With You .. patr 05

With You .. Part 05

بعد ما تعبت دومى من اللعب وقعدت ترتاح شوية .. طلبت من هيوك انهم يمشو .. قام هيوك ومد ايده لدومى عشان يقومها .. سحبت دومى ايدها من هيوك ومشيو من الملاهى .. ركبو المواصلات .. اول ما ركبو محستش دومي بالدنيا و نامت و هي سانده راسها علي الكرسي .. سند هيوك راسها علي كتفه عشان ترتاح اكتر فى نومها .. بعد فتره مش طويله فتحت دومى عينها بس مش حاسه بالدنيا لقت كيونا قاعد على ظهر الكرسى اللى قدامها .. بصتله بعيون مقفلة من التعب
كيونا : انتي كويسه ؟
اكتفت دومي بابتسامه بسيطه ورجعت غمضت عينها علشان تنام تاني وهى بتسمع صوت كيونا : نامى وارتاحى .. وبدا الصوت يختفى واحدة واحدة

وف الحلم جالها كيونا كالعادة .. اول ما شافته راحت بسرعة حضنته ومكنتش عايزة تسيبه

كيونا وهو حاضنها : متخافيش انا معاكى

دومى : انا تعبانة .. عايزة افضل جوه حضنك لانه مكان راحتى .. نفسى افضل هنا ع طول شيفاك وحساك ولمساك .. قادرة احس بخوفك وحنيتك ونبضات قلبك

كيونا : بس ده مجرد حلم وهتصحى منه

دومى : مش عايزة اصحى انا مش عايزة حاجة من الدنيا غيرك

كيونا : هشششش .. خلينا كده لحد ما تصحى .. واكيد لما هتصحى هتلاقينى قدامك ومعاكى

همهمت دومى بالموافقة وريحت براسها اكتر ع صدر كيونا عشان يحاوطها بدراعاته وتغرق فيه

بعد ربع ساعه فاقت دومى لاقت كيونا باصصلها وحست بنفسها انها مش ف البيت وافتكرت اللى حصل .. رفعت راسها من على كتف هيوك
بصلها هيوك : انتى فوقتى ؟ .. حاسة انك احسن ولا لسه تعبانة ؟
اتصدمت دومى من انها كانت نايمه علي كتفه فهزت راسها : اه كويسة ..  بيانيه بوظتلك اليوم .. وضايقتك وانا نايمة .. مش عارفة انا سندت عليك ازاى .. مكنتش حاسه بنفسي
هز هيوك راسه  : لا انا اللي لازم اعتذر بس مكنتش اعرف انك بتتعبي
دومي : انا حاولت اقولك بس انت مكنتش عايز تسمعنى

هيوك باسف : انا كنت فاكرك هتعترضى على المكان كله عموما عشان مش عايزة تستمتعى
كيونا : خلاص ياعم الحنين
ابتسمت دومي : حصل خير .. وبعيدا عن اللى حصل فى الاخر ده من تعبى بس فعلا انا استمتعت النهارده
كيونا بصوت عالى : يااااااااا
هيوك : بجد ؟
هزت دومي راسها : اها بقالي كتير مخرجتش ولا رحت الملاهي .. كان يوم حلو .. كوماوو
كيونا عمال يهز راسه يمين وشمال وفاتح عينه جامد : انتي هتجننيني
ابتسم هيوك ابتسامة واسعة  : انا مبسوط انك استمتعتي
ابتسمت دومي : هو احنا رايحين فين تاني ؟
هيوك : هروحك
دومي : لا .. انا لازم اروح الشغل
هيوك : بس انتي تعبانه
دومي : لا انا بقيت كويسه
كيونا باصص على الطريق ومربع ايده : انا مش هتكلم

بصتله دومى وابتسامتها ماليه وشها لانها بتحب شكل كيونا وهو غيران

راح هيوك ودومي شغلها لقو هيومى ونورين و دوني هناك

هيومى : انتو كنتو فين ؟ احنا قلقنا عليكو لحد ما دونى قال انكو مع بعض

دومى بصت لدونى : وانت عرفت منين اننا مع بعض

دونى بصلها وبص لهيوك : هيوك كلمنى وقالى عشان منقلقش عليكو

نورين بلهفة : عملتو ايه .. ورحتو فين ؟

سمعو صوت من وراهم

تشولا : مش مهم كانو فين ؟ .. المهم انهم رجعو .. دومى روحى ابداى شغلك

هزت دومى راسها وبصت لاصحابها : اى حد فيكو يدينى محاضرات النهاردة عشان انقلها .. وسابتهم ومشيت

بص تشولا لهيوك ودونى : ورايا انتو الاتنين

قام دونى وبص لهيوك .. وراحو ورا تشولا بره الكافيه خالص

هيومى : شكلهم هيتقطعو من تشولا

نورين اتنهدت : كانو خادونى معاهم وانا احوش عنهم

بصتلها هيومى بطرف عينها : يالا عشان يقطعك انتى كمان وارتاح منك

نورين بصتلها : انا قعدة على قلبك

هيومى : منورانى يا ضرتى العزيزة

نورين قربت من هيومى : سيبك من كل ده .. موضوع هيوك ودومى مش مرتحاله .. باين قوى ان هيوك مهتم بدومى

هيومى : عندك حق انا بردو ملاحظة كده .. بس ياريت هى كمان تهتم بيه .. الواد حلو ومز

نورين : لما نشوف .. وبعدين بصت بره الكافيه : تفتكرى تشولا عمل فيهم ايه ؟

هيومى بابتسامه خبيثة : مش بعيد تلاقيه معلقهم من رجلهم

بصت نورين لهيومى وفضلو يضحكو

فى الوقت ده كان تشولا واقف مربع ايده قدامه ودونى وهيوك واقفين عمالين يبصو لبعض ويبصولو

تشولا : مين اللى سمحلك تخرج معاه ؟

هيوك : انا قولتلها وهى وافقت

تشولا : اخدت راى او موافقتى قبل ما تطلب منها انها تخرج معاك ؟

هيوك بص لدونى ورجع بص لتشولا : لا

تشولا : يعنى لا طلبت اذن حد .. ولا قولتلى .. واعرف من دونى بالصدفة لما سالته على دومى انك اخدتها وخرجتو

بص تشولا لدونى : وانت مقولتليش ليه اول ما عرفت انه عايز يخرج معاها

دونى : هيونج .. انا معرفش انك هتهتم بالموضوع قوى كده

تشولا مسك هيوك ودونى من ودنهم جامد وهما بيتوجعو وماسكين ايده

تشولا : انا قولتلكو انتو الاتنين قبل كده ان دومى اختى الصغيرة .. واكيد عارفين انا بهتم بيها قد ايه .. وبص لهيوك : اوعى تتصرف معاها تانى من دماغك لازم تقولى الاول عشان اوافق على اللى هتعمله .. وبعدها بص لدونى : وانت تيجى تقولى كل حاجة تخص دومى انا معرفهاش اول باول .. مفهوم

هيوك ودونى وهما بيحاول يفكو ايده من ودنهم : مفهوم .. اااه .. مفهوم

سابهم تشولا : ورايا على جوه

دخلو وراحو وقفو عند طرابيزة هيومى ونورين

تشولا بص لهيوك : عقابا ليك هتنقل كل المحاضرات بتاعت دومى النهاردة

هز هيوك راسه : حاضر اهيونج

سابهم تشولا ومشى .. قعد دونى وهيوك وبدا فعلا هيوك ينقل المحاضرات لدومى

بعد كام يوم فى الجامعة بعد ما دومى خلصت محاضراتها قابلت هيوك

هيوك : كويس انى شفتك .. لانى كنت عايز اطلب منك طلب

هيومى : اخدت اذن تشولا الاول

دونى : يااا .. انتى مالك .. خليكى فى نفسك

راحت نورين وقفت جنب هيومى وابتسمت ابتسامة جانبيه خبيثة : شكلهم كده محدش فيهم قاله .. ايه رايك نروح احنا نقوله ونتفرج على اللى هيحصلهم منه

بصتلها هيومى بخبث : 1 2 3 .. اجرى بسرعة نقوله .. وبداو يجرو فى اتجاه الكافيه ودونى يجرى وراهم

هيوك بيضحك : كل اللى بيعملوه ده على الفاضى

كيونا : قولتلك كذا مرة ان اصحابك مجانين .. وبعدين ايه موضوع الاذن ده ؟

دومى موجهه كلامها لهيوك وكيونا : سيبك منهم

هيوك : المهم ارجع للطلب اللى عايز اطلبه منك

دومى باهتمام : خير

كيونا : وهو ده هيجى من وراه خير ابدا

حط هيوك ايده وراه راسه : انا هقابل حبيبتى النهارده… و جاي اخد رايك  البس ايه…؟  او الالوان الحلوه عليا
وقف كيونا يتنطط وهو مبسوط : هييييييه هخلص منه
ضحكت دومي على رد فعل كيونا
هيوك باستغراب : بتضحكي علي ايه ؟
هزت دومي راسها : ولا حاجه…  مممم اكتر الالوان الحلوه عليك الاسود و الاحمر والابيض
هيوك طلع 3 صوابع : اسود واحمر وابيض…  اراسو كوماووو
دومي : انت هتقابلها امتى بالظبط ؟
هيوك : الساعة 6
دومي بدات تزقه : روح جهز نفسك .. فايتنغ
وقف كيونا بينهم ووشه لدومى : هو رايح يحارب .. بتقوليله فايتنغ ليه ؟
هيوك ابتسم : ماشى .. سلام
اتنهد كيونا بارتياح : اخيرا هخلص منه ومن طلبانه
دومي : مش عارفه انت مش بتحبه ليه ؟ .. ده حتي طيب
بصلها كيونا من فوق لتحت : مش بحبه و خلاص
دومي هزت كتافها بلا مبالاه : خلاص مش مهم .. شكله هيعترف لحبيبته النهارده
حط كيونا ايده فى جيبه وبدا يمشى : يبقي احسن

راحت دومى شغلها وبدا اليوم يمشى بطبيعية زى كل يوم .. والساعة 6 وصل هيوك الكافيه لوحده كان لابس بلوفر احمر و جاكت اسود وبنطلون ابيض ومرجع شعره لورا  
اول ما شافته دومي ضحكت : انت لبست الالوان اللى قولتلك عليها كلها
هيوك وهو كمان بيضحك : اه بصراحه معرفتش البس ايه بالظبط .. فلبستهم كلهم

دومي باستغراب : صح .. انت جاي هنا ليه مش المفروض تروح معادك .. انت كده هتتاخر على حبيبتك
هيوك : مش هينفع اننا نتقابل النهارده
دومي باستغراب : ليه ؟
هيوك : مممم حصلت عندها ظروف طارئه .. بعد ما اتشيكت و لبست معرفتش اعمل ايه ولا اروح فين فجيت علي هنا .. اهو اشرب حاجه
دومي بابتسامه : طيب يا استاذ متشيك .. تطلب ايه ؟
هيوك : هوت شوكليت
دومي : روح اقعد انت و انا هجيبهولك
راح هيوك قعد علي طرابيزه و دومي بتحضر الهوت شوكليت
كيونا : يا فرحه ما تمت .. يعني مش هنخلص منه
ضحكت دومي : ماتقلقش اكيد هيتقابلو لو مكانش النهارده هيكون يوم تاني
كيونا : ياريت

عملت دومي طلب هيوك واديتهوله  .. فضل هيوك قاعد لحد ما دومي خلصت شغلها
هيوك : يلا بقي هوصلك
رفع كيونا ايده بيحركها قدام وش هيوك : لا شكرا معاها راجل
دومي : لا ملهوش لازمه .. انت عارف ان بيتي قريب
اتنهد هيوك : وانتي عارفه ان بيتي فى نفس طريق بيتك
بص كيونا لدومى وهز راسه : شكلنا مش هنخلص من اللزقه دي
هيوك بيمثل بدراميه : يعني حبيبتى مجاتش و فوتت المعاد .. وانتي كمان مش عايزه تمشي معايا .. هى الناس مش طيقانى خالص
ضحكت دومي : انت شرير قوي على فكره
هيوك بابتسامه : عارف علي فكره
كيونا : كائن لزج علي فكره

ابتدي هيوك و دومي يتمشو لحد البيت وسط صمت من الاتنين لحد ما قرر هيوك انه يقطع الصمت ده
هيوك : ايه رايك نكرر الخروجه تاني ؟
بصتله دومي وعينها مفتوحه : تاني .. انت عايز تموتني المره دي ؟
كيونا : انا مش قولتلك انى مش مرتاحله
هيوك وهو بيضحك : فهمتيني غلط .. هنخرج بس مش هنروح الملاهي .. هنروح لمكان تاني
دومي : لا شكرا بس مش هينفع اسيب … . مكملتش باقي جملتها لان الدنيا ابدت تمطر
دومي وهي حاطه ايدها علي راسها : ده وقته
قلع هيوك الجاكت بتاعه وحطه علي راسه هو و دومي
كيونا : لا كده كتير
بصتله دومي باستغراب : بتعمل ايه ؟
هيوك : اختراع احسن ما نتبل من المطر

ابتدي هيوك و دومي يجرو لحد ما وصلو لبيت دومي .. لحظت دومي ان هيوك مبلول و الدنيا لسه بتمطر ولو روح بيته بالشكل ده هيتعب
دومي بتردده : ممكن .. امم .. تدخل تنشف نفسك .. و تستني الدنيا تبطل مطر
هيوك بيحاول يكتم فرحته : مش عايز اتطفل عليكي
ربع كيونا ايده وبص لهيوك : انت اصلا بتتطفل علينا ف كل حاجة
دومي : لا مفيهاش حاجه وبعدين انت كده هتتعب
دخل هيوك مع دومي بيتها وهو قلبه هيطير من الفرح بعد ما دخل البيت و ابتدي انه يتفحصه بعينه
هيوك : انتي عايشه لوحدك ؟
دومي وهي بتديله فوطه ينشف نفسه : اها  
وسابته و دخلت المطبخ و بعد شويه طلعت و معاها نسكافيه سخن
دومي : اشرب ده هيدفيك شويه
كيونا بيدور عينه بعيد عنهم : انا لو كنت حقيقه .. كنت اتشليت من زمان
اخد هيوك الكوبايه : كوماووو دومي
استكفت دومي بالابتسامه … وبعد فتره كان المطر بطل وهيوك هدومه نشفت جزئيا فالبس الجاكت
هيوك : انا لازم امشي الوقت اتاخر
كيونا بسخرية : لا يا راجل مانت قاعد كمان شويه
دومي : تمام … وراحت توصله لحد الباب
مشى هيوك وفضلت دومى تصالح فى كيونا وطبعا ماخدش فى ايدها غلوة وصالحها على طول

بعد يومين في الكليه كانت دومى قاعده مع اصحابها .. بس بتتكلم مع كيونا ومش مركزه معاهم لحد ما جه هيوك و معاه علبه متغلفه
هيوك : انيو
كيونا : اهو جه هادم اللذات ومفرق الجماعات
الكل بابتسامه : انيو
هيوك : بتعملو ايه ؟
دوني : كنا بنحضر نفسنا علشان المحاضره
هيوك : خلاص مش هعطلكم روحو علشان متتاخروش
قام الكل و راحو علي المدرج لحضور المحاضرات
هيوك : دومي
لفت دومي لهيوك بابتسامه بعدها مد هيوك العلبه لدومى اللى بصت للعلبه و بصت لهيوك تاني بملامح استغراب
هيوك : بما انك بتساعديني… قررت انا كمان اساعدك
دومي بنفس ملامح لاستغراب : تساعدني ؟
هيوك : اها .. اما رحت لبيتك .. حسيت فى حاجه نقصاه .. حاجه تضيف فيه روح
كيونا : البيت فعلا فيه روح .. وشكلها هتوريك شغل الارواح
دومي : كوماوا هيوك بس ملهاش لزوم
هيوك : متقوليش كده .. ومد ايده اكتر بالعلبه يلا علشان محاضراتك

بعد تردد اخدت دومي العلبه و ابتسمت لهيوك وبعدها سابته و مشيت لمحضرتها
كيونا : يااااا اوعي تفتحيها احسن يكون فيها حاجه تنفجر
دومي وهي بتمثل الصدمه و الخوف شهقت : تفتكر .. بعدها اتحولت ملامحها 180 درجه .. حد قلك عنه ارهابي وبعدين انفجار ايه بس فى العلبه دي
كيونا : انتي حره انا حذرتك و خلاص

وصلت دومي للمدرج و ملحقتش تكلم اصحابها لان المحاضره كانت ابتدت

بعد ساعتين خلصت المحاضره لم الكل حاجته و طلع
دوني  : انا بكره الماده دي .. و حاسس بعون الله اني هشيلها
رفعت نورين ايدها : وانا كمان
رفع كيونا ايده : وانا كمان بكره كل المواد بتاعتكو
ضحكت دومي من كلام كيونا .. بصلها الكل باستغراب
هيومى : بتضحكي علي ايه ؟
دوني : واحده زيها لازم تضحك علينا ماهي الماده سهله بالنسبالها .. الاخت دحيحه
بصت دومي ببرائه : انا عملت حاجه
لفت انتباه هيومى العلبه اللى فى ايد دومي : ايه اللي فى ايدك ده …؟  مش دي اللي كانت مع هيوك
نورين و دوني : ايه ؟
بصلهم كيونا بشر : دومي اديهالهم علشان تنفجر فى وشهم و نخلص
دومي : هو جابها لانى بساعده فى اى حاجة يطلبها منى وهو حب يشكرنى

خبطتها هيومي بدراعها وغمزت بعينها : بلاش حجج
بصتلها دومي وهي مصدومه : قصدك ايه ؟
نورين : من وقت ما اتعرفتي علي هيوك و احنا حاسين بتغيرك
رفعت دومي حواجبها باستغراب : تغيري ..؟
نورين : اها .. عمرك ما قعدتي مع حد واتصاحبتو بالسرعة دى .. ده حتي انتي اتعرفتي علينا بالعافيه
هيومي : المفروض ان احنا اللي كنا معجبين بهيوك و ببرنامجه .. يعني مفروض احنا اللي نشد انتباهه
نورين : بس اللي حصل العكس .. انتي اللي شديتي انتباهه .. و دلوقتي بتتبادلو الهدايا
بصت دومي للعلبه وبصتلهم : كل ده علشان هديه
هيومي : ولسه فى كتير
دوني لهيومي و نورين : بس بقى انتى وهى .. بطلو تضايقو فيها.. وبعدين هي وضحت انه رد لجميل هي عملته…  وبعدها بص لدومي : دومي هما بيلعبو معاكى .. اكيد فاهمة طبعا لانهم دايما بيحبو يرخمو كده

هزت دومي راسها بضيق : خلاص يا دوني… انا رايحه الشغل
دوني : طب استني هنيجي معاكي
رفعت دومي ايدها قدامها : بلاش النهارده .. سلام .. و سابتهم و مشيت
بص دوني للبنات و هو غضبان : كان لازم اللي عملتوه ده
نورين : انا بس كنت عايزه اعرف هو بينهم ايه ؟
دوني بعصبيه : اللي بينهم ليهم هما .. انتم ملكمش دعوه بيه
هيومي : خلاص متتعصبش بس .. بكرة كل حاجة تظهر وتبان

----------------- 

BY

D&E

Lolo Adel  

Emy Tarek