With You .. patr 04

With You .. Part 04

تانى يوم راحت دومى الجامعه وقضت يومها كالعادة مع اصحابها ومحاضراتها وكلامها مع هيوك على الحلقة .. وتريقة وتعليق كيونا على كل كلمة بتتقال وكل حاجة بتتعمل

وبالليل فى الكافيه .. فضل هيوك قاعد لحد ما الكافيه قرب يقفل  
راحله تشولا وقعد قدامه : انت هتقضل هنا لحد امتى ؟
هيوك : النهاردة لازم اخد خطوة كمان معاها عشان اقدر اتقربلها اكتر
حط تشولا ايده على الطرابيزة وابتسم : اقولك على حاجة .. انا فرحان فيك انك واقع مع واحدة وهى مش معبراك
هيوك : انا وراها لحد ما تحبنى .. بس مش عارف ليه دايما بحس ان فى حاجة واقفة بينا
اتنهد تشولا : انا بجد نفسى انها تتغير .. انا كمان بلاحظ عليها حاجات غريبه ومعرفش ليه دايما بحس انها عايشه فى عالم تانى .. نفسى اخرجها منه
بص هيوك لتشولا من فوق لتحت : هيونج انت بتحبها ولا ايه ؟
مد تشولا ايده وخبطه على راسه : دى اختى الصغيرة .. وخد بالك لو جت مرة اشتكتلى منك انك بتضايقها انا اللى هطلع عينك
حط هيوك ايده على راسه وبصله : لالالالالالالالا انا كده استحاله اضايقها .. معنديش اى استعداد انى يحصلى حاجة منك

قام تشولا وقف : قوم بقى من هنا
هز هيوك راسه : انا مش همشى غير لما هى تيجى تمشى
ميل تشولا على هيوك وبص فى عينه بنظرات جادة : اخرج وهى هتمشى كمان شوية استناها بره عشان نقفل .. ولا تحب تفضل قاعد واعرفها انك ابن عمى
قام هيوك وقف بسرعة : دايما بتعرف تستغل الموقف .. خلاص همشى
ضحك تشولا بانتصار : ايوة كده .. وسابه ومشى

خرج هيوك واستنى دومى بره من غير ماهى تعرف .. وبعد ربع ساعة خرجت  لاقت هيوك واقف قدام الكافية وحاطط ايده فى جيوبة وباصص على الطريق
بصتله دومى وهى بتفكر .. تروح تساله هو واقف هنا ليه .. ولا تسيبه ونمشى ؟
كيونا : انتى ايه اللى موقفك يالا بسرعة على البيت

لفت دومى وشها وبدات تمشى فعلا .. شافها هيوك وراح وراها
هيوك : دومى
كيونا : عايز ايه ده دلوقتى ؟
وقفت دومى وراح هيوك وقف جنبها
هيوك : انتى مروحة ؟
كيونا : لا رايحه تجيب لب
دومى : اها انا خلصت شغلى ومروحة البيت
هيوك : طيب ممكن اجى اوصلك ؟
كيونا : شكرا مش محتاجين خدماتك انا هوصلها
دومى بابتسامة بسيطة : لالالا مش عايزة اتعبك .. انا بيتى قريب من هنا مش بعيد

هيوك : لا مينفعش اسيبك تمشى لوحدك بالليل كده
دومى : لا عادى انا متعودة على كده وزى ما قولتلك البيت مش بعيد
اتنهد هيوك : طيب انتى بيتك اتجاهه ازاى ؟
كيونا بيحاول يمسك هيوك من رقبته عشان يخنقه بس مفيش فايده : شكلك عايز اتجاه السما .. تعلالى وانا هظبطك كويس
شاورت دومى على الطريق اللى بيوصل لبيتها
هيوك : ده نفس طريقى .. تعالى هوصلك فى سكتى واكمل انا طريقى لبيتى

ملاقتش دومى حاجة تقدر تقولها فوافقت ومشيو مع بعض

هيوك حاطط ايده فى جيب الجاكت وباصص قدامه : دومى .. انا كنت عايز اخد رايك فى حاجة بما انك اكتر واحدة بتقولى على رايها بصراحة
دومى بصتله باستفهام : خير يا ترى
هيوك بصلها : لو انا معجب بواحدة .. اقدر ابينلها ازاى انى معجب بيها او الفت نظرها
كيونا : اضربها على دماغها عشان تموتك وارتاح منك
ابتسمت دومى من تعليق كيونا : انا مقدرش افيدك قوى لان كل بنت بتختلف عن التانية .. بس الاكيد بين كل البنات ان الاهتمام بياثر عليهم ويشدهم .. وانها تحس بانه فعلا بيحبها ويخاف عليها وبيقدر عقلها ومشاعرها
هز هيوك راسه بتفهم .. وكملت دومى كلامها : انت ممكن تعمل حلقة يكون ده موضوعها وساعتها هتجيلك اراء كتير تقدر تستفيد منها
هز هيوك راسه : الحلقة اللى بعد الجاية .. لان الحلقة الجايه هتكون تكملة للحلقة اللى فاتت بتاعت العادات اللى بنعملها فى حياتنا

بعد 10 دقايق وصلو لبيت دومي .. سلم هيوك عليها ومشى وهي دخلت بيتها واول ما دخلو البيت
كيونا بضيقه وغيره : الشخص ده انا مش مرتاحله
بصتله دومي : ليه بس هو عمل ايه ؟
كيونا : مش مرتاحله و خلاص
قربت دومي منه وابتسمت : انا شايفه انه مفيهوش اي حاجه تخليك مترتحلوش…  الا اذا كنت غيران
ابتسم كيونا بسخرية : هغير من ايه ده شبه الكتكوت المبلول
ضمت دومي ايدها وبصت للسقف وابتسمت : حرام عليك .. ده جنتل  قوى وصوته حلو والبرنامج بتاعه مشهور فى الجامعه وليه شعبيه كبيره هناك وكل البنات هتموت عليه
كيونا بصوت عالى : و كمان بتعاكسيه قدامي
ابتسمت دومي وبصتله : بس انا بحبك انت وكمان انت احلي واحد بالنسبالي
اتنهد كيونا وهز راسه : بتعرفي دايما ازاي تسكتني
دومي : هروح بقي انام عندي محاضرات بدري
كيونا : تصبحي علي خير
دومي : وانت من اهله

 تاني يوم الصبح صحيت دومي علي صوت المنبه لقيت كيونا قاعد على كرسى قدامها و بيبص عليها
كيونا : صباح الخير
دومي وهي بتتمطع : صباح النور

قامت دومي غيرت هدومها و استعدت لانها تروح الكليه عدي يومها طبيعي زي اي يوم عادي .. وجه اليوم اللي بعده .. راحت الجامعه وقعدت مع البنات تسمع هيوك .. بعد الحلقة قابلها هيوك واتكلمو مع بعض زى كل يوم .. بعدها بص هيوك لدونى اللى فهم قصد هيوك

 قام دونى وقف : انا رايح اجيب حاجة اشربها .. حد عايز حاجة .. وبدا يبصلهم واحدة واحدة

هيومى : انا عايزة نسكافيه عشان اقدر افوق كويس

نورين رفعت ايدها : وانا كمان

دومى ابتسمت : وانا كمان

هيوك : انا مش عايز حاجة

دونى شاور لهيومى ونورين : قومو معايا نجيب المشروبات .. مانا مش هشيل لوحدى

قامت هيومى ونورين معاه بالعافية وهو عمال يشدهم وراه .. فضل هيوك ودومى يضحكو على منظر دونى والبنتين .. وبعدها بص هيوك لدومى

هيوك : انا عملت زي ما اتفقنا وفتحت موضوع ازاى الواحد يقدر يبين لحد انه معجب بيه او يلفت نظره .. و فعلا جالي اراء و افكار كتير .. بس كل ده خلانى محتار اعمل ايه ولا ايه و ابدأ بايه ؟
كيونا : اعمل خط و امشي عليه بعيد عن هنا
دومي : جرب اللى شايف انك تقدر تعمله وفى نفس الوقت يجيب نتيجة مع اللى بتحبها
مسك هيوك ايدها : طيب ممكن تساعديني
كيونا بيحاول يشيل ايد هيوك : يااااااا شيل ايدك
دومي باستغراب : اساعدك ازاي ؟
كيونا بص لدومى  : دومي اوعى تساعديه
هيوك : هجرب معاكي اللي ممكن اعمله او اقوله ليها .. وانتي قولي رايك .. كويس او مش كويس او ممكن اعمل او اقول حاجه احسن او انا من الاساس اوفر .. وبكده هتقدرى تساعدينى كتير
شدت دومي ايدها : لا مينفعش طبعا .. الكلام ده مفروض تقوله لحبيبتك على طول .. انا مليش دعوة
ضحك كيونا و بص لهيوك
نزل هيوك راسه بخيبة امل : مانا خايف اكلمها وهى متوافقش .. او اقول حاجه غلط يكون كلامي سبب انها ترفضني
بصت دومي لكيونا بتردد وبعدين بصت لهيوك : مينفعش
هيوك بترجي : مش هنسالك الموقف ده ومش هطلب منك حاجه تاني بس وافقي المره دي

فكرت دومي شويه واتنهدت وغمضت عينها وهزت راسها بالموافقه .. ضحك هيوك و حضنها .. فتحت دومى عينها علي الاخر بصدمة وبعدته عنها
كيونا بضيقة : يااااا هو انا اخلص من دوني يطلعلي انت
دومي : الحاجاات دي تخليها لحبيبتك .. دى بالذات مينفعش تعملها معايا
اتنحنح هيوك وحط ايده على رقبته باحراج : انا عشان كنت فرحان انك وافقتي … بيانيه

مسك هيوك دراع دومى وبدا يسحبها معاه : يالا بينا بقى

سحبت دومى دراعها من ايد هيوك : يالا بينا فين ؟

وقف هيوك وبصلها  : تساعديني زي ما وعدتيني
دومي باستغراب : دلوقتي…  طيب هعمل ايه؟
هز هيوك راسة : هنخرج .. عايز اشوف المكان اللي هاخدك ليه هيعجبك ولا لاء ؟ عشان لو عجبك هاخد البنت اللى بحبها ليه
دومي : بس انا عندي محاضرات
هيوك : انتي دايما بتحضري محاضراتك مش هيحصل حاجه لما تاخدى اجازة يوم ومتحضريش
وقف كيونا فى النص بين هيوك ودومى بيحاول يزقه بعيد عنها بس ايده بتطلع من الناحيه التانية : محدش اشتكى و قال انها عايزه اجازه
دومي  : بس انا مش متعوده افوت محاضرات
رفع هيوك صوباعه قدامه : هو يوم واحد و ابقي خدي محاضراته من اصحابك

دومي بعد تفكير و الحاح من هيوك وافقت وخرجت معاه .. وهما فى الطريق
دومي : احنا رايحين فين ؟
هيوك بابتسامه : مفاجئه … استني لما نروح هتعرفي

هزت دومي راسها و بعد شويه وصلو عند الملاهي
وقفت دومي قدام بوابة مدينة الملاهى : لا مش هدخل
مسكها هيوك من ايدها : ليه بس ؟ .. ده احنا هنستمتع قوى بس تعالي

شدها من ايدها و دخلها .. كانت دومى كل ما تحاول تعترض يقاطعها فى الكلام
هيوك : ها .. تحبي تلعبي ايه ؟
بصت دومي لهيوك و بعدين للالعاب و بعدين بصت لهيوك تاني و هزت كتفها و مدت شفايفها بمعني مش عارفه
ابتسم هيوك : خلاص نبتدي بالسهل الاول…  نسخن زي ما بيقولو
ابتسمت دومي ابتسامة خفيفة وهزت راسها
مسك هيوك ايدها وهو مبتسم
كيونا بيحاول يضرب ايد هيوك اللى ماسكه ايد دومى عشان يسيبها : انا سكت انك جرجرتها بره الجامعة وخلتها متحضرش محاضراتها النهاردة .. وسكت على انك جايبها الملاهي .. بس مش هسكت على مسك ايدها .. سيب ايدها
سحبت دومي ايدها من ايد هيوك جامد عشان متضايقش كيونا اكتر من كده .. بس الحركة دى خلت هيوك بصلها وبص على ايده باحراج ورجع بصلها تانى
هيوك : انا مسكت ايدك علشان الدنيا زحمه .. وخايف اننا نتوه من بعض
دومي : متخافش مش هنتوه

بص كيونا لدومى : حبيبتى انتى .. وبص لهيوك وطلع لسانة

ابتدي هيوك و دومي يركبو الالعاب الموجودة .. بس بعد اكتر من لعبه بدات دومى تدوخ وتتعب
فجاه وقف هيوك قدامها : يلا نتصور
هزت دومي راسها بالنفى : لا ملهاش لزمه
هيوك : دي اول مره نخرج سوا .. و الصوره دي هتكون ذكري حلوه لينا
ربع كيونا ايده على صدره : قالتلك لا .. انت ليه عايز تعصبني
دومي و هي مش منتبهه لكلام كيونا : ذكري
ابتسم هيوك وهز راسه : اه ذكري .. ايه رئيك ؟
ابتسمت دومي : ماشى
بصلها كيونا بضيقة : انتي مبقتيش تسمعي كلامي خالص
دومي لفت راسها الناحيه التانية بعيد عن هيوك واتكلمت بهمس : دي مجرد صورة ذكرى

هيوك باستغراب من تصرفها : بتقولى حاجة

بصتله دومى وهزت راسها : لا

هيوك : طيب يالا بينا

اخد هيوك دومي وابتدو يتصورو مع بعض وبعدها رجعو للعب تاني
هيوك : نبتدي بقي اللعب الصعبه
دومي و هي فاتحها عينها على الاخر : ها
ابتسم كيونا بسخرية : علشان تسمعي كلامى بعد كده

مسك هيوك ايدها بابتسامه وشدها باتجاه لعبة : يلا بينا

ركبو لعبة قطر الموت .. كانت دومي طول اللعبه ماسكه فى الكرسى جامد بايدها ومغمضه عينها وبتصوت بصلها هيوك ومسك ايدها عشان يطمنها .. وهى مسكت ايده جامد .. و كيونا قاعد بينهم فى الهوا وبيتفرج عليهم بضيقة .. بعد اللعبه ما خلصت ..نزل هيوك وهو بيضحك ومبسوط .. بص لدومى لاقاها مش قادرة تقوم وجسمها بيترعش .. سندها هيوك عشان تقوم تقف .. وقف دومى وهى سانده على هيوك وهو ماسك ايدها بايد وبايده التانية حاططها على كتفها .. مسكت دومى بطنها و مميله بجسمها ناحيه الارض شويه ومغمضه عينها

كيونا بقلق بيحاول يمسكها بس مفيش فايدة : يااا انتى كويسة ؟ .. قولتلك بلاش تلعبي
هيوك بقلق : انتي كويسه ؟
هزت دومي راسها بمعنى لا من غير ما تتكلم
سندها هيوك : تعالى نقعد فى اى مكان عشان ترتاحى

قعدو مع بعض وهيوك جابلها عصير بس هى رفضت تشربه .. كان جسمها لسه بيترعش .. قعد هيوك جنبها وحط ايده على كتفها واخدها فى حضنه بيحاول يهديها .. وكيونا واقف مش بيتكلم .. بعد فترة هديت دومى وبقت احسن .. بصت لكيونا

كيونا بقلق : انتى كويسة ؟

شاورتله دومى بعينها بمنعنى ايوة

اتنهد كيونا : عارفة .. لو مكنتيش تعبانه كان هيبقي ليا كلام تاني معاكى
دومى وهى باصه فى الارض : انا عايزة امشى من هنا

هيوك : ارسو .. يالا بينا

قام هيوك ومسك ايدها عشان يقومها .. سحبت دومى ايدها من هيوك ومشيو من الملاهى .. ركبو المواصلات .. اول ما ركبو محستش بالدنيا ونامت و هي سانده راسها علي الكرسي .. سند هيوك راسها علي كتفه عشان ترتاح اكتر فى نومها .. بعد فتره فتحت دومى عينها بس مش حاسه بالدنيا لقت كيونا قاعد على ظهر الكرسى اللى قدامها .. بصتله بعيون مقفلة من التعب
كيونا : انتي كويسه ؟
اكتفت دومي بابتسامه بسيطه ورجعت غمضت عينها علشان تنام تاني وهى بتسمع صوت كيونا : نامى وارتاحى وبدا الصوت يختفى واحدة واحدة

----------------- 

BY

D&E

Lolo Adel  

Emy Tarek