امال ماهر )))
دوني ومريم وكيو وويسونج -_-
ميرا O_O , شيوون :D
ونرجع لاحداث الكنبة
<<< دونجهي كور ايده وكان هيناولها ف وشها بعد الزقة اللي زقتهاله
امنية اتفزعت وحطت اديها
على وشها وهي بتقوله : اضرب اضرب هي دي الرجولة بتستقوى على واحدة ست
دونجهي -_- : والمصحف منا
رادد
امنية شالت اديها وبصتله
بتحدي : اوعك عينك شعرك دقنك تهوبلي تاني
دونجهي *_* : يا شيخة
اتلهي انتي فكرك حضنتك حبا فيكي – انا متعود احضن المخدة وهيونج شال المخدة ورزعك
مكانها
امنية -_- : اتحجج ياخويا
دونجهي : هو انا مش الزفت
الاوبا بتاعك ولا بتبلا عليكي؟
امنية : مع الأسف ايون
دونجهي : طب ياختي المفروض
تزقططي كده عشان قربتلك بس
امنية -_- : مش زريبة هي
احنا الالف المصري اسمنا الف الصخرة يعني الرجولة كلها
دونجهي -_- : عاش يا وحش
امنية : اتفضل وريني جمال
أفاك واتخمد عبال مزفت الطين يمشي
دونجهي ×_× (نام على جنبه وهو
مديها ضهره وعمال يشتم)
امنية -_- : سمعاك يا
مؤدب
وفي الاوضة اللي اجتمع فيها كل
الحبايب (دوني – مريم – ندى- ميرا) + ( ييسونج – كيو – شيوون) , ميرا قامت من على
شيوون وهي بتقرب لندى وعنيها بتعبر عن ندمها
ميرا : لأ يا ندى هو
مخانكيس انا اللي غصبته
ندى ودموعها بتنزل :
انتي اخر واحدة كنت اتوقع منها كده
ميرا وعنيها دمعت : مكنس
قصدي انتي متعرفيس اللي حصلي – سوفتهم بعنيا على فراس الخيانة الدم غلي ف عروقي
وغلطت سامحيني
ندى بتمسح دموعها : مش
بالسهولة دي هقدر انسا اللي شوفته وسمعته
شيوون :D : واد يا كيو هات حبة فشار
كيو وهو بياكل فشار كبش حبة
وحطهم ف ايد شيوون , مريم قاعدة عالارض جمب كيو وبتأزأز لب
مريم : اوبا متيجي نقعد
قدام انا مش شايفة كويس
ييسونج لسة مربوط فالسرير
وبيتفرج بملل -_-
دوني كانت واقفة جمبه
شاطته برجلها : انت ياض اتفرج وانت مبتسم
ييسونج :D : اهو مبتسم اهو :D
ويستمر المشهد < ميرا مسكت ايد ندى : ابوس ايدك سامحيني مكنس قدامي حد
غيره لحظة منويت الخيانة
ندى وهي بتهز راسها
(لا) : لو كنت غالية عليكي كنتي فكرتي فيا قبل متعمليها
ميرا سابت اديها واتنهدت
بحزن : انا كمان بقول كده – لو كانت المحروقة دي فكرت فيا مكانتس عملت اللي عملته
ندى بنبرة فضولية :
محروقة مين !
ميرا : 3 ونص – سوفتها
معاه عالكنبة وواضح ان الموضوع + 18
ندى انشكحت واتنططت :
عملتها بنت الايه والنبي احكي احكي
كيو -_- :
كككككككككككككت – غير حرف الشين المضروب بالنار عند الانسة - ايه التدني والانحدار
ف المستوى التمثيلي ده – فين التدريج في الانتقال من مشاعر الحزن لابتسامة الامل
لـ
مريم : لكوبري عبود
لفيصل لحد القطامية عند مصنع الكراسي :D
كيو -_- : قومي من جمبي
ليست هناك تعليقات:
إرسال تعليق