Break My Spell ( part 2 )

Break My Spell

Part 2

 

(ابله ابله ابله ابله )

صوت رخم بيكرر الكلمة بطريقة مستفزة اجبرها على انها تفتح عنيها بإنزعاج واول حاجة عينها جت عليها وشه اللي خلاها تتفزع وتنط من عالسرير برعب وهي بتتلفت حواليها بتحاول تعرف هي فين وايه اللي بيحصل

صفا : انته ايه ؟

هيتشول : انتي شايفاني اساساً البسي نضارتك العجيبة دي

مدلها ايده بالنضارة فنتشتها منه بسرعة ولبستها وبصلته .. حط ايده تحت وشه وابتسم برخامة

هيتشول : اجنن مش كده

صفا : انته بتستظرف يا حيوان انته

هيتشول بسعادة : انتي عارفة بقالي اد ايه نفسي حد يشتمني اما استظرف

صفا : يا مجنون يا ...

قبل ماتكمل باب الاوضة اتفتح ودخلت ممرضة الحضانة بإبتسامة

الممرضة : صفا , انتي كويسة دلوقتي

بصلتها وبصت لهيتشول منغير ماتنطق لقتها مرت جمب هيتشول ببساطة ووقفت قدامها

الممرضة : عشان كده دايماً اقولك متمشيش في الشمس فيها ايه لو خدتي تاكس

صفا : انتي مش ...

هيتشول : لو جبتي سيرتي هيتقال عليكي مجنونة وانتي اصلاً شكلك يشجع على كده

الممرضة : في ايه ؟ دماغك مصدعة مش كده

صفا : في .. في حد دخل هنا وانا نايمة

الممرضة : حد مين ؟ قصدك الاطفال لا متقلقيش انا وقفت معاهم برا وقلتلهم انك كويسة بس منمتيش امبارح كويس

صفا : محدش دخل خالص .. مش شايفه اي حد

الممرضة : حد مين بس ؟!

حست الدنيا بتلف بيها تاني فقعدت عالسرير بتحاول ترتب افكارها

صفا : ماهو يا كلكوا بتشتغلوني يانا اتجننت بجد

رفع ايده كأنه في فصل

هيتشول : انا ممكن اقولك تفسير تالت لو عايزة

تنحتله والممرضة اتلفتت مكان ماهي متنحة طبعاً مشافتش حاجة

الممرضة : بصي انا بقول تروحي النهاردة بدري وترتاحي تقريبا الشمس اثرت عليكِ .. انا هروح استأذنلك المدير بنفسي متقلقيش

طبطبت على كتفها وخرجت

هيتشول : صاحبتك لطيفة

صفا : لا لا لا انا مش مجنونة مفيش حد هنا غيري

هيتشول : نظرياً ايوه

غطت ودانها بإيدها عشان متسمعوش وخرجت جري من عيادة الحضانة وهو وراها

صفا : مفيش حد مفيش حد مفيش حد

هيتشول : استني بس مانتي لو تسمعي هترتاحي

وقفت وسط الاطفال اللي اتلموا حواليها بلهفة عشان يتطمنوا عليها وهيتشول واقف وراهم مستنيها تستسلم , حاولت تبان طبيعية قدامهم وتطمنهم عليها مداهاش الفرصة وفضل يتنطط بينهم ويضايق الاطفال مستحملتش اكتر خرجت من الحضانة كلها وهو ماشي وراها

هيتشول : ابله ابله ابله ابله

عمال يكررها بإستمتاع حقيقي كفاية انها سامعاه وهو بيقولها وهي بتمد في الشارع وبتكلم نفسها

صفا : مش موجود انا خدت ضربة شمس لو خدت دش بارد ونمت هبقى كويسة

هيتشول : الايس كريم مفيد برضو وياسلام لو تعزميني معاكي

مدت اكتر وهو وراها مش عايز يسكت لحد ماوصلت العمارة وطلعت شقتها وهو وراها برضو اول ماوصلت دخلت جري وقفلت الباب فوشه

هيتشول من برا : على اساس اني كده مش هعرف ادخل .. افتكري ان انتي اللي جبتيه لنفسك

قعد قصاد الباب وربع وابتدى يلحن مقطوعة موسيقية على باب الشقة مكونة من 3 كلمات " افتحي يا ابلة "

دخلت اوضتها وقفلت الباب على نفسها وهي بتترعش برعب مش قادرة تفهم ايه اللي بيحصل واللي برا ده وهم ولا عفريت ولا اشتغالة وخبطه عالباب هيجننها بجد لحد مالقته بينادي من برا

هيتشول : على فكرة انا ممكن اخبط كده 3 ايام ومحدش في العمارة هيتجنن غيرك فأفتحي بالذوق عشان انا رخم

دخلت الحمام حطت راسها تحت الحنفية يمكن تفوق لحد ماكانت هتغرق , خرجت راسها بسرعة وهي بتكح لقت الخبط لسه موجود

فضلت تلف حوالين نفسها ساعة تقريبا وهو برا كل شوية يريح ايده ويرجع يكمل خبط بإصرار اكبر لحد ماجالها انهيار عصبي فعلاً ومقدرتش تستحمل اكتر جريت وفتحت الباب وهي بتصرخ

صفا : كفاية ارحمني كفاية

هو نفسه اتفزع من خروجها المفاجئ ونط لورا

هيتشول : اهدي .. اوعي تتجنني انا ماصدقت

شاورلها بأيده تهدى وهو بيقرب منها بحرص كأنه بيقرب من اسد وهي بتاخد نفسها بعصبية

هيتشول : نتكلم بالعقل ماشي .. ماشي 

هديت شوية وحست ان مفيش مفر غير انها تسمعله

صفا : انته ايه ؟

هيتشول : انا ممكن اشرحلك هنا بس لو حد مالجيران شافك هيقولوا البت اتجننت وبتكلم جرس الباب وانا ميرضينيش الكلام ده

بصتله لثواني بتفكر المفروض تعمل ايه وهو باصصلها بحرص مستعد يجري برا العمارة في اي لحظة لحد ما وسعت وسمحتله يدخل .. ابتسم ودخل فسابت باب الشقة موارب ودخلت وراه .. رمى نفسه على اول كرسي شافه بسعادة

هيتشول : ياااااااااه بيتك معفن فعلاً انا نمت في خرابات احسن من كده

تجاهلت كلامه المستفز ووقفت قصاده بحرص فشاورلها تقعد

هيتشول : الموضوع يطول شرحه .. اه نسيت اعرفك بنفسي

قام وقف وعدل قميصه

هيتشول : انا كيم هيتشول وانتي ؟

مردتش عليه وهي بصاله بشك فقعد تاني

هيتشول : مفيش مشكلة لحد ماتنطقي يبقى اسمك ابله .. اقعدي بقى

صفا بجدية : انته .. موجود فعلاً

هيتشول : بصي هو لحد 3 ساعات فاتوا مكنتش موجود لكن فجأة بقيت موجود يا سبحان الله

بصتله بعصبية

هيتشول : اعملك ايه انتي اللي قافشة اقعدي كده وانا هفهمك

قعدت بتردد فأبتدى يحكي

هيتشول : بصي ياستي من فترة تقريبا 4 شهور فتحت عيني لقيت نفسي نايم على رصيف في الشارع والناس راحة جاية تتكعبل فيا .. قمت لا فاكر انا مين ولا فين ولا وظيفتي ايه في الحياة حاولت اهدى كده واسأل اي حد يقولي انا فين , اكلم بني ادم اتنين تلاتة محدش بيرد عليا اوقف ده واشاور لده محدش حاسس بيا ولا سامعني خالص حتى القطط بتتكعبل فيا وهي ماشية , اكتشفت المصيبة بقى لما وقفت قصاد مراية في واجهة محل ولقيت نفسي مش موجود اصلاً

صفا : استنى يعني انته صحيت مالنوم لقيت نفسك مختفي

هيتشول : بالظبط .. فضلت عايش كده احاول افهم ايه اللي حصلي مفيش فايدة ولا حد عارف بوجودي اساساً .. لحد ماقابلتك

صفا بزعيق : وانا مال امي انا ؟!

هيتشول : على اساس اني جيت اتمسحت فيكي انا مالي انا كمان انتي الوحيدة اللي شايفاني

صفا : اشمعنى انا ؟

هيتشول : انا ايشعرفني بقولك مش عارف انا مين ده انا عرفت اسمي من مكالمة تليفون هعرفك انتي

خبطت على رجليها وهي بتندب حظها الاسود

صفا : منا عارفة انا كده طبيعي واحدة زيي تبقى اخرة صبرها عفريت لا وعفريت اهبل كمان لا وعفريت اهبل وعنده زهايمر كمان

هيتشول : ده بس من ذوقك والله

صفا : طب احرقك طيب ولا اعمل ايه دلوقتي

هيتشول : تحرقي مين يا حجة وانا طاجن باميه .. طب مش يمكن نكون عارفين بعض من قبل كده

ظبطت النضارة على عنيها وركزت في وشه وهو كاتم ضحكته على شكلها اللي شبه الفار

صفا : معرفش انا الاشكال دي

هيتشول : طبيعي يابنتي انا لو كنت اعرفك فعلاً يبقى استاهل اللي بيحصلي ده

صفا : طب مش يمكن اتقابلنا بس انته شكلك اتغير بعد مامت .. يعني مثلاً عفريتك مش شبهك

هيتشول : وبتقولي عليا انا اهبل عفريت ايه اللي مش شبهي وبعدين انتي خلاص اجزمتي اني مت واللي قاعد معاكي عفريتي

صفا : شايفلها تفسير غير كده

هيتشول : صح انتي صح انا عفريت بس محترم اوي لدرجة انتي اتركن على باب شقتك ساعة بطبل عشان تعبري اهلي

صفا : مش العفاريت ميقدروش يخشوا البيوت منغير استئذان .. اه لا ده كان فلم مصاصين دماء انته صح

هيتشول استلم وصلة الندب منها

هيتشول : يعني من بين كل البشر وكل البنات ميبقاش الا دي اللي تشوفني ده انا كنت اصاحب كلب بلدي ارحم

بعد تفكير ومناقشات وندب استمر ساعة تقريبا موصلوش فيها لأي حاجة مفيدة

صفا : بص انا ميهمنيش انته ايه انا اللي يهمني انا شايفاك ليه

هيتشول : صدقيني احتمال كعب الكوباية اللي فوشك ده يبقى هو السبب

نتش النضارة من على عينها

هيتشول : شايفاني كده

صفا : طشاش

هيتشول : كويس اوي خليكي كده بقى

صفا : هات النضارة متهزرش

هيتشول : انا بعمل فيكي معروف صدقيني

صفا : هتغابى عليك

هيتشول : خدي انا غلطان

ادالها النضارة لبستها ورجعت فار تاني

هيتشول : معندكيش حاجة تتاكل

صفا : على اساس اني خلفتك ونسيتك

هيتشول : ماتقومي تردحيلي احسن

شتمته في سرها ودخلت المطبخ عملت سندويتشات جبنه وخرجتله

صفا : اطفح

قعدت قصاده مركزة عليه اوي وهو بياكل

هيتشول : هو انا معرفش شكلي بس واضح اني مز مش كده

صفا : اخرس وكل

هيتشول : هاكل ازاي وانتي بصالي في اللقمة

صفا : عايزة اعرف حاجة كل

هيتشول : حاجة ايه وانا اريحك

صفا : لما بتاكل الاكل بيبان وهو نازل في معدتك ولا لا

سخسخ مالضحك لحد ما الساندويتش وقع من ايده

هيتشول : دي كل مشكلتك عايزة تعرفي ملامح جهازي الهضمي .. لا ومش كده وبس يعني بقولك انتي الوحيدة اللي شايفاني ومتوقعة تشوفي الاكل وهو نازل فبطني انته دماغك فيها بطاطسايه مش مخ اكيد

حست بكمية الغباء اللي قالته في جملة واحدة وحمحمت بإحراج

صفا : الموضوع كله ملخبط عايز ايه يعني اذا كنت مش قادرة استوعب فكرة انك لو وقفت جمبي في المراية مش هتظهر

هيتشول : هقنعك عملي فين اوضة النوم

صرخت بفزع : ايه ؟ انته عايز ايه انته يا ...

هيتشول : يخربيت دماغك اكيد المرايه في اوضة النوم

صفا : مافي مرايه في الحمام

هيتشول : على اساس ان الحمام مفيهوش افكار دنيئة

حست انه عمال يحسسها بغباءها مع كل كلمة بتنطقها فقفلت بوقها خالص وقامت وشاورلته يجي معاها .. دخلو الاوضة ووقف قصاد مراية الدولاب وهو جمبها .. ملوش وجود .. مع انه واقف جمبها بالظبط انما ملوش وجود , المنظر رعبها بالفعل وجسمها كله ارتجف

هيتشول : صدقتي

صفا بخوف : مش قادرة استوعب اللي بيحصل

هيتشول : هتستوعبي كده

حاوط كتفها بدراعه بملل

هيتشول : صدقتي اهو لازق فيكي ا...

لسه هيكمل لقاها صرخت بفزع وهي متنحة في المرايه , بص هو كمان شاف اللي وقع قلبه في رجليه .. دراعه باين .. دراعه اللي محاوط رقبتها باين كأن في دراع لعبة ملفوف على رقبتها لوحده المنظر فزعه وهي نطت بعيد عنه بفزع رجع دراعه اختفى بمجرد مابعدت

هيتشول : ايه اللي حصل دلوقتي ؟!