With You .. patr 01

With You .. Part 01

فى وسط المدينة وخصوصا فى بيت صغير صحيت دومى على اشعة الشمس وصوت حبيبها اللى بتعشقه وبتحس فيه بالدفء وهو بينادى باسمها .. فتحت عينها عشان تلاقيه بيبتسملها ابتسامته الجميلة

دومى وهى بتتمطع : صباح الخير كيونى

كيونا بابتسامة : صباح الخير والجمال عليكى يا بيبى .. قومى يالا الساعة بقت 8

لفت دومى على جنبها اليمين وبصتله وهو نايم جنبها : النهاردة اجازة معنديش جامعة او شغل .. يعنى هنقضى اليوم كله مع بعض من اوله لوحدنا

ابتسم كيونا  وهمس بصوت واطى : عارف .. وعشان كده عايزك تصحى ونقضى اطول وقت مع بعض .. قومى حضرى الفطار عشان نلحق يومنا

قامت دومى وبدات تحضر الفطار وكيونا قاعد قدامها على طرابيزة صغيرة .. حطت الاكل وبدات تاكل وكيونا بيبص عليها ويتكلمو زى كل يوم

دومى : البيت محتاج طلبات كتيرة الحاجة اللى عندنا قربت تخلص

كيونا وهو بيتفرج عليها : قولتلك اكتر من مرة انك محتاجة تجيبى حاجات

 بلعت دومى  اللى فى بقها : كيونا .. انت عارف انى مش فاضية

كيونا : خلاص خلصى اكل ونروح نجيب اللى انتى عيزاه

خلصت دومى اكلها وقامت تغسل الاطباق اللى اكلت فيها ودخلت اوضتها

دومى بتقفل باب اوضتها : خليك بره لحد ما اغير هدومى

دخل كيونا : هتمنعينى ازاى بقى وبدا يقرب منها وهى ترجع لحد ما وصلت للدولاب فى ضهرها وهو لسه بيقرب منها

دومى بتتكلم بصوت هادى وهى بصه فى عينه : عارف .. فى الوقت ده بتمنى انك تكون حقيقة قدامى فعلا واحس بيك وبقربك وبانفاسك وحضنك

رجع كيونا خطوة لورا وغمض عينه واختفى من قدام دومى اللى اتنهدت بخيبة امل ودخلت تاخد دش وتغير هدومها وهى بتفكر فى اللى حصل قبل سنتين

فلاش باك .............

كانت دومى وكيونا فى اخر سنة فى المرحلة الثانوية عايشين فى مدينة بعيدة هادية كانو راجعين من المدرسة

كيونا ماسك ايد دومى وماشين : اول ما هنخلص الدراسة وندخل الجامعه هنسيب المدينة ونروح اكبر جامعه فى البلد ونعيش هناك

دومى : بس انا مش عايزة ابعد عن المدينة وبعدين احنا كل ذكرياتنا هنا

كيونا بصلها وشد على ايدها : هنعمل هناك ذكريات احلى منها بكتير

دومى خبطته بادها التانية : يااا كيونا مش لما نخلص دراستنا الاول نبقى نقرر هنعمل ايه

كيونا : هنخلص وهننجح وهندخل الكليه اللى احنا عايزينها .. انا هدخل كليه الهندسة .. وانتى ادخلى اداب قسم التاريخ بتاعك اللى بتحبيه

دومى بصت قدامها : انا مش عارفة انت مش بتحب التاريخ ليه

كيونا : بيبى كل واحد فينا ليه ميول معينة .. انا بحب الهندسة وانتى بتحبى التاريخ وعشان انتى بتحبيه انا كمان بقيت بهتم بيه بس مش لدرجة انى احبه

وهما فى الطريق عدو على حديقة وقعدو فيها شوية

دومى حاطه راسها على كتف كيونا : انا بحب المكان ده قوى

كيونا بيستعبط : اشمعنا يعنى

دومى : بطل رخامة انت عارف انا بحبه ليه

كيونا حط راسه على راسها : انا كمان بحبه قوى لان هو ده المكان اللى اعترفتلك فيه بحبى وانتى كمان طلعتى بتحبينى من معاميع قلبك

اتحرجت دومى وبصوت خجول : يااا كيونا

ضحك كيونا لانه بيحب يلعب معاها كل شوية عشان يشوفها وهى خجولة ووشها احمر وكمان بيكون فى نظرة فى عينها بتخليه يعشقها اكتر

كيونا : خلاص هسكت بس على شرط واحد

بصتله دومى باستفهام

رفع كيونا صباعه : توعدينى اننا نخلص الدراسة ونروح ندرس فى الجامعه اللى فى العاصمة

استسلمت دومى للامر الواقع لانها عارفة انها مش هتقدر تغلب كيونا ابدا وفى النهاية هيحصل بردو اللى هو عايزة لانه ليه طرق كتيرة بيقدر ياثر عليها بيها وبعدها فضلو قعدين شوية ووبعدين قامو وروحو

وفضلت حياتهم ماشية بطبيعية لحد ما خلصو امتحاناتهم وبالفعل قدمو اوراقهم فى الكلية اللى اتفقو عليها بس قبل ما يدخلو الدراسة حصل حاجة قلبت حياتهم كله

كان كيونا ماشى وبيكلم دومى فى التليفون وهو فى طريقة لبيته

دومى : كيونا احنا مش اتفقنا انك متتاخرش بره كده ؟

كيونا :  كنت قاعد مع اصحابى شوية انتى عارفة ان كل واحد فينا هيفترق فى جامعه مختلفة عن التانية

دومى : بس الوقت اتاخر قوى الساعة دلوقتى 2 بالليل

كيونا بخباثة : خايفة عليا ؟

دومى : يااا بابو لو مخفتش عليك هخاف على مين ؟

 ضحك كيونا : عارفة انا نفسى فى ايه

دومى : اكيد اى حاجة شريرة وخبيثة من بتاعتك

كيونا : لا لا المرة دى نفسى فى حاجة مختلفة .. نفسى تكونى قدامى وقتى

دومى : مش بقولك عايز حاجة شريرة وخبيثة

كيونا : لو كنتى قدامى كنت اخدتك فى حضنى و ....

قاطع كلامه خروج اتنين من بيت قدامه وهما بيجرو

دومى بقلق : كيونا .. انت سكت ليه ؟

كيونا بصوت واطى : فى حاجة غريبة حصلت لاقيت اتنين خارجين بيجرو من بيت جانغ

دومى بقلق : ابعد عنهم وكمل طريقك

كيونا : متخافيش انا مش هقرب منهم بس عايز اشوف اى ملامح ليهم

دومى بقلق اكبر : كيونا بلاش فضولك وقتى وابعد عنهم

كيونا مهتمش بكلامها وفضل يقرب لحد ما واحد من الاتنين شافه وضربه بالرصاص

سمعت دومى صوت الرصاص وصريخ كيونا قلبها نط من الفزع وفضلت تنادى على كيونا بهسترية لحد ما سمعت صوته

كيونا بصوت متقطع : دومى انا بموت

دومى الدموع بتنزل من عينها وقلبها هيقف من كتر الخوف : لا كيونا متموتش .. كيونا

كيونا بصوت متقطع : خدى بالك من نفسك واعتذرى لامى وابويا .. كان نفسى احقق احلامى معاكى بس .. وشهق كذا مرة وبعدها مبقاش فى اى صوت منه

دومى بفزع : كيونا .. كيونااااااااااااا

End

خلصت دومى لبسها كانت لابسة بنطلون جينز اسود وبادى اسود وعليه جاكت رمادى خرجت من اوضتها لاقت كيونا مستنيها
ابتسم كيونا  لما شافها : مش ناسيه حاجة ؟
دومى فكرت شوية وبعدين مسكت السماعات حطيتها فى ودانها : كده مش ناقص اى حاجة .. انا معنديش استعداد الناس تفتكرنى مجنونة لما امشى اكلم نفسى قدامهم .. انت فاكر لما قولتلهم انى شيفاك وبكلمك افتكرونى مجنونة ههههههه
ابتسم كيونا : انتى مجنونة دايما مش لسه هيفتكروكى .. وبعدين طبعا فاكر لان من وقتها وانتى بطلتى تقولى لحد لانه مش بيصدقك وبقيتى دايما لابسه السماعات 

راحو لسوبر ماركت كبير وطول الوقت هى بتختار حاجة وهو بيختار حاجة بس طبعا رايها هو اللى بيمشى فى الاخر لانها بتجيب اللى هى عيزاه ليها
وبعدها رجعو البيت وقضو طول اليوم مع بعض بيتفرجو ع افلام او تقوم هى تعمل اكل الاسبوع وهو واقف جنبها بيغنيلها بصوته الجميل او بيرخم عليها

خلص اليوم وراحت دومى عشان تنام وكيونا نايم جنبها
دومى بصوت نعسان : خليك هنا لما اصحى انت عارف انى بحب اصحى على صوتك ووشك قدامى
كيونا بصوت هادى وهو باصص فى عينها : انا موجود هنا عشانك انتى وبس .. كل اللى انتى عيزاه هو اللى هيحصل
غمضت دومى عينها وراحت فى ارض الاحلام

تانى يوم الصبح قامت دومى على صوت ووش وابتسامة حبيبها كالعادة قامت حضرت نفسها وراحت كليتها شافت من بعيد اصحابها نورين وهيومى واقفين مع دونى اللى عمال يبص على كل اللى رايح واللى جاى خصوصا البنات وبيسمع اغانى وكل شوية يبص على هيومى ونورين اللى شوية يناقرو فى بعض وشوية يتفقو مع بعض

كيونا بيشاور على اصحابها : اصحابك المجانين واقفين هناك
ضحكت دومى لانها عارفة ان تعليقات كيونا عليهم هتبدا
كيونا : هما مش بيزهقو من الكلام فى نفس الحوار وعلى نفس الشخص كل يوم
دومى بابتسامه : اللى بيحب حد مش بيزهق منه ولا من الكلام عليه
قربت دومى منهم واول ما شافوها حركت ايدها ليهم .. قام دونى وحط ايده على كتفها : اخيرا جيتى اهو الاقى حد اتكلم معاه بدل الجنان اللى انا قاعد فيه ده
ابتسمت دومى لسببين
اولا : كلام دونى عن نورين وهيومى
وثانيا : على رد فعل كيونا لما شاف دونى بيحط ايده على كتفها
كيونا عمال يضرب دونى على وشه وبطنه بس طبعا بما انه شبح ايد كيونا بتخترق دونى وتطلع من الناحية التانية .. كل يوم بيحصل الكلام ده

بصت دومى لهيومى ونورين عملتو ايه امبارح
هيومى : اتبسطنا طبعا
نورين : نفسى مرة واحدة يا دومى تحضرى حفلة معانا او تيجى معانا واحنا خارجين او اى حاجة
دومى : انتو عارفين انى مش فاضية وبعدين اليوم الوحيد اللى بريح فيه اكيد مش هخرج واتعب نفسى فيه
دونى بص فى الساعة : محاضرتنا هتبدا كمان ساعة تعالو نفطر اى حاجة قبل ما ندخل

دخلو الكافتريا وكيونا طول الوقت بيتكلم مع دومى ويتريق على اصحابها وهى تضحك وفى نفس الوقت بتتكلم معاهم .. هى اتعودت انها تعرف تركز معاه وفى نفس الوقت تركز مع اصحابها
سالت نورين : هى الساعة كام وقتى ؟
بص دونى لساعته : 9:10
هيومى صرخت فجاه : لا البرنامج بداء من 10 دقايق .. وطلعت فونها هى ونورين وبدا يسمعو برنامج الاذاعة الخاص بالجامعه فى الراديو وهما الاتنين منشكحين قوى .. هما مش بيسمعو البرنامج غير عشان يسمعو صوت اللى بيقدمه وطريقته فى الكلام
بصلهم دونى وهز راسة : الاتنين دول مفيش امل فيهم ابدا
قرب كيونا  منها : على فكرة اصحابك دول هيموتو موته مش طبيعيه ابدا

هنا انفجرت دومى من الضحك وفضلو طول الوقت الباقى قبل محاضرتهم بالطريقة دى لحد ما جه وقت انهم يدخلو يحضرو المحاضرة

فى الوقت ده كيونا ساب دومى تدخل مع اصحابها لوحدها لانه مش بيحب التاريخ وكمان بيشتت تركيز دومى بكلامه

بعد ما خلصت محاضراتهم كالمعتاد دومي راحت شغلها والشله راحت معاها

طبعا البنات بيروحو لغرض معين انما دوني بيروح لانه مش بيلاقى حاجة تانية يعملها فبيروح معاهم وهو مغلوب علي امره
وصل الكل لشغل دومي ( كافيه قريب من الجامعه )
دومي انحنت : انيوهاسايو
ربع تشولا  ايده قدام صدره : انيو دومي .. اتاخرتي ليه ؟
دومي : كان عندي محاضره اتاخرت بسببها
وقتها لمح تشولا البنات وهما بيبصو عليه : خلاص خلاص روحى غيرى هدومك وابداى شغلك

انحنتله دومي وبعدين لفت شاورت للشله بتاعتها و دخلت اوضه تغير الملابس علشان تغير و تبتدي شغلها

وهى داخله همست لكيونا : خليك هنا لحد ما اغير

بعد 5 دقايق خرجت دومى وهى لابسه لبس الشغل وبدات تستلم طلبات الزباين وبعدها ياخدوها منها ويروحو يقعدو فى اماكنهم وكيونا واقف جنبها عمال يتكلم ويتريق على كل زبون وهى تبتسم

فى نفس الوقت قعدو دونى والبنات على طرابيزة والبنات اخدو الكرسين اللي فى وش تشولا و دوني مديله ظهره
دوني وهو ماسك المنيو : ها تحبو تشربو ايه ؟
نورين حاطه ايدها على الطرابيزة وسانده عليها : واااااااا وسيم قوي كل يوم بيحلو اكتر من اللي قبله
هيومي بتقلب فى المنيو من غير ما تبصله : شكلي كده هتجنن رسمي وهروح اطلب منه انه يخرج معايا
نورين بصتلها : يخرح مع مين يا انسه اومال انا مش ماليه عينك ولا ايه ؟
هيومي بصتلها : هو انا كلمتك
دوني رزع المنيو من ايده : يايايااا في ايه انتو الاتنين مش هتبطلو اللى بتعملوه ده
نورين و هيومي بصو لدوني بلا مبالاه و بعدين بصو لتشولا

تشولا ابتدي يظهر نفسه للبنات اكتر و راح لعندهم
تشولا بابتسامه جميلة : ها قررتم هتشربو ايه
دوني و هو باصص علي المينيو : لا لسه مقـر……
قاطعه البنات في نفس النفس : اللي تحبه انا هشربه
بصو لبعض الاتنين وبعدين بصو لتشولا تاني
تشولا : انا هجيب لكم مشروبي المفضل و ابتسملهم ابتسامه ساحره و غمزلهم ومشي
وقت ما مشي حط البنات ايدهم علي خدهم : هييييييييييح
دوني باستغراب : هييييح ؟ علي فكره مش حلو للدرجه دي يعني
نورين فتحت عينها على الاخر : مش ايه ؟  مش حلو انت اتجننت ولا مستغني عن نفسك .. انت شفت عينه يالهوتي
هيومي : ولا شعره السايح
نورين : ولا مناخيره
هيومي : ولا شفااااايفه
نورين اتنهدت : ايون شفايفه
هيومي : و بشرته البيضه دي يالهوتي .. هيييييح حبيبي يا ناس
نورين خبطتها فى ايدها : حبك برص
هيومي زقت نورين فى كتفها : البرص ده يبقي حبيبك انتي يا روحي متقوليش كده علي هيتشي لو سمحتي
نورين : هيتشك في عينك ياللي تنشكي

هز دوني راسه بياس وهو بيسمع الخناقه المعتاده بين البنات وسابهم و قام راح عند تشولا
دوني : هيونج
تشولا بصله وابتسم : هما بداو مناقرة كل يوم ؟
دوني و هو حاطط ايده علي راسه : صدعت هيونج .. انا ايه اللي خلاني وقعت مع البنات دي دول مجانين
تشولا ابتسم ابتسامة جانبيه : الطيور علي اشكالها تقع وبعدين دول دمهم خفيف
دوني بتريقة : خفيف قوووووي .. جرب بس تقعد معاهم شويه ومش بعيد تقطع علاقتك بينا و تطرد دومي كمان من هنا
فضل تشولا ودونى يتكلمو .. فى نفس الوقت دخل شاب الكافيه و راح ناحيه تشولا علي طول وظهره للبنات
الشاب : هيونج ..  انيو
تشولا بصله : اوه هيوك انيو ..  اخيرا جيت
هيوك بابتسامه : هيونج مش كفاية بشوفك فى البيت هاجى اشوفك فى المحل كمان
تشولا بثقة فى نفسه : فى غيرك يتمنى يشوفنى طول اليوم .. اه نسيت اعرفك ده دوني وهو بيشاور علي دوني .. و بعدين شاور علي هيوك ده هيوك ابن عمى الصغير
دوني و هو بيمد ايده لهيوك : تشرفنا
هيوك هو كمان مد ايده : الشرف لينا
تشولا : هيوك بقى هو اللى بيقدم برنامج الساعة 9 فى راديو الجامعه بتاعتكو

هيوك بص لدونى : انت بتدرس في نفس جامعتي وعمرنا ما اتقابلنا .. بتدرس ايه بقي ؟
دوني : انا بدرس تاريخ .. وانت  بتدرس ايه ؟
هيوك : انا بدرس اعلام… اخر سنه ليا
دوني : وااا اخر سنه ده انا لسه فى تانى سنة ليا
هيوك : يعني انا هيونج

دوني : انت بقى الي بتقدم البرنامج الاذاعي الصبح
هيوك : ايون .. هو انت بتسمعه ؟
دوني وهو باصص علي البنات و بيهز راسه : لا بس عندي اللي بيقوم بالواجب

وسط كلام دوني وهيوك  لمح هيوك دومى .. لفتت انتباه هيوك وتابعها شويه
هيوك وهو باصص عليها : مين دي و شغاله هنا من امتي ؟
تشولا و دوني بصو عليها
تشولا : دي دومي .. وبما انك مجتش هنا من فتره كبيره فهي شغاله هنا من سنه و يمكن اكتر
دوني وهو بيشاور عليها و بعدين علي نفسه : اهى دى تبقى الرابعه ف شلتنا و معانا فى 2 تاريخ بردو
هيوك باستفهام : ودي بقي واحده من اللي بيقومو بالواجب و بيتابعو الاذاعه بتاعتي ؟
دوني : لا دي واحده مننا فى الشله بالاسم بس .. يعني ملهاش اي نشاط معانا لا رحلات ولا حفلات حتي لو خروجه بسيطه يعني من البيت للجامعه للشغل للبيت و هكذا
اتعجب هيوك : واااه بجد هو لسه فى حد بيعمل كده

وفضل باصص عليها وهي مركزه في شغلها وعماله تتكلم وشويه تضحك و شويه تتكلم بجد وهو متابع تعابيرها وملامحها ولفت انتباهه انها عماله تتكلم مع نفسها لانه مشافش السماعه
هيوك : بس هي مالها عماله تتكلم مع نفسها .. هى عندها هسهس

تشولا : هسهس ؟!!!

هز هيوك راسه : مجنونة يعنى ؟
بصلها دوني وبعدين بص لهيوك : لا مش بتكلم نفسها دي بتتكلم فون بس حاطه سماعات
هيوك وهو لسه باصص عليها : دى عملت كل التعابير اللى الانسان بيعملها بوشه .. هى بتكلم مين كل ده ؟
دوني هز راسه : معرفش الصراحة .. لان عمرى ما شفت حد معاها او بيزروها حتى ..مجرد بتتكلم فى التليفون وبس
هيوك هز كتفه : مش عارف .. وبعدين همس لنفسه : البنت دى فيها حاجة غريبة  
فوقه من سرحانه دوني اللي حط ايده علي كتف هيوك : لو عايز تعرف اللي بيسمعو الاذاعه بتاعتك شاور دوني بايده التانيه علي البنات وهما بيتناقرو زى اطفال الابتدائي
لسه هيوك هيلف علشان يشوفهم مسكه دوني بسرعه من كتفه ومنعه انه يبصلهم و بيتكلم زي ابطال افلام الحرب بدراميه شديده : لا مش عايزين اي ضحايا دلوقتي دول لو شافوك او حتي سمعو صوتك بس هينقضو عليك مش بعيد ياكلوك دول مجانين و بيحبو البرنامج بتاعك قوي
هيوك وهو بيضحك : ياااااه للدرجه دي
دوني هز راسه : واكتر دول ماساتي اليوميه
هيوك وهو لسه بيضحك : ياه انت شكلك بتعاني
دوني و هو بيمثل انه بيعيط : لما تشوف اللى بيحص كل يوم هصعب عليك اكتر
هيوك : اتمني اقدر اتعرف عليهم علشان اقدر اشوف تستحق التعاطف ولا لاء
دوني : اكيد هعرفك عليهم بس واحده واحده علشان الاوضاع الامنيه متدهورش
وبعدها بص دوني وهيوك لبعض و ضحك

قاطع كلامهم وضحكهم تشولا وهو باصص لهيوك : ياااا انت جاى تقطع عليا وتاخد منى البنات

وبعدين بدا يزقه : امشى من هنا مش عايز اشوفك تانى

-----------------

قبل ما حد يتهور او يمد ايده .. 

ايون كيونا ميت ..

عشان كده كلامه الوحيد اللى هيبقى بلون مختلف

لان محدش بيكون سامعه او شايفه غير دومى 

اتمنى القصة تعجبكو

----------------- 

BY

D&E

Lolo Adel  

Emy Tarek